dart №3

№12 (25924)
2022-тӥ ар 31-тӥ южтолэзь 19
Стендап
Ческытсэ утчаса
Мон чакламъя, котькуд
тулыс улонмы
воштӥське: азьло пандемиен
нюръяськимы,
нош али — санкциосын.
Мыным котьку удалтэ:
ӵапак та вакытэ телефон
басьтыны дасяськисько вал.
Эше шудогес вылэм, мынэсьтым
азьло смартфонзэ
выльдыны вуиз. Табере со
смартфон ик 10 сюрслы дуногес
сылэ ни.
Чай юыны малпай: сакыре
бырем. Ярам, малпасько,
кӧня ке кеньыр но басьтоно
на. Потӥ магазинэ — вань
ӝажыос бушесь. Мынӥ мукет
магазинэ. Мар малпаськоды?
Отын но озьы ик!
Окей, гугл, кытысь басьтоно
сакыр, магазинъёсын со
ӧвӧл ке? Вотэс ивортӥз: али
калык кышкатскыса уно сакыр
басьтэ. Улонэ быриз!
Сакыртэк кыли! Табере валамон,
малы трамвайёсын
ӵукна но, ӝытазе но сомында
пересьёс ворттыло, соос
сакыро интыосты утчало.
Эшшо чаклай пересьёслэсь
лайфхаксэс. Соос лавка
дорын возьмаськыса сыло,
товар ваё ке, машинаысь
потӥсь воргоронъёслэсь
лек куараен юало: «Сакыр
вайиды-а, ӧд-а?» Сакырен
чай юэмды потэ ке, тӥ но
озьы ик каре.
Импортозамещение удмурт сямен.
Нош блогеръёслэн но егитъёслэн
мукет кӧтӝожзы — «Инстаграмез»
(Россиын алэмын)
ворсазы. Мылкыдзы куашказ.
Но пинал калык озьы гинэ уг
сётӥськы! Олокытысь олокызьы
VPN ватсэтэз пуктыны
кутскизы. Солэн юрттэменыз,
валаны уг луы, кытысен, кыӵе
кунысен адями социальной
сете пырыны выре. Мынам
иворъёсын лентае, азьло сямен
ик, турлы, табере тодӥсько,
кыӵе эшъёсы телефоназы со
ватсэтэз пуктӥзы.
Тӥ яратӥськоды-а фастфуд
сиыны? Мон — туж зол! Мон
фастфуд диетаын пукисько:
ӟызыёмем интые — куайисько.
Табере веразы, «Макдональдс»
но пытсаськоз шуыса.
Кин ке шумпотэ, нош кин ке,
мон кадез, бӧрдэ. Я, юнме гинэ
эн куректэ! Мон али гинэ отын
кӧтме тыри, туспуктэмме «Инстаграме»
(Россиын алэмын)
поттӥ. Ваньмыз ужа!
________
Никита СОПРИН
Кино
Тузонзэс сэзъялтом...
Туннэ асьмеос кунгожсьӧр кинокомпаниослэсь выль
ужъёссэс адӟыны ум быгатӥське. Самой дырыз Совето
Союз вакытысь киноосты тодамы вайыны. Эшшо но
умой, со кино асьмеос кадь егитъёс сярысь ке.
«Курьер» (16+), 1986-
тӥ ар. Режиссёр — Карен
Шахназаров.
Иванлэн анаез,
школаысь дышетӥсь,
пизэ пединститутэ
пырыны косэ, но Иван
экзамензэ юромо
алама сётэ но научной
журналлэн редакцияз курьер луыса ужаны интыяське. Огпол
со ужезъя Кузнецов профессор доры вуэ. Отысен профессорлэн
нылыныз тодматске. Катя МГУ-ын дышетске, туж чебер
дӥсяське. Егитъёс пӧртэмесь ке но, соослы ог-огенызы тунсыко.
Катялы туж кельше, кызьы Иван, Кузнецов профессорен
вераськыкуз, кылъёссэ уг чакла, алдаське, малпанъёссэ меӵак
вера. Солэн но озьы улэмез потэ: эркын, атаезлэн косъяськонъёсызтэк.
Ӝоген Катя секытэн луэ…
«Берегите женщин»
(12+), 1981-тӥ ар.
Режиссёръёс — Александр
Полынников но
Виктор Макаров.
Флотын ужась
нылмуртъёсты шер
пумиталод. Нош
татын — быдэс экипаж!
«Цик лон» буксирын ветлӥсь Люба, Оля, Галя но Валя егит
морячкаос пиосмуртъёслы палуба вылазы пыдзэс лёганы ик уг
сёто. Озьы ке но воргоронъёслэсь юрттэт куроно луэ ик: вужмем
буксирзэс кемалась воштоно ни. Нылъёс уг тодо, сыӵе буксир
соослы юри сётэмын вал — оло, «кышномурт» улонэ берытскозы
шуыса. Вылаз ик, Женя нимо журналист экипажазы кок луыса
ужаны лыктэ. Пияш уг тоды на, зарезь дурын улон сярысь статья
гожтон понна солы олокӧня пуд макарон сиёно луоз шуыса.
________
Галина ЕВСЕЕВА
Книга ӝажы
Яратон, яратон… Мар меда сыӵе тон?
Мар луоз, литературовед
но психиатр ӵошен
книга гожъяны кутскизы
ке? Клаудия Хохбрунн
но Андреа Боттлингер
«Герои книг на
приёме у психотерапевта»
(18+) книгаязы
пӧртэм вакытъёсысь
произведениослы
аспӧртэмлыко анализ
лэсьто.
Пуштросэзъя книга 5
вакытлы люкемын: античность,
Шор дауръёс, 17-тӥ-
19-тӥ, 20-тӥ, 21-тӥ дауръёс.
Котькуд вакытысь тужгес
тодмо яке тунсыко (куддыръя
тунсыкоез сокем ик
тодмо ӧвӧл) произведениослы
авторъёс психологической
анализ лэсьтӥллям.
Куд-ог йылпумъянъёссы
мыным валамонэсь вал:
шуом, мон вазен ик Ромеоен
Джульетталы ӧй
синмаськылы, соослэн огогзэс
ӟырдыт яратэмзылы
ӧй оскылы. Кыӵе яратон,
куке нылашлы 13 арес, нош
пияш 2-3 арлы бадӟымгес?
Авторъёс но верало, Шекспир
подростокъёслэн
нырысетӥ синмаськонзы
сярысь гинэ мадиз, со, пе,
зэмос яратонлы матын но
ӧвӧл на. Джульетта воксё еж
вылэм ай ке, Ромеолэн нарциссизм
шуыса нимаськись
психологической шекез
кылдыны вуттэм ини. Соин
валче солы нокызьы но уг
удалты: нырысетӥ «зэмос»
яратонэз солэсь куштӥське,
Джульетта кулыса кошке.
Сыӵе учыръёс нарцисслы
кык поллы секытэнгес
сётӥсько. Зэмзэ вераса,
Ромео Джульетта понна уг
кулы. Со секыт вакытсэ ортчыны
уг быгаты, малпанъёсыз
уг быдэсмо, соин пияш
ассэ быдтэ. Та кык пиналъёс
ӧй ке кулысалзы, соос люкиськысалзы:
малпам яратонзы
туж ӝог тӧлӟысалыз.
Нош лыдӟисьёс синмасько
та историлы, малы ке шуоно
асьмеос иллюзиосын
улыны яратӥськом.
Мукет сямен улэ Артур
Пендрагон. Артур
нырысетӥ интые эксэй,
рыцарь, зэмос эш луэмзэ
пуктэ, нош кышномуртъёсын
«ну, а девушки потом»
шуэм сямен кадь выре. Шор
дауръёсы нылмурт котьма
понна янгыш вал: соин сэрен
ожъёс кутскылӥзы,
со пиосмуртъёслэсь йырзэс
берыктылӥз... «Король
Артур. Рыцари Круглого
Стола» произведениын но
котькытын кышномурт
янгыш луэ: Гвиневра пиосмуртъёслэсь
эшъяськонзэс
сӧре, Моргана ке воксё
ведӥн, эшшо политикае
нырзэ чуртнаны шедьтэ
на… Артурлы соос туж люкето.
Тодысал ке Артур,
6 даур ортчыса, кыӵе ке
Белла Свон, Эдвард вампирлы
синмаськыса, равноправие
понна нюръяськыны
кутскоз шуыса. «Сумерки»
романысь Беллалэн вампир
луэмез потэ. Солы, пе,
ваньзэ верано, солэсь малпанъёссэ
юано. Артур сыӵе
кышномуртэз матаз но ӧй
лэзьысал. Нош Эдвард Каллен
сыӵеезлы синмаське.
Но Эдвард Артурлэсь кыдёке
ӧз кошкы: со малпа,
Белла ачиз номыр лэсьтыны
уг быгаты шуыса. Оглом
та роман кышномурт эмансипация
сярысь маде. Тунсыко,
сое лыдӟыкум но, соя
пуктэм киноосты учкыкум
но, та малпан йырам ӧз
лыктылы.
Авторъёс эшшо трос
пӧртэм произведениосты
эскеро на: «Дракула», «Шерлок
Холмс», «Пеппи Длинныйчулок»,
«Имя розы»,
«Гарри Поттер»… Тодмо
произведениос шоры воксё
мукет синмын учкыны
кутсконо, нош тодмотэм
произведениосты лыдӟем
потыны кутске. Та книгаез
лыдӟыса, психология удысын
тодон-валанъёсы паськытазы,
лыдӟоно произведениосын
списоке трослы
узырмиз, котькуд произведениысь
мон табере мур
ватэм палъёссэ утчасько.
________
Галина ЕВСЕЕВА