ud#43 (25853)

№43 (25853)
6 2020-тӥ ар 5-тӥ шуркынмон НУНАЛ БӦРСЬЫ НУНАЛ
Ивор куды
БАЛЕЗИНО
________
Пыдын ветлон сюрес
Дядьпи черкогуртысь Школьной
ульчаын нимаз пыдын ветлон
инты кылдӥз. 1 иськем сюрес
дуръёс асфальтэн шобыртэмын.
Школьной ульча кузя трос транспорт
ортче, пыдын ветлӥсез но уг бырылы. Угось
татын школа, нылпи сад, клуб, гурт администрация,
черк интыяськемын. Соин калык куремъя
нимаз пыдын ветлон инты кулэ шуыса ужпум
ӝутэмын вал.
Сюрес лэсьтӥзы гуртэз котыр ласянь азинтон
программа улсын. Талы 1 миллион 400 сюрс манет
пала висъяськиз, 222 сюрс манет бичазы гуртоос
но ужбергатӥсьёс.
ГЛАЗОВ
________
5 гуртэз буре вайизы
30-тӥ октябре Самки гуртын
кылдӥз ожын бырем солдатъёсты
буре ваён инты.
Гуртэ пуктӥзы 5 плита. Куреггурт
муниципал кылдытэтэн
кивалтӥсь Валентина Никитина верамъя, Самки
гурт котырын вазенгес 5 гурт вылэм, табере соос
быремын, нош Самкиын 58 улӥсез кылемын. Гуртъёсты
но ожмаськонэ пыриськем солдатъёсты
буре вайыса, синпелет усьтӥзы, со плитаос вылэ
120 муртлэсь фамилиоссэс гожтӥзы. Соосты люканы
юрттӥськиз Самки гуртын улӥсь Елена Гавшина.
Ужзэс быдэстыны луонлык кылдӥз, «Лукойл»
огазеяськонлэн социальной проектъёсъя вожвылъяськоназ
пыриськыса. Озьы 200 сюрс манет
тыр грант утӥзы, эшшо 30 сюрс манет асьсэос люказы.
Лэсьтӥськон ужъёсты быдэстыны юрттӥзы
«Коротай» гурт хозяйство но Куреггурт школа.
ГРАК
________
Ашальчи Оки уз вуны
Выльдыны кутскемын Порымысь
Ашальчи Окилы сӥзем
сквер.
Ёрослэн йырыз Виктор Белов
ивортэмъя, нырысетӥ удмурт
нылкышно кылбурчилэн вордскем
юртъерезлэн бервылаз сквер кылдытэмын
вал 1998-тӥ арын. Соку отчы ӟусъёс пуктылӥзы,
пичи шур вамен выж лэсьтӥзы. Но та дыр куспын
ваньмыз со вужмыны вуттӥз ни.
Скверез тупатъяны уксё висъямын элькун казнаысь.
Озьы выльысь волялозы сюресъёс,
выльдӥськозы ӟусъёс но выж. Со сяна, чакламын
тыл кыскыны.
Тодмо кылбурчи луэм сяна, Акулина Векшина
эмъясь сямен уно калыкез утиз син висёнъёслэсь,
нош войнаез хирург луыса потӥз.
ДЭРИ
________
Кӧльыез воштӥз
асфальт
Постол черкогуртын сюрес табере
асфальтэн шобыртэмын.
Азьвыл гуртоос кӧльыен вӧлдэм гопо-гопо
сюресэтӥ ветлӥзы. Лэсьтӥськон кылем арын
мытэмын вал, туэ азьланьтэмын. Озьы 3,8 иськем
кыстӥськись сюрес ӵошкытаз. Со сяна,
лэсьтэмын пыдын ветлон сюресъёс, рейсовой
автобуслы дугдылон но котыртӥськон инты.
Ёрос центре та сюрес гинэ нуэ, со Постолэз Ува
— Ижевск сюресэн герӟа.
Ужъёс Удмуртиысь сюресъёсты азинтонъя программа
улсын быдэстэмын.
ИЖ
________
Кызьпу арамаын
чылкыт луиз!
Кызьпу арамаын утялтӥськизы
50 пала мыло-кыдо адямиос.
Таӵе кичӧлтонэн потӥзы «Парки
Ижевска» огазеяськон но Индустриальной
ёрослэн администрациез.
Вань лыктэмъёслы люкылӥзы маскаос,
перчаткаос, жаг бичаны мешокъёс. Нош
утялтӥськемзы бере ваньзэс возьмаз пӧсь чай.
Ӟеч уж лэсьтэм ӟеч мылкыд кузьмаз. Табере городын
улӥсьёслэн одӥгез яратоно шутэтскон
интызы толлы чылкыт кылёз. Матысь аръёсы
та парк тодмантэм воштӥськыны кулэ. Специалистъёс
али сое выльдонъя проект бордын
ужало, 100 пала дэмланъёссы вуизы ни Ижын
улӥсьёслэсь но.
КЕЗ
________
Сикез утёз
пу кырныж
«Живица» этнокомплексын арлы
быдэ маке вылез кылдэ.
Таяз учыре «Сьӧд кырныж»
аспӧртэмлыко арт-объект
пуктӥзы. Комплекслэн кивалтӥсез Екатерина
Лекомцева кемалась малпа ни вал бадӟым тылобурдо
лэсьтыны: я муг ӧз тупалля, я ярамон
писпу выжы ӧз шедьылы. Таяз учыре Лекомцевъёс
но соослэн юрттӥсьёссы нырысь ик сикез
утялтӥзы, жуг-жагзэ бичазы, писпу выжыосты
порылӥзы но усем вайёсты коразы, озьы пу кырныж
доры пыдын ветлон сюрес кылдӥз. Матысь
дыре кырныжлы кар лэсьтозы на.
КИЯСА
________
Машинаен ӵыпетэ
выйизы
Косолаповоысь ӵыпетэ машина
выйиз: ӝомал дыръя кожонэз
адӟиллямтэ.
Шаерысьтымы Утчанъя-утёнъя
службалэн пресс-службаез ивортэмъя,
машинаын 3 мурт пуке вылэм, одӥгез
пассажир усьтэм укноетӥ потыны вуттэм, нош
кыкез быгатӥллямтэ. Гурт ӵыпетлэсь пыдэссэ водолазъёс
эскеризы, 45 аресъем воргоронлэсь но
35 аресъем нылкышнолэсь мугоръёссэс поттӥзы.
Бӧрысь ӵыпетысь выем машинаез ӝутӥзы. Та
учыръя эскерон нуиське.
МОЖГА
________
100 пӧртэм дэрем
но пыдкук
Ёрос администрациысь культурая
отделлэн адӟытонъя залаз
«100 пӧртэм дэрем — дӥсь бордысен
калык дорозь» выставка
усьтӥськиз. 6+
Со сӥземын Удмуртилэн кунлык басьтэмез дырысен
100 ар тырмонлы. Возьматэмын вашкала
куэм дэремъёс но, туала вакытэ вуремъёсыз
но. Такъяос, кышетъёс, пыдкук, уксё тӥрлык,
нылкышноослэн кильтыръяськон арбериоссы —
пель угыос, суйпоскесъёс — пужыятэм айшетъёс,
вож нуныослэн дӥсьсы, мунёос, куиськон
тӥрлык — ваньмыз со люкамын ёросысь гуртъёсын
улӥсь удмуртъёслэсь.
Адӟытон усьтӥськиз 1-тӥ ноябре. Ужрадэ пыриськиз
ёрослэн йырыз Александр Васильев.
Выставкае поттэм дӥськутэн тодматскыны луоз
15-тӥ ноябрёзь.
ПИЧИ ПУРГА
________
Газ луоз!
Ёросысь кӧня ке гуртъёсын
улӥсьёс чагыр эстӥськонлы шумпотозы
— лэсьтӥськон удысэз
азинтонлы сӥзем элькун программа
чотын гумыосты кысконвыльдон
кутскиз.
Гумыослэн огъя кузьдалазы ог 11 иськем
луоз. Газ вуоз Вылӥ Иж-Бобьяла. Нош Кечейыл,
Яган-Докъя, Бигерпочинка (Альдульменево)
гуртъёс дорозь со вазен вуттэммын ке но,
ульчаосы пыртымтэ на вал. Постолпочинкаын
вужъёссэ гумыосты выльдыны дыр вуэмын,
Пугачёвоысь газ сётон пунктын тупатъян ужъёс
чакламын.
Ваньзэ туэ ар пумозь йылпумъяны чакламын.
САРАПУЛ
________
Библиотека
выльдӥське
Н. Крупская нимо библиотекае
4 сюрс пала ӵыжак-выль книгаос
вуизы, али соосты электронной
каталоге пырто.
Книгаос вуыны кулэ на — оглом ог 6 сюрс
500 экземпляр, огъя дунзы 3 миллион манет.
Таин ӵош библиотекаын мукет но бадӟымесь
воштӥськонъёс ортчо — со быдэсак туала шӧмъем
луоз. Коньдон висъяське Россилэн Президентэныз
В. Путинэн кичӧлтэм «Культура» нацпроект
чотын, оглом 12 миллион манет пала.
Библиотека туэ 185 ар тырмонзэ пусйиз. Солэн
фондъёсаз 118 сюрслэсь ятыр документъёс возисько,
60-лэсь ятыр газет-журналъёс вуо.
СЮМСИ
________
Огкылысь
26-тӥ октябрьысен 1-тӥ ноябрёзь
ёросын ортчиз пӧртэм выжы калыкъёслы
сӥзем арня.
Ужрад нимаськиз «Удмуртия
— огъя дормы». Та вакытэ
ёросын 38 выжы калыкъёс
уло, тужгес трос ӟучъёс, удмуртъёс, бигеръёс,
поръёс, тужгес ичи украинецъёс, белорусъёс,
немецъёс, чувашъёс. Ёросысь культура
удысын ужасьёс нуналлы быдэ тодматӥзы
кыӵе ке калыкен, соослэн улэм-вылэменызы,
кырӟанъёсынызы, йылол-сямъёсынызы,
пӧртэм мастер-классъёс ортчытъязы. Вань
адӟытон радъямын вал «ВКонтактеын» «Сюмсиысь
культурая юрт» группа пыр.
ШАРКАН
________
Стадион, клуб, сад
Ёросын бадӟым выльдӥськон
ортче.
Йылаз-пумаз вуттэмын ни черкогуртысь
стадион. Шарканъёс
сое 4-тӥ ноябре, Калык огазеяськон
нуналэ, усьтӥзы. Татын
футболэн шудон бусыез выльдэмын, 1 сюрс учкисьлы
пуконъёс пуктэмын, пыдын бызьылыны
5 туала сюрес лэсьтэмын.
Озьы ик культурая юртэз тупатъян мытэмын.
Липетэз, ву кошкон гумыосыз выльдэмын, выль
котельной пуктэмын. Ар пумозь чакламын на
тыл езъёсты, вентиляциез воштыны, клублэсь
котырзэ чебертыны.
Со сяна, Мишкино гуртын 80 интылы ясли-сад
ӝутэмын. Ар пумозь отчы 60 нылпиос вамыштозы
ни, али лицензия басьтон ортче.