Vladimir Nabokov, Púshkin og þýðingarnar - Skemman

Í erindum III til V kemur fram bæði nákvæmni þýðingar Nabokovs sem er vissulega kostur, en einnig kemur fram viss skortur á ljóðrænu
á enskri tungu Nabokovs. Þannig segir Nabokov á mjög óljóðrænan hátt: „All of us had a bit of schooling in something and somehow: hence
education, God be praised, is in our midst not hard to flaunt.“Johnston notar í þýðingu sinni sem er til hægri ljóðræn stílbrigði: „We all
meandered through our schooling haphazard; so, to God be thanks, it´s easy, without too much fooling to pass for cultured in our ranks.“
Þýðing Johnston til hægri gerir tilraun til að halda í upphaflega hrynjandi ljóðsins og ná jafnvægi milli forms og innihalds en Nabokov er ekki
einu sinni að reyna að nálgast formið. Stundum er merking þýðingar Nabokovs skýrari en hjá Johnston en alls ekki alltaf. Nabokov talar þannig
um „tumultous youth´s season“ á meðan Johnston notar hið skýra og ljóðræna „hour of youthful passion“. Hér hefur Johnston vinninginn hvað
varðar ljóðrænu en þá má ekki gleyma hinum viðamiklu skýringum Nabokovs sem bæta miklu við textann. Nabokov er greinilega að leggja
áherslu á skýringarnar fremur en texta Púshkins og honum finnst e.t.v. að ef hann mundi reyna að þýða eins og allir aðrir hafa gert gæti hann
ekki skapað neitt nýtt. Þýðing Johnstons er hefðbundin en þýðing Nabokovs er eins og afstraktmálverk. Lesandinn þarf að nema staðar og hugsa
sig um og spyrja þeirrar spurningar hvað þýðandinn sé í rauninni að gera – hver sé hugsunin á bak við þýðinguna.
75