copione - Silveria Gonzato

46
GERVASIA (avvicinandosi ad Anselmo)
La so Giuliéta l’è in cusìna che la spàsema par el so Romeo.
ANSELMO
Ma ci èla sta Giuliéta? A mi no me interessa gnénte dei fati dei altri. Mi vói savér indóe l’è la
Iolanda.
GERVASIA (cantando)
Fior di lavanda,
lui ama la Iolanda.
fior di pompelmo,
Iolanda ama Anselmo.
ANSELMO
Sióra Gervasia, a che punto èla la so arteriosclerosi? Me sà che la va via un po’ massa in
prèssia.
GERVASIA
Adesso vago da la Iolanda e ghe digo che lu el m’à dimandà de éla.
ANSELMO
Gervasia!
GERVASIA
El staga chièto che torno subito.
GERVASIA SI AVVIA VERSO LA CUCINA.
IOLANDA
L’éra ora! Credéa che i t’avésse magnà anca ti. Mi qua a spignatàr e voàltri delà a far festa!
Che ve andasse tuto in colesterolo e tricicli! “Nò, non era l’allodola, era l’usignolo!” Ò sentìo
tuto e g’avì batù anca le mane!....Le Giuliéte stagionà le paréa piassè bòne a far i cadaveri ne
la séna de la tomba.
GERVASIA
Mi ò solo servìo. Ghe l’èto anca con mi?
IOLANDA
Ghe l’ò con tuti!
GERVASIA
Su col moràl, Iolanda! El m’à dimandà de ti. L’è tanto dispiasù de no védarte; nó ‘l se dà pace.
IOLANDA
Dalbòn?! Caro el me Anselmo! Par colpa de quéle do strie, par balàr co’ l’Anselmo, me tóca
spetàr st’altro san Stracampìo. Questa no ghe la perdono mia. Eh nò! Sta òlta no le le passa
mia lìssia. Gervasia, m’è vegnù ‘n’idea: dame la to grésta e la to grembiàla, vago mi a servir al
to posto.
GERVASIA
E se la diretóra la se ne inacòrze?
IOLANDA
No la se inacòrse de gnénte. La g’à òci solo par la sindaca, par l’Adelaide e l’Augusta; figùrete
se la ne varda noàltre!.... Dai!.... Dame la grésta e la grembiàla!.... Móete, senò l’Anselmo el
va in lèto.
GERVASIA
Mi fasso come te vól, ma stà atènta! Ghe vago de mèzo anca mi.