Markeboek van Raalterwoold

Desen dienende tot ghienen anderen fine, bevelen wij daer mit U edelen in die bescherminge des
Almechtigen. Deventer, den 8e Octobris 1622.
U edeles guede vrunden,
Adam van Herdt Niclaes van Boeckholt Johan van Coverden Henrick Vriesewick, rentmeester Johan
van der Beeck Johan Luloff Gerlich Doeis Herman van der Beecke Henrick Losscher Johan van
Twickelloe Gerrit van Deth Allart Hellendoren, rentmeester.
Dese nhavolgende getuigen beleidet die marckenrichteren van Raelter Woelt die edele erentfeste
Jonkeren Gerrit Mertens unde Geerlich van Besten, ende dat van wegen die buirschappen Tij unde
Raede, Linderte, Bootele, contra d'van Luttenbarch.
Anno 1632 den 4 Julij bint erschennen in den gerichte Tonnis ten Tijhuis tho Boetele, Esken upten Tij
ende Derrick toe Vechterloe, ter instantien ende gerichtelick versoeck van die edele erentfesten Gerrit
Martens ende Geerlich van Besten marckenrichteren in der tit van Raelterwoolt, dachgelacht sinde om
een tuichnisse der waerheit te seggen bij die poena van 25 olde schilden ende haer zielen salicheit,
up interrogatoria ende vragestuicken haer voergeholden.
In den iersten getuige aff te vragen een ieder sin olderdoem? Item waer sie getaegen ende gebaeren
sijnt, unde waer sije altit gewoent hebben?
Tonnis ten Tijhuis secht olt te sijn omtrent 76 iaeren ende ten Tijhuis tho Bootele getaegen ende
gebaeren te sijn ende altit ende noch tegenwoerdich woent, ende gewoent heft.
Esken upten Tij olt 76 iaeren, secht gebaeren te sijn tho Vechterloe ende aldaer gewoent te hebben,
bes dat hij hillockte upten Tij, daer hij alnoch tegenwoerdich op woent.
Esken tho Vechterloe olt 75 iaer is up die Vechterloe gebaeren ende is altit daer gewoent ende
woenet aldaer noch huiden desen dach.
Gerrit tho Vechterloe olt 70 iaeren, is ock up Vechterloe geboren ende heft daer altit gewoent, dan
wont noch bij die Vechterloe up die Sennept.
Ten derden wat hun wittich unde kundich sij van die limiten ofte bepaelinge van die buirschap
Luttenbarch, ofte zie ock weten, ofte van anderen hebt hoeren seggen, dat die van Luttenbarch
besundere bepalinge hebben, scheidende die drie buirschappen Tij unde Raede, Lynderthe ende
Bootele van die buirschap Luttenbarch. Ende offte niet die drie voerschreven buirschappen met
Luttenbarch eene onverscheidene marcke hebben ende gemene gebruickt hebben ende gemeen
geholden sint worden?
Op desen tuiget getuige Tonnis ten Tijhuis, niet te wetten ock niet anders gehoert te hebben, dat die
Luttenberger enige bijsundere bepalinge tusschen die drie voerschreven buirschappen solden
hebben, dan altit sijner kentenisse gemeen ende onverscheiden liggen ende gebruicket worden. Secht
ock dat hij getuige selfs int Koeschater venne hefft torff gegraven ende ock torf heft helpen afdragen,
gelijck die ander Booteler ock daer gegraven hebben. Secht widers dat hij van verscheiden heft
hoeren seggen ende ock van zaliger Lambert ten Brinckhuis, dat die acht waren in Bootele, in
Schanebroeck mede gewaert sijnt, ende dat hij guide hoechnisse heft dat zine ionge peerden int
Schanebroeck gedrieven heft, ende t'gansche jaer daer in sint bliven gaen.
Esken upten Tij secht niet toe weten dat die Luttenberger bijsondere bepalinge hebben, scheidende
die vorschreven Tijunderade Linderte ende Bootele van die Luttenberger marcken, unde dat hij van
den zaligen olden schultz Johan van Twickelloe gehoert hefft, dat hij tegens die van Luttenbarch, ende
Willem tho Rordinck nu tho Norep sachte, dat die voerschreven buirschappen ende Luttenberch
ghiene verscheidene marcke een hadden, sachte ock die darper aeren torff plegen te steeken baven
Brunseler camp.