ud#70 (25685)

2018-тӥ ар 18-тӥ куарусён (сентябрь). Пуксён (вторник) № 70 (25685)
Вань удмуртъёслэн газетсы
Кылдытэмын 1915-тӥ арын 4-тӥ феврале
Ужрад
2
«Читай, Ижевск!» фестиваль
культураысь уно ужпумъёсты ӝутэ
Шаертодон
Проза
Мае тодыны луэ
3 6, 7
автобиографической
произведениысь
Анатолий Перевозчиковлэн
«Сьӧлыктэм сьӧлык»
кузьмадёсысьтыз люкет
ИНКУАЗЬ НО АДЯМИ
инГОЖЛИТЕРАТУРАЛЫ СӤЗЕМ НОМЕР
Туспуктӥз Юлия ГАБИДА
Сӥялскем шундылэн саюлаз
Людмила КУТЯНОВА
Сӥзьыл тӧл
Та киргам куаръёсын
Коӵышпи кадь шудэ:
Ӵаштырак карыса,
Вырӟытэ соосыз, лобӟытэ,
Собере жадьыса со кӧлэ
Сӥялскем шундылэн саюлаз,
Ум йылтӥз но ӵаштрак карыса
Кызьпулэн вай пӧлаз.
Нош тани,
Кытысь ке потыса,
Пилемъёс кысӥзы инбамез.
Шар-р-р! гинэ васькыса,
Инвуос коттӥзы чусомем музъемез.
Жильк! киськиз
Укно ул кызьпуысь ӵуж зарни…
Гужемез эриктэм думыса но
Уд возь ни бордад, уд ни.

№ 70 (25685)
2 2018-тӥ ар 18-тӥ куарусён
инГОЖ
ФЕСТИВАЛЬ
Лыдӟиськы, гожъяськы,
кенешы, Ижкар!
Удмурт кылын верам куара уг ышы
Анастасия ШУМИЛОВА
7-тӥ-9-тӥ куарусёнэ
Ижкарын ортчиз литературалы
сӥзем 6-тӥез
«Читай, Ижевск!» фестиваль.
Асьме доры
вуылӥзы Россиысь
тодмо гожъяськисьёс,
кылсярысь, Москваысь
Майя Кучерская
но Дмитрий Воденников.
Кызьы шедьтоно
аслэсьтыд сюрестэ?
Майя Кучерская - Бунин
нимо премилэн но студентъёс
понна Букерлэн премиезлэн
лауреатсы, тросэзлы
тодмо солэн «Современный
патерик: Чтение для впавших
в уныние», «Бог дождя»,
«Тётя Мотя» романъёсыз но
веросъёсыз.
Творческой пумиськонын
со мадиз аслаз трос полэс
улонэз сярысь. Улоназ со 4 ӧр
висъя: гожъяськись, филолог,
дышетӥсь но анай. Озьы
улыны мӧзмыт ӧвӧл, пе, но
умой луысал, нуналэ эшшо
2 час ватсаськысалыз на ке.
Егит гожъяськисьёс юазы писательлэсь:
кутскись авторъёслэн
кыӵе луонлыкъёссы
вань печатласькыны. Майя
Кучерская ӵектӥз пыриськыны
литературая пӧртэм конкурсъёсы,
форумъёсы.
Ужъёсаз христиан оскон
бадӟым инты басьтэмен, писателез
черклэн но адямилэн
кусыпсы сярысь вераськыны
куризы. Писатель малпамъя,
котькытын умоез но, уродэз
но вань - озьы ик черкын но,
но оскон - со нырысь ик адями
- черк ӧвӧл. Кулэ, пусйиз
Майя Кучерская, ачид шоры
учкыны, астэ чакласа улыны:
мар мынам умойзэ лэсьтэме
луэ. Тыршоно, пе, мукет
адямиез валаны. Егит дыръя
солы ӵемысь чидан уг тырмы,
нош мӧйымыса адями
адӟыны кутске мукет адямиез
сыӵеен, кыӵе со вань.
Майя Кучерская «Экономикая
вылӥ школа» университетын
ужа. Кӧня ке ар талэсь
азьло солэн сюлмаськемезъя
кылдытэмын вал «Литературное
мастерство» программая
магистратура. Отын 2 ар ӵоже
студентъёсты дышето гожъяськыны
- чеберлыко литература,
сценарийёс, статьяос,
книгаос бордын ужаны. Текстъёсты
валанлы саклык висъяське.
Студентъёсын ужало
адӟымон адямиос - Сергей
Гандлевский, Марина Степанова,
Дмитрий Быков гожъяськисьёс
но критикъёс, Олег
Лекманов но Алексей Вдовин
литератураез эскерисьёс.
«Читай, Ижевск!» огинлэн «ВКонтакте» бамысьтыз
Ижкарын улӥсьёслы
Майя Кучерская час ӵоже
мастер-класс ортчытӥз. Кӧня
ке вакчи - но мур - тезисъёс
пыр возьматӥз, кызьы гожъяськисьлы
аслэсьтыз куаразэ
шедьтоно. Покчиос, шуиз со,
номыре тодытэк, мар ке но
кылдыто, но ужъёсазы одно
ик шӧдӥське мукет пиналъёслэсь
пӧртэм луэмзы. Писатель
валэктӥз, мар быдэ вуэм
адямилы люкетэ эркын луыны
- асьмемыз, пе, пичи дырысен
дышето текстъёс кылдытъяны,
гожъяськыны «шонер»,
озьы асьмелэсь куарамес
лӥялъёсты сямен «поро».
Кыл-куаратэм текстъёс, пе,
пушъё. Кызьы соин нюръяськоно?
Майя Кучерская кӧня ке
дэмлан сётӥз. Аслэсьтыд куарадэ
шедьтон понна, пе, нырысь
ик трос но ӝог гожъяськоно
«автоматическое письмо»
амалэн. Одно ик пыр-поч
тодоно ваньзэ, мар сярысь
гожъяськод - соку авторлэн
кышканэз тӧлӟе. Лыдӟисез
син азе пуктоно - тодыны
кулэ, кинлы тон гожъяськод,
соин улэп адямиен кадь вераськоно.
Гожъяськись ачиз
тодыны кулэ, ма со возьма
лыдӟисьлэсь - кышкатэмез-а,
мар ке сярысь мадемез-а
яке сое паймытэмез-а потэ.
Гожъям текстъёсты писатель
шара лыдӟыны ӵектэ,
соосты, диктофонэ гожтыса,
кылзыны, чакланы, мар аслыд
кельше, мар уг. Мукет
адямиез тунсыкъяськытон
вылысь гожъяськись нырысь
аслыз ачиз кельшыны кулэ.
Майя Кучерская ачиз гинэ
ӧз вераськы, люкаськем калыклы
уж сётӥз. Котькудӥз
гожтӥз 2 пичи текст, тужгес
кышкасьтэмъёсыз ужъёссэс
шара лыдӟизы, соосты
ӵошен эскерим. Текстъёсты
сэрттон-пертчон дыръя писатель
возьматӥз, кыӵе инты
басьто текстын чыры-пырыос,
кызьы шедьтоно лыдӟисез
бордазы кыскись образъёсты,
гожъяськыку мултэс гольтыръяськемлэсь
алӥз.
Зэмос кылбур абдратэ
Дмитрий Воденников -
тодмо кылбурчи, эссеист, колумнист.
Фестивальын со
кылбуръёссэ лыдӟиз, кылбурет
сярысь лекция ортчытӥз.
Лекцияз поэт алама но
умой кылбуръёс сярысь вераськиз,
валэктӥз, ма соосты
урод яке ӟеч каре. Кылбурчи
вераськонзэ Красная
шапочка сярысь выжыкыл
бордысен кутскиз. Выжыкыллэн
калык сюжетэз зол
висъяське Шарль Перролэн
гожтэмезлэсь - отын мифологической
малпаськон кузёяське,
соин ик шимесэзлысьӧсезлы
инты вань. Сыӵе
вашкала сюжетъёс туала
вакытысь лыдӟисез абдрато
- нош поэзия, Дмитрий
Воденников пусъемъя,
сыӵе ик абдратӥсь, лыдӟисез
ӵашйытӥсь луыны кулэ. Со
ик вань зэмос вылӥ кылбурет.
Нош алама кылбуръёсын
пумисько сузмем кылъёс,
бездэм образъёс, соос огдышем
сямен гожтэмын.
Эдуард Асадовлэсь кылбуръёссэ
тодэ вайытӥз - соос,
пе, сокем уродэсь, кӧшкемыт
попса кырӟанъёс выллемесь,
но соосты но куддыр
кылзэм-лыдӟем потэ, соос но
куддыр паймытыны быгато.
Дмитрий Воденников
Всеволод Некрасов кылбурчилэсь
(со авангард, концептуализм
жанръёсын ужамын)
кылъёссэ вераз: «Уг
«ПоэтUp» штаблэн кенешоназ
пыриськизы А. Шумилова,
И. Кадочникова, А. Арзамазов.
яра мурт тӥрлыкез уже кутыны».
Всеволод Некрасовлэсь
кылбуръёссэ шара
лыдӟыса, со возьматӥз, кызьы
та поэт быгатэ, кӧня ке
кыллэсь гинэ кылбур гожтыса,
мур образъёс кылдытыны,
трос полэс текст радъяны,
лыдӟисез куриканы.
Озьы ик Дмитрий Воденников
Ян Сатуновскийлэсь
(Быдӟым ож пыр потэм
кылбурчи, футуризмлы матын
гожъяськиз) кылбуръёссэ
лыдӟиз, валэктӥз, кызьы
кылбурчи быгатыса кылъёсын
ужаз - одӥг кыл гинэ
пыртыса, со текстэз йыринчукин
берыктэ вал - озьыен,
лыдӟисьсэ шуэрскытэ. Линор
Гораликлэн - туала кылбурчилэн,
эссеистлэн, критиклэн
- «берыкъяськись» кылбуреныз
(стихотворение-перевёртыш)
тодматӥз. Линор
Горалик, кык тодмо сюжетэз
- Корней Чуковскийлэсь «Федорино
горе» кылбурзэ но Библиысь
еврей калыклэн Египетысь
потэмез сярысь мадёсэз
- огазеяса, выль пуштрос
кылдытэ, лыдӟисез паймымон
финалэ вуттэ.
Печатлам книга данын
Фестиваль дыръя
«ПоэтUp» штаб ортчытӥз
«Ижкарысь туала поэзия»
котырес ӝӧк. Кенешонэ пыриськизы
Ирина Кадочникова
(кылбурчи, критик, филолог),
Александр Лаврентьев
(литератураез эскерись,
УдГУ-ысь дышетӥсь), Алексей
Арзамазов (филология
наукаосъя доктор, кылбурчи),
Анастасия Шумилова
(кылбурчи). Соослы юан сётэмын
вал: кин но малы гожъяське
али Ижкарын но кинлы
со кулэ?
Тунсыко кенешон пурӟиз
книга печатлан пумысен.
Александр Лаврентьев малпамъя,
поэзия туала вакытэ
маргинальной маке луэ. Тиражъёс
пичиесь, но со дыре
ик ялан выль книгаос пото.
Туала вакытэ книга шоры
синпель кузьым шоры кадь
учко, пе. Ирина Кадочникова
шуиз: книга поттыкуз,
кылбурчи текстъёссэ быръе,
озьыен, аслэсьтыз творчествозэ
лусъе, кыӵе ке йылпумъянъёс
лэсьтэ. Алексей
Арзамазов пусйиз: удмурт
кылын книга печатлан гражданской
ужпумлы пӧрме -
котькуд книга возьматэ, удмурт
литература вань на шуыса.
Анастасия Шумилова
малпамъя, книга поттон литературной
улонэз азьланьтэ.
Вотэсын литература ас
кожаз улэ, нош книга потэ ке,
со учырлы пӧрме ини - ивор
вӧлмытӥсьёс саклык висъяло,
адямиос литература сярысь
вераськыны кутско.
Котырес ӝӧк сьӧрын удмурт
но ӟуч кылъёсын гожъяськисьёслэсь
югдурзэс
ӵошатӥзы. Огласянь, ӟуч кылын
тросгес адями лыдӟиське,
но со дыре ик кылбурчилы секыт
аслэсьтыз аудиторизэ
шедьтыны, нош удмуртъёслы
со ласянь капчигес - удмурт
кылын верам куара уг
ышы. Вылаз ик, али Россиын
улӥсь калыкъёслэн литератураосынызы
тунсыкъяськыны
кутскизы Москваысь
литераторъёс. Алексей
Арзамазовлэн малпамезъя,
Ижкар оглом ворсаськем кар,
отын литературной улон но
ворсаськем кабъя кошке - литература
котырысь адямиос
ог-огенызы кусып уг возё.
Александр Лаврентьев серекъяз:
поэтъёслэн трос кузя
люкаськемзы уг луы, пе, - куспазы
споръяськонъёс пурӟо.
Кылбурчиос веразы, соослы
нырысь ик лыдӟиськись адямиослэн
малпанзы дуно луэ
шуыса - котькудӥзлэн гожъяськисьлэн
йыраз вань аслаз
«идеальной» лыдӟисез.
Герман Суслов «ПоэтUP»
штаблэн кылдэмез но вуоноезлы
малпанъёссы сярысь
мадиз. Сӥзьыл «поэтапъёс»
выль альманах поттыны
малпало но «Туала кылбуретлэн
школаез» проектсэс улонэ
пыӵатыны ӧдъяло - отчы пыриськисьёслы
валэктозы, кызьы
текстъёсын ужано, соосты
лыдӟоно но гожъяно, озьы ик
тодмо кылбурчиосын пумиськонъёс
радъяськозы.

инГОЖ
№ 70 (25685)
3
2018-тӥ ар 18-тӥ куарусён
ШАЕРТОДОН
Горд нылаш сярысь
Автобиографической произведениослэн историын интызы
Елена МИННИГАРАЕВА
Берло дыре чеберлыко
литератураез
лыдӟыны дыр шергес
шеде. Но Лидия
Будогоскаялэсь «Повесть
о рыжей девочке»
автобиографической
гожтэмзэ (6+)
огшокчемен лыдӟи.
Произведениын вераськон
мынэ даур
талэсь азьло Сарапулын
улэм горд нылаш
сярысь.
Четлыкын
Произведение бадӟым
ӧвӧл. Вераськон мынэ 1912-
тӥ арын луэм учыръёс сярысь.
Нырысетӥ чуръёсысеныз
ик книга бордаз кыске
но уг ни лэзьы. Зэм, со
горд йырсиё удмурт нылаш
сярысь ӧвӧл, повестьын удмурт
нылаш вань ке но.
Произведение секыт семья
кусыпъёс, кивалтыны
яратӥсь атайлэн зӥбетэз,
али ӝужась яратон, сое лёган-саптан
но астэ дунъяны
быгатон сярысь.
Повестьлэн валтӥсь героиняез
- 13 аресъем Ева.
Со дышетске Сарапулысь
гимназиын. Атаез - жандарм,
городысь югдурез
утёнъя бадӟым кивалтӥсь.
Семьязэ но мыжыказ кырмыса
возе. Таӵе улонэз чидатэк,
кузпалыз пегӟе.
Атай юртын Евалэн одӥг
гинэ утисез - песянаез. Но
тазэ но лек атай дорысьтызы
улляса лэзе.
Налаш ялан кышкаса
улэ:
«Кемалась, Ева пичи
дыръя ай, атаез жугиз солэсь
нянязэ. Няня ачиз но
пичи нылаш вал ай, ӟызы,
шыр быж кадь векчи йырси
пунэтэн. Огпол, нокинлэсь
юатэк, со сакырез басьтэм.
Атай бадӟым мыжыкеныз
ымныраз сётӥз ук! Шимес
суредэз адӟыса, Евалэн
быдэс мугорыз куалекъяны
ӧдъяз. Со дырысен Ева
атаезлэсь кышка. Ваньзы
кышкало атаезлэсь. Нуналлы
быдэ атаез доры бумага
папкаосын лыктэ писарь.
Кабинетэ со пыдчиньы
йылаз гинэ пыре, сапегъёсыз
медаз ӟукыртэ.
Атаез сое но одӥг пол бамаз
мыжгиз...»
Ева кемалась дорысьтыз
кошкысал ни, но атаезлэсь
кышкан возе сое.
Берпуметӥ осконэз - анаез.
Солы гожтэт гожтӥ ке,
монэ валалоз, дораз басьтоз.
Но анаез нылызлы
юрттыны уг быгаты, чиданы
гинэ куре: мон туж ёрмыса
улӥсько, нош атаед
дышетоз, дӥсялоз - чида...
Евалы табере эшшо секыт,
угось со вала: анаез сое сокем
юн уг яраты вылэм,
туж яратысал ке, номыр
шоры учкытэк, басьтысалыз
ук...
Быдэ вуымтэ нылашез
гимназиын ялан серем
каро горд йырсиез но «шушань»
луэмез понна, дораз
но со - четлыке шедем тылобурдо.
Эшшо ке атаез вае
выль егит кышно. Таиз но
пал кыл но пумит вераны
уг дӥсьты.
Произведенилэн кутсконаз
шӧдӥськиз на: Евалэн
атаез нылыз сярысь
ас сяменыз сюлмаське,
урод пиналъёс пӧлы медаз
шедьы, «витьёслы»
гинэ мед дышетскоз, нялтас
гинэ мед кариськоз.
Но пумен-пумен со нылзэ
адӟемпотостэм каре, лёга
Евалэсь нырысетӥ яратонзэ,
серем каре ненег мылкыдъёссэ.
Быдэ вуымтэ
нылаш кытчы пырон инты
уг ни шедьты, шуак пуштэ
- атаезлы пумит султыны
но дорысьтыз пегӟыны
дӥсьтэ.
Дорын - кезьыт,
куноын - шуныт...
Огласянь, произведенилэн
сюжетэз огшоры гинэ.
Но отысь суредъёс син азе
туж яркыт пуксё. Дауръем
висэз пичи но уд шӧдӥськы,
произведение али гинэ
гожтэмын кадь. Нырысь
ик, со вакытысь Кам шур,
Сарапулысь ульчаос, инкуазь...
Г. Фитингофлэн суредъёсыныз
книгалы лыдӟись тужгес синмаськиз.
Монэ, валамон ини, бордаз
кыскизы удмурт калыкен
герӟаськем детальёс,
адямиос, мурт синмын асьме
шоры учкон. Евалэн
тужгес матысь эшез - Дэбес
черкогуртысь Нина Куликова.
Текстын шуэмын:
«Нина Куликовалэн анайатаез
улӥзы Дэбес черкогуртын...
Ниналэн атаез
отысь больницаын фельдшер
вал. Быдэс тол ӵоже
Нина городын вуриськисьлэн
квартираяз огназ улӥз,
гужем гинэ дораз бертылӥз.
Нина Еваез дораз, Дэбесэ,
гужемлы куное ӧтиз. Евалэн
туж потӥз мынэмез. Но
со кышкалляз - атаез уз лэзьы.
Но атаез соку ик лэзиз,
чик малпаськытэк... Нырысь
мынӥзы пароходэн,
собере - паськыт бусыостӥ
зуркась тарантасэн. Черкогуртын
Ниналэн анай-атаезлэн
юртсы - пичи гинэ пу
корка. Укноос пичиесь, выж
быдэсак половикъёсын шобыртэмын.
Кухняын - ӟуч
гур. Ниналэн анаез шыдэн
яке ӝукен горшокез кузь
ухватэн кутэ но гуре донге.
Азбарын курегъёс ӵашето,
ӟазегъёс кесясько, ыжъёс
ларго... Кыдёкын ик ӧвӧл,
бакчаос сьӧрын, - чылкыт
шур но тӧдьы сяська возь.
Быдэс нуналъёсын Нина но
Ева шурын пыласько, йырсиоссэс
лэзьяса, возь вылтӥ
уйылӥськыса шудо, бызьыло.
Ниналэн атаез соосты
сьӧраз нюлэскы нуллэ...»
Ева туж вожъяське
эшезлэн семьяезлы, огогзэс
валаса улэмзылы,
синмаське ужаны быгатэмзылы.
Озьы туж тунсыко
возьматэмын гуртын
но городын улӥсь нылъёс.
Одӥгез начаргес улэ, но семьяязы
яратон кузёяське,
мукетыз семья узыр ке но,
туж кезьыт.
Огпол чидантэм секыт
луиз но, Ева кӧлыны
эшез доры пегӟиз. Ниналэн
пичи гинэ патераз берытскон
интыез ӧвӧл, но,
паймоно кадь, татын шоканы
ик капчигес. «Со (Нина)
соку ик пельнянь лэсьтыны
кутскиз. Нина - шаплы нылаш:
пӧраськыны но, дӥсь
но, выж но миськыны быгатэ.
Ваньмызлы талы Нинаез
дышетӥз вотячка мумиз.
Дэбесэ куное ветлыкуз,
Евалы туж кельшиз Ниналэн
анаез. Гуртысь огшоры
нылкышно, кышетэн,
гань-гань, туж лякыт. Атаез
но - фельдшер - кельшиз.
Со малпаськись тусо, чыртыез
ошпилэн кадь зӧк, но
ачиз туж лякыт. Евалэн но
Ниналэн кадь анаез-атаез
луысалзы ке, нылаш вӧй
пӧлын сыр кадь улысал...
- Нокытчы но татысь
уг кошкы, - шуиз Ева, -
ӵукнаозь татын уло, ӵуказе
коть ньӧрын мед жугозы...»
Уртчись вакытлэн
шукыяз
Повесть шӧдтэк шорысь
быре - дорысьтыз пегӟем
но Сарапулысь Петербурге,
песянаез доры, вуэм Ева
тодэ: атайзэ, Воткинскысь
заводын пуромем бунтэз
пачкатыны мынэм муртэ,
рабочийёс виё...
Тае лыдӟем бере йырын
пӧртэм мылкыдъёс бергало.
Одӥг ласянь, туж потэ
на вал тодэм: нош мар
бӧрысь луиз геройёсын?
Мукет ласянь, тунсыко вал
революцилэсь азьвыл шаерамы
ортчем ужъёсты
пуш ласянь адӟыны. Историкъёслэн
верамысьтызы
ӧвӧл, тани тазьы, быдэ вуымтэ
ныллэн синмыныз.
Но Евалэсь (Лидия Будогоскаялэсь)
азьланяз
улонзэ мон, биографизэ
лыдӟыса гинэ, тодӥ ни. Л.
Будогоская вордӥськем 120
ар талэсь азьло, 22-тӥ ноябре,
Польшаысь Плоцк городын,
ӟуч офицерлэн семьяяз.
Семьязы пӧртэм
городъёсын улэм: Златоуст,
Калуга, Кронштадт,
Сарапул... Нылаш ёрмонэз
адӟытэк будэ, кунгож
сьӧры но пичиысен вуылэ
(Дрезден, Берлин но мукет
городъёс). Озьы ке но, туж
лек атаен улыса, со зэмос
шунытэз уг адӟы.
Нырысетӥ дунне ожмаськон
дыръя Л. Будогоская
госпитальёсын ужа.
Нош собере кема ужтэк
пуке. Но уг ыштӥськы,
Выль ар шудонъёс лэсьтыны
ӧдъя, Эдик выныныз
ӵош соос пичи гномикъёссэс
лавкае вузаны сётъязы,
со пичи коньдонэн улӥзы.
Бӧрысь Л. Будогоская ужа
трикотажной фабрикаын
вуриськисьын, молочной
кухняын, нуны утисьын...
Кыкетӥ дунне ожмаськон
дыръя фронтэ кошке.
Л. Будогоскаяез туж
дунъя вылэм Самуил
Маршак. Та писательлэн
ӝуткамезъя ик Л. Будогоская
рос-прос гожъяськыны
кутске, «Повесть о рыжей
девочке» произведенизэ
дася. Нырысьсэ книгаен
со потэ 1929-тӥ арын.
«Повесть о рыжей девочке»
произведениысь геройёс
- со вакытысь зэмос
адямиос. Соин ик йырысьтым
нокызьы уг поты повестьысь
Нина Куликова.
Валамон, али со улэп уз ни
луы. Соку, оло, выжыоссэ,
нылпиоссэ шедьтоно?
Удмуртъёс ортчем даурлэн
кутсконаз туж ик
ӧз яратэ интыысь интые
кӧчылыны. Гимназиын дышетскем
нылаш дораз ик,
Дэбесэ, бертӥз, дыр. Оло, со
отын школаын ужаз? Оло,
Дэбесын вань на солэсь
фельдшер атайзэ тодӥсьёс?
Жаляса верано, Дэбесысь
шаерчиос мыным
юрттыны ӧз быгатэ. Со вакытъёсысь
архивъёс, пе,
утиськемын ӧвӧл. Улонысь
кошкиллям ни азьвыл
больница вӧзын улӥсь пересьёс
но.
Сарапулысь шаерчи Татьяна
Пеганова произведениысь
куд-ог геройёслэсь
выжызэс шедьтэм, нош
Нина Куликовалэсь - ӧвӧл.
Зэмос улонын, пе, солэн нимыз
Ольга Куликова вал,
дыр... Но мынам малы ке
осконэ уг ышы. Утчаськом
на, шуо, Дэбесысь шаерчиос
но. Зэм, вакытэз соку туж
бугырес вал - революция,
Граждан ож, коллективизация,
репрессиос... Кин
тодэ, кытчы улон вуттӥз
дышетскем нылашез? Оло,
горд нылаш сярысь книгаысь
удмурт ныллэн нылпиосыз,
нунокъёсыз мукет
ёросын, городын уло? Ми
куриськом лыдӟисьёслэсь
юрттэт...
Аслаз Лидия Будогоскаялэн
нылпиосыз ӧй вал.
Одӥг гинэ вынызлэн выжыосыз
али Израильын
уло.

№ 70 (25685)
4 2018-тӥ ар 18-тӥ куарусён
инГОЖ
ТОДМАТСКОН
Воксё мукет
Мария ВЕКШИНА
Шаркан ёросысь
Быгы гуртысь егит
кылбурчи Екатерина
Васильева шуэ:
улонын керпотӥсько,
нош кылбуръёсам
усьтӥськисько. Соин,
вылды, солэн лирической
героез кышкатэк
вера, кызьы нылкышно
мугорыз яратон
куре.
Екатерина Васильевалэн
2 бичетэз потэмын -
«Бурдъёсы вордӥсько» но
«Малпанлэн шыпыртэмез».
Тросэз критикъёс пусъё, со
дӥсьтӥсь кылбурчи шуыса
- чуръёсыз эротикаен тырмемын.
…Бирдыме
йӧтӥськод ке,
Кышномурт
асме кожасько...
Лирической героиня -
ӧрак усьтэм сюлмо, мугорыныз
но, лулыныз но яратонэз
возьмась нылкышно.
- Екатерина улэ но гожъя
лулыныз. Удмурт нылкышно
кылбуретын сямен, солэн
кылбуръёсаз шӧдӥське
«мон вордӥськемын яратыны»
малпан, интим но
анай луон темаос дӥсьтыса
ӝутэмын, - «Малпанлэн
шыпыртэмез» кылбур бичетэн
тодматскон ӝытэ шуиз
литературовед Любовь Фёдорова.
- Ачим сярысь шуисько:
гожъяськыны Инмар сётэм,
угось анае но, атае но
та удысэн герӟаськемын
ӧвӧл, - шуэ Екатерина Васильева.
- Темае одӥг - яратон:
«сьӧд синъёс», «яратон
ворме», «улон, кытчы монэ
нуиськод?». Лирической герое
- зэмос кышномурт, со
яке секытэн, яке быземын,
яке анай. Кызьы шуо, выжыкыл,
пе, гожтӥськод ке,
со куке но быдэсме. Мон но
озьы ик малпасько. Литературовед
Александр Шкляев
шуэ: Е. Васильевалэн сюлэмыз
котьку усьтэмын. Зэмзэ
ке, синъёсме но ӝутыны
керпотӥсько, нош кылбуръёсам
мон воксё мукет.
Мыным туж кельшо
Алла Кузнецовалэн кылбуръёсыз:
зэмосэсь, сюлмоесь,
чебересь. Соос мыным
матын луо.
Михаил Федотов но
Эрик Батуев сюлэмшугъяськытӥсь
темаослы
гожъяськизы. Озьы ик соослэн
кылбуръёсазы кулон
сярысь малпанъёс трос.
Огласянь, та кылбурчиос
кулонэз асьсэос ӧтизы,
дыр, соин ик улонысь вазь
кошкизы. Школаын дыръям
мынам но вал сыӵе вакытэ:
«Мон кулӥ ке, улон
воштӥськоз, дунне кыклы
пилиськоз». Кулон сярысь
гожъяськыны уг яра, мон
малпасько, - шуэ Екатерина
Васильева.
КЫЛБУРЕТ
Кышномурт асме кожасько
Екатерина Васильевалэн чуръёсыз
* * *
Кӧня пол сэрпалляд, жагез кадь,
Кӧня пол виылӥд, кибыез кадь...
Кӧня пол бурмылӥ, паймоно кадь,
Кӧня пол улӟылӥ, осконтэм кадь!
* * *
Йырад тӧл шула на,
Визьтэм на.
Йырад тӧл шула на,
Сьӧлыко на.
Вӧсь кариськод монэ,
Сюлэмме бышкиськод, нэ.
Вӧсь кариськод монэ,
Собере, оло, жалялод, нэ.
Монэн сьӧлыкаськод гинэ,
Монэн шудӥськод юнме.
* * *
Кыӵе интыез вылтырам
Тыныд тужгес но ярам:
Гурезез-а?
Гопез-а?
Нюкез-а?
Возез-а?
Ошмесэз-а?
Кыӵе люкетыз тыныд
Сюлэмыдлы матын?
Кыӵе дыре но ку
Улысал тон котьку
Чебер вылтырам:
Ошмесо?
Турыно?
Арлэн кыӵе дыръёсаз?
Бирдыме
Бирдыме чупаськод ке,
Анаен асме лыдъясько.
Бирдыме йӧтӥськод ке,
Кышномурт асме кожасько.
Бирдыме кырмиськод ке,
Весяклы тынад, малпасько.
Бирдыме чупаськод ке,
Уйвӧтам, оло, вуисько.
Бирдыме ӟыгыръяськод ке,
Тон пушкы быдэс пырисько.
Бирдыме учкиськод ке,
Юзыр-кезьыр пыр луисько...
Синъёсыдлэсь гинэ,
Киосыдлэсь гинэ
Йырсазьме ыштӥсько,
Мынам яратонэ.
* * *
«Эн уйылы монэ», -
Шуид толон гинэ.
Туннэ нош малы ке
Синмыд утча монэ.
Уг пота ни азяд,
Ай уйылод ачид.
Тодод улытозяд,
Кинэ огпол ыштӥд.
* * *
Лыктысалыд ке мон доры,
Чупамтэ интыед кыльысал-а меда?
Лыктысалыд ке мон доры,
Инмарлы тау каремысь дугдысал-а меда?
Туспуктӥз Ксения ВОРОНЧИХИНА
* * *
Нылпие вордӥськиз ке,
«Пичие» нимало пиме.
Котьку со луоз пичи.
Нимыз пичилэн
Гожтэмын ке но луиз,
Котьку со луоз - пичи.
Пичие
- Эн бӧрды, пичие,
Ваньмыз ай лапкомоз.
Тырмыт, майбыр луоз
Асьме улон, пичие.
Адӟонмы сыӵе шуыса,
Нянь шоремен тырмыса,
Улон азьланьтӥське, пие...
Эн паймы, пичие,
Инмар сётӥз ук лул.
Та дуннеын кӧттыр улод
Котькыӵе дыръёсы, пие...
* * *
Кужым сётэ кадь осконэ,
Ӟигаро каре малпанэ.
Вӧськыл но лыдӟисько,
Инмарлы вазисько -
Шуд солэсь курисько...
Курисько... Курисько...

инГОЖ
№ 70 (25685)
5
2018-тӥ ар 18-тӥ куарусён
ИНКУАЗЬ НО АДЯМИ
Ӵуштыр-ӵаштыр...
Арлэн вакытэз сярысь кылбуръёс
* * *
Екатерина МАКАРОВА
Сӥзьыл куазез эн шуэлэ мӧзмыт,
Лякиськись куар кадь, туж ик акылес.
Я дунъялэ сое вылтӥ, тырмыт,
Ноку эн каре инкуазез мылес.
Бен со но, дыр, ук тӥ кадь ик улэ
Аслаз урод но ӟеч сямъёсыныз.
Нош юады-а, малы со бӧрдэ,
Малы туннэ но тырмемын пушкыз?
Ватскиськоды кыштыр шуныт корка:
Та сӥзьылэд, пе, чылкак визьтэммем,
Йырсиоссэ оген-оген ишка,
Укноосы дымбыр йыге, урмем!
Куанер сӥзьыл… Укша куштэм муртлы,
Бӧрдэмысьтыз тӧрназ ини музъем.
Буйгатыны сое ӧвӧл, дыр, ук сьӧлык.
Медаз гинэ пӧя вылэм сюлэм.
«Шӧдон», Удмуртия, 2006
* * *
Эрик БАТУЕВ
Эн бергаты монэ, сӥзьыл,
Ӝож кырӟанын.
Йыры сотэк но пороме.
Нош сюлэмын,
Нош сюлэмын…
Муэз, дыр, нюроме.
Арлыдэз шӧдон сямен вуылӥськод,
Вож сылӥсь куарез пересьмытскод.
«Гольык», Удмуртия, 1995
Сӥзьыл ӵукна.
Буёл шапык
Сергей МАТВЕЕВ
Ӵабышъяса гожмо-пиртэш,
Ӵужон ӵуже ӵуж куаръёсты -
Вань дыбыр-йыг куараосты
Ӵаштыртонэн со шобыртэ.
Кыӵе даур, кыӵе вакыт,
Кыӵе калык, кыӵе дунне…
Ӵаштыр вазё куаръёс туннэ,
Солэсь туннэ бертэм-а кыд…
Ӵаштыр-ӵаштыр, ӵуштыр-ӵуштыр
Сюлэм вылэ со лэзиське.
Дунне берга солэсь, иське.
Солэсь, иське, сюлэм уг тыр.
«Инсьӧр пӧртмаськонъёс», Удмуртия, 2011
* * *
Александр БЕЛОНОГОВ
Куддыр кисьтэ зорзэ сӥзьыл инбам,
Сучырмымон коттэ вань шаерез.
Куакъёс ӝомыт учко ни пумитам,
Кык чур синву ӧрен бӧрдэ сюрес.
Возьёс но шеректэм тус арама,
Шашытурын, пеймытомем Вало -
Укыр ни возьмаллям, лэся, кема,
Соин, дыр, ӝоженгес пумитало.
Тани азям, пересь анай сямен,
Пичияк гурт потоз сюрес урдсы.
Сое потӥз ни нош ик адӟеме.
Мар вань мыным, ӧйтӧд, та палъёсын.
Веть вань ук тэль сьӧрын ик городэ,
Зор ву улын асфальт чиля отын,
Урам отын гурла но гуретэ,
Ӧвӧл кадь мӧзмонлы шыпыт инты.
Я мар муген мон, мае утчаны
Нош лыктӥсько та чалак сэреге?
Татын мынам улэ-а кырӟанэ,
Лулы татын потэ-а эрике?
«Выллань сюрес», Удмуртия, 2002
Малы сӥзьыл бӧрдэ?
Владимир ВОЗНЯКОВ
Сӥзьыл валлин кыдыраса
Вортто зоръёс гужем бӧрсьы.
Куректонэн кайгырыса,
Пересь инкуазь бӧрдэ озьы.
Малпа, луоз, кызьы гужем
Писпу куаръёс вожектӥзы,
Яркыт, вӧлмыт нюлэс кушез
Крезьёс ялан шулдыртӥзы…
Ӧвӧл ни табере дырыз:
Ӧвӧл куара-ланга йӧназ,
Пелез вандӥсь шып котыраз
Туж кемалы юнмаз.
Огназ татын улэ пересь.
Быриз корка тыр улӥсез.
Пумен куашка, шальтра юртэз -
Котыр ласянь адске шимес.
...Ваньзэ тае умйылсконъяз
Инкуазь малпа, дыр, одӥгназ.
Соин, дыр, шӧдонтэм аслыз,
Васько курыт синвуосыз.
(«Тӧдьы тэльын пытьы //
Одӥг пол гинэ…», Удмуртия, 1992)
Туспуктӥз Юлия ГАБИДА
Кылбуръёсты люказ
Анастасия ШУМИЛОВА

№ 70 (25685)
6 2018-тӥ ар 18-тӥ куарусён
инГОЖ
АНАТОЛИЙ ПЕРЕВОЗЧИКОВ
Сьӧлыктэм сьӧлык
Кузьмадёсысь люкет
Саптар Миколлы армие
мыныны повестка вуиз. Микол
шумпотэ, нош мумиз чигиське.
Угось Педосьяпайлэн
со - шудтэм шудэз, шуг-секыт
зорлэсь утись липетэз. Санаторие
ветлыкуз, сьӧлыказ
со. Инмарлы оске ке но, уг
ӧпкельы. Инмар картэн улыны
шудзэ ӧз сёты угось. Нош
сяськаез, емыш сётытэк,
тӧлӟе ни вал.
Гур т пичи. Синмаськымон
воргоронъёс ӧвӧл.
Йӧноосыз кышнояськемын.
Отӥыз я юо, я сямзы керӟег, я
пытсэт сьӧры сюрылэмын…
Ӧвӧл ке ӧвӧл мед луоз
ини. Марлы удалтымтэ картэн
курадӟод, висисьтэм йыре
кышет керттод? Кудӥз бен
газетэ ялон но сётъя, лэся.
Сыӵеослы инмысь шуд кизили
но усьылэ, шуо. Но Педосья
выжыкыллы кемалась уг
оскы ни. Ма, со егит ӧвӧл ни
ук! Ньыльдонэз матэктэ…
Синучкон азе султылыкуз,
ымныр туссэ учкылыкуз,
ӵемысь но ӵемысь выль кисыриоссэ
синйылтылэ. Иське,
ӧсаз мӧйымон йыгаське
ни. «Улонэдлэсь ортчемзэ
но тазьы уд шӧды, ява, - куалектэ
со. - Вань дауредлы
тӧлопу кылёд…» А ведь учконтэм
шуш но ӧвӧл. Питырес
ымныро. Куд-ог шушмараослэн
сямен, бам бусыяз синазькыль
пужы но киземын
ӧвӧл. Синмыз чагыр - кинайчача
но кинайчача! Бамъёсыз,
тужгес но кырысь пыремез
бере, горд-горд вуэм улмоос
кадесь. Ымдурыз - льӧль
эмезь… Мугорыз но веськрес
на. Конешно, дуринчи куско
модной нылъёслэн кадь ик
уд шуы, но чылкак синмаськонтэм
ӧвӧл на ай. Вылтус
бен нырысь интыын луыны
но кулэ ӧвӧл. Шуо ук: книгаез
вылызъя уг, пуштросэзъя
дунъяло. А ведь со нырысь
ик вылтусызъя син шоры
йӧтэ. Ма, адями но озьы ик.
Дӥсезъя сое пумитало, визезъя
келяло…
Тӥни озьы, ныл чеберезлэн
бездэмезлэсь кышкаса,
Педосья, Инмарлэсь «алэмзэ»
кылзытэк, сьӧлыке пыриз.
Пыриз ке пыриз вылэм ай
но, гуртысь карто кышноослы
туж бадӟым шугъяськон
Анатолий ПЕРЕВОЗЧИКОВ - Удмуртиысь
Писательёслэн огазеяськонзылэн
ёзчиез
Туспуктӥз Максим ЕГОРОВ
вайиз. Педосьялэсь бадӟым
пуйы кадь пельтӥськем кӧтсэ
адӟыса, соос котькудӥз сямен
ас кузпалзэс сьӧлыкоен
лыдъяны ӧдъязы. Йырзэс
тӥяло, тодазы ваё, ку, кытын
ӝегаз вал картсы, ку мурт
бакчае кожаны, «шыраны»
вис шедьтӥз. Керетонзы, тупамтэ
дыръязы шат меда?..
Соин ик туж чидатэк витизы
Педосьялэсь вордэмзэ -
гурезлэсь куашкамзэ.
Тани Тимок Пекла но
картсэ - Олёшсэ - олокӧня пол
юмоке вуттылӥз ини:
- Инмар, Инмар понна,
кӧты шӧдэ, тынад, тынад
со «кузьымед», Олёш. Гур
пуктӥд вал Педосьялы. Кыктой
со дорын уйшорозь «кунояд».
Али чакласько-лыдъясько
но - ӵапак укмыс толэзь
талэсь азьло вал ук!.. У-у, калера
басьтон, кӧттырмостэм
ошак! Ас коркасьтыд сиён берекеттэм,
иське. Муртлэнэз
зумытгес потӥз-а?..
Олёшез, кытчы пырыны
инты шедьтытэк, шонере потыны
тырше:
- Да ӧй вал милям номыр
но. Мар кулэтэмзэ зулиськод?
Уд ке оскиськы, кирос
поно…
Пеклаез, оло, эшшо зол
«тачыртыны» ӧдъя. Малпалод,
пӧсь табае вӧй
кисьтӥськиз:
- Я, мынэсьтым ке кепыр
вайыны уд валаськы, нылпиосыдлэсь
коть возьдаськы
вал. Соос бадӟымесь ни ук,
ваньзэ валало… Тани, тани
ӝоген сьӧлыкед, семьяедлы
гинэ ӧвӧл, быдэс гуртлы тодмо
луоз. Ой, мар возьыт та,
мар возьыт! Аслад ке ымнырад
сурон лякемын, мынамез
азьло ик тылын ӝуа ини…
Ой, Инмаре-Кылчинэ! Кызьы
гурт калык азе но поталод
на ай? Возьдаськыса му
пыр виялод ук!..
Педосья, нылпи вордыса,
эмъяськонниысь бертӥз гинэ
- гурт кышноос со доры, мавзолее
сямен, огзы бӧрсьы мукетыз
кыстӥськизы ни. Кузьмаськыны,
пе. Огез шудон
басьтыса вае, мукетыз - дӥсь,
кутэт…
Педосьялэн мумиз, Губыр
Сандра, чылкак паймиз гуртоосызлэн
таӵе шырыт луэмзылы.
Азьвыл ке копейказэс
но пунэмен уг сёто вал, чурытало.
Олокыӵе но муг шедьтыса,
ваньзэ но ӧвӧл шуыны
турттылӥзы. Табере ке -
ме, дунтэк сомында кузьым
ваё. «Кема улӥд ке, оломае но
адӟод, ява, - нёжтэ со. - Ма, та
адямиос укыр бай луизы-а,
мар-а? Узырлыксэс кытчы
карыны уг тодо ни шат?»
Тани Пекла но Саптаръёс
доры вуиз. Талэсь азьло магазинэ
пыраз. Дунтэмзэ бырйыса,
нуны дӥсь басьтӥз.
Ӧжыт бадӟымгес ке но, сокем
ӧз ӝожомы: пинал будоз
ай. Ма, собере аслыз ӧвӧл ук!..
Солы Педосья доры мыныны
муг гинэ кулэ. Адӟоно! Зэмзэ
ик-а солэн пиез Олёшезлэсь.
Уть ай, картэз пурт кадь
танӥське, му пыр виян. Инмар
кариськыны турттэ. Мынэсьтым,
кылчинлэсь сямен
ик, вень йыл быдӟа но шекме,
пе, уг ватӥськы. Сечас, сечас
рентгенэн выллем адӟиськоз,
ваньмыз шараяськоз.
Та пиослы оскы гинэ,
соос тыныд син вылад буёло
очки понозы но асьмелэн
ваньмыз умой, мусое, шуыса
кырӟалозы. Яке ӟуч сямен
ке: «Всё корошо, прекрасная
маркиза, всё корошо, всё корошо!»
А кинлы «корошо»?
Мыным-а? Уез изьытэк потам
- со умой-а? Самой матысь
адямиед тонэ вуза ке,
кызьы шуо, «с потроками»…
- Корка пась бере, кинэз ке
но вань, дыр, шуыса пырисько,
- чырткемъяськем интые,
куара поттӥз Пекла.
- Вань ай, вань, - пырись
муртлы гур азь палась потон
сяменыз вазиськиз Губыр
Сандра. Сыӵе ӧлексы вордскемысьтыз,
гуртын сое пичиез
но, бадӟымез но тазьы
шуэ. Со вожзэ уг вайы ни.
Мар бон карод, Инмар сыӵе
вордэм бере. «Кыӵе вань!
Сыӵеен адӟемез потӥз, дыр»,
- малпа Сандӥ.
Гуртын солы одӥг урод
сямо адями но ӧвӧл кадь. Ваньмыз
шоры ӟеч мылкыдын,
либыт вазе. Керӟегъяськемзэ
но кин ке кылӥсь вал меда?
Со лек кылъёсты уг ик тоды,
оло. Инмар Сандӥез ӧлексы
вордэмысь, калык сое жаляны
кулэ кадь. Нош луэ чылкак
мукет сямен: Сандӥ ачиз
гуртысь котькуд муртэ самой
матысь лул, ӵыжы-выжы,
бӧляк каре. Со понна дуннеын
мурт адями ик ӧвӧл, лэся.
Тани Пеклаез но Губыр
Сандра матысь ӵыжывыжызэ
выллем пумитаз. Верамаз
вань сюлэм шунытсэ
ватсаз кадь.
- Пуксьы, пуксьы, Пекла.
Лулдэ ӝамак шутэты, дуное.
Сюресэд вамышъямон:
уллапалась валлапала тубон
- коркась азбаре потон кадь
гинэ ӧвӧл…
- Озьы, озьы, Сандрапай.
Егит дыръя тыбырысь юэн
мешокез но шӧдыны уг луы
вал, табере ас арлыдъёсыд
гинэ но секыт ныпъет кадь
пото ни.
- Коркамылэсь борддоръёссэ
зарни куараеныд шумпоттэмед
туж кемалась ни
вал. Вера, вера, Пекла, куара
либытлыкедлэсь сюлэм
мед няськалоз… Малпасько,
такеме тӧлэз ӵыжан понна
гинэ ӧд лыкты, дыр. Вань,
дыр, кыӵе ке но мугед.
- Ма, муге со гинэ. Ӟеч
ивор гур вылын уг пукы,
шуо. Со коркась корка ветлэ,
котькудзэ шумпоттыны дыртэ.
Мон доры но тани вуиз но
- тӥ дӥне вуттӥз. Куке но соку
- огпалангес улыкумы - пичи
дырмы Педотчаен ӵош ортчиз.
Ӵош шудӥм-голектӥм,
гольык пыд бызьылӥм…
Куддыр шудонъёсмы но одӥг
луо вал. Ӧм керетэ, уртче
шудылӥмы…
Али кадь син азям на, коркады
уллапалан гурезь бамалын
сылыку, укно улады
милям, пичиослэн, «садикмы»
вал, шуыны луоз. Мар
но ӧм карылэ ми отын, кызьы
но ӧм шудылэ! Татчы
уго (котыр лымы луэ ай вал)
«гужем» самой вазь вуылӥз.
Укно улэ шунды жалятэк
пӧсь тылсизэ кисьтӥз. Милемыз,
пичи нылпиосты, шуныт
киосыныз анай сямен вешалляз,
нош коркады кезьыт
уй тӧллэсь атай выллем сайялляз…
Ачиз бон Педотча татын
ӧвӧл шат?..
- Ма, ужаны потӥз ини со.
Кык кузя нылпи утьыса коркан
уд пукы ук! Кинлы ке но
семьяез но сюдоно…
Со вискын пичи нуны сайказ
но бӧрдыны ӧдъяз. Губыр
Сандра висъет сьӧры дыртӥз.
Но ӝоген, кутэтэн бинялтэм
нылпиез зыбкаысьтыз басьтыса,
ки вылаз лэчкатыса,
Пекла доры потӥз. Ӧтьымтэ
кунолы та ик кулэ вал: со кучыранлэн
кадь лэчыт синмыныз
вож нунылэн ымныраз
мертчиськиз. Миськем
бусы сяртчы кадь нылпиез
сӥсъяса ик учке: Олёшезлэн
ик-а кисьтэм-басьтэм тусыз?..
Нош Губыр Сандра, оло,
солэсь мылкыдзэ шӧдыса-а,
син усёнлэсь но кӧбератэк
(зэм, пичиезлэн кымыс шораз
суэн вишты пуктэмын
ик), нунылэсь йырзэ выллань
ӝутэ, уката адӟиськымон
каре…
Огпол но, кык пол но учкиз
Пекла нуны ымныр шоры
- Олёшезлэсь номырзэ но ӧз
синйылты. Бератаз со, аслыз,
ас синъёсызлы оскытэк, Инмарлэн
куинь кылыз шуыса,
куинетӥзэ учыртӥз на. Собере
гинэ, гадь вылысьтыз секыт
из усьыса кадь, капчияк
лулӟиськиз но пильмаськем
мылкыдыз сайкыт лыз
ин выллем чагыраз, асьыказ.
«Иське, ӧвӧл, ӧвӧл та нуны
Олёшелэсь! - шумпотӥз Пекла.
- Юнме вожаса улӥськем.
Сомында лек кыл зори картэ
вылэ, кӧня ӟури, кӧня ултӥяй
сое! Бертыса, Инмарлэсь сямен
ик, пыдесъяськыса прощение
курытэк уз луы…
* * *
Нош со вакыт саптаръёслэн
пичи нунызы каллен
будӥз, покыль-покыль луиз,
серекъяны кутскиз. Педотча,
азьвыл сямен ик, колхозысь
фермае скал кыскыны, сюдыны
ветлэ. Ужез секыт ке но,
ымнырысьтыз пальпотонэз уг
кысылы. Уго фермаын но муспотон
пиезлэн тусыз син азяз
улэ. Эшъёсыз вазьыку но,
куд-ог дыръя соосты уг кылы.
Кыкетӥзэ кеськыса верало ке,
куаляк потэ… Со понна ужзэ
быдэстэ, йылса ни ке, дор палаз
бызьыса сямен, спортсмен
кадь, туж шаплы лашкинтэ.

инГОЖ
№ 70 (25685)
7
2018-тӥ ар 18-тӥ куарусён
Корказы пырыса, ужан
дӥсьсэ ури-бери куштыса,
киоссэ но ымнырзэ миськыса,
воштӥськыса, нуны кӧкы
доры вуэ ини. Пиналзэ кутэтэн
валче зыбкаысь ӝутэ
но, ӟус вылэ пуксьыса, йӧлын
пельскем нонызэ поттыса
пиезлэн ымаз донге. Собере,
уралмем, сюмам нуныезлэсь
нонэмзэ, сюпсемзэ, ымдур
выретэмзэ учкыса, небыт
сиё шунды кадь пиштыса,
пальпотэ. Та пичи муспотоно,
дуно лул бугорезлэсь солы
верантэм небыт, шуныт тулкым
ыртэ. Мар-о со сыӵе меда?
Анай шуд, дыр. «Таӵе шуд понна,
вылды, нылкышноос тыл
но, йӧ но пыр потыны дасесь»,
- малпа Педотча. Таӵе шудэз
со ӧз тодылы, ӧз веръя на вал.
Оло, соин но, вуэм льӧль эмезез
нырысьсэ веръякуз выллем,
синзэ кыньыса ик, шӧмзэ
мугораз каллен гинэ пыӵатэ.
Собере синзэ усьтэ но пиез
шоры учке, учке… Озьы, дыр,
пиосмурт но кышномурт куспын
кенжем яратон каньылак
гинэ нылпи вылэ выже.
Со али уг но малпа ни пиезлэн
атаез сярысь. Ну, вал сыӵе пиосмурт.
Педотча синмаськиз
лыз инбам кадь синъёсызлы,
пужым кадь веськрес мугорызлы,
визьмо вераськемезлы. Верамезлы
быдэ визьбур кылъёссэ
марӟанэз сямен пазьгылэмезлы…
Озьы Педотча ачиз но ӧз
шӧды, кызьы кужмо пиосмуртлэсь
мӧзмем ныл сюлэмзэ
пытсэтысь эрике лэзиз. Санаторийысен
соос Вася нимо
воргоронэн ӝытъёсы вож садо
урамтӥ поръязы, уӵыослэсь
ог-огенызы вожмаськыса
выллем турлы гуръёссэс кисьтэмзэс,
ӟозъёслэсь чикыртэмзэс
кылзӥзы...
Нош одӥг пол Вася Педотчаез
кык интыем палатае
куное ӧтиз. Эшедлэсь
умой ӧвӧл, шуыны турттӥз
нылкышно…
- Али мон огнам, -
шокыштӥз Вася. - Эше городэ
тодмоосыз доры кунояны
мынӥз.
Воргорон Педотчаез пумитаны
азьло ик дасяськем. Та
сярысь нылкышно палатае
пыремез бере ик валатскиз:
уго котырес ӝӧк вылын вазае
понэм куинь лемлет розаос
сыло вал, шампанской, «тылобурдо
йӧлэн» конфетэн коробка…
Чырсалэс-ческыт винаез
ымдурыныз чепылляса юэмзэ
адӟыса, Вася куноезлы воксё
паймиз но шуиз: «Ма, та
кабак ӧвӧл ук! Сюкась кадь
гинэ. Юэм потыку - сюэз юзматон.
Вай ай быдтытозямы,
ваче шуккиськыса ик, юом…»
- Мар понна? - соку ик юанэн
могӟытӥз эшсэ Педотча.
- А вань умоез понна!
Кудъёсыз азьланьын одӥг
пол гинэ уз луэ на.
- Нош кытысь тодӥськод,
озьы луоз шуыса? - выльысь
меӵкытӥз Педотча.
- Ма, умоезтэк улон уг
пӧлэстӥськы уга…
Вася возьматӥз, кызьы сюмыкез
огполскын бушатоно.
Педотча таяз учыре чепылляса
ик юыны ӧз выры ке но,
куинь пол гучыктӥз ик.
- Конфетме но веръя, -
«тылобурдо йӧлэн» коробказэ
усьтыса Педотчалы пальпотыса
мычиз Вася.
Небыт, ческыт конфетэз
пичиен куртчылыса веръянъяз
Педотча шӧдӥз: лулпушказ
пӧсь тулкым поръяны
ӧдъяз. Со йыраз но тубиз,
пыдаз но васькиз…
Собере, «чутонтэм» понна,
кыкетӥзэ сюмыкез
бушатӥзы. Радиоын вальслы
тупась гур сётэмзы бере
эктыны потӥзы. Комнатаын
ӟоскыт ке но, соослы кроватьёс
вискын но инты тырмиз.
Поръяны гинэ ӧз - берганы
но! Нош Вася таиз ласянь
усточи вылэм: эшсэ бубылиез
сямен, туж капчи ширъятӥз.
Эсьма, Педотчалэн лулыз
ик ыректылӥз. Та вакытэ со,
музъем вылысь тылобурдо
выллем ӝутскыса, инметӥ
лобаз кадь. Кемалась ни вал,
кемалась Педотчалэн тазьы
мыло-кыдо ширъямез. Ма,
кинэн-о? Скалъёсыныз шат?
Гуртысь клубе но потӥськод
ке, вальсэз эктӥсь пиос чиньыен
лыдъямон но ӧвӧл
(шонергес луоз, дыр, бергасьёсыз
шуид ке). Крезьгуръя
поръясьёсыз гинэ вань. Ма,
кытысь-о луозы? Гуртын, городын
сямен, эктонъя кружокъёс
ӧвӧл. Куд-огез маке
быгатэ ке, со ини ас кожаз
дышетскемезлэн емышез.
Педотчаез эктон пичи дырысеныз
ас бордаз кыскылӥз.
Нырысь со юон дырысен
эктӥсьёслэсь адӟем карылӥз.
Собере, телевизор басьтэмзы
бере, отысь ширъясьёсты
адӟыса, шоразы синъёсыныз
мертчиськылӥз…
Гужемзэ гуртазы чиганъёс
вуылӥзы. Соос
котьку сямен шур дуре
интыяськылӥзы. Бадӟым
выж доры. Татын ӵошкыт
возез но вань. Отчы соос кӧня
ке шатёръёс пуктылӥзы.
Пыласькылӥзы. Сиён
пӧзьтылӥзы. Ӝытъёсы, гитараен
шудыса, кырӟаллязы,
эктылӥзы…
Гурт пиналъёс чиганъёсты
учкыны Таган вырйылэ
ветлылӥзы. Татысен, гурезь
йылысен, шур сьӧрысь
чиганъёс кипыдэсын кадь
адӟисько. Та шумприч артистъёслэн
шудэм, эктэм,
кырӟамзылы Педотча (ма,
солэн эшъёсыз но) пумтэм
синмаськылӥз. Кыӵе соос
мылкыдоесь! Гитара шудэм
улсын, асьсэ кылын кырӟаса,
турлы буёло бубылиос сямен,
дэрем сӧзулъёссэс сопала но
тапала шонало. Туж капчи
поръяло, экто. Малпалод,
соос шур дурысь ярдурысь
возь вылын ӧвӧл - сцена вылын
ас быгатэмзэс возьмато…
Та адӟемъёссэс Педотча
но солэн эшъёсыз улытозязы
уз вунэтэ. Бертыса соос
асьсэ коже чиганъёслэсь эктонзэс
дышетыны азбаразы
выризы. Нош анай-атайёссы
нылпиоссылэсь та быгатонзэс
волятон понна юон
дыръёс дыръя эктэмзэс сцена
вылын но возьматыны
курылӥзы…
Берло эктыны дышетскем
потонэз Педотчалэн
уката аляз. Но мар кароз со,
гуртысь школаязы эктонлы
дышетӥсьсы ӧй вал ке. «Макем
шудоесь город пиналъёс:
соослэн котькыӵе быгатонлыксэс
волятыны луонлыксы
вань», - ӝожомыса, бӧрдэмез
ик потыса, малпалляз нылаш.
Ярам ай, интернатысь
Галина Потаповна воспитательзы,
егит нылмурт, школаез
йылпумъяса гинэ вуэм
маке, Педотчалэсь мылкыдзэ
тодыса, вальсын берганы
дышетӥз. Кызьы гинэ
ӧз выре соос кӧня ке нылъёсын!
Выж вылэ мелэн треугольник
лэсьтыса но, пуконэз
асьсэлы эш, куз карыса,
ӟыгыртыса но…
Озьы-а, тазьы-а, но выремез,
курадӟемез Педотчалэн
юнме ӧз луы: со вальсэз эктыны
дышиз. Зӥр бергакуз, лулыз
ик шумпотыса ыректэ.
Зэм, усто бергатӥсь эш шедьтыны
капчи ӧвӧл. Бадӟым луэмез
бере но таӵе шуг-секыт
сюлэмшугъяськытӥз Педотчаез.
Сыӵе быгачи пиос гуртын
ӧвӧл! Луо ке, пумисько ке
куддыр, со нылаш понна сьӧд
пилем улысь потэм яркыт
шунды ини.
Санаторий палатаын берганъяз,
эктонъяз Педотча
пичи дыраз, егит вакытаз
вуылӥз кадь. Сыӵе солы каньыл,
умой вал. Со вакытэ
ик, оло тодэ ваёнэзлэсь, оло
ширъяменыз йырыз но поромиз.
Соин эктонзэ куспетӥ
карыса но лулзэ лэзьыса,
кровать вылэ уськытскиз.
- Кемаласьгес тазьы бергаме
вал ни, эсьма, йыры ик поромиз…
Яке та шампанэд-а
йырам шуккиз, - серекъя Педотча.
Вася, ӵыж-горд луэм нылкышно
шоры паляса, шуэ:
«Кемаласьгес ӧд эктылы ни,
дыр?»
- Озьы. Вунэтӥ ни, ку
сыӵе шудо дыры вал… Али
выльысь егит вакытам
берытскылӥ кадь. Сыӵе умой
вал мыным, бордысьтым ог
дасо аре ик усиз, оло…
- Ма, зэмзэ но тон егит.
Дас тямыс аресъем кадь адскиськод
ай, - ушъяны выриз
Вася, ныллэн синдурысьтыз
но кымысысьтыз векчи кисыриоссэ
синйылтытэк кадь.
- Ну, тон вералод ке вералод
ини. Шу на ай: вӧзад дас
тямыс аресъем нылэз султытыса
юад ке, кудзы егитгес?
Монэ, монэ пиналгес лыдъялозы.
Озьы-а?
- Озьы, - кепыраса мар вазьыны
ёрмиз Вася.
Но Педотча вӧзы пуксьыса,
нылкышнолэсь ужын сюрмем
бадӟымесь кужмо киоссэ
кутыса, воргорон дыдык сямен
гуэктыны ӧдъяз: «Чебере тон
мынам, четлыкын возем бурдое,
эрикез адӟылымтэ пислэге.
Вӧлъя, вӧлъя ни бурдъёстэ!
Тон али эрикын, тон али лыз
инмын! Лобӟы, лобӟы, дыдыке,
ас шудэд-буред доры?»
- Кытын ай бон со мынам
шудэ-буре? - серекъяса юа
Педотча.
- Тани со, тани вӧзад, -
пальпотэ Вася. - Нёшто уд
адӟиськы? Кызьы ай шуэ вал
Сергей Есенин? «Лицом к
лицу лица не увидать». Озьы
ик, иське, тон но шуддэ матысен
адӟыны шугомиськод…
Вася Педотчаез ас палаз
каллен гинэ берыктӥз
но льӧль эмезь кадь ымдураз
чупыштӥз. Нылмурт
ӧз палэнскы. Солы кельшиз,
лэся, ческыт пиосмурт
ымдур. Эсьма, ачиз
но шӧдытэк, синъёссэ кыниз.
Быдэс мугортӥз, чечыен
пӧсь чай юэмез бере
кадь, пӧсь-шуныт вӧлскыны
ӧдъяз. Оло, шампан вина
куд-а озьы улӟиз но, вир
интые лулсэртӥз ветлыны
кутскиз? Котьма медло но,
Педотчалы усто, ческыт-ческыт…
Соин ик со ачиз но
пиосмурт ымдуръёс борды
кыстӥськиз, сяська мӧле муш
кадь мертчиськиз…
УЛОН ЧИГВЕСЬЁС
Ондыръян
Нина ЕРМОКИНА
«Мар ай та таӵе ӵукна
ик сюлэм шурдэ? Уг валаськы:
оло со шумпотэ, оло кышка»
шуыса, Ондыръян азбарез
кузя ветлэ. Туннэ пудо поттон
но чыры-пыры гурт ужъёс сярысь
кенеш луоз. Отчы потыны
дасяське. Кышноез, Овера,
капкаетӥ потыкуз, кеськиз на:
- Пастук потон нуаналэз
тод. Пудо сиёнмы бырон калын
ни. Кема эн ветлы!
Кенешын Ондыръян ымзэ
уз усья. Аслаз гуртаз ке
улысал, оло, мар ке но вераны
дӥсьтысал ик. Но со та
Изгуртын пыртос чотын улэ.
Пиосмуртлы 47 арес тырмиз.
Оло тырмиз, оло лобӟиз,
оло ышиз. Созэ Ондыръян валаса
ик ӧз вутты. Вина, тамак
мугорзэ но, ымнырзэ но дырызлэсь
вазь чабырӟытӥзы.
Синъёсыз пожектӥзы, ымнырзэ
векчи кисыриос чонари
вотэсэн кадь шобыртӥзы.
Ваньмыз улоназ ӟеч кадь.
Кыкетӥ кышноез чупрес, капчи
мылкыдо, ужась. Секыт
ужъёс бере виназэ но сётыны
вала. Корка пуктӥзы. Ул но
ул. Нош малы ке, сюлэм весь
пирсэкъя, гыбда. Кыӵе ке пычей
сюлэмаз каръяськемын
кадь. Вина юыкуз но, тамаксэ
кыскыкуз но, со весь сюпсе.
Уг вала воргорон малызэ, уг.
Кенеше люкаськемъёс
ог кызё мында вал ни.
Ӟусъёс ӧвӧлэн кузесь, зӧ-кесь
пужымъёс вылэ пуксьылӥллям.
Ог дасо аръёс кыллё
ни та коръёс. Зор но
шунды гордмыт сулзэс бездытӥллям,
сисьтӥллям но
уськытӥллям.
Малы ке нокинлы но та
коръёс кулэ ӧз луэ. Коть
пулы ке но кин ке вандэ вал,
кӧня ке кинлы ке шунытсэс
сётысалзы...
Пиналгес депутат сельсоветысь
адямиен тылпулэсь
утиськон, жуг-жагез утялтон
сярысь верасько.
Шуак вань калык йырзэ
огпала берыктӥз. Бускель гуртысь
лыктӥсьёс вань. Веськрес
мугоро кышномурт вылын
льӧль атласлэсь удмурт
дэрем. Шунды сиос дэрем кильымъёс
вылын тулыс эктонзэс
экто-шудо. Векчи пужыё
кашемир кышетэз ӝикытак
керттэмын, чагыр айшетэз
инбамен эчеше. Вӧзаз ик солдат
пи. Кителез веськрес мугораз
лач-лач пуке. Гадь вылаз
трос бырттэм значокъёсыз
синмез мальдыто.
- Ма, Гали, тон лэся ук? -
вазиз Лида апай.
- О-о. Тани Сашике армиысь
бертӥз но поездэ дыртӥськом,
военкоматэ потӥм, - сэзь вамышъяса
ортчизы шудо анай
но пиез сюрес кузя.
Люкаськем калык огогеныз
сипыртыны кутскиз.
Вераськисьёсты уг кыло ни.
Ондыръян но тамаксэ
кенжытӥз. Ымнырыз тӧдьыалэс-пурысь
луиз. Йырзэ
кошкисьёс сьӧры берыктыса,
со туж кема учкыса сылӥз.
Галя - солэн нырысетӥ кузпалыз,
Сашик - пиез.
Галязэ Ондыръян 2 пичи
нылпиен кельтӥз. Кутӥз но
кошкиз мукет кышномурт
доры. Малы кошкемзэ юад
ке но, ачиз но валэктыны уз
быгаты.
Куд-ог дыръя сюлмыз
шурдылӥз ке но, мазэ-созэ
воргорон сямыныз ӧз валалля.
Ӧз кылылы куштэм
кышноезлэсь уйёсы лушкем
бӧрдэмъёссэ, ӧз валалля
пичи нылпиосызлэсь
«атай» кыллэсь вожъяськемзэс.
Олокытысь шуак ыркыт
тӧл пельтӥз. Сьӧд пилем
потӥз. Жаляк зор кисьтыны
кутскиз. Малы ке но со
тулыс зор кадь небыт, няськыт
ӧй вал. Кезьыт, мугорез
юзыр-кезьыр карись...

8
№
70 (25685)
2018-тӥ ар 18-тӥ куарусён
инГОЖ
КНИГА ӜАЖЫ
Куасчиос данъяло шаермес
КНИГА ӜАЖЫ
Анастасия ШУМИЛОВА
2013-тӥ арын ортчиз
ШУД-лэн - Удмурт драматургияя
школалэн -
нырысетӥ семинарез.
Сое радъяз Туала драматургияя
но режиссурая
центр. 5 ар ортчыса,
лыдӟисьёс кие вуиз
«ШУД» бичет (12+).
Книгае пыртэмын 6
авторъёслэн ужъёссы.
Котькудӥз пьеса 2 кылын -
ӟучен но удмуртэн - печатламын.
Удмурт кылэ текстъёсты
берыктӥз Лукерья Шихова.
Павел Зорин - драматург,
режиссёр но ШУД-лэн ректорез
- книгалэн азькылаз вера,
5 ар ӵоже школае ог 200 адями
пыриськиз шуыса. Та дыр
куспын 50-лэсь ятыр пьеса
Георгий ГРЯЗЕВ,
«Удмуртия» издательствоысь
валтӥсь редактор
«Удмуртия» издательствоын
алигес потӥз
«История лыжного
спорта Удмуртии»
книга (12+). Авторез -
куасэн бызьылонъя но
тол полиатлонъя спортъя
мастер, куасэн бызьылыны
яратӥсьёс
(любительёс) пӧлын
дуннелэн 5 пол чемпионэз
Валерий Мусалимов.
Книгаын 7 главаез,
котькудӥз материалъёсын
но туспуктэмъёсын узыр.
Ваньмыз кутске Быдӟым
ож вакытысен. Сыӵе секыт
вакытэ но пӧртэм
ӵошатсконъёс ортчылӥзы,
нош собере шаерысьтымы
куасэн бызьылонлэн
ӝужанэз но сяськаян вакытэз
вал. 1950-тӥ аръёслэн
шоразы асьме элькунмес
кунгож сьӧрын данъяз,
Олимпийской шудонъёсын
азвесь но бронза медальёс
утӥз Радья Ерошина (ныл
фамилиез Нургаева). Италиысь
Кортина д , Ампеццо
(1956-тӥ ар) но США-ысь
Скво-Вэлли (1960-тӥ ар)
городъёсын ортчем тол
Олимпиадаосын Ижевскын
вордскем нылаш кужмо
спортсменъёс пӧлы
шедьылӥз. Радья Ерошина
- Удмуртиысь нырысетӥез
спортсмен, Олимпийской
призёр.
Собере дуннеысь ӧсъёс
усьтӥськизы кадь. Туж яркыт
кизили югдӥз 1972-
тӥ арын: Галина Кулакова
Япониысь Саппороын ортчем
Олимпиадаын 3 зарни
медаль утӥз. Отӥяз тол
Олимпиадаосысь но дуннелэн
чемпионатъёсысьтыз
пӧртэм медальёсын доразы
бертӥзы: Тамара Тихонова,
гожтэмын, лыдӟемын, сэрттэмын-пертчемын.
Кутскись драматургъёсын
ужаз Валерий Шер-
В. Мусалимов книгаеныз.
Шудо драматургъёс
Владимир Никитин, Максим
Вылегжанин, Дмитрий
Япаров, Юлия Шамшурина,
Сергей Крянин.
Автор нимысьтыз пусъе
элькунысьтымы инвалид
спортсменъёслэсь но вормон
басьтэмъёссэс. Соос нырысь
ик герӟаськемын Сочиын
ортчем Паралимпиадаен.
Отысь медальёсын
бертӥз Владислав Лекомцев,
озьы ик Ванкуверын
но Сочиын ортчем шудонъёсысь
азвесь но бронза медальёсын
бертӥз Владимир
Кононов.
Валерий Мусалимов
паймытӥз утчаськыны быгатэменыз.
Со шедьтэм Можга
ёросысь Выль Юбера гуртын
вордскем Алевтина Елесинаез
(Яковлеваез). Спортъя
дано мастер, Паралимпийской
шудонъёслэн 2 пол
чемпионказы Екатеринбургын
улэ, оло, соин но нимыз
Удмуртиын чылкак вунэтэмын
ни вал. Табере Алевтина
Елесина сярысь ӟечгес тодыны
луоз.
Книгаысь одӥг люкетэз
сӥземын элькунысьтымы
Гурт тол шудонъёслы. Со туж
шонер лэсьтэмын. Куасэн
бызьылонъя вормонъёсты
лыдэ басьтоно ке, тросэз соос
герӟаськемын гуртысь потэм
спортсменъёсын. Кызьы
пусъе автор, Удмурт шаермы
котьку но мед данъяськоз
куасэн зол бызьылӥсьёсын,
со понна умой базаос кылдытоно,
та удысэ тросгес пиналъёсты
кысконо, пӧртэм
ӵошатсконъёс ортчытъяно.
Таӵе книгаос бордын ужаса,
мылкыд ӝутӥське, данъяськон
пуроме, автор понна
шумпотон пачылме. Малпасько,
та выллем ужъёсын
«Удмуртия» издательство
азьланяз но шумпоттоз
на.
гин. Театрен со кемалась кусып
возе ини - Сарапулын
вордӥськем но будэм актёр
но драматург дышетскиз
Екатеринбургысь быдэс дуннелы
тодмо режиссёрлэн Николай
Колядалэн курсъёсаз.
Ижкарын улӥсьёслы Валерий
нырысь ик тодмо «Колбаса/Фрагменты»
но «Шлюхи
не огонь» пьесаосыныз,
кудъёссэ пуктӥз егитъёслэн
Les Partisans театрзы.
В. Шергинлэн семинаръёсаз
ветлэм сяна, школае пыриськисьёс
пумиськылӥзы
пӧртэм каръёсысь но кунъёсысь
дано драматургъёсын.
Бичетэ пырем мукетыз
автор - Миша Соловьёв
- Дэри ёросын следователь
луыса ужа. Солэн «Деликатес:
удмуртская история преступлений»
пьесаезъя спектакльлэн
премьераез ортчиз
2018-тӥ арын Les Partisans
театрын. Бичетэ «еж» авторъёслэн
ужъёссы но пыризы
- шуом, Женя Буглеевалэн
«Дугдэ» пьесаез (али нылаш
Ижкарысь школаын дышетске).
Павел Зорин пусъемъя,
школа ужа Удмуртиын
выль драматургъёсты будэтон
понна - нош ӟеч емыш
басьтон вылысь нырысь ик
музъемез гыроно-утялтоно.
Оскиськом: школалэн ужамез
но «ШУД» бичетлэн потэмез
шаерысьтымы драматургилэсь
туссэ умой пала
воштозы, сое узыргес но яркытгес
карыса.
КЫЛПУМЫСЬ
Яратон уг вормы
Ольга ВАХИТОВА
Иван Гончаровлэн
малпам героез -
Илья Обломов - асьмелы
пичи дырысенымы
тодмо.
Школа дырысен тусыз
син азьын: «Несколько дней
из жизни И. И. Обломова»
фильмын сое шудӥсь
Олег Табаков кадь питыркотыр,
быдэс нуналъёсын
вушйылыса кылле диван
вылын. Ӵукна сайка но
малпаськыны кутске:
Обломовкае бертылоно
вал, отысь улонэз туала
сямен радъяно вал... Таин
кӧтыз тыре но, диван
вылысьтыз султылытэк
ик, нош ик умме усе, вӧтъёс
адӟе. Ӵапак со вӧтъёсысь
ик школа дырысен асьмеос
тодӥськом, малы Обломов
сыӵе азьтэм будӥз. Но быдэ
вуись пинал малпаське-а,
кызьы будэтоно нылпиез?
Соин ик шуиськом собере:
Иван Гончаров мӧзмыт
роман гожтэм.
Зэмзэ ке, та произведение
пиналъёсты шонер
будэтон сярысь вылымтэ
- чылкыт, чебер яратон
сярысь. «Обломов» романлэн
(12+) куиньмос люкетэз
сӥземын Илья Ильичлэн но
Ольгалэн кусыпъёссылы.
Кисьтэм-басьтэм чудовище
но красавица!
Зӧк бӧчы кадь вырӟылӥсьтэм,
кык ангесо Обломов
пушкын 30 арлэсь кема ини
ватскыса улэ ӟеч дышетскем,
адямиез валась но
жалясь ненег воргорон.
Солэсь кӧмзэ пилёно гинэ!
Сыӵе вылӥ малпанэн
Обломов шоры учкылыны
кутске Ольга - котыр
ласянь синмаськымон ныл.
Сайкатыны гинэ
шуыса Обломов борды
басьтӥськем нылаш солы
мур синмаське. Илья
Ильич но Ольгаез яратэ,
но кыӵе ке эли-кеби
яратонэн: ялан сюлмаське,
нылаш калык синмысь
медаз усьы шуыса, асьсэос
ог-огзы борды йӧтскыны
ик кышкало ке но. Туала
нылкышно сэректысал
ини воргоронлэн сыӵе
небыльток луэмезлэсь. Нош
Ольга сое вала, калык пӧлы
ӵемгес поттаны выре,
книга лыдӟытэ, Обломовкае
бертыны ӝутка... Но
чудовище пушкысь принц
озьы но уг вордскы...
№ 70 (25685)
2018-тӥ ар 18-тӥ куарусён (сентябрь)
1915-тӥ арысен 1917-тӥ арысен 1918-тӥ арысен 1918-тӥ арысен 1930-тӥ арысен 1943-тӥ арысен 1992-тӥ арысен
Учредители:
Государственный Совет
Удмуртской Республики
Правительство
Удмуртской Республики
Главный редактор
З. К. Рябинина
Адрес редакции-издателя:
426008, г. Ижевск,
ул. К. Маркса, 274
www.udmdunne.ru
e-mail: udmdunne@yandex.ru
Газета отпечатана в АО
«Ижевский полиграфкомбинат»
(426039 г. Ижевск,
ул. Воткинское шоссе, 180)
Телефоны:
73-33-42, 89511953765 - приёмная, реклама,
зам. гл. редактора
73-33-46 - отв. секретарь
73-33-43, 89511953766 - корреспонденты
Индексы: П 5806, П 5001
Тираж номера 1000
Заказ № 462
Объём 2 п. л.
Цена свободная
Подписано к печати - 18.00
По графику - 18.00
Мнение авторов не всегда совпадает с
мнением редакции
Использование материалов допускается
только с разрешения редакции
Материалы, публикуемые с пометкой
«Д» и «Реклама», печатаются на договорной
основе.
Газета зарегистрирована Управлением
Федеральной службы по надзору в сфере
связи, информационных технологий и
массовых коммуникаций по Удмуртской
Республике
Регистрационный номер
ПИ №ТУ18-00646
Рекомендовано для чтения с 12 лет