ACTA PLENO - Concello de Santiago de Compostela

ACTA PLENO
A Sra. Sierra engade que fronte a orzamentos que prevían uns niveis de inversión totalmente irreais, que
ao final non se executaban e que daban lugar á situación que o seu grupo hereda agora, o goberno
municipal, pola contra, establece unha política de adaptación da inversión á situación real na que nos
atopamos, ademais cun criterio de priorización que se manterá no tempo. Tamén, fronte a orzamentos que
daban a espalda aos cidadáns, o actual goberno prioriza o gasto social incrementándoo en contía nun
12,5% e focalizando a actuación en tres vertentes: en primeiro lugar, na conxelación de tributos no que
atañe ás posibles actuacións voluntarias do Concello, en segundo lugar no aumento das axudas sociais, e
en terceiro, na dotación de partidas concretas de axudas aos máis necesitados.
Por outra parte, e fronte a orzamentos que contemplaban niveis de endebedamento voluntario para
inversións sen precedentes, baixo o lema reiterado en varias ocasións de que volvíamos a endebedarnos
polo que amortizábamos, o actual equipo de goberno aplica unha política de non endebedamento, a non
ser que sexa estritamente necesario e sen acudir a un recurso tan fácil como perigoso que é a débeda.
Remata a súa intervención a Sra. Sierra afirmando que hai un antes e un despois na política económica
deste Concello, mal que lles pese ós concelleiros da oposición que non queren entrar a debater estas
cuestións e se quedan noutras que son cortinas de fume para ocultar a realidade dos feitos.
Don Rubén Cela Díaz di que o que nunca fixo o grupo municipal do BNG é presumir das cousas que non
se teñen feito ben. Pensa que se ten que predicar co exemplo, e que ten que haber unha correspondencia
entre o que se di cando se está na oposición e o que se fai cando se goberna, e non é de recibo que hoxe á
sra. Sierra lle faga graza falar de prazos incumpridos cando ela mesma pediu no seu día a demisión da
responsable da área de facenda naquela altura, por aprobación duns orzamentos nuns prazos similares aos
de hoxe. Cre o concelleiro que un mínimo de autocrítica dende logo nunca sobra.
O concelleiro é consciente de que non resulta doado facer uns orzamentos nun contexto económico e
social como o actual, de menor actividade económica, maior desemprego, menor consumo, menor
recadación pública, e maiores necesidades de protección social. Agora ben, o Partido Popular aquí e en
todos os ámbitos onde ten posicións de goberno, o único que está a facer é botar máis leña ao lume, ao
problema do paro responde cunha reforma laboral que abarata e facilita o despedimento, e para rematar a
faena reduce nun 50% os fondos adicados a políticas activas de emprego a nivel autonómico, e nestes
orzamentos municipais renuncia a priorizar claramente as políticas de emprego sobre outras que neste
momento poderían ser secundarias.
Cando no país se contrae a demanda privada, o partido popular segue insistindo en contraer aínda máis a
pública en todas as administracións, incluído este Concello, e iso se reflicte cun orzamento onde
baixando só un 5% o orzamento de gastos, baixa un 56% o investimento real, ata ficar nun ridículo 4,2%
sobre o orzamento dos gastos.
Ante a merma da capacidade adquisitiva da poboación, a suba de prezos nos servizos básicos e a suba dos
impostos polo goberno central, nos orzamentos que hoxe o goberno municipal pretende aprobar, os
impostos directos subirán un 8,14%, o que supón que o Concello pensa que os veciños e veciñas pagarán
este ano 2.957.000 euros máis só neste concepto, pero tamén terán que pagar a súa fabulosa subida do
imposto do valor engadido, e como non, a suba da luz, do gas, da auga, da gasolina, dos transportes, da
autoestrada, que acaba de subir ese 7,5%, e que o mes que vén subirá outros tres puntos porcentuais máis.
Contra a sangría de peche no pequeno comercio, ó goberno non se lle ocurriu mellor opción que a
liberalización de horarios, a suba de impostos, e quitarlle a paga extra, cando non o traballo, a unha parte
importante da súa clientela, e cando hai máis xente pasando mal reducen as prestacións da Lei de
26