ud#20 (25830)

№20 (25830)
20 2020-тӥ ар 28-тӥ куартолэзь
Туала искусство
Рейве удмурт дӥсен мыноно
22-тӥ куартолэзе удмурт
художник Чудья Жени
выль суредъёсыныз
тодматӥз, вотэсын онлайн
экскурсия радъяса.
Самоизоляциын пукон
дыръяз суредасьлэн выль сузьетэз
вордӥськиз. «Удмурт
рейв» суредъёсаз егит художник
туала электрон крезьгур
улсын эктӥсь нылъёсты суреда.
Ваньзы соос удмурт калык
дэремъёсын, саестэмъёсын
пӧрмытскемын.
Художник верамъя, киоссэс
вылэ ӝутӥсь нылъёсын суредъёссэ
со азьло «Удмуртка
ловит связь» сузьетэ пыртылэ
вал. Нош алигес, вуж суредъёсыз
шоры учкыса, валам: со
нылъёс озьы экто, дыр.
Чудья Жени суредъёсызлы
аспӧртэм дуннеос малпа. Таяз
учыре со возьматӥз, кызьы
рейвъёс (электрон крезьгур
улсын шулдыръяськонъёс)
удмурт гуртын ортчысалзы.
Озьы Чудья Жени вашкала
удмурт культураез туала улонэ
пыртэ. Суредаськем сяна,
Чудья Жени крезьгура но:
post-dukes проектаз электрон
крезьгур сураськемын кубыз
куараен. Соин но, дыр,
суредъёсыз шоры учкыку,
аспӧртэм крезьгурез кылыны
кутскиськод.
Онлайн экскурсиез радъяны
юрттӥзы «Ошак, толэзь
но палэсмурт» огазеяськонысь
эшъёсыз — соос суредъёс
сярысь мадизы, Чудья
Женилэн творчествоез
сярысь вераськизы. Та выллем
экскурсия «ошакъёс...»
радъяллязы ини. 2018-
тӥ арын соос квартираын
адӟытон ортчытӥзы, Чудья
Женилэн ужъёсыныз «Полосатый
период» каталоген
калыкез тодматӥзы.
Чудья Жени вотэсын аукционъёс
но радъялля. Толэзьлы
быдэ «Инстаграм»
бамаз выль суредзэ поттэ,
сое дунтэм дунын басьтыны
ӵектэ. Искусство басьяны
мылкыд карисьёслэн лыдзы
пумен будэ, нош удмурт художниклэсь
адӟем каро шаерысьтымы
мукет суредасьёс
но.
________
Анастасия ШУМИЛОВА
Суредаз ЧУДЬЯ ЖЕНИ
«Дартэ» юанъёсын, дэмланъёсын вазиськоно
73-33-42 телефон номеръя.
Материалъёстэс, туспуктэмъёстэс, суредъёстэс ыстэлэ
электрон почтае dart.gazet@yandex.ru.