ud#40 (25850)

№40 (25850)
6 2020-тӥ ар 15-тӥ коньывуон НУНАЛ БӦРСЬЫ НУНАЛ
Ивор куды
АЛНАШ
________
Шыкысын —
кырӟанъёс
Алнашысь лулчеберетъя юрт,
Удмуртилэн 100 ар тырмонэзлы
сӥзьыса, мытӥз «Даур шыкыс»
конкурс.
Чакламын 3 номинация: «Анай-атай гуръёсмы»
(вашкала удмурт кырӟанъёс, вӧсяськон гуръёс),
«Икча-кукча» (нылпиослы кырӟанъёс, шудонъёс,
мадиськонъёс), «Ческыт мед кошкоз» (удмурт сиён-юонъёсын
рецептъёс).
Отчы пыриськыны быгато вань мылкыд карисьёс.
Со понна номинацилэн темаезъя видео гожтоно
но сое вотэсын аслад бамад поттоно, конкурслэсь
но номинацилэсь нимзэ хештегын пусйыса. Вуэм
ужъёс фонотека кылдытыны юрттозы, калыкез
асьме культураенымы тодматозы.
ВАВОЖ
________
Пӧяськонлэн кукыз
вакчи
Черкогуртысь быдэ вуымтэ 3 пиосты
янгыш каро мурт машинаен
ворттылэмзы понна.
Кылем арняе полицие вазиськиз
57 аресъем воргорон, уйин капка азьысьтыз
машинаез ышиз шуыса. Шараяськиз: машинаен
ворттылӥллям воргоронлэн сюрпиез но солэн
эшъёсыз. Пиослы 14-16 арес гинэ. Мурт автомобилен
соос кыдёке вуиллямтэ — сюрес урдсы кошкиллям.
Та йыртэманзылэсь «пытьыоссэ» согон
вылысь пияшъёс машинаез тэле ватӥллям.
Табере быдэ вуымтэ пиос 7 арлы пытсэт сьӧры
ӝимыны быгатозы.
ВОТКИНСК
________
Ворттылыны яра
Туэ Воткинскын «Кышкыт луисьтэм
но ӟеч сюресъёс» национальной
проект улсын 11 сюресэз тупатыны
кулэ. 5-етӥз ворттылыны
яра ни.
Ӵапак али йылпумъяськиз Пролетарской
ульчаез выльдон, отын выль асфальт
вӧлдӥзы, сюрес вамен потыны «зебра» лэсьтӥзы.
Кызьы пусйизы эскерисьёс, уже ӟеч материалъёс
гинэ кутэмын вал, асфальт кемалы окмоз.
— Туэ тупатӥськомы нуналмысь кулэ луись сюресъёсты,
— вераз Воткинскысь Общественной
палаталэн ёзчиез Лев Рогозин, — кылсярысь,
Пролетарской ульчаетӥ заводэ ужаны ветло, Орджоникидзе
но Энгельс ульчаосын котьку трос
машинаос ворттыло, угось татын трос магазинъёс,
вокзал, школаос, нылпи садъёс интыяськемын.
ГЛАЗОВ
________
Усто студентъёс
Глазовысь пединститутысь егитъёс
«Арлэн студентэз — 2020» вожвылъяськонын
Удмуртилэсь данзэ
утёзы. Конкурсэ быдэс Россиысь
студентъёс пырисько, финалэз ноябре Москваын
ортчоз.
Удмуртиысь студентъёсты быръён понна нимысьтыз
ӵошатскон радъямын вал, со 8-тӥ октябре
йылпумъяськиз, ӵапак соку вормисьёслэн нимъёссы
тодмо луизы.
Уноез — Глазовысь. Диана Сидороваез быгатӥсь
студентэн лыдъязы, нош Данил Прошинэз — усто
спортсменэн. Озьы ик Глазовысь институт вормиз
4 номинациосын.
ДЭБЕС
________
Мыжыкъёсын
шонаськиз
Райцентрысь 48 аресъем кышномурт
5 ар колониын визьмаськыны
быгатоз полицейскоез мыжгемез
понна.
Сентябрь пумын Дэбесысь полицие
жингыртӥсь луиз. Кышкатскем нылкышно
ивортӥз, солэн квартираяз мурт кенак пыриз
шуыса. Полицейскойёс ӝегатскытэк вуизы ӧтись
доры. Адӟизы: жингыртӥсь мурт дорын юр-яр каре
кудӟем кышномурт. Югдурез утисьёс 48 аресъем
куноез кошкыны косӥзы. Нош керетӥсь кенак
буйгатскыны ӧз но малпа, со кышномурт полицейскоез
мыжгиз. Жугиськыны кутскем йыртэмасез
зӥбломытӥзы мукет полицейскойёс.
ИЖ
________
Мурт коньдон гочатӥз
Ижысь 36 аресъем кышномурт
2 ар мында сӧсыр муртлэн коньдонэныз
кузёяськиз.
Нылкышно ужаз соцработник луыса
Инвалидъёслэн но пересьёслэн элькун интернатазы.
2 ар ӵоже кышномурт улӥз мурт коньдон чотын. Со
понна со сӧсыр нылашлэн телефоназ банклэсь онлайн
приложенизэ пуктӥз, вань парольёссэ тодӥз.
Висись муртлэсь пенсизэ келялляз аслаз счётъёсаз.
Нош отӥяз воксё эрказмиз: инвалидлэн коньдонэныз
машина басьтыны ӧдъяз — автосалонэ вазиськиз.
Оглом 1 миллион 100 сюрс манетлы узырмыса
вуиз. Табере со Уголовной кодексысь 2 статьяя
оглом 10 арлы пытсэт сьӧры шедьыны быгатоз.
КИЯСА
________
5 медален бертӥзы
Районысь мӧйыослэн командазы
3-тӥ интые потӥз Удмуртиысь
спортлы но тазалыклы сӥзем фестивальын.
Таӵе ужрад ортчиз Арлыдоослэн
калыккуспо нуналэнызы валче.
Пандемиен сэрен ӵошатскыны лэзизы 64 аресозь
мӧйыосты гинэ. Котькуд спортсмен коронавируслы
анализ сётоно луиз на. Озьы киясаос 12 кузя
вожвылъяськыны ветлӥзы, спортысь 6 амалын кужымзэс
мертазы.
Дартсын 2-тӥ интые потӥзы Аркадий Беспалов
но Вера Ромашина. Пневматикая винтовкаен
ыбылӥськыса, азвесь медаль утӥз Галина Тихонова.
Та дисциплинаын ик 3-тӥ интые потӥз Владимир
Собинов. Нош Василий Семёнов уяса бронза утӥз.
МОЖГА
________
Парсь интые — скал
«Россия» хозяйство пудоезлэсь
лыдзэ йылтон бордын мылокыдо
ужа. Азьвыл парсь возён
гидзэс паськытатӥзы, выль выж
кисьтӥзы, буязы, тӥрлык вуттӥзы.
Чылкыт, вӧл-вӧл гидзэс та нуналъёсы усьтӥзы. Табере
татын 208 скалэз думытэк воземзы луоз. Кыед
музъеме медаз пыӵа шуыса, 35 сюрс кубометрлы
лагуна лэсьтӥзы.
Хозяйстволэн кивалтӥсез Аркадий Вершинин
пусъемъя, али басьтӥськизы 1 сюрс йырлы ферма
пуктыны. Фундамент кисьто ни. Комплекс вуоно
арын ужаны кутскоз шуыса чаклало. Та йӧл поттонзэс
эшшо но йылтыны юрттоз. Туэ 9 толэзь
ӵоже котькуд скаллэсь шорлыдын ог 6 сюрс килограмм
йӧл кыскыны пӧрмытӥзы ни.
ПИЧИ ПУРГА
________
Жаг вылын будоз
ожо
Пичи Бӧдья гурт вӧзысь жагез
утялтӥзы «Экология» нацпроектлы
луыса.
Районысь тужгес бадӟымез жаг
куян инты кылдӥз 1990-тӥ аръёсы.
2013-тӥ арын сое ворсано шуыса решение
кутэмын вал. Та дыр куспын 4,7 гектар музъем
вылын кылем-мылемъёс 4,5 метр зӧкта луизы.
Оглом 60 сюрс тонна мында жуг-жаг люкаськиз.
Табере жаг куян интыын возь луоз. Свалкалэсь
котырзэ горд сюен юнматӥзы — со понна 117
сюрс кубометр сюй ворттӥзы. Кузяз тыремын гумыос
— отӥ биогаз потоз. Жаг вылэ эшшо 23 сюрс
кубометр сюй нуллэмын.
САРАПУЛ
________
Удмуртиетӥ шудыса
вамышъяло
Удмуртиысь дышетӥсьёс понна
радъяськиз «Мозаика цифровых
образовательных ресурсов» вожвылъяськон.
Сарапулысь 5-тӥ школаысь дышетӥсь Карина
Артуровна Чечёткина отын возьматӥз «Ошмесо
шаер» ӝӧк выл шудонзэ. Шудон возьматэ Удмуртилэсь
тунсыко интыоссэ: нылпиос, шаермылэн
картаез вылтӥ «ветлыса», пӧртэм ёросъёсы вуыло,
соослэн аспӧртэмлыко интыосынызы тодматско.
Шудон чакламын 10-13 аресъем пиналъёслы.
Дышетӥсьёс понна та вожвылъяськон 2006-тӥ
арысен радъяське ни. Та аръёс ӵоже 5 сюрслэсь
трос дышетӥсьёс урокъёслы дасям ужъёссэс
возьматӥзы ни.
ЭГРА
________
Югыт луиз!
Райцентрысь эшшо одӥг интыын
югытгес луиз.
Ямщиклы сӥзем памятник дорысь
юбоосын тыл ӝуатскиз.
Та синпелет кылем арын гинэ
кылдэмын, но котыраз трос калык
люкаськылэ ни. Татын ӟусъёс пуктылэмын,
брусчатка вӧлдэмын. Но та дырозь пеймытгес
вал. Табере уж быдэсмиз «Формирование комфортной
городской среды» федерал программалы
луыса.
Со сяна, туэ тыл ӝуатскиз Пролетарской, Шевченко,
Парковой ульчаосын. Юбоосысь лампаос
воштэмын Советской но Труд ульчаосын. Посёлокын
улӥсьёс куремъя воштэмын 60 светильникъёс,
эшшо 20-зэ матысь толэзе пуктозы.
ЯР
________
Шудон интызы ӟеч
Бармашурын нылпиослы шудон
площадка пуктӥзы.
Та ужез быдэстон понна гуртоос мыло-кыдо
пыриськизы «Инициативное бюджетирование»
проектэ. Со понна 67 сюрс 500 манет
люказы. Тамында ик коньдонзэс висъязы гурт
поселениысь ужбергатӥсьёс но депутатъёс.
Эшшо кӧня ке коньдон чакламын на вал интыысь
бюджетын. Озьы 202 сюрс 500 манет вӧзы
республикалэн бюджетысьтыз 240 сюрс манет
вуиз на.
Табере Бармашурысь пиналъёслэн шудон интызы
юн усто. Матысь дыре отчы нимысьтыз «шобрет»
вӧлдыны чакламын на.