Descarga en formato PDF (9,4 MB) - Centro Ramón Piñeiro para a ...

550 A nacionalización do pasado irlandés, 1845-1937
dos celtas” 858 chegaría ás illas Británicas como parte dos movementos demográficos
que estenderon estas poboacións polas terras europeas entre o 600 a.C. e o 250
a.C. Non precisa o historiador irlandés para este grupo orixe nin característica
especial ningunha que non sexa a do conxunto xeral na que o engloba. Como xa
vimos no seu tratamento doutros casos concretos do fenómeno de espallamento
do céltico, tampouco aquí non se limita a unha cuestión de pura difusión de
elementos culturais, senón que se pon de manifesto que houbo un despraza mento
de persoas físicas ata estes lugares tan distancia dos do núcleo centroeuropeo
orixinario. Chegada que tería lugar, inclínase a pensar, en diversos e separados
pequenos grupos que se irían establecendo naquelas afastadas terras atlánticas e
organizándose de modo autónomo. 859
Tal e como xa vimos no caso das supostas orixes ibéricas da poboación
neolítica das illas Británicas, antes mesmo de expoñer as súas propias teses sobre
unha cuestión histórica, a técnica habitual de MacNeill consiste en desmentir
aquelas que considera que son posicións erróneas. Sobre todo, cando constitúen
a versión predominante, ben nos ambientes populares, ben entre a comunidade
científica, ou incluso en ambos os dous niveis, como acontece con frecuen cia.
Como, por demais, as ditas versións adoitan reflectir puntos de vista que non
cadran nin coa súa concepción global da historia de Irlanda nin cos obxectivos
políticos que configuran a súa preocupación vital cotiá, os traballos de MacNeill
optan case sempre por esta técnica expositiva, de forte orientación pedagóxica,
que pretende desfacer os que el considera prexuízos asentados na mentalidade
popular e en boa parte dos círculos académicos, como paso previo para afirmar
a continuación o verdadeiro relato histórico que el pretende dar a coñecer.
Partindo da aplicación dese esquema, frecuente en toda a súa obra, MacNeill
comeza por desautorizar as propostas históricas sobre a chegada dos celtas ás illas
Británicas que eran de aceptación común nos tempos en que el escribía, que non
eran outras que as do xa mencionado John Rhys e a súa escola, predominantes
daquela en Gran Bretaña, na apreciación do noso historiador.
As teses de Rhys e os seus seguidores, 860 xa incluídas nas obras de
divulgación histórica daqueles días, sostiñan que as poboacións celtas se
presentaran nas illas Británicas por vez primeira na Idade de Bronce, tempo que,
858 PIH, p. 44.
859 PIH, p. 206. A maioría das informacións sobre os aconte cementos e interpretacións que rodean o primeiro
asentamento da raza gaélica en Irlanda contéñense no capítulo II de PIH, “The Celtic colonisation of Ireland
and Britain”, pp. 31-60.
860 PIH, pp. 42-3. Aínda que as alusións ás posicións de Rhys por parte MacNeill son continuas, sistematízaas
de maneira clara nestas páxinas.