ACTA PLENO - Concello de Santiago de Compostela

ACTA PLENO
Evidentemente as centrais sindicais non poden estar de acordo coa proposta, e solicitaron a súa
reconsideración ao igual que o fai hoxe aquí o BNG, pola arbitrariedade e a falta de xustificación real da
modificación dos cadros de persoal, onde os principios de racionalidade, economía e eficiencia só os ve o
goberno.
Así, a proposta parte da eliminación de perto do 10% da plantilla de persoal funcionario municipal,
suprimindo un total de 53 prazas, 32 sen dotación orzamentaria en consoancia co marcado no plan de
estabilidade orzamentaria, e 21 vacantes máis que se produciron durante o pasado exercicio, ademais da
supresión dunha parte importante da promoción interna comprometida no ámbito da negociación
colectiva. Entre esas prazas, desaparecen nada máis e nada menos que 28 de policías locais, unha mostra
máis da austeridade selectiva do goberno local. Pero non se reducen prazas en todos os ámbitos, porque
como xa se ten debatido noutras ocasións neste foro, para o que non hai tixeira é para os habilitados
nacionais, para ampliar o cadro de persoal e ter un terceiro secretario, terceiro interventor, terceiro
tesoureiro, ademais da dotación orzamentaria da xefatura de área de facenda, a de mobilidade e
seguridade cidadá, que xunto coa provisión doutra xefatura da área de urbanismo, e dúas xefaturas de
servizo con persoal externo en comisión de servizos, supón un gasto extra de aproximadamente, 600.000
euros anuais, case dous millóns e medio de euros nun mandato.
O informe do señor secretario apunta á legalidade do procedemento aplicado, e que esas novas prazas non
computarían para ese 10% de taxa de reposición de efectivos. Non vai cuestionar o BNG a legalidade da
medida, porque non lle compete facelo, pero sí a súa oportunidade dende o punto de vista político e ético,
claramente reprobable.
O goberno tampouco tivo a ben revisar a dotación das partidas dirixidas a acción social, ou a formación,
nin fixo caso do pedimento de dotación de novas prazas en diferentes ámbitos, como reflicten varias das
alegacións plantexadas pola Confederación Intersindical Galega, para cumprir co establecido no acordo
regulador.
Ao anterior engade o concelleiro que existe unha crítica unánime de todas as centrais ao método
empregado e á falta de motivación real para incumprir o selado no acordo regulador, pois tal
incumprimento só podería xurdir como consecuencia dunha causa grave de interese público derivada da
alteración substancial das circunstancias económicas, que a teor do coñecido da liquidación de 2011, e
das cifras do orzamento para o 2012, aprobado inicialmente, non se produce.
Da batería de alegacións plantexadas pola CIG, UXT, CCOO e CSIF só se acepta unha presentada pola
CIG e tamén pola UXT, referida á incorporación ao cadro de persoal dun intendente principal da policía
local e dun intendente de policía, cun custe total, de 114.807 euros, porque tal e como se denuncia nas
súas alegacións respectivas, a Lei 4/2008, de 20 de abril, de coordinación de policías locais de Galiza,
sinala expresamente no seu artigo 28 que esas prazas son obrigatorias en municipios de máis 75 mil e 50
mil habitantes, respectivamente.
Non se pode dicir que o goberno derroche comprensión ante as lexítimas demandas dos traballadores e
traballadoras a través dos seus representantes, e en definitiva, non se pode facer peor no ámbito dos e das
traballadores públicos deste Concello. É nula a vontade de información e negociación real coas centrais
sindicais, hai destrucción de emprego público, e precarización como antesala da privatización de servizos
públicos e reducción de dereitos, e se por isto non fose suficiente, envolto en criminalización, cando non
en ridiculización dos dereitos laborais.
22