ACTA PLENO - Concello de Santiago de Compostela

ACTA PLENO
Hai asemade alegacións comúns de varios sindicatos, como a referida á dotación de fondos no orzamento
para a partida de acción social. Neste caso, tanto a CIG como o CSIF apuntan que por acordo da mesa de
negociación do Concello de 9 de febreiro do 2010 estableceuse a cantidade de 450.000 euros para a
partida de acción social, pero hai que lembrar que ese acordo non foi ratificado por ningún órgano
competente, nin pola Xunta de Goberno, nin polo Pleno da Corporación, polo que carece de virtualidade
para modificar o disposto no artigo 5.1 do acordo regulador.
Sobre a partida de formación, o acordo regulador tampouco se refire a unha cantidade concreta a destinar
cada ano a ese concepto.
Por outra banda, UXT e CIG coinciden na alegación que si se estima, e que ten que ver coa inclusión no
cadro de persoal das prazas de intendente principal e intendente da policía local. Sobre isto hai que dicir
que estas prazas figuraban ficticiamente no cadro de persoal, porque non ian acompañadas da
correspondente dotación orzamentaria, e inicialmente suprimíronse, porque o criterio do grupo de
goberno foi incluír só no cadro de persoal aquelas prazas que tivesen a correspondente dotación
orzamentaria, co obxecto de observar o sinalado na lei. Pero visto que a lei de coordinación de policías
locais de Galicia, polas características do Concello de Santiago, esixe a existencia desas prazas, se estima
parcialmente a alegación, e en consecuencia se inclúen no cadro de persoal esas dúas prazas, coa
correspondente dotación orzamentaria, en cumprimento do que dispón o artigo 90 da Lei de Bases de
Réxime Local, e a diferencia do que se fixo nos orzamentos dos anos 2010 e 2011.
Dona Amelia González se sorprende porque non entende que neste momento económico tan difícil polo
que está a pasar o Concello, a CIG e a UXT se preocupen pola non inclusión desas prazas, que se suman a
outras máis que tampouco se inclúen porque non hai cartos con que dotalas, e non se preocuparan os
pasados exercicios polas decenas de prazas que non contaban con dotación orzamentaria.
Para Don Rubén Cela, que intervén a seguir, se cumpriron as previsións que realizaba o BNG ao comezo
deste ano, e finalmente estes orzamentos entrarán en vigor xa comezado o mes de agosto, tan só tres
meses antes de que o goberno municipal debera trasladar a súa proposta de orzamentos para o ano 2013.
Como xa deixou patente no pasado pleno da aprobación inicial deste orzamento, o 22 de xuño, non eran
os prazos a principal crítica que tiña que facer o grupo municipal do BNG á proposta de orzamentos,
senón ao seu contido. De feito, cre o concelleiro que naquela sesión ficou meridianamente clara a súa
posición de frontal rexeitamento á proposta de orzamentos para o ano 2012, polo que non cómpre reiterar
innecesariamente argumentos xa esgrimidos.
O grupo popular tivo hoxe a oportunidade de presentar unha proposta de orzamentos mellorada, que
estimase algunha das alegacións plantexadas por diferentes colectivos, pero preferiu seguir enrocado na
súa intransixente postura e facer uso non da capacidade de diálogo e consenso que debera ter o goberno
municipal, senón no rodillo da súa maioría absoluta.
Indica o concelleiro que unha parte importante das alegacións, como se ven de comentar, ten que ver cos
traballadores e traballadoras deste Concello, e neste aspecto, o goberno municipal detenta a cuestionable
honra de ser capaz dunha cousa non doada, como é a de poñer de acordo en algo a todas as centrais
sindicais con presenza neste Concello. Esa unanimidade é de por si ben significativa da gravidade do que
o goberno municipal pretende aprobar, sen facer caso dos sindicatos nin antes nin agora, rexeitando as
súas propostas, todas elas razoables e axustadas á lexislación vixente, non así os recortes que o grupo
popular ven de propoñer.
21