à rsmelding HFK 2008N.pdf - Politiske saker - Hordaland ...

FYLKESORDFØRAREN
Eit aktivt og utviklande år
2008 har vore eit særleg aktivt og utviklande år for Hordaland fylkeskommune. Nemnast kan
både ferdigstilling og iverksetjing av store samferdselsprosjekt, store investeringar i
skulesektoren, stor aktivitet i kultursektoren og omfattande medverknad for regional
utvikling. I tillegg er det internasjonale engasjementet blitt større og viktigare. Folk trivst i
Hordaland og vi kunne ynskja 7 000 nye innbyggjarar velkomne til fylket!
Fylkesordførar
Torill Selsvold
Nyborg
Regionreforma som vert gjeldande frå nyttår 2010, vil tilføra fylkeskommunane ein del nye
oppgåver, spesielt innan samferdsel. Dette inneber mellom anna ansvar for riksvegar og ferjer.
Frå 1. januar 2008 fekk fylkeskommunen på ny ansvaret for kollektivtransporten i Bergen
kommune etter at det fireårige forsøket med kommunalt kollektivtransportansvar vart avslutta.
Fylkeskommunen skal også stå for drifta av Bybanen i Bergen. Bergen kommune er
ansvarleg for å byggja bana fram til Nesttun. Den vidare utbygginga, i første omgang
strekninga Nesttun-Lagunen, skal fylkeskommunen stå for. Dette vert ei stor og spennande
satsing i fylkeskommunal regi. I 2008 investerte vi 72 mill. kr i vogner til Bybanen.
To store vegprosjekt fekk si avklåring i 2008. Etter ny kvalitetssikring vart det endeleg
klarsignal for Hardangerbrua. Jondalstunnelen fekk klarsignal frå regjeringa og fylkestinget
vedtok opplegg for anbodsinnhenting. Begge er gode prosjekt for Hardanger.
Kollektivtrafikken, særleg bussdrifta, krov stor innsats og ressursar i 2008 i samband med
konkurranseutsetjinga av bussruter. Fire anbodspakker er sette i verk. Omleggingar vil alltid
ta litt tid før dei går seg skikkeleg til. Det har vore utfordringar med anbodsrutene i delar av
fylket, men gjennom dialog med brukarar og operatørar ser det ut for at flokane løyser seg.
I forsøksperioden sette Bergen kommune i gang mange tiltak, særleg det
siste året kommunen hadde ansvaret. Det var ei stor utfordring for
fylkeskommunen å vidareføra dei gode tiltaka kommunen hadde innført,
for kostnadene var mykje høgare enn inntektene som følgde med då
ansvaret atter vart fylkeskommunalt. Eg er glad for å kunna seia at
fylkeskommunen klarde denne utfordringa med glans. Vi kom ut med
rekneskapen i balanse – og utan å måtta ty til nedskjeringar i andre
sektorar.
Den store nybygginga vår av vidaregåande skular går for fullt. I
2008 brukte vi 290 mill. kr, om lag 120 mill. kr meir enn året før.
Utbygginga av Nordahl Grieg og Knarvik vidaregåande skular går
mot fullføring i 2009. Hausten 2008 var det byggjestart for store
tilbygg ved Kvinnherad og Austevoll vidaregåande skular. Fleire
prosjekt står for tur. Vi kan gle oss til ei kraftig fornying og
kvalitetsheving av skulebygningane våre dei komande åra.
Eg vil takka så hjarteleg alle våre tilsette for ein suveren
innsats i 2008. Takka vera dykkar kompetanse, engasjement,
pågangsmot og samarbeidsevne greidde vi å tilby gode
tenester i verdas beste fylke!
Årsmelding 2008 3