ud#20 (25830)

№20 (25830)
6 2020-тӥ ар 28-тӥ куартолэзь НУНАЛ БӦРСЬЫ НУНАЛ
Ивор куды
АЛНАШ
________
Школаос выльдӥсько
Туэ ар куспын тросэз школаос
выльдӥськозы пӧртэм программаосъя
но проектъёсъя.
Кылсярысь, «Бадӟым ремонт»
программае пыртэмын Кузёбай школа.
Лэсьтӥськон ужъёсты отын 1-тӥ майысен мытӥзы
ни. Табере школалэн липет улаз интыяськоз нылпи
сад но. Азьвыл со нимаз вал. Ужъёсты быдэстыны
чакламын 30-тӥ июнёзь, огъя дуныз — 1,9
миллион манет.
Озьы ик чакламын Вуж Шудья школаысь укноосты
воштыны, Улын Асангурт школаысь спортзалэз
тупатъяны, нош Байтэрек но Алнаш школаосы
«Точка роста» центръёс усьтон вылысь выль
оборудование вайыны.
БАЛЕЗИНО
________
Липет йылысь усизы
2 воргоронъёс липет йылысь усизы.
Балезино каргуртысь вуж льнозавод
котырын лэсьтӥськон
мытэмын вал. 34 аресъем но 65
аресъем воргоронъёс, вуж юртлэсь липетсэ выльдыкузы,
8 метрысь усизы. Соос секыт сӧсырмизы
но та вакытэ больницаын йӧнатӥсько.
Следствиея комитет та учыръя эскерон уж ӝутӥз.
Адӟисьёслэн верамзы гожтэмын ни, вӧсь луыны
шедемъёслы судебно-медицинской экспертиза
ортчытэмын.
Пусйыны кулэ, уж доразы сӧсырмыны шедисьёслэн
лыдзы тросгес луэмын. Берлоез учыр
пусъемын вал Якшур-Бӧдья ёросысь Чур каргуртысь
кирпич заводын — 1 ужась кран улэ
шедиз.
ВАВОЖ
________
400 аръем сусыпу
Вавож черкогуртлэсь кӧнялы ке
гинэ палэнысь шедьтэмын ог 400
аръем сусыпу.
Нырысь ик сое синйылтӥз шаерчи,
биолог Александр Кондратьев.
Сусыпулэн ӝуждалаез ог 7,7 метр, пасьталаез
1,5 метр пала. Шаерамы пумиськылӥсь
сусыпуос куак порма будо ке, таиз — писпу кадь.
Соин ик сое Удмуртиын гинэ ӧвӧл, быдэс Россиын
шер пумиськылӥсь будосэн лыдъяны луэ, шуо
тодосчиос. Ог 400 аръем сусыпулы нимысьтыз
номер сётыны но Россиысь инкуазьлэн синпелетъёсыз
пӧлы пыртыны чакламын.
ВОТКА
________
Штраф тырозы
анай-атаез
Воткаын кыл кутон улэ кыскемын
школаын дышетскись нылаш.
15 аресъем нылмурт, экстренной
службалэн 112 номеро телефоназ
жингыртыса, одӥгаз школае мина понэмын
шуиз. Отчы ӝегатскытэк потӥзы спасательёс но
полицейскойёс.
Эскерон возьматӥз: нылаш умой вала вылэм,
кытчы вуттыны быгатоз укылтэмъяськонэз. Со
вылэ Уголовной кодексысь 207-тӥ статьяя (терроризм
сярысь пӧяса ивортон) уголовной уж
ӝутэмын вал. Та нуналъёсы суд решенизэ шараяз:
йыртэмась 5 сюрс манет штраф тыроно луоз.
Но солэн аслаз доходъёсыз ӧвӧл на бере, сое тыроно
луозы анай-атаез.
ДЭРИ ________
Картошка мерттонзэс
йылпумъяло ни
Ёросысь гурт удысын тыршисьёс
туэ 694 гектар картошка мерттыны чаклало.
Ужъёссы тани-тани йылаз-пумаз вуозы ни.
Мерттӥсько, вань куронъёсты лыдэ басьтыса:
котькуд гектаре 3-3,5 тонна картошка кидыс
кошке, удобренизы тырмыт, нялтас ватсало
нымы-кибыосты быдтӥсь суретъёсты но.
Уката бадӟымесь картошка бусыосыз «РусЕвроплант»
огазеяськонлэн — 350 гектар. Со пӧлысь ог
75 процентэз мерттэмын ни.
ИЖ ________
Куштӥськем тэлез
утялтӥзы
Буммаш тэльын кылдыны быгатоз
шутэтскон инты.
Кызьы вераз Иж город администрацилэн
йырызлэн воштӥсез Дмитрий
Чистяков, отчы лёгозы скандинав амалэн поръясьёслы
сюресъёс. Со сяна, гужемзэ татӥ
великен ворттылыны, нош толалтэзэ куасэн
нискыланы луоз. Инты сюроз воркаутэн вырисьёслы
но.
Татчыозь тэль куштӥськемын, жуг-жаген тырмемын
вал. Но сое выльдон понна нырысетӥ вамыш
лэсьтэмын ни. Отын бадӟым утялтӥськон ортчиз.
8-тӥ ЖРП-ын ужасьёс, Буммашын улӥсьёс
дӥсязы перчаткиос, маскаос, куспазы 1,5 метр
вис кельтыса, тэлетӥ ортчизы. Ог 20 тонна жаг
бичазы.
КИЗНЕР
________
Нылпиосты утён
1-тӥ июне — Нылпиосты утён
нунал. Соин валче ёросысь анайатайёслы
тодазы вайытӥзы, пиналъёс
сярысь вунэтоно ӧвӧл
шуыса.
Та нуналъёсы люкаськылӥз ёросысь быдэ вуымтэосын
ужанъя комиссия. Отын эскеремын
15 административной ужъёс, нылпиослэсь правооссэс
тӥясьёслы 19 сюрс 300 манет тыриськонъёс
тупатэмын.
Со сяна, та вакытэ ёросын радъяське пичи дырез
утёнлы сӥзем акция. Со чотын нылпиослы
сӥзем пӧртэм ужрадъёс ортчо. Нимысьтыз саклык
висъяське секыт югдуре шедем пиналъёслы
— соослэсь улэм-вылэмзэс эскерыны вуыло специалистъёс.
САРАПУЛ
________
14 сюрс респиратор
потто
«Алькор» предприятие толэзь
куспын радъяз респиратор поттонэз.
«Удмуртиысь аптекаос» огазеяськонэн огкыл
со гожтӥз апрель толэзе. Нош али уй-нунал
ӵоже 14 сюрс респираторъёс поттэ ни. Талы луыса
предприятие утьыны быгатӥз 42 ужан интыоссэ,
ватсаса эшшо 17-зэ усьтӥз на.
Азьланезлы «Алькорлэн» уката бадӟымесь малпанъёсыз.
Угось со шедиз Россиысь 10 предприятиос
пӧлы, кудъёсыз коронавирусэн нюръяськон
вакытэ уката кулэ луись вузъёс потто. Озьы
В. Путинэн дэмлам «Ужазинлыкез будэтон но
ужан интыос кылдытон» нацпроект чотын производствозэ
ог 2 поллы будэтоз — суткаяз 21
сюрс респираторъёс поттоз.
УВА ________
Маска люкылӥзы
Ува каргуртын ортчиз «Нуллы
маскаез шонер!» акция.
Искусствоосъя школаысь мылокыдоос
ортчизы каргуртысь трос
калык люкаськылон интыостӥ —
вуз карон центръёстӥ, базаретӥ, банкъёстӥ. Дунтэк
люкылӥзы маскаос но Роспотребнадзорлэсь
коронавирус сярысь памяткаоссэ.
Туж пайдаё пӧрмиз маскаез шонер дӥсянъя мастер-классы
но. Угось тросэз сое кызьы нуллыны
уг валало вылэм: ымзэс пытсало, нош нырзэс —
уг.
Волонтёръёслэн син шоразы йӧтӥз на: тросэз
маскаоссэс нулло кисыязы, сумкаязы, машинаязы,
нош дӥсяны уг дӥсяло. Таӵеослы тодазы
вайытӥзы, коронавируслэсь утиськоно шуыса.
ШАРКАН
________
Выльдӥськизы
Зар-Вишурысь культурая юртын
— бадӟым шумпотон: «Огъя
Россия» партилэн «Пичи Дорлэн
культураез» проектэз чотын
выль ӝӧкъёс, ӝажыос, микрофонэн
2 радиосистемаос басьтэмын.
Оглом дунзы — 100 сюрс манет.
«Инвожо» ансамбльзы «Элькуновидение-2019»
вожвылъяськонын тужгес трос учкисьёслэсь
куараоссэс люказ но, культурая юртлэн
выльдӥськыны луонлыкез кылдӥз. Ужан интызы
уката шулдыр мед луоз шуыса, татысь специалистъёс
кабинетазы пичияк ремонт лэсьтӥзы на.
Табере соос выль проектъёс борды басьтӥськыны,
выль кырӟанъёс гожтыны дасесь.
ЭГРА ________
Депутатлэсь кузьым
Зура черкогуртысь школа-интернатэ
выль котыр вайизы.
Коронавирусэн сэрен татысь
пиналъёс но дистанционно дышетсконо
луо. Озьы ке но школаын
уж пӧзе. Школа-интернатлэн
кивалтӥсез Лидия Байметова верамъя,
визьнодасьёс вуоно дышетскон арлы дасясько
ни, школаын тупатъян-выльдон ужъёс ортчыто.
Кун Кенешысь депутат Дмитрий Лукин кабинетъёсысь
мебелез выльдыны ӵектӥз. Верам
кылзэ та нуналъёсы быдэстӥз: депутат юрттэмъя
школа-интернатэ ваемын шкафъёс но
телевизор.
ЯР ________
Спортэз азинтэмез
понна
Ёрослэн йырыз Александр
Старцев тау кариз Юлия Рудиналы спортын
вормонъёс басьтэмез но ёросын спортэз азинтэмез
понна но пусйиз пичияк коньдон кузьымен.
Премия висъяськиз Россиысь Олимпийской
комитетлэн кичӧлтонэзлы луыса:
спортысь вань ветеранъёслы со сётӥське коронавирус
вӧлмемен сэрен.
Юлия Рудина — шаерысьтымы физкультура
но спорт удысысь одӥгез яркытэз ветеран луэ:
СССР-ысь куасэн бызьылонъя спортъя мастер,
РСФСР-ысь калыкъёслэн спартакиадазылэн
чемпионкаез, Удмуртиысь ветеранъёс пӧлын
капчи атлетикая трос пол чемпионка. Вордскемын
Яр ёросын, районлэн Дано адямиез
луэ.