ud#20 (25830)

№20 (25830)
18 2020-тӥ ар 28-тӥ куартолэзь
Экзаменъёс
Марлы дасяськоно?
Школаез йылпумъясьёс туж сюлмасько экзаменъёссы понна:
ку но кызьы соос ортчозы?
Эгра черкогуртысь 1-тӥ школаысь
11-тӥ классын дышетскись Маша Данилова:
________
— Зэмзэ вераса, ЕГЭ-ез ӝоггес сётэме потэ ини. Гожтод но,
ужед быроз. Нош али дасяськыса но ваньмыз йырысь кошке.
Эшшо школалэсь мӧзми на, эшъёсы уг тырмо, нош та милям
берпуметӥ дышетскон армы вал. Оло, кинэн ке воксё
адӟиськыны уз кылды ни. Огез гинэ умой: экзаменлы дасяськыны
дыры тросгес. Быръем экзаменъёсы капчиесь ик ӧвӧл
— история но обществознание. Кыкезъя ик трос материал
лыдӟыса потоно. Эшшо бадӟым шумпотон — базовой математикаез
сётытэк яра. Со капчи ке но, сюлмаськытэ вал.
Алнаш ёросысь Сьӧд Ошмес школаысь
11-тӥ классын дышетскись Юлия Архипова:
________
— Кышкыт экзамен сётыны. Интернет пыр дышетскыны
мыным туж секыт потэ. Куддыр школаын но дышетӥсь ёслэсь
верамзэс ум валаське но, нош татын одӥг пол гинэ материалэз
валэкто, нош тон котьмар кар собере. ЕГЭ сяна, гуртысь
уж лэсьтон вань на. Ярам, дырдэ валаса радъяськод ке, нош
аналскиськод ке — тросэз лэсьтытэк кыле.
Дэри ёросысь Подшивал школаысь
11-тӥ классын дышетскись Ульяна Смирнова:
________
— Мынам дышетскыны вань мотивацие ышиз.
Дышетӥсьёс номыр уг верало, кызьы но ку ваньмыз
ортчоз, дасяськонмы палэнэ кыле. Гуртын пукиськод но
шутэтскиськод кадь, нош ЕГЭ матэктэ но матэктэ. Экзаменъёс
сётыны уг кышкаськы, ӝоггес гожтысал но вунэтысал
соос сярысь. Кышкасько огезлэсь гинэ, ЕГЭ-ез онлайн
амалэн карозы шуыса. Мон копак уг валаськы Интернетэз,
нош сигнал ышиз ке, баллъёстэк кылид ке...
Алнаш ёросысь Вуж Утчан школаысь
9-тӥ классын дышетскись Кристина Чернова:
________
— Дистанционкае потыкумы, мон шумпотӥ вал, кӧня ке
шутэтско шуыса, нош сэре кышкыт луиз: кызьы бен дышетском?
Кызьы ОГЭ сётом? Ярам, экзаменъёсты быдтӥзы.
Зэмзэ вераса, мон шумпотӥ, мултэс малпаськыса со сярысь
уг улы ни шуыса. Гуртын пукыса, яратоно ужелы тросгес
дыры луиз: лыдӟиськисько, кылбурасько.
________
Алёна МОХОВА
Лулчеберет
Театрын «Москвичен» ширъяло
1995-тӥ ар. 4 эшъёс, 17-
18 аресъем пиос, яркытвож
«Москвич-412»
машинаен сюрес кузя
ширто. Азьланяз пиос
пӧртэм шуг-секытъёс
пыр потозы, эшъяськонзы
юнмалоз, нош вож
машина котькудзылы
туж дуно луоз. Маин
дуно — та сярысь вера
Удмуртиын потӥсь «Слушай
сюда» сериал (18+).
«Слушай сюда» сериалэз театрын пукто.
Сериалъёс туала культураын
бадӟым инты басьто —
соос, пе, бадӟым классической
романъёсты воштӥзы
ини. Али сериалъёсты дано
режиссёръёс пукто, сериалъёсысь
тодмо артистъёсты
адӟыны луэ. Учкись но туж
бырйиськись луэмын: сомында
ӟеч проектъёс пӧлысь
кудзэ быръёд? Шоураннеръёс,
сценаристъёс, режиссёръёс
учкисез пӧртэм сямен гочатыны
тыршо. Нош маин висъяське
«Слушай сюда» сериал?
Нырысь ик со — театрын
вордскем но театрын радъяськись
проект. Учкисьлы
азьвыл пуктэм-пӧрам сериалэз
уг возьмато. Туала драматургияя
но режиссурая центрын
(ЦСДР) сериаллэсь выль
серизэ котькуд арнянуналэ
меӵак эфирын лыдӟо артистъёс.
Нош мар луоз геройёсын
азьланяз — тае уг тодо сериаллэн
авторъёсыз гинэ но.
Угось сценарийзэ вошъяськыса
гожто ШУД-э (Удмуртиысь
драматургияя школае)
ветлӥсь драматургъёс. Котькуд
серизэ одӥг драматург
арня куспын гожтэ. Режиссёр
но актёръёс нунал ӵоже дасясько,
асьсэос ик декорациос
лэсьто.
Сериалэз театрын возьматыны
малпаз ЦСДР-ысь
режиссёр Павел Зорин. Театръёслэн
ворсаськеменызы
сэрен ШУД-лэн ужез куспетӥ
луиз. Доразы пукись драматургъёс
медаз мӧзме, гожъяськыны
кизы но кылзы мед
волялоз шуыса, Павел Зорин
соослы сериал дэмен гожтыны
ӵектӥз.
Нырысетӥ серизэ гожтӥз
Сарапулын вордскем драматург
Валерий Шергин, ШУДысь
дышетӥсь. Со историлы
кутскон сётӥз, геройёсты малпаз.
Адямиос коронавирус сярысь
иворъёслэсь акыльтӥзы
Туспуктӥз Александр ШКЛЯЕВ
ини шуыса, со 1990-тӥ аръёсты
суреданы малпаз, «Бригада»
сериаллэсь, «Бумер» кинолэсь
адӟем карыса.
— Нырысь ик та сериал
лэсьтӥське драматургъёс
понна — гожъяськыны мылкыдзы
мед луоз. Со дыре ик,
актёръёс шоры учкыса, валаськод,
соослы туж кельше
шуыса. Малпасько, сериал театрысь
улонэз бугыртэ. Драматургъёс
но актёръёс вакчи
дыр ӵоже ужзэс быдэстыны
кулэ. Таин валче ик тунсыко
малпанъёс кылдо, — вера Валерий
Шергин.
Удмуртиысь кун театръёс
сезонзэс дырызлэсь азьло
йылпумъяно луизы. Но
ЦСДР-ын уг шутэтско: сериал
пуктэм сяна, спектакльёссэс
меӵак эфирын возьматъяло,
туала драматургъёслэсь пьесаоссэс
шара лыдӟо, Санкт-
Петербургысь драматурглэн
Ольга Потаповалэн «Спички
детям» пьесаезъя радиоспектакль
гожтӥзы. Павел Зорин
верамъя, секыт вакытэн валче
выль малпанъёс вордско.
Сыӵе мыло-кыдо ужамзы
секыт югдурен но
герӟаськемын. ЦСДР, Россиысь
тросэз независимой театръёс
кадь ик, ӟудэмын. Спектакльёс
возьматъямзы уг луы,
нош коньдон соос потто, билет
вузаса. Соин малпаськоно
луэ: кызьы улэп кылёно?
Оскисько, выль сезонын
но ЦСДР ӧсъёссэ усьтоз. Пичи
театръёстэк улон мӧзмыт
луоз — ӵапак таӵе интыосын
пушъе туж тунсыко,
аспӧртэм, городмес но элькунмес
узырмытӥсь культура.
«Слушай сюда» сериалэз
учкыны луэ ЦСДР-лэн «ВКонтакте»
вотэс бамаз: vk.com/
csdr_izh.
________
Анастасия ШУМИЛОВА