Jierferslach 2006 - Fryske Akademy

1 Direksjeferslach
Nije ûntjouwingen: De Fryske Akademy yn 2006
Misje en wurkgebiet
De doelstelling fan de Fryske Akademy bliuwt ûnfermindere it foarmjen fan it wittenskiplik
sintrum fan Fryslân en om heechweardich wittenskiplik ûndersyk te dwaan op it mêd fan de
Fryske taal, kultuer, skiednis en mienskip yn de romste sin.
Wichtige ûntjouwingen en barrens
Yn de earste helte fan it jier wie prof.dr. Durk Gorter aktyf as waarnimmend direkteur. De Fryske
Akademy hat in soad oan him te tankjen foar de wize wêrop't hy dy funksje, yn in tige drege
perioade, ferfolle hat.
Op 1 juny kaam as nije direkteur-bestjoerder prof.dr. Reinier Salverda fan it Dutch
Department fan University College London yn tsjinst.
Yn septimber 2006 hat de Fryske Akademy in ynterne selsevaluaasje holden. It algemiene
byld is, dat der de ôfrûne jierren goed en mei tawijing trochwurke is, mar dat de Fryske Akademy
amper nije inisjativen ûntwikkelje kinnen hat troch de neisleep fan de krisis fan 2004 en dat der
no foar de takomst ferlet is fan in krêftige kwaliteitsympuls, likegoed op wittenskiplik as op
finansjeel-organisatoarysk mêd.
Yn novimber is in notysje Strategische Keuzen en Beslissingen ta stân kommen, dêr't in
strategysk perspektyf yn bean wurdt op de takomst fan de Fryske Akademy as wittenskiplik
ûndersyksynstitút. Mei KNAW en Provinsje is ôfpraat dat dat yn it foarjier fan 2007 útwurke
wurde sil yn in Masterplan foar de takomst fan de Fryske Akademy, mei trije haadûnderdielen: in
Undersyksplan, in Bedriuwsfieringsplan en in Húsfestingsplan.
Opmerklike publikaasjes, prizen en bliken fan wittenskiplike erkenning
Persoanen
Yn juny waard Piter Boersma beneamd ta lid fan de Maatschappij der Nederlandse Letterkunde
te Leien. Yn septimber waard Anne Dykstra op it kongres fan Euralex (European Association for
Lexicography) yn Turijn keazen ta lid fan de Executive Board. Op 1 oktober waard dr. Goffe
Jensma beneamd ta bysûnder heechlearaar Fryske taal- en letterkunde oan de Universiteit van
Amsterdam.
Boekpresintaasjes
Op de ûnderskate mêden dêr't de Fryske Akademy aktyf op is, fûnen de neikommende
boekpresintaasjes plak:
- op 9 april dr. Goffe Jensma's nije edysje fan it Oera Linda-boek;
- op 19 july dr. Bernie van Ruijven har rapport Leervorderingen in het Friese basisonderwijs;
- op 29 septimber op de Akademy-dei Het raadsel van de ratelaar fan dr. Renée van Bezooijen, oer
de útspraak fan de 'r' yn it Ljouwerter stedsdialekt;
- op 18 oktober it boek fan Ria van Hemmen oer in ieu beropsûnderwiis yn Fryslân;
Jierferslach 2006 side 5