Navigare 01-19

Vikingtokt til Danmark
Sjøfartsdirektoratet jobbar i desse dagar med å utforma eit nytt regelverk for opne treskip.
Eit besøk hos Vikingskipsmuseet i Roskilde baud på nytting informasjon for arbeidet vidare.
Dag Inge Aarhus
kommunikasjonsdirektør, Sjøfartsdirektoratet
– Dette var eit av to viktige møter for å diskutera og få meir
kunnskap om korleis ein kan utforma eit regelverk som tek omsyn
til både tryggleik og desse spesielle skipa, seier Jan Reinert
Vestvik, som er senioringeniør i passasjerskipsavdelinga i
Sjøfartsdirektoratet. Saman med to kollegaer besøkte han
Vikingskipsmuseet i Roskilde i februar. Ved museet har dei
erfaring med både bygging, rekonstruksjon og drift av vikingskip,
og fagfolka ved museet kunne bidra med nyttige innspel til det
pågåande regelverksarbeidet.
HENTAR INN INFORMASJON
Hausten 2017 gav Nærings- og fiskeridepartementet direktoratet
oppdraget med å utarbeida eit nytt regelverk i samband med saka
rundt vikingskipet Saga Oseberg. I mars 2018 sende
Sjøfartsdirektoratet det første forslaget til nytt regelverk for opne
trefartøy som fører fleire enn 12 passasjerar, ut på høyring.
Høyringa avdekte fleire område som burde greiast ut nærare,
noko også departementet var samde i. Mellom anna vart det peika
på at ein i større grad burde innhenta informasjon og erfaringar
frå ulike fagmiljø, mellom anna Universitetet i Sørøst-Norge.
MØTE MED NORSKE AKTØRAR
– Danmark har eit eige regelverk for denne type skip, og det var
mellom anna årsaka til ein valde å vitja eit fagmiljø der, i tillegg til
at me har hatt møte med fleire norske aktørar. Dei norske
aktørane vil sjølvsagt også kunne gje sine tilbakemeldingar i den
neste høyringsrunden, som kjem ein gong på vårparten, påpeiker
Vestvik.
Det opphavelege oppdraget frå Nærings- og fiskeridepartementet
er å få på plass eit regelverk som både tar vare på eigenart ved
drift og bygging av skipa, samstundes som det vert tatt omsyn til
tryggleiken ein må forventa for passasjerar og mannskap.
Navigare 1 - 2019 | 49