Descarga en formato PDF (9,4 MB) - Centro Ramón Piñeiro para a ...

A fixación do relato histórico nacionalista. 1886-1937
583
ministerio sacerdotal, tarefa que se vería facilitada, precisamente, pola abundancia
de mozos ben formados nas propias escolas druídicas. 988
Tras sete anos de duro esforzo en solitario, recibiu Patricio o apoio de tres
novos bispos enviados na súa axuda. Xunto con eles e mais os conversos nativos
estableceu as bases organizativas da nova Igrexa irlandesa, centrada na sede
metropolitana en Armagh, creada despois dunha viaxe a Roma para ver confirmado
o seu traballo, aínda discutido en Britania, e nas correspondentes ós outros bispos,
todas elas, segundo o costume da época, próximas ós centros de poder do país.
En realidade, afirma MacNeill, Patricio recibira unha formación monástica,
xusto nun momento en que este novo modo de vida cristiá comunitaria estaba no
seu apoxeo na parte occidental do territorio europeo, e non cabía dubidar de que
lle parecera moi axeitada para os seus novos conversos. 989 Moitos dos neófitos
irlandeses, sobre todo unha gran cantidade de mulleres, seguiron a orde monacal
que Patricio espallou, tomada do modelo de san Martiño de Tours, ben asentado
na Galia desde unhas décadas antes e que el mesmo experimentara directamente
nas súas estadías continentais. Sen embargo, a organización da Igrexa patricia
adoptaría unha estrutura decididamente territorial, e non monástica, cun bispo
metropolitano en Armagh encabezando unha rede de dioceses baixo a súa
xurisdición. 990 E, claro está, apunta o noso autor, sometida á xerarquía suprema
do Papado romano, dependencia que MacNeill se preocupou de sinalar de modo
explícito, nun afán por contrarrestar as versións que presentaban unha Igrexa
irlandesa autónoma desde os tempos fundacionais, segundo unha interpretación
antirromana de evidente significación relixiosa e política, presente desde a ruptura
con Roma da rama inglesa da Igrexa e que, ademais, na súa opinión, non se
correspondía coa verdade histórica. 991
Aínda que, certamente, a tarefa cristianizadora estaba aínda incompleta á
morte do santo, cando esta se produciu, en 461, a Igrexa irlandesa estaba firmemente
asentada, sobre todo na parte oriental da illa, onde os primeiros misioneiros
desenvolveran prioritariamente a súa evanxelización. 992 En conxunto, o papel de
san Patricio na historia irlandesa de MacNeill non admite parangón ningún. Da
súa obra arrincou unha nación xa constituída en plenitude, nova pero, ó tempo,
988 SP, p. 99.
989 SP, pp. 46, 61.
990 SP, pp. 97-98.
991 SP, p. 84.
992 SP, p. 83.