copione - Silveria Gonzato

GERVASIA
E alóra buta via tuto e méti su bródo de dado….Tanto, te vedarè che no se ne inacòrse nissùni.
Méteghe anca ‘na s-ciànta de òio, che vègna fóra du tri òci par piàto. El bródo de prima nò stà
butàrlo in giardìn, te fè morìr l’erba.
IOLANDA
Lo buto zó dal seciàr. Sperémo che no se sbusa le cane!...Te m’è dato ‘n bòn consìlio,
Gervasia, fago come te m’è dito. A l’Anselmo, el bródo de dado no ‘l pól mia farghe mal.
GERVASIA
Piassè de lavàrghe le buèle proprio no‘l fa.
IOLANDA
Gervasia, varda che gh’è du biciéri sbecà, métegheli a l’Adelaide e a l’Augusta. Cissà che no le
se tàia la léngua.
GERVASIA
Ghe méto anca i piróni coi denti storti.
IOLANDA
Bràa!
GERVASIA
E i tovaiói che i à dropà ieri el Bèpo e el Giobàta. Ghe li piego roèrsi così no le se inacòrse de
gnénte.
IOLANDA
Ancora piassè bràa!
GERVASIA VA IN SALA DA PRANZO E COMINCIA AD APPARECCHIARE LA TAVOLA
DISPETTOSAMENTE. INTANTO PARLA TRA SÉ.
GERVASIA (tra sé)
Èco a cosa el serve el me sangue blu….a far la camariéra in te ‘n ricòvaro! Quando el lo savarà
me fiól, la diretóra, sóra ai sconti su le padele e sui papagài, la ghe strangossarà. El dópio ghe
digo de farghe pagàr! Intanto, stanòte, quando gh’è solo l’Elvira che varda la televisión, fago
sparìr qualche padèla, così, la diretóra la g’avarà da andàrghe prima a crompàrle. Pecà che ai
papagài no posso mia rivàrghe. I è nel reparto dei òmeni. Se podésse andar là sènsa èssar
vista, i faréa sgolàr via come usèi veri….G’ò ‘n nervoso che spacaréa tuto, anca le caréghe.
Che bèlo che saréa se l’Adelaide e l’Augusta le finisse col dedrìo par tèra! Se ne inacorsaréa
tuti che le g’à i panolóni e le mudànde de plastica par i….i….i incontènti…. Me pàr che se diga
così. E se no se dise così, l’è istésso! No posso mia savér tuto mi! Me mama, quando me fradèl
l’éra pìcolo, la diséa ch’el se pisàa adòsso, e mi capivo. Ma adesso se usa parlar in chìcara e,
se no te lo fè, i te varda come i vardaréa ‘n pòrco ne la molonàra o le galìne in mèzo al
forménto….Se l’è vera ch’el morto el vede el vivo, el me pòro Gaetano, par la ràbia de
védarme tratà così, el sarà drio a saltar da ‘na nùgola a l’altra come ‘n cavréto.
IOLANDA (in cucina)
Spèta che condìssa ben sta carne mazenà. L’Anselmo el g’à da tiràrse su la petorìna. Se el
spèta de tiràrsela su co’ sto bródo, el stà fresco, poaréto! Lu no ‘l g’à nissùna colpa, i è stà
quéle do fiàpe a sassinàr tuto….E mi che voléa farme la sialìna!.....La grembiàla i m’à messo e
l’ò za anca ónta….In sta carne ghe méto ‘n bel po’ de òio de quel bòn, de buro solo ‘na s-
ciantinìna, senò a l’Anselmo ghe vien el culesteròlo, do séole, de la salvia, del sgulmarìn e tri
biciéri de vin rosso, de quel che ciòca….Spèta, g’ò da gratàr el formàio grana par el bródo.
Indóe èla la gratacasóla?.... Ècola qua. (Iolanda comincia a gratuggiare il formaggio con foga)
Ghe ne méto ‘n bel póco, così, almànco, sta slavaùra la savarà de qualcosa…..Ai pransi de
matrimonio, ò sentìo dir che al spóso i ghe dà da magnàr tanto formàio….El parché mi no lo sò.
Ma se i ghe lo dà al spóso, se vede ch’el fa ben. El ghe farà qualcosa anca a l’Anselmo!
28