dart №3

№12 (25924)
16 2022-тӥ ар 31-тӥ южтолэзь
«Даур ТВ»
Малпанъёсты зэматыны — 2 ар
8-тӥ оштолэзе 2 ар талэсь
азьло кылдӥз уй но,
нунал но ужась удмурт
интернет-телеканал.
«Даур ТВ» вордӥськем
нуналзэ эшъёсыныз
ӵош пумитаны дасяське,
учкись ёссэ Эшъяськон
юртэ «Пуксьы, кык!»
концертэ (0+) ӧте.
2019-тӥ арын Эшъяськон
юртысь методистэз, кырӟасез,
кылбурчиез Богдан Анфиногеновез
Удмуртилэн Тӧроез
Александр Бречалов «Признание»
премиен пусйиз.
Богданлэн кемалась потэ ни
вал, удмуртъёслэн уй но нунал
ужась телевиденизы мед
кылдоз шуыса, соин ик премия
басьтэмез бере кема ик
ӧз малпаськы, малы та коньдон
мыноз.
— «Даур ТВ» каналэз кылдытыкум,
уг но тодӥськы вал,
кызьы «ВКонтакте» бамын
меӵак эфир нуоно, — вераз
Богдан Анфиногенов. — Мон
асме нылпиен ӵошатӥсько:
со уяны уг быгаты, нош сое
вуэ кушто, «дышетскы!» шуо.
Мон кышкасько вал, но асме
буйгатъяй, дышетско, быгато
шуыса.
Телеканаллэн эфираз мынӥзы
вотэсысь люкам удмурт
видеоос. Нош сӥзьыл Эшъяськон
юртын кылдӥз «Даур ТВ»
студия, татын ваньмыз зэмос
телевидениын кадь: тылъёс,
камераос, микрофонъёс,
режиссёрлэн пультэз… Озьы
«Удмурт арня» передачаын куноын — кырӟась Светлана Ручкина.
егит удмурт азьветлӥсьёс асьсэ
передачаоссэс но лэсьтыны
кутскизы.
— Нырысьсэ меӵак эфире
потӥмы «Чеберай шоу» передачаен,
— тодаз вае Богдан. —
Сое нуизы «Чеберай» проектэз
улонэ пыӵатӥсь нылъёс. 20 час,
техникаез тодӥсь-валась муртъёс
Эшъяськон юртысь кошкизы
ни. Эфир кутскытозь,
кылиз 5 минут, нош милям
номыр уг ужа! Мырдэм валамы,
кызьы тупатоно. Эфирмес
беромыса кутскимы… Техникаен
герӟаськем шуг-секытъёс
пумиськыло. Кемалась ик
ӧвӧл «Бур ӵукнаен» передачаез
нуисьёслэн — Эшъяськон
юртысь методистъёслэн Алина
Черновалэн но Августина
Михайловалэн — куараоссы
ӧз кылӥське. Микрофонъёсты
тупатыны ӧм пӧрмытэ но
озьы ик ужамы ни, учкисьёсмылы
плакат суредамы, отчы
«Куараез ӧвӧл, но ми тӥледыз
яратӥськом» гожтӥмы.
Богдан тау каре, вӧзаз
юрттӥсьёс но туж ӝог кылдӥзы
шуыса: спонсоръёс, Эшъяськон
юртысь ӧнерчиос, передача
нуисьёс.
Ачим «Даур ТВ» кылдэм
бере ик малпай, кыӵе умой луысал,
татын егитъёс асьсэ передачаоссэс
но лэсьтылысалзы
ке, «Вечерний Ургант» выллем
удмурт шоу кылдысал ке. Богдан
монэ «Удмурт арня» передачаез
нуыны ӧтиз но, воксё
малпаськытэк, «я!» шуи. Передачаез
кутскимы журналистэн
Александр Бикузинэн нуыны.
Арнялы быдэ тунсыко куноос
эфире вуыло. Шумпоттэ,
шаерысьтымы дано артистъёс,
журналистъёс дорамы мылокыдо
лыкто шуыса, егитъёслэн
кужыменызы кылдытэм
удмурт телевидениез урод уг
каро.
Мар но ӧй вал ни эфиръёсамы!
Чакласькомы вал,
«Удмурт арня» часлэсь кема
уз мыны шуыса, но одӥг пол
дорамы куное вуиз психолог
Анастасия Петрова, соин вераськон
туж тунсыко мынӥз.
Александрлэн солы эшшо но
эшшо юанъёсыз кылдылӥзы,
нош мон вень йылын кадь
пуки, дыр ортче шуыса. Озьы
меӵак эфирын 2 часлэсь кема
ужамы!
2 ар куспын «Даур ТВ»-лэн
эфираз уно удмурт клипъёс,
концертъёс возьматэмын,
выль передачаос
кылдытэмын. Али телеканаллэн
«ВКонтакте» оги наз —
10 сюрс пала адями.
— Проектэ ӧз куашка, 2 ар
возиське ни. Шумпотӥсько:
мае малпасько вал, ваньзэ
улонэ пыӵатыны быгатӥ шуыса.
Но куректӥсько, эфиръёсмес
сокем трос адями уг
учкы шуыса, — вера Богдан.
— Та дыр куспын мон котьмалы
дыши, кивалтӥсь интыын
асме оскалтӥ. Мыным
со секыт потӥз, уг яратӥськы
кивалтыны, мае ке радъяны.
8-тӥ оштолэзе Эшъяськон юртын
«Даур ТВ»-лэн вордскем
нуналаз кырӟалозы Светлана
Ручкина, Влад Андреев,
Алина Антонова, Туръялыс,
Антон Белослудцев, Анастасия
Байматова, schoozymade,
bobolenin но Suleme группаос
но мукетъёсыз. Со сяна, ужрадын
луоз басьтыны «Даур
ТВ» суредэн футболка, кружка,
стикер. Вань коньдон мыноз
телеканаллэсь ужзэ азинтонлы.
Нош вордскем нуналэз
бере «Даур ТВ»-лэн выль вакытэз
кутскоз.
— Тыршо ӵемгес возьматъяны
пӧртэм ужрадъёсты, концертъёсты,
— вераз Богдан,
— асьме передачаосмес ӟечгес
каромы, соин ик шергес меӵак
эфире поталомы, дыр. «Ютубысь»
шоуос выллем передачаос
лэсьтыны тыршомы.
________
Мария ЕМЕЛЬЯНОВА
Эшъяськон юртысь методист, оператор Егор Зуев:
________
— Удмурт кылэз уг ке но валаськы, удмурт лулчеберетэз туж
яратӥсько. Богданлэн проектэз мыным тунсыко потӥз. Видеокамераен
ужаме ӧй вал бере, Богданэн ӵош дышетскимы.
Нырысь секыт вал — кадре выж но, вӧлдэт но сюрылӥзы. Но
пумен дышим.
Удмурт кылэз но кӧня ке валаны кутски ни. Куноослэн вераськемзыя
шӧдӥсько ни, кин пала камераме берыктоно. «Даур ТВ»-
ын трос тунсыко передачаос, туж яратӥсько «Ваче пумит»
викторинаез (нуисез — Кузебай Герд нимо гимназиысь дышетӥсь
Артём Малинин), отын выльзэ но тодод, серекъялод но.
Кузебай Герд нимо гимназиысь дышетӥсь Владимир Вахрушев:
________
— Нырысьсэ «Даур ТВ»-ен рос-прос тодматски, «Ваче пумит»
программае куно сямен вуылыкум.
Сокугес ик ӵектӥзы Александр Бикузин интые Маша Емельяноваен
ӵош «Удмурт арня» передачаез нуыны. Малпаськыса кема
ӧй улы, малы ке шуоно трос ӟеч проектъёс пӧрмо мылкыдлы
луыса. Со вань ке, уж но пӧрме. Камера азьын, журналистика
удысын ужалляме вань бере, мон соглаш кариськи.
«Даур ТВ»-лэн, мон малпамъя, туж бадӟым миссиез! Со удмуртъёс
сярысь трос дауръёслы ивор кельтэ, удмурт лулчеберетэз эшшо но
паськытгес, тунсыкогес каре.
Адӟытон
Мем удмуртомем
— Августина, малы
асьмеос печатламы
мемъёсты?
— Интернетэз
кысӥзы ке, соосты
учкыса пуком.
1-тӥ оштолэзе 13
часын Эшъяськон
юртын «Удмуртомем»
адӟытон (12+)
усьтӥськоз. Отчы
интыяськозы «Даур
ТВ» огинын потэм
200 удмурт мемъёс.
Удмурт кылын
мемъёс вотэсын кемалась
вӧлмо ни. Соосты
пӧртэм сямен дунъяло:
кин ке соосты серекъя,
кин ке гожъя, малы кунгож
сьӧрысь «мем» кылэз
татчыозь удмуртэ
ӧм на берыктэ шуыса.
Тунсыко, туала вакытэ
шугъясь кытӥсь
учыръёсты ӵапак мемъёс
пыр возьматыны
ярато шуыса. Кылчиос,
тодосчиос мемъёсты
памфлетъёсын, фельетонъёсын,
сатираен
ӵошато, серемес суредъёсты
туала фольклорен
лыдъяло. Соин
ик адӟытонэз усьтон
ужрадэ ӧтимы Удмурт
кун университетысь
кунгожсьӧр кылъёсты
эскерись дышетӥсьёсты.
Соос литературая урокъёсазы
мемъёслы но саклык
висъяло, пе.
Ми котьку тыршиськомы
дуннеын вӧлмем
трендъёсты удмуртомытыны.
Малпасько,
таиз адӟытон но возьматоз,
удмурт кыл паськыт
кутӥськыны быгатэ
шуыса.
«Удмуртомем» адӟытон
8-тӥ оштолэзёзь
ужалоз.
________
Александр БИКУЗИН