ud#37 (25847)

№37 (25847)
6 2020-тӥ ар 24-тӥ куарусён НУНАЛ БӦРСЬЫ НУНАЛ
Ивор куды
ГЛАЗОВ
________
Гондыръёс
кышкатъяло
Ёросысь кӧняяз ке гуртъёсы гондыръёс
вуылыны кутскемын —
отын улӥсьёс та сярысь ивортӥзы
ни спасательёслы.
Ӧтьымтэ куноос асьсэдыз уката укылтэм возё
Поняпиын, Ляпагуртын но Коршынгуртын — азбаръёсы
пырало, мушъёс, чипы-курегъёс доры
вуттӥсько. Куддыр огдыре 2 но, 3 но пӧйшур вуэ.
Соосты пуныосын но, пыӵалысь ыбылыса но улляны
выро ни. Нюлэскы ветлон сярысь веранэз
ик ӧвӧл, ӝытлань ульчае потыны кышкыт, шуо
гуртоос.
ДЭРИ
________
Сюресъёслы —
43 миллион манет
Ёросысь сюресъёсты тупатъян
ужъёс туэ понна йылпумъясько.
Оглом 34 иськемлэсь ятыр транспортэн но пыдын
ортчон сюресъёс волязы, талы 43 миллион
манет пала быдтэмын.
Ёрослэн йырыз Константин Русинов верамъя, туэ
нимысьтыз саклык висъяськиз ёрос центрысь
4-зэ ульчаосты тыро-пыдо волятонлы. Но ужъёс
мынӥзы куд-ог гурт поселениосын но, кылсярысь,
Люкын, Ожмосын, Якшурын, Италмасын
но мукет интыосын.
Вуоно арын ёросысь сюресъёсты тупатыны элькунлэн
бюджетаз шӧдскымон тросгес уксё чакламын
ни — 226 миллион манет.
ИЖ
________
Дано гражданъёс
Пыӵал тӥрлык поттӥсьлэн нуналэзлы
сӥзьыса, город администрациын
сӥё-дано ужрад ортчиз.
Люкаськемъёсты ӟечкылазы
Иж городлэн йырыз Олег Бекмеметьев но город
Думалэн тӧроез Олег Гарин.
Ижез азинтон понна кужымзэс, дырзэс жалятэк
тыршись адямиос дано пусъёсын, нимъёсын
сӥлы каремын. Пӧлысьтызы 5-ез Ижлэн дано
гражданъёсыз луизы: 15-тӥ школа-интернатлэн
директорез Наил Сираев, шаерчи Сергей Селивановский,
Россиысь Спецстройлэн ветеранэз,
писатель Николай Украинец, Афган, Чечня, Дагестан
ожъёсысь ветеран Олег Матвеев. Хоккеен
шудонъя «Ижсталь» командалэн валтӥсь тренерез
Сергей Абрамов дано нимен сӥлы каремын
кулэмез бере.
КЕЗ
________
Бадӟымъёс кадь
17-тӥ куарусёнэ ёрос центрысь
«Олимп» стадионын юр-яр каризы
пичиос.
Ёрос администрациысь спортъя
секторын ужась Ольга
Пулькина ивортэмъя, Кезысь 5 нылпи садъёсысь
но Чепца гуртысь пиналъёс улоназы нырысьсэ
ГТО-лэсь куронъёссэ сётӥзы: ки йылазы
ӝутъяськизы, сылыса азьпала мыкыръяськизы,
30 метре бызьылӥзы но 1000 метрез ортчизы.
Садъёсысь быръемын вал бадӟымъёсыз
пиналъёс, угось ГТО-лэн нырысетӥ тубатэз 6
аресъемъёслы чакламын. Арня ортчыса, соос
мукет куронъёсты быдэстозы на, кылсярысь,
кузьдалае тэтчалозы. Нош кин зарни значоклы
мынэ — сыӵеос 2 кузя — 1 иськем кросс ортчозы
на.
КИЯСА
________
Ожын кылдэм
суредъёс
21-тӥ сентябре 110 ар тырмиз
художник-баталистлы, «Победа»
суредэз понна СССР-лэн Кун
премиеныз пусъем Пётр Кривоноговлы.
Киясаын вордӥськем художник быдэс войнаез
ортчиз, Берлинозь вуиз. 5 ар ӵоже ог 300 суред
кылдытӥз. Ёрос центрысь солэсь нимзэ нуллӥсь
музее «По дорогам войны» выставкае (6+) лыктыса,
куд-огзэ адӟыны луоз. Соосты киясаослы
огдырлы сётӥз Суредаськон искусствоосъя элькун
музей. Со сяна, Киясаысь музей утьыса возе
П. Кривоноговлэсь 105 суредзэ, отын возьматэмын
1812-тӥ арысь Отечественной война, Гражданской
война но Быдӟым ож.
КРАСНОГОРСК
________
Больницаын но,
ужын но, дорын но
Ёрос центрысь больницае грипплэсь
1 сюрс 300 доза вакцина
вуиз.
Прививка лэсьтыны адямиос
асьсэос ӵемгес лыкто больницае. Инфекционной
кабинетэ маскатэк но перчаткитэк пырыны лэземын
ӧвӧл. Эмчиос асьсэос но потало организациосы-предприятиосы
но сыӵе гуртъёсы, кытын
ФАП-сы ӧвӧл. Прививка пуктэмлэсь азьло котькуд
адямилэсь бесконтактной термометрен температуразэ
мертало, висёнъёсыз сярысь юаллясько.
Октябре ёросэ эшшо 2 сюрс доза вуоз на. Соку
эмчиос, коркась корка ветлыса, 65 ареслэсь
бадӟымъёслы но прививка пуктылыны кутскозы
— коронавируслэсь утиськон вылысь соослы
больницае лыктоно ӧвӧл.
МОЖГА
________
Кырсь уз луы ни
Можга карын канализацие люкаськись
кырсез сузясь сооружение
лэсьтыны кутскемын.
Али мисьтаськонэ, производствое
кутэм кырсь ву Сюга шуре
кисьтӥське, инкуазез кырсёмытэ — шаерамы
та учыр тужгес сюлмаськытӥсь ужпумъёс пӧлы
пыртэмын, инкуазьлы ыштонъёс ваем понна
бадӟымесь штрафъёс юнматэмын.
Выль сооружение дась луыны кулэ 2022-тӥ арын,
сутка ӵоже со 8 сюрс кубометр вуэз чылкытатыны
вормоз. Солэсь ужаны кутскемзэ чидатэк витё
Можгалан улӥсь 50 сюрс пала адямиос.
САРАПУЛ
________
Чорыг лэзизы
Усть-Сарапулка гурт дорысен
Кам шуре 3-4 толэзьем 750
стерлядьёсты лэзизы. Соосты
юромо вайизы Пермь улосысь
одӥгысьтыз чорыг будэтон заводысь.
Кам но отчы усись шуръёс дорысь кӧня ке интыосын
туэ лэсьтӥськон ужъёс мыно. Кылсярысь,
июньысен Ягуречка шур вамен выжез тупатъязы,
солэн кузьдалаез 15 метр пала. Со сяна,
Киясаез но Лутохаез герӟась сюрес волятӥське
— таин сэрен но шуре кырсь шедьыны быгатэ.
Инкуазь ыштонъёс адӟе бере, стерлядьёсты
шуре лэзён солы пунэмзэ берыктэм кадь мед
луоз, шуизы Управдорысь но Росрыболовствоысь
специалистъёс.
СЮМСИ
________
Ма каремзэ ӧз вала?
Ёросысь 44 аресъем воргорон
нылпиосты эриктэмаз шуыса янгыше
уськытэмын.
Следствие но суд шараязы: 2010-
тӥ арын пиосмурт тодмоосызлэсь
пичи нылзэс сантэмам. Нош
2013-тӥ арын аслэсьтыз быдэ вуымтэ нылзэ ӧвӧл
жалям. Психологъёс но психиатръёс воргоронэз
эскеризы, шуизы: дырын-дырын ма каремзэ уг
валалля, йырыз сураськылэ. Сыӵе вакытаз пиналъёс
вылэ омырске.
Табере воргорон 18 ар колониын пукоз. Со сяна,
психиатръёс дӥньын эмъяськоз.
УВА
________
Выль асфальт
куашказ
Каргуртэ вуылӥзы «Калык фронтлэн»
ёзчиосыз — соосты ӧтизы
гуртоос.
Калык лыдъя: каргуртысь «Формирование
комфортной городской среды» кун
программая куд-ог азбаръёс но калык люкаськылон
интыос чакламъя тупатымтэ. Кылсярысь,
«Красавица ель» площадьлэн одӥг интыяз выль
кисьтэм асфальт ог метр мурдалае куашказ ни.
Шолохов урамысь 2а номеро юртын улӥсьёслэн
но мылкыдзы ӝыныё — азбаразы кисьтэм выль
асфальт ломдылӥз. Та сяна, соос корказэс кенерен
котыртыны куризы вал. Кенер интые, профиль
гинэ кыскемын. «Калык фронтысь» адямиос шуизы:
ӝожтӥськонъёс юнме шорысь уг вуо — Ува
администрацилы юанъёс трос, соосты сэрттонопертчоно.
ШАРКАН
________
4 инты
«ДаУР» проектэз быдэсъям улсын
Шаркан ёросысь 4 места пыриз
Удмуртилэн 100 тунсыко, учкымон
интыосыз пӧлы. Алигес отчы
нимысьтыз пусъёс пуктылӥзы.
Со сярысь вераз «Шаркан» инкуазь
паркысь методист Анастасия Князева.
Котькин тодэ, Быгы — фин-угор дуннелэн шоркарез,
кызьы соос дӥньын кунояськытэк! Тол бабай
пиналъёсты но, бадӟымъёсты но вите тол но, гужем
но. Тодӥськоды-а, Тол буба — адямиослэсь пегӟыса
Каргурезе ватскем алангасаръёс пӧлысь одӥгез шуыса?
Иське, 200 метр ӝужда Каргурезе но одно ик
тубано. Эшшо учконо, кытын лэсьтӥзы «Тень Алангасара»
фильмез — удмуртъёслэсь 12-тӥ даурысь
улэмзэс син азе пуктыны луэ Мувыр котырын.
ЭГРА
________
Кытын вал гуртъёс...
Ёрос музейын усьтӥськиз «Любовь
к Игре и картографии» выставка
(12+).
Со сӥземын Ӟуч географической
обществолы 175 ар но Удмуртилэн
кунлыкезлы 100 ар тырмонлы.
Музейын ужасьлэн Юлия Мошонкиналэн
малпамезъя, выставкаын возьматэм документъёс
пӧлысь огез тунсыкоез — Удмуртилэн этнической
картаез, со 1933-тӥ арын лэсьтэмын, возьматэ,
кытын уло вылэм со вакытэ удмуртъёс, ӟучъёс но
бесерманъёс. Огез вашкалаез карта — Эгра волостьысь
Калининской починоклэн 1875-тӥ арын
суредам планэз. Тодыны луоз, кыӵе гуртъёс быризы,
кытӥ сюресъёс ортчизы, ма быдӟа вал тэльёс...