ud#37 (25847)

udmdunne.ru
+7 951 195 37 65
ЛЫДӞИСЬКОН СИГ
№37 (25847)
2020-тӥ ар 24-тӥ куарусён 27
Конов ассэ умойтэм возе,
котьку, пичи но малпаськытэк
кадь, дурбасьтыны сюлмаське
директорлы но Раковлы.
Зэм, парторганизацилэн
секретарез но институтлэн
директорез огкылысь тупаса
ужаны кулэ. Со озьы. Нош Конов,
туж валамон кадь шонер
веракузы но, ужазы тырмымтэос
сярысь ке верало, одно
соку ик дурбасьтыны тырше
соослы.
Тани Петин институтэ
лыктэм бере куд-ог теоретической
ужъёсын тырмымтэос
сярысь поттылыны кутскеменыз
валче Кедров солы меӵак
дурбасьтэмзэ вераз но, Коновлы
со туж ӧз яра, шӧдске.
Одӥг пол со Кедровез вераськыны
ӧтиз.
— Тӥ, Пётр Петрович, Петин
сямен ик, институтамы
туж кемалась уд ужаське на.
Соин-а, мар-а Петинэн кылды
туж ӝог тупаз. Малы нош,
со егит ерпечкаен кылды тупаз
ке, со сярысь вераськыны
уд лыктӥське парторганизацие?
Оло, асьмеос одӥг кыл
шедьтысалмы.
— Валантэмез ӧвӧл кадь,
Конов эш, тӥ асьтэос лыдэ
уд басьтӥське шонер верам
кылъёсты, — шуиз Кедров.
Конов таӵе дыръя котьку
сямен ик зӧк мугорыныз пукон
вылын ӟукыртымон берганы
кутскиз но Кедровлы вожез
потэмен кадь шуиз:
— Тӥ, партийной ужын
ужам адями, ӟеч тодӥськоды,
луоз, — котькытын умой
партийной коллектив луыны
кулэ. Нош тӥ со сярысь
уд малпаське-а, мар-а, ялан
директорлы но Раковлы пумит
луыны тыршиськоды.
Озьы тӥ, Пётр Петрович, Петинэн
ӵош парторганизацимылы
но институтлы изъян
лэсьтӥськоды, коллективез
сураськоды.
— Дугды ай, Конов эш, —
сое уретӥз Кедров, — нош тон
партия, партия шуиськод но,
ачид кемалась-а партиын?
— Нош малы со кулэ? —
синъёссэ ик быльккетӥз Конов.
— Мон тӥлесьтыд биографидэс
уг юаськы ук!..
Тодэмды потэ ке, мон ньыль
ар ни партиын.
— То-то, ньыль ар ни партиын!
Нош монэ дышетэмды
потэ ни. Тодӥськоды — мон
ог кызь вить ар ини партиын.
Улытозям партийной
ужын дыръям трос адямиосты
адӟылӥ, тӥ кадьёссэ но,
дырызлэсь азьло нырзэс
ӝутыны кутскисьёсты.
Конов пукыны ӧз чида.
Султӥз но карандашен ӝӧк
вылэ торккетыны кутскиз.
— Тӥ, Пётр Петрович, Петинэн
парторганизацилы пумит
асьтэды пуктӥськоды ук.
Малы монэн уд кенешиське,
маке уг ке яра тӥледлы?
— Тӥ, Конов эш, секретарь
ке но, огнады парторганизация
ӧвӧл на. Сое тодыса улэ.
Эшшо одӥг пол верасько на,
критика вань бере, со юнме
ӧвӧл, дыр. Сое мургес валан
сярысь сюлмаське вал, озьы
умойгес луысал.
Кедров султӥз но Коновлэн
кабинетысьтыз сэректэм
тусын каллен потӥз.
Конов уг витьы вал Кедровлэсь
сокем пумит луэмзэ.
* * *
Романов ас ужезъя ӵем
гинэ вуылоно луэ Москвае.
Тани али но со столицае командировкае
мынӥз. Москваын
мукет ужъёсыз, отчытатчы
ветлон мугъёсыз трос
ке но, Романовлэн йырысьтыз
нокызьы но уг палэнско
Петинэн, Раковен, Песьтэровен
но мукетъёсыныз берло
дыре вераськемъёсыз. Со
умой шӧдэ: Песьтэров но Раков
шебельскон сюрес вылэ
гылӟемын, нош сое асьсэос уг
валало, соослэн малпамзыя,
партимылэн съездэзлэсь решениоссэ
институтын ужасьёс
уж вылын умой быдэсъяло.
Соин ик соос пумтэм
но котькытын вераськыны
ярато «культ личности» шуон
дыръя лэсьтэм янгышъёс сярысь.
Та пумысен Романов
вераськылӥз ни обкомысь
кивалтӥсьёсын но. Нош татын,
Москваын дыръяз, солэн
умойгес тодэмез потэ вал,
кыӵе югдур кылдэмын мукет
республикаосын литературазылэсь
историзэ возьматон
удысын.
Москваын вераськемъёсыз
Романовлэсь мылкыдзэ
уката но юнматӥзы, Петинлэн
шонерезлы осконэз солэн
юнмаз. Зэм, Москваын но Раков
выллем адямиос чылкыт
шур вылэ, кырсь шукылэн
кылдэмез сямен, ӝутскыны
выро вылэм. Мукет эшлыко
республикаосын но сыӵе
учыръёс шӧдскылӥллям. Нош
партия сыӵе шукы пульыослы
вӧлскыны но чылкыт вуэз пожаны
ӧз сёты.
Романов малпаз: Ижевске
бертыса, Петин сярысь ужпумез
одно ик эскероно институтлэн
парторганизацияз.
Конов валасьтэм адями ӧвӧл
кадь, солы умой-умой валэктэм
гинэ кулэ луоз. Со ачиз
ваньзэ пыр-поч валаз ке, коммунистъёс
солы дурбасьтозы.
Раков сямызъя сэзь адями.
Со аслаз ужез понна, аслыз
умой карон понна дась котьмае
лэсьтыны. Сыӵе адямиез
нырзэ олокытчы но чуртнаны
быгатэ, шуо. Тани али но со,
аслыз меӵак дурбасьтымтэзэс
шӧдыса, Романовлэсь та ужпум
борды кутскемзэ тодыса,
Москвае мынӥз. Солэн отын
тодмоосыз ичи ӧвӧл — сое
тодо кандидатской диссертациезъя,
Москвае ӵем вуылэмезъя,
Москваын потылӥсь
изданиосы гожъямезъя. Раков
оске тодмоосызлэн юрттонзылы,
со вала, Москваысь
учёной эшъёсыз пӧлын
сыӵеосыз но вань, кудъёсыз
пыр-поч уг эскеро Удмуртилэсь
историзэ, мар гожъямын
вал удмурт кылын, сое уг тодо,
оско удмурт учёнойлы Раковлы.
Соин ик Раков кӧбератэк
гожтыны малпаз Москваысь
кивалтӥсь органъёсы но. Тодмоосыз
пӧлын инъет шедьтыны
лыктӥз со Москвае, кулэ ке
луиз, юрттозы шуыса малпаз.
Москваысь тодмоосыз пӧлын
Зот Мироновичлэн сыӵе
эшъёсыз но вал, кудъёсыз
тужгес умой валазы (озьы
малпа со ачиз — Раков) солэсь
мар понна тыршемзэ. Сыӵе
«учёнойёсын» вераськылэмез
бере со аслыз оскон кужым
пыӵатылӥз кадь.
Нош сыӵе пумиськылонъёс
бере Москваысь ульчае
потэ ке, Раковлэн мылкыдыз
вуёме. Зот Миронович туж
умой шӧдэ угось сыӵе адямиос
трос ик ӧвӧл, соос асьме
улонмы сярысь нукыртыны
мултэс сюлмасько. Соослэсь
сыӵе мылкыдзэс Раков ас сюлэмаз
быдэсак басьтыны уг
быгаты. Соин но солы уката
секыт йӧтэ. Гостиницае вуэ
ке, ӝытазе валесэз но укыр
кезьыт потэ, быдэс улоназ
юзмыт вир пыӵаз кадь, со
огназ, сое, солэсь чутыръясь
сюлэмзэ валась адямиос котыраз
чик но ӧвӧл кадь.
Зот Миронович Москвае
пӧртэм кивалтӥсьёс доры
ветлӥз — писательёслэн Союзазы
но, институтъёсы но,
мукет организациосы но. Бен,
со вераськыку, солэсь мылкыдзэ
валало кадь, нош мур
оскон кылдытон понна шуныт
кылъёс Раков ӧз кылылы.
Со котыре няняськыны кутскизы,
солэсь верамъёссэ юн
гажамзэс возьматыны тыршизы
музон сюресъёс сярысь
малпаса улӥсьёс гинэ. Сое
Раков валатэк уг улы но уката
секыт луэ. Сыӵе мылкыдын
ик со Ижевске но бертӥз.
* * *
Учёной советэз сӥзьылозь
люканы ӧз быгатэ. Нош али
сое люкан сярысь Песьтэровен
вераськемзы бере Раков
сюлмаськыны кутскиз: ӧд ке
дася выступлениосты, азьло
ик ӧд ке вераськы кулэ адямиосын,
совет, оло, солы пумит
берытскоз. Соин ик Раков
куд-огзэ институтын ужасьёсты
ӧтьылыса индылӥз, аслыз
кулэ адямиослы телефонэн
жингыртылӥз — со пала
дурбасьтӥсьёс уногес, пе, мед
луозы.
Кинэ ӧтёно учёной советлэн
заседанияз, сое директор
оскиз Раковлы — эскероно
ужпум угось литературая —
Петинлэн газетэ поттэм статьяез
пумысен вераськон.
Институтысь аслыз дасям
егитъёсыз сяна, солы дурбасьтозы
директор, Конов. Таизлы
сокем уг ке но оскы, Раков
малпа, Конов, та ужез умой
валамтэеныз, Петинлы дурбасьтыны
уз быгаты. Со сяна,
Раков туж оске вал педагогической
институтысь одӥг профессорлы,
языковедлы, солэн
— Раковлэн — книгаосызлэн
редакторзылы. Заседание
ӧтё но адямиосын списокысь
Раков Романовез ӵушылӥз. Со
советлэн членэз ӧвӧл, ӧм ке
но, пе, ӧте, со понна номыр уз
каре. Нош респуб ликанской
газетлэсь редакторзэ одно ик
ӧтёно луоз.
Мар, бен, ваньмыз дась
кадь. Раков советлэн умой
ортчонэзлы оске. Ужъёслэсь
кудлань берытсконзэс син
азяз умой пуктэ. Максимез но
Кедровез чалмытскыны косозы.
Раковлы Петин жаль но
потэ кадь. Егит научной ужась
ук со. Дыртыса суп-сап выременыз,
кыӵе умойтэме вуттӥз
ассэ. Ойдо ӵок, солы ик пайда
луоз. Берло мургес малпаськыны
дышоз. Валалоз, Раковез
озьы гинэ уд бекмыльты.
Раков ачиз кутоз но суйёстэ
мышкад керттылоз. Нош сое
ваньзэ ачиз меӵак уз лэсьты.
Солэн юрттӥсьёсыз тыршозы.
Учёной советэз люказы
ӝыт пал, ӝомыт луэ ни вал.
Советлэн членъёсыз сяна,
залын пуко ӧтемъёсыз, редакциосын
ужасьёс но писательёс,
институтын ужасьёс,
соос пӧлын ик Татьяна Петровна
но Пётр Петрович. Петин
адӟе: Танялэн мылкыдыз
сэзь ӧвӧл — со вала угось татын
Максим сярысь вераськозы,
сое тышкаськозы, пыкылозы.
Заседание люканы
дасяськыкузы ик ини, со валамон
вал.
Учёной советлэсь заседанизэ
кутскытозь ог дас минут
пукытозяз, Максимлэн тодаз
лыктӥз Таняез пумитамез.
Соку со дорысьтыз потӥз, ульчаын
пиштӥсь лампочкаос
улын кӧня ке сылӥз. Сылӥз но
малпаз: солэн кышноез вань,
умой-а луоз мукет кышномуртэ
вокзалын пумитаны.
Тодмоос адӟозы но паймозы,
оло, кулэтэм вераськонъёс
кылдозы. Озьы ӧжытлы пуштэм
кепыран сямзэ чутрак
палэнтӥз но трамвай пала
вамыштӥз Петин. Бен мар
курданэз, ӝоген-а, берлогес-а,
вань тодмоос адӟозы но тодозы
ук солэсь Таняез яратэмзэ,
сое ватыны нокызьы уз луы
ни. Максимлэн сюлмаськемез
токма луиз. Со вокзалэ беромыса
вуиз но Татьяна Петровнаез
ӧз шедьты ни, кошкыса
вуэм. Солэн городын
ӵыжы-выжыосыз вань, соос
доры ик пыриз, луоз.
Тодэ ваёнъёсыз но заседание
кутсконэз витемез Петинлзсь
мылкыдзэ суралтыса
пожало. Та берло огыр-бугыр
улонын тулкымъёслэсь солэн
сюлмыз керӟег луиз. Али со
азьын пукись директорез но
Раковез адӟемез ик уг поты
ни. Кытчы ке кошкы вал, соос
син шоры медаз шедьылэ.
Номыр уд кары, Максимлы
пуконо луоз. Кылзоно.
Тани газетысь редактор
вуиз ни. Нош профессорез витьытэк,
заседаниез кутскыны
умой ӧвӧл, шуо. Со вуэм бере
залын капчияк шокчизы.
— Эн лекатэ монэ, пересез,
— шуиз но профессор пуксён
интыез учкыса но ӧз вуы, со
доры тэтчыса сямен дась пуконэн
вуиз ни Раков.
— Пуксе, профессор эш.
Дорамы лыктыны дыр шедьтӥды,
со туж умой.
Собере директорлы вазиськиз:
— Табере, Иван Захарович,
кутскыны луоз ни.
Учёной совет ужаны кутскиз.
Отын ужпум пуктэмын:
Петинлэсь газетэ поттэм статьязэ
эскерон, солы дунъет
сётон.
Песьтэров но Раков азьвыл
ик вераськизы ни та заседаниын
Петинэз шымыртон пумысен.
Раковлы дурбасьтӥсьёс
кизэс ик посыса витизы та заседаниез
— вот, пе, йӧттом ни
ерпечкалы, ас интызэ, пе, мед
тодоз, уг ке вала калык радъя
улыны, нырзэ, пе, сокем урдыны
солы вазь на, уть кыӵе
со, дано учёноймес курланы
выре, йӧттоно солы.
Песьтэров нырысь ик вераськыны
кыл сётӥз Раковлы,
литература секторлэн
кивалтӥсезлы.
Петинлэн статьяяз меӵак
верамын вал удмурт литературалэсь
историзэ возьматонын
куд-ог идейной
янгышъёс сярысь. Со тужгес
но шӧдӥське Раковлэн книгаосаз
но мукет гожъямъёсаз.
Соин ик Зот Мироновичлэн
Петинлы вожпотонэз пурӟиз.
Докладаз со пӧртэм лэчыт
кылъёсты жалятэк кисьтэ но
кисьтэ.
— Петин котькинлэсь трос
тодэмзэ возьматыны выре,
— шуэ Раков. — Нош партимылэн
берло съездэзлэсь
валэктэмъёссэ уг вала, азьвыл
сямен ик ялан утчамез
потэ дано писательёсмылэсь,
кылсярысь, Зангарилэсь,
классовой нюръяськонэз валамтэзэс.
Нош со асьме ужлы
люкетэ, культурамес саптаны
тырше. Тыныд, — шуэ со Максимлы,
— вазь на сыӵеослы
милемды дышетыны.
________
Азьланьтонэз вуоно номерын.