#10

Литературалы
сӥзем газет
№40 (25850)
2020-тӥ ар 15-тӥ коньывуон 13
Коньывуонэ вордскизы
9-тӥ коньывуонэ
65 арес тырме Надежда
Серафимовна Лопатиналы
— удмурт гожъяськисьлы,
«Ӟечбур!»
газетлэн редакторезлы,
Удмуртиысь дано журналистлы,
Трокай Борисов
нимо премилэн
лауреатэзлы, «Кылъёсын
шудон», «Буква
вӧзы буква…» но мукет
книгаослэн авторзылы.
________
Адями но инкуазь
Бурд улаз ӧте сӥзьыл
22-тӥ коньывуонэ
150 ар талэсь азьло Воронеж
карын вордскиз
Иван Алексеевич Бунин
(1870-1953) — ӟуч писатель,
кылбурчи, кылысь
кылэ берыктӥсь,
Нобель нимо литературной
премилэн
лауреатэз.
________
23-тӥ коньывуонэ
100 ар талэсь азьло
Италиысь Оменья
коммунаын вордскиз
Джанни Родари
(1920-1980) — нылпи
писатель но кылбурчи,
журналист, «Приключения
Чиполлино», «Торт
в небе» но мукет книгаослэн
авторзы.
Библиотека
Та нуналъёсы Национальной
библиотека
радъя Удмуртилэн
кунлыкезлы 100 ар
тырмонлы сӥзем «Литературная
и100рия»
марафон. Со ортче
библиотекалэн «ВКонтакте»
вотэс бамаз:
vk.com/unatlib. Марафон
пыр потыса, тодматскыны
луоз Удмуртиысь
литературалэн
сюресэныз. Марафон
кыстӥськоз 4-тӥ ноябрёзь.
Театр
Сентябрьлэн пумаз
Йошкар-Олаысь
М. Шкетан нимо драмая
театрын ортчиз
фин-угор театръёслэн
«Майатул» калыккуспо
фестивальзы.
Отчы вуылӥз Удмурт
театрысь труппа но.
Элькунысьтымы театр
возьматӥз Сергей
Антоновлэсь «Пуны»
спектакльзэ (драматург
пьесазэ сцена вылын
ачиз пуктӥз). С. Антонов
драматурглэн ужез
«Надежда» номинациын
пусъемын вал.
Виталий МОРОЗОВ
Син азьын вож, горд но льӧль
Буёлъёс пишто.
Выжыкыл со чик ӧвӧл —
Куарусён усто.
Мынектӥсь покчигужем
Бурд улаз ӧте,
Бусыысь, лудысь уже
Тыршисез вите.
Котырез коньывуон
Небӟытэ пумен.
Кысык дыр бере жадён
Буйгатске уммен.
Пужмерен чильпа муэз —
Синъёслы мальдэт.
Дыртытэ ни улэпез
Лэсьтыны толъет.
Шуркынмон вале котыр
Юг-тӧдьы мамык.
Чылкыт-дун, небыт шобыр —
Выль шумпотонмы.
Лымыен ваньзэ толэзь
Огинэ герӟа.
Дасяса матысь толлы,
Нуны гур кырӟа.
Туспуктӥз Максим ЕГОРОВ
Сӥзьылэ, ой, сӥзьылэ,
Муспотон вакыт.
Бурмемын бордад сюлэм,
Тынэсьтыд уд ӵыд!

№40 (25850)
14 2020-тӥ ар 15-тӥ коньывуон
Гурт библиотека
Беризь пушкын — песьтэр, песьтэр пушкын — кылъёс
Можга ёросысь Бадӟым
Сибы гуртысь библиотека
ӝоген удмурт
лыдӟетъюртлы пӧрмоз.
Лыдӟиськон юртэз вошто,
удмурт кырӟанэз
санэ басьтыса.
Бадӟым Сибы гурт — трос
дано удмурт гожъяськисьёслэн
кӧкызы. 20-тӥ даурлэн
кутсконаз татын улӥз
дышетӥсь Вера Васильевна
Толстая. 25 ар ӵоже со
трос пиналъёсты грамоталы
дышетӥз — пӧлазы вал Игнатий
но Василий Гаврилов
агай-вынъёс. Соослэн нимъёссы
пыраклы герӟаськемын
Удмурт театрен но солэн
кылдэменыз. Театрлы азинскыны
юрттӥзы Сибыысь потэм
мукет дано муртъёс но:
Михаил Покчи-Петров кылбурчи
но писатель, режиссёр
вал, Анатолий Григорьев
драматурглэн трос пьесаосыз
сцена вылын улӟылӥзы ини.
Сибыын озьы ик вордскемын
Анатолий Петров журналист
но кылбурчи. Узыр та гурт тодосчиосын
но: татысь потӥзы
экономика наукаосъя доктор
Михаил Шишкин, филология
наукаосъя доктор Александр
Шутов, филология наукаосъя
кандидат Лидия Долганова.
Дано муртъёссылэн вордӥськем
нуналъёсазы соослы
Можга ёросысь Бадӟым Сибыысь библиотекарь
А. Михайлова «беризь» бордын.
сӥзем ужрадъёс арлы быдэ
радъялля гуртысь библиотекарь
Александра Михайлова:
я библиотекае калыкез люка,
я ачиз нылпи садэ яке школае
вуылэ. Нылкышно культура
удысын со 37-тӥ арзэ ини:
азьвыл культурая юртын ужаз,
7-тӥ арзэ — библиотекаын.
2018-тӥ арын Национальной
библиотека радъяз Можга
ёросысь литературалы
сӥзем нуналъёсты. Ар ӵоже
Ижкарын но ёросын ужрадъёс
ортчылӥзы. Александра Григорьевна
но Можга ёросысь
кылбурчиосты люкалляз,
Алнашысь гожъяськисьёсты
куное ӧтчаз.
Туэ малпан кылдӥз библиотекаез
чылк-чылк удмурт
карыны. Проектэз быдэстыны
юртто Можга ёросысь
библиотекаысь ужасьёс. Удмурт
лыдӟетъюртлэсь туссэ
пӧрмытон понна удмурт
кырӟанэз тодазы вайизы:
...Та веран кылъёсме, та
кырӟан гуръёсме
Пересьёс веразы, песьтэре
ватӥзы,
Песьтэрез юнгес нинэн
керттӥзы,
Туспуктӥз Анастасия ШУМИЛОВА
Бадӟым крезь пушкы мургес
донгизы,
Бадӟым крезь беризьлэн
гырказ ватэмын,
Со беризь кыдёке тэль
сьӧры ышемын…
Библиотекае пырыса ик,
беризез адӟиськод. Со нуэ мукет
висъет — песьтэр — доры.
Нош со песьтэрын люкамын
крезьгуръёс-кырӟанъёс —
книгаос. Ӝоген ваньмыз удмурт
сямен гожъямын луоз,
пырон доры крезь ошозы на.
Нош беризез библиотекае
кельтӥллям удмурт артистъёс.
Сибые вуылыкузы, реквизитысь
писпулэн модосэз татчы
кылем. Трос аръёс ортчыса, со
беризь выльысен «пушйиз».
Со сяна, библиотекае вуж
арбериосты, ӝӧкъёсты, ӝажыосты,
сандыкъёсты лю ка ло.
Сибыос вашкала ӝа жыоссэс
вайизы ини. Александра Григорьевна
куш тӥськем Кӧс
Сибы гуртысь арбериосты
люказ. Удмурт лыдӟетъюртэз
усьтыны туэ ик дасясько, Удмуртилэн
кунлыкезлы 100 ар
тырмонэз пусйыса.
Лыдӟиськон юрт 30-тӥ
арзэ клубен одӥг липет улын
улэ, укно янакъёссы пырдо
вал ини. Ярам, туэ укноосты
«Культура» нацпроектъя
вошъ язы. Паськыт укноослы
библиотекарь туж шумпотэ.
Котькуд гурт библиотекаын
сямен ик, татын но выль
книгаослы ёрмо. Али фондын
3 сюрс 400 пала книга лыдъяське,
тросэз вужесь ини, нош
выльёсыз ӧжытэн вуо. Ярам,
азьвыл аръёсы печатлам удмурт
книгаоссы, газет-журналъёссы
уно: калык соосты
лыдӟыны яратэ.
— Арлыдоос кылем дауре
потэм удмурт книгаосты,
классикаез ӵем окто, — вера
Александра Григорьевна. —
Соос шуо: азьло улон сярысь
лыдӟеммы потэ. Мыным
но потэ, азьвыл шулдыргес
улӥськом вал шуыса. Удмурт
книгаосты лыдӟыса, ортчем
аръёсты тодамы вайиськомы,
колхоз улон син азе пуксе.
Яратӥськомы «Удмурт дунне»
газетэз но: тросэз доразы
басьто, кин ке, библиотекае
пырыса, лисъя.
Александра Григорьевна
дӥне пиналъёс «умоесь» шуыса
пыро, удмурт сямен верасько.
Тросэз куспазы ӟуч
кылын лабырто, но библиотекарь
нылпиосты дышетӥз:
ӟучен вазё ке, кышномурт
адӟымтэ улсы кариське. Удмурт
гуртын удмурт кылын
вераськоно, ӟучезлы дышозы
али, шуэ библиотекарь.
________
Анастасия ШУМИЛОВА
Туризм
Лудӟи шур дуре васькало
Можга ёросын, Трофим
Архиповлэн вордӥськем
палъёсаз, усьтӥськиз
литературной маршрут.
Дано удмурт писательлэн
улон но ужан сюресэныз
тодмато Можга
ёрос библиотекаысь
ужасьёс.
— Кылем арын, улосчимес
буре вайыса, «Лудӟи шур
дурын» проектмес малпамы,
— вераз ёрос библиотекаысь
валтӥсь библиотекарь Елена
Сапожникова, — Трофим
Архиповлэн улонэныз ӟечгес
тодматскыны мылкыд карисьёсты
3 гуртъёсы — Пыӵасэ,
Бияе, Гозеге — нуллӥськомы.
Та выллем проектъёс Удмуртиын
ӧй на вал.
Трофим Архипов вордӥськемын
Бия гуртын, жаляса
верано, атай юртэз али кылемын
ӧвӧл ни, но ульчаез
писательлэсь нимзэ нуллэ.
1998-тӥ арын гуртын Трофим
Архиповлы синпелет усьтӥзы.
Туристъёслы татын писатель
сярысь кӧня ке кыл верало,
коркаезлэсь сылэм интызэ
возьмато. Вуыло Сямгурезь
Можга ёросысь Гозегысь Н. Иванова анаезлэн корказ
музей усьтӥз.
выжыысь ошмес доры, со сярысь
Трофим Архипов гожъялляз
«Ортчеменыз пумиськон»
повестяз.
Биялэсь кыдёкын ик ӧвӧл
— Пыӵас. Школаысь огаз классын
Трофим Архиповлы сӥзем
сэрег усьтэмын. Бадӟым классын
дышетскисьёс экскурсия
ортчыто, писательлэн пинал
дырыз сярысь пыр-поч мадё.
Маршрутэз йылпумъяло
Гозег гуртын, отӥ бызе Лудӟи
шур. Критикъёс но лыдӟисьёс,
«Лудӟи шур дурын» романэз
лыдӟыса, пӧртэм малпанъёсы
вуылӥзы: кыӵе ёросысь шур
сярысь татын вераськон мынэ,
пе. Угось Лудӟи бызе Можга,
Ува ёросъёстӥ, Ижкар котыртӥ.
Ачиз Трофим Архипов кема
аръёс ӵоже ужаз «Советской
Туспуктӥз Елена САПОЖНИКОВА
Удмуртия» (али «Удмурт дунне»)
газетын, шаермылэн
пӧртэм сэрегъёсаз вуылӥз.
Но берло ваньзы огкылэ вуизы:
та, дыр, писательлэн
вордӥськем палъёсысьтыз
шур, уго Гозегын Т. Архиповлэн
апаез улӥз, писатель ӵем
дораз вуылӥз.
Гозегын туристъёсты куноято
удмурт коркан. Надежда
Кузьминична Иванова аслаз
мылкыдызъя усьтӥз сое анаезлэн
корказ. Надежда Кузьминична
татчы пӧртэм вашкала
арбериосты люказ, музей
кылдытӥз. Туристъёслы экскурсия
но ачиз ортчытэ: кеносэз
но, азбарез но возьматэ.
Гозегысь арлыдоос удмурт
корка кырӟаны люкаськыло,
экскурсие вуэмъёслы гуртсы
сярысь мадё, вашкала удмурт
но ӟуч кырӟанъёсты быдэсто.
Ӵемысь та маршрутъя пото
школаын дышетскисьёс, библиотекалэн
конкурсъёсаз вормисьёс.
— Культурая юрт милемлы
автобуссэ сётъя, — вераз Елена
Сапожникова, — ог 10 пол
маршрутэз ортчимы ни, но
ужез трос на, проектмес азинтоно,
азьланяз грант сётӥсь
конкурсъёсы пыриськоно.
«Лудӟи шур дурын» маршрутэз
ортчыса, калык, Трофим
Архиповлэн улонэныз сяна,
тодматске удмуртъёслэн сямйылолъёсынызы,
шаермылэн
инкуазеныз.
________
Мария ЕМЕЛЬЯНОВА

№40 (25850)
2020-тӥ ар 15-тӥ коньывуон 15
Арлэн книгаез
Дорад ке дунъяло, пуш тыре...
Та нуналъёсы Ижысь
Эшъяськон юртын «Арлэн
книгаез П. Чайковскийлэн
вордӥськем
палъёсаз» фестивальконкурслы
йылпумъянъёс
лэсьтэмын вал.
Ужрад ортчиз Национальной
библиотекалэн
сюлмаськемезъя.
Таӵе конкурс нырысьсэ
ортчиз но кӧня ке улосъёсты
огазеяз. Вожвылъяськонэ
пыриськизы 129 изданиос.
Книгаос вуизы Удмуртиысь,
Марий Элысь, Комиысь, Башкортостанысь,
Татарстанысь,
Чувашиысь, Якутиысь но Киров
областьысь.
Жюрилы туж секыт вал
устоосыз пӧлысь устооссэ
книгаосты, издательёсты
быр йыны. Конкурсэ, чеберлыко
литература сяна, вуизы
наукаен герӟаськем книгаос,
справочникъёс, учебникъёс,
энциклопедиос.
«Устоез оформление» номинациын
пусъемын Башкортостанысь
«Китап» издательстволэн
«Урал Батыр.
Башкирский народный эпос»
книгаез. Нош наукая тужгес
устоез издание луиз Чувашиысь
издательстволэн «Материальная
и духовная культура
суваро-булгар — предков чувашей»
книгаез.
Устоеныз дышетон изданиен
лыдъямын «Удмуртия»
издательствоын поттэм
«Ӟеч-а, бур-а, удмурт кыл!»,
нош чеберлыко книгаос пӧлын
пусъемын Марий Элысь издательстволэн
антологиосыз.
Нылпиослы но быдэ вуымтэослы
чаклам книгаос пӧлын
«Арлэн книгаез П. Чайковскийлэн вордӥськем палъёсаз»
конкурсын «Удмуртия» издательствоез данъязы.
озьы ик вормиз Марий Элысь
издательство, соослэн нылпиослы
яркыт суредъёсын порӟуч-англи
кыллюкамзы тужгес
ӟечен лыдъямын. Нимысьтыз
номинация чакламын
вал электрон книгаос понна.
Татын вормисе потӥз Удмуртиысь
Национальной библиотекалэн
Михаил Калашников
конструкторлы сӥзем указателез.
Жаляса верано, пандемиен
сэрен куд-огез ужрадэ
лыктыны ӧз быгатэ. Со понна
Марий Элысь, Якутиысь издательствоос
Удмуртиысь книга
яратӥсьёслы онлайн вазиськизы,
та выллем конкурс ортчытэмлы
бадӟым тау каризы.
Трос тау карон кылъёс
чузъяськизы сцена вылысен
но.
— Туж бадӟым тау карем
потэ Национальной библиотекалы,
Удмуртилэн кунлык
басьтэмез дырысен 100 ар
тырмон вакытэ соос асьме
улонын книгаослэсь интызэс
возьмато, — пусйиз Кун Кенешысь
ялан ужась комиссилэн
кивалтӥсез Татьяна Ишматова.
Культурая министр Владимир
Соловьёв озьы ик пусйиз
Национальной библиотекалэсь
быгатыса ужамзэ.
— Книгаез поттоно гинэ
ӧвӧл, вӧлмытоно, — пусйиз
министр. — Библиотека туж
трос каре со понна, «П. Чайковскийлэн
вордӥськем палъёсаз»
фестивальлы луыса республикамы
сярысь палэнын
но тросгес тодо.
Нош Печатья но ивор
вӧлмытонъя агентстволэн
кивалтӥсез Александр Валов
шумпотэмзэ вераз: П. Чайковскийлэн
родинаез мукет
улосъёсысь авторъёсты, издательствоосты
но бурдъя.
Но ваньзы возьмало ни
валтӥсь номинациосын вормисьёсты.
Нимъёсты шараян
понна сцена вылэ потӥзы Кун
Кенешысь ялан ужась комиссилэн
кивалтӥсез Татьяна
Ишматова но Кун Думаысь
депу тат Алексей Загребин.
Национальной бибилиотекалэн «ВКонтакте» бамысьтыз
Конвертэз усьтон вискын
ваньзы шокамысь ик дугдӥзы
кадь. Озьыен, Удмуртиысь
устоеныз лыдъямын «Удмурты.
Тайна тамги» —«Удмуртия»
издательствоын поттэм книга!
Та бӧрсьы ик яло эшшо
одӥг нимысьтыз номинациез
— «Арлэн книгаез». Татын но
вормиз «Удмуртия» издательстволэн
книгаез — «Секреты
удмуртских мастеров».
Юрий Кузнецовлэн — «Удмуртия»
издательстволэн директорезлэн
— пушкыз тыриз.
Тау карон кылъёссэ шуак вераны
ик ӧз ни быгаты, сцена
вылэ ӧтиз та книгаос бордын
ужам адямиосты — Георгий
Грязев редакторез но Валентин
Семёнов дизайнерез.
— Малы мыным сокем
дуно «Секреты удмуртских
мастеров» книга? Сое лэсьтонэ
быдэс дунне пыриськиз!
Тодосчиос, кибашлыослэн
юртъёссы, «Айкай» театр, Калык
творчествоя юрт... Ваньзы
ужазы одӥг копейка гонорартэк
но! — тау карыса пусйиз
Юрий Васильевич. — Книгаосмы
палэнын, Москваын трос
пӧртэм дипломъёс басьязы
ни, но дорад басьтэм дунъетлэсь
дуноез номыр ӧвӧл, пуш
тыре, синвуос пото...
Национальной библиотекалэн
кивалтӥсез Татьяна
Тенсина оскемзэ вераз, таӵе
фестиваль-конкурс азьланяз
но радъяськоз шуыса. Угось
со Удмуртилэсь гинэ данзэ
уг ӝуты, пӧртэм улосъёсысь
гожъяськисьёсты но издательствоосты
огазея.
________
Елена ПАНФИЛОВА
Нобель нимо премия
Ма понна дунъяло гожъяськисьёсты?
Туэ Нобель нимо литературной
премиен
пусъемын Америкаысь
кылбурчи Луиза Глюк.
Кылбурчи но эссеист
вордскиз 1943-тӥ арын Нью-
Йоркын еврей семьяын. Атаезлэн
выжыосыз Венгриысь
пото, нош анаез ласянь Луиза
Белоруссиын вордскем
Саймон Кузнец тодосчилэн,
статистиклэн, экономикая
Но бель нимо премилэн лауреатэзлэн
племянницаез
луэ. Луиза Глюклэн егит
дыръяз тазалыкез ляб вал,
соин сэрен со университетэз
йылпумъяны ӧз быгаты. Но
1970-тӥ аръёсысен со Америкаысь
пӧртэм университетъёсын,
колледжъёсын ужа,
Пӧртэм премиослэн
лауреатсы Л. Глюк.
студентъёсыз поэзиен тодматэ,
гожъяськыны дышетэ.
Произведениосыз понна
кылбурчи трос премиосын
пусйылэмын. 2003-тӥ-2004-
тӥ аръёсы Луиза Глюк Америкаысь
Конгресслэн библиотекаез
бордын поэт-лауреат вал
(американ кылбурчиос понна
та валтӥсез данъет, пе). Нош
англи кылэз тодӥсьтэмъёс
пӧлын та дырозь Луиза Глюклэсь
нимзэ кылылэмъёс трос
ик ӧй вал, дыр. Озьы Россиысь
валтӥсь классикез Александр
Пушкинэз но Америкаын туж
ӧжытэз тодо. Кылбурчилэн
сыӵе адӟонэз: поэтъёс быдэс
дуннелы тодмо луыны, асьсэ
культуразы, кылзы пушкысь
потыны шер быгато.
Луиза Глюклэн ӟуч кылэ
берыктэм кылбуръёсыз пӧртэм
аръёсы печатласькизы
бичетъёсын но журналъёсын.
2012-тӥ арын «Дикий ирис»
книгаез потӥз (ӟуч кылэ Борис
Кокотов берыктӥз). Матысь
дыре берыктэмъёс тросгес луозы,
вылды.
Швециысь академия премизэ
улэп классиклы сётӥз
«ноку янгышасьтэм куараез»
понна. Аслаз рос-прос,
чурыт чебереныз со одӥг
адямилэсь улонзэ вань адямиослы
валамон возьматӥз,
пе. Луиза Глюк американ литературалэсь
традициоссэ
азин тэ, классической амалэн
гожъяське. Верлибръёсыз
(эрико кылбуръёсыз) ӵемысь
бадӟымесь, эпическоесь луо.
Мар шуо критикъёс Швециысь
академикъёслэн Луиза
Глюкез быръемзы пумысен?
Тросэз пусъё: берло дыре
бадӟым премиос, фестивальёс
политикаен, авторъёслэн
дунне шоры учкеменызы
герӟаськемын. Пусъё сыӵе адямиосты,
кин шара вераське,
кин ке понна дурбасьтэ, туала
улонысь висьытӥсь югдуръёсты
меӵак возьматэ. Луиза
Глюкез сыӵе авторъёс пӧлы
пыртыны шуг. Со гожъя классической
поэзилы, античной
кылбуретлы, мифологилы матын
луись кылбуръёс, соиз яке
таиз югдур сярысь кесяськыса
уг вераськы. Озьыен, кылбурчиез
литературной премиен
дунъязы кылбуръёсыз понна
— таиз туж шумпотымон.
________
Анастасия ШУМИЛОВА

№40 (25850)
16 2020-тӥ ар 15-тӥ коньывуон
Книга ӝажы
Берыктон луд
Малпанъёс пеньлы пӧрмозы
О. Алексеева.
Тодмо дуннеосы
Ольга Алексеевалэн
— Удмуртиысь
ӟуч кылбурчилэн
— творчествоез
Ижысь поэзиез
яратӥсьёслы кемаласен
тодмо. Трос
аръёс ӵоже уно
люкаськем кылбуръёссэ
поттӥз «Я
к вам вернулась»
бичетэн (12+).
Ольга Алексеева вордскиз
Шарканын, йылпумъяз
Удмурт кун
университетысь филологияя
факультетэз.
Бӧрысь пӧртэм ужъёсты
быдэсъяз, наука, культура
удысъёсын тыршиз.
Трос дырзэ котьку
сӥзьылӥз творчестволы.
Кылбуръёсыз 1980-тӥ
аръёсысен печатласько
газет-журналъёсын.
Кылбуръёс сяна, Ольга
Алексеева пьесаос, сценарийёс
но проза гожъя.
Солэн кылбуръёсызъя
кырӟанъёс чузъясько
Ӟуч театрлэн спектакльёсаз.
«Я к вам вернулась»
кылбуръёсын бичетаз —
пӧртэм аръёсы вордскем
чуръёсыз. Книгалэсь
пуштроссэ эшшо но мургес
каро Ижысь художниклэн
Наталья Вострокнутовалэн
суредъёсыз.
Автор верамъя, солэн
кылбуръёсыз «документальной
реализм»
амалэн гожтэмын: соос
дневникъёсысь, гожтэтъёсысь
пегӟемын
кадь. Кылбуръёсыз —
улонысь адӟем-кылэм
учыръёслы эскизъёс,
соин куд-огез вакчи
веросъёслы, сценкаослы
тупало. Ольга
Алексеева вазиське
эшъёсызлы но тодмотэм
лыдӟисьёсызлы, берыктэ
ортчем вакытэз но
учке азьлане, поръя литературалэн
дуннеостӥз,
яратоно кылбурчиосызлэн
чуръёсыз кузя
но асьмелы тодмо
интыостӥ: Ижкартӥ,
Дэри черкогуртэтӥ но
ёростӥ. Зэмос кылбурчи
кадь, автор быгатэ
лыдӟисез куриканы.
Улон сюрес вылын
кылбурчилэн кельтэм
пытьыостӥз вамышъя
лыдӟись но…
Ижысь ӟуч кылбурчилэн Ольга Алексеевалэн чуръёсыз
* * *
Лимонэн чайлэн зыныз —
Южтолэзь, лымы, пуэд.
Нош ик ки вылам чипы,
Син азям — школа, ӵыпет.
Вордыса мусо нылме,
Берытски еж вакытам.
Нош ик, син пӧртман сямен, —
Еж дырысь пуэд вӧзам.
* * *
Лымыен валче синмаськон чальтче.
Лымы, мурт сэрегъёс сямен,
монэ эшъяськытэ
ӝожомонэн.
Тулысэ ӧвӧлтэм яратон ӝуштытэ,
нош тол кулэстэ буёлэз:
мылкыд бездэ но ӟаректэ,
алда ваньзэс.
Шудлы ёрмон оштолэзе
кырем вирсэр выллем,
нош толалтэ шуныт вазем —
со дунъянтэм.
Куинетӥ дунневыл
Книгаос но пеньлы пӧрмозы.
Калыкъёс но пеньлы пӧрмозы.
Малпанъёс но пеньлы пӧрмозы.
Соку тӧл шӧйёсмес бинялтоз
Та тылпу бервылын огинэ.
Вань тодэ ваёнъёс — ыр тӧллы,
Ми сярысь книгаос — ыр тӧллы,
Ми сярысь малпанъёс — ыр тӧллы.
Та тылпу бервылын со вузоз.
Кин сярысь? Утчалоз со кинэ?
* * *
Кечат-вамат вуо ортчем
Аръёс но нуналъёс.
Куара ыше, азям пуксе
Мар вал но мар луоз.
Ӝомыт нунал вал шур вадьсын,
Пичи тылскем гомаз,
Вал эшъёсы со котырын,
Ву кырӟанзэ нёръяз.
Султэм потэ, кеськем потэ —
Бордаз луо возе.
Нош ньылонме ӵын ӝабыртэ,
Ву пуртыын пӧзе.
Мон курикысь поттэм чорыг,
Пурты но мон понна.
Шу вал: «Бызёз берлань шур-дыр»,
Но бак мон, чукырна.
Витетӥ зор
Шӧдтэк шорысь дугдӥз жаль зор.
Пельпум вылад изиз уйвӧт.
Синкылиен быроз кӧтӝож.
Ку яратон кошкоз — уд тод.
Нош со кошкиз, куазь ӟардыку,
Кылиз ог-кык шапык гинэ,
Шӧдӥз ыштонъёсты пельпум,
Кузьыт сюрес шориз бамез.
Нош нуназе кот вай борды
Йӧтскоз пельпум, луоз курыт —
Тодад ваёд, кызьы вӧтын
Кот бам ӝожомытӥз уйбыт.
* * *
Пунэмзэ берыктэ мыным кар, сӥялэс луыса,
Малы ке шуоно мон ачим мылкыдме ватӥсько.
Шӧдӥсько: серемез но потэ, эсьмаса,
Мон ачим но рос-прос адскыны тыршисько.
* * *
Ымнырзэ кисыръя, йӧнъяське мон сямен,
Бен, сямыз но луэ чурытгес но ӝожгес.
Я, ойдо эшъяськом инь, зӥбыт юлтоше-уроме,
Усьтыса лулъёсмес, ватытэк уртчылӥсь мылкыдмес.
Чус-пеймыт вакытэ, ку уйвӧт дуннеез эгеса,
Асьмеос кыкнамы кылёмы, мон учко синъёсад.
Жингырес куараен серекто но, монэ кылыса,
Горыса дыректоз-зуркалоз кот асфальт.
Антонова Олялы
Оли, вуж юртъёсты сэртто.
Со вӧсь ӧвӧл — ортчем яратонлэсь
сюлме кылем шырпуоссэ* поттон выллем.
Бен ма… Ӧпкелемед токма.
Вуж юртъёсты шумпотыса сэртто,
Вож садъёсты но кораса быдто,
Жагез но шелепез буш интыысь потто.
Озьы ке но нокин уз юа асьмелэсь,
Соин тынад ӧпкелемед токма.
Тон кынь синдэ, сюлэмысьтыд тон потты
шырпуоссэ ортчем яратонлэсь…
Оли, вуж юртъёсты — сэртто.
________
* Шырпу (татын) — заноза
Туспуктӥз ЧУДЬЯ ЖЕНИ
________
Берыктӥз Анастасия ШУМИЛОВА

№40 (25850)
2020-тӥ ар 15-тӥ коньывуон 17
Кылбурет дунне
Ӟыгыртыса дор-шаерез…
Дэри ёросысь Якшур гуртысь Виталий Морозовлэн чуръёсыз
Вылез ӝутске улон
Музъем улысь быльыраса
Чызъе чылкыт ошмес.
Шулдыр гурен жильыраса,
Лулъя вань котырез.
Пересе
Толэзьёс, аръёс гожен
Ымнырез басьто.
Ӝог лобиз егит гужем,
Сӥзьылад ни тон.
Дун вуэныз чик жалятэк
Юзматылэ сюмес.
Огинтыяз уг улы тэк,
Утча, шедьтэ сюрес.
Син-пельёс пумен лябӟо,
Юскиське суй-пыд.
Юн кужым, ӟигар лобӟо,
Сураське мылкыд.
Дыртэ, будэ, пӧрме шурлы —
Выль усьтӥське улос.
Кыстӥськылэ бордаз шаплы
Тэль, возь, пӧртэм лулос.
Мугорез но, уть, куасаз
Нуналмысь весь уж.
Лэсьтыны сое дыраз
Сюлмаськид ук туж.
Ӝоген потэ вӧлмыт кыре,
Вуэ эшез вӧзы —
Вогыриё батыр ӧрен
Бызе, кошке зыл-зыл.
Жадьытэк ветлӥд куке,
Вамышъяд чупрес.
Табере кык-куинь иськем —
Вормонтэм сюрес.
Нош азьпалан паськыт зарезь
Шудэ тулкымъёсын.
Юн кужымзэ, вузэ солэсь
Уд возьы пытсэтын.
Но ӧз ыш пальпотонэд,
Кузьмаськод шуныт.
Нылпиед но нунокед
Оскисько тыныд.
Ӟыгыртыса дор-шаерез,
Узырлыксэ кузьма.
Бусьтырезлы котькуд дыре
Паймод, ява, эсьма.
Мертантэм лулкужымед
(Вожъяськоз пинал!)
Котырад вӧлме, вӧлме —
Шулдырске нунал.
Ошмес шурен но зарезен
Тыршо чупрес, сюлмо —
Ӝужа, пушъе ни син азьын,
Вылез ӝутске улон.
Бен соин ик, пересе,
Эн, эн усь ӝоже,
Тусыдлэн ук чеберез
Сюлэмад выже.
Кыл кужым
Инкуазь озьы ни кылдытэм:
Огкадь ӧвӧл муртъёс.
Тусмы-буймы, дӥсьмы пӧртэм,
Нош уката — кылъёс.
Жади
Жади. Нунал потэм вылысь огсыр
Шумпотонэз зӥбе курыт кайгу.
Тюрагаез ӧй кыл ни уно дыр,
Силе кикы вакчиятэм крезьгур.
Туспуктӥз Максим ЕГОРОВ
Бадӟым ик бен улонамы
Кужмыз, катез кыллэн.
Соя ӵемысь (ма, нуналмысь)
Ӟечез, жобез кылдэ.
Шуэм-вазем ук огезлэн
Пушказ шудэн пыре,
Лул шыкысаз музонэзлэн
Потэ пӧськы урен.
Ымысьтымы чечы киське —
Гурезьёсты пород.
Но луыло дыръёс, куке
Со тэкитэн суро.
Вераськонмес ӧвӧл чаклась,
Кытын меда табу?
Котырамы куддыр чаляк
Кисьтылӥськом пож ву.
Огез отын уя шаплы,
Шурын чорыг выллем.
Шӧдӥсь, ненег ке сюлэмлы —
Сьӧд ӝокатӥсь пилем.
Бен, йӧспӧртэм ик асьмеос,
Нош уката — кылъёс.
Чакласькыса кошкись кылос,
Жаль, чик ӧвӧл ай трос.
Ыштӥ улонэлэсь чылкыт ӧрзэ,
Азьланезлы оскон нюжа сэра.
Мылкыд пумен викыштылэ, вузэ,
Ӟечсэ, кыжзэ чаль огинэ сура.
Кытын мон, кин — бен шуг ик вераны.
Лобӟиз шӧдтэк (нош вал-а со?) шудэ.
Вадьсам поръя, дась кокчаны кырныж,
Пересь кышно кусоеныз шудэ.
Адӟон кызэ, ӵемысь гинэ кизьнэ,
Черзэ-кыльзэ ӧвӧл куштон катез.
Уг валаськы, уг шедьтӥськы туннэ
Утиськыны солэсь эмез-юмез.
Пинал дыр малы меда…
Пинал дыр малы меда
Туж чаляк ортче?
Улонэ тани бырда,
Аръёсын уртче.
Азьвылгес ӝоггес-ӝоггес
Азьланьзэ возьмай.
Потылӥз мыным маке:
Ӝегатскиз ни май.
Ӧс дорын ӝуждаламе
Пусйылӥ ялан,
Витьылӥ весь будэмме,
Ӝутскемме выллань.
Шузигес ик вылӥськем
Нылпи йыр валлин.
Луысал на ке васькем
Со дыре али…
Гольык пыд бызьылысал
Ӵук лысву пӧлтӥ,
Шудысал, лӧптылысал
Эшъёсын кытӥ.
Но уг лу вамыштыны
Ог шуре кык пол.
Дасяське шокыштыны
Пумитам лек тол.
Адӟонмы сыӵе ветлэ —
Мар куректонэз.
Вань ук котькуд вакытлэн
Маиз ке ӟечез.
Ёзъёс*
Кошке, ортче паськыт, кужен,
Вольыт я дыгырес.
Выдэ шонер я нош коже
Улон вирсэр — сюрес.
Пересь уно аръёс ӵоже
Шумпотонэн, ӝожен,
Пельпумъёсаз секыт ужен
(Сӧсыр кылем ожын)
Весь вамышъяз инвис пала:
Матын кадь вал шунды.
Шӧдтэк шорысь нош азьпалаз
Кылдӥз могӟет шурдыт.
Дугдӥз тыпак… Нылпи азьлань
Вамыш лэсьтӥз. Катез
Угось солэн тросгес ай вань,
Сузе на ик моӵез.
Мынэ, дугдэ, кыштыр вырӟе,
Пыдъёсыныз кугӟа.
Пинал дырыз, оло, вурӟем,
Тодмотэмлэсь лябӟе?..
Тани кельтэ пиез мышказ,
Ялан кыдёкынгес,
Иськемъёсты лыдъя эрказ —
Уд сьӧлта даурез.
Кошке, ортче паськыт, кужен
Улон вирсэр — сюрес.
Отчы-татчы выже, коже,
Выль ёз воштэ ёзэз.
________
Ёз*— поколение

№40 (25850)
18 2020-тӥ ар 15-тӥ коньывуон
Верос
Бызён
Анатолий ПЕРЕВОЗЧИКОВ
Россиысь Писательёслэн
огазеяськонзылэн ёзчиез
Кин тодэ, кыӵе адӟонэз
луысал пичи гинэ Почыш
гуртын будэм 20 аресъем
Дуся Векшиналэн. Азьло ик
сое тодыны луэ шат? Уг ук!
Ма, вань ёзъёсыз сямен ик,
кинлы ке но бызьысал, дыр,
нылпи вордысал, сое утьыны,
пыд йылаз султытыны
тыршысал. Яке, кызьы шуо
на: писпу мерттысал, корка
пуктысал, огназ ӧй, валамон
— кузпалыныз...
Нош али со колхоз кеносысь
— ю шертонысь бертэ.
Уйбыт тыршем бере иземез
потэ. Котьма ке но, юнме
шорысь уй но нунал ӧвӧл,
дыр, ук. Уй — со шутэтскыны.
Оло, улэп лулъёслы гинэ.
Но тылобурдоос, тани уӵыос
ик, шуом, уйин но чирдочипсо.
Эшшо кыӵе! Адямиез
но изьытэк потто. Тужгес
но егитъёсты — яратӥсь сюлэмъёсты...
Нош Дуся егит
ӧвӧл шат? Егит! Но тӥни,
уйин гажанэныз юмшам интые,
бригадир Очей Лади сое
кеносэ ужаны лэзья. Тон, пе,
Одоть, таза мугоро, чиед воргоронъёсты
но воштод... Ма,
воштэ уго. Сютэм улэм, пот
нянь сием чиед Кольток Косьтыклэн
кыӵе-мар кужым?
Пал киыныд чабкиськод но
— усе ини. Оло, провор луэмысьтыз
ик, Дуся борды одӥг
пиосмурт но йӧтскылыны
уг дӥсьты. Чиньыеныд-мар
мертчалтӥд ке, Дуся кувалда
быдӟа мыжыкеныз пунэмзэ
берыктоз ини. Кытысь тодод,
оло, тазьы, кутэзъя кабез шуэмзы
мактал, карт но уз шедьы.
Котькыӵе таза, сӥльвиро
луид ке но. Улон кузъёспалъёс
вылын возиське. Иське,
кышномурт пиосмуртэз
уз вошты. Юнме уг верало,
вылды, кышномурт — ӝыны
юрт. Озьыен, мукет ӝыныез
— пиосмурт.
Али война ӧвӧл ни. Война
дыръя со палкышноос
сӥзьыл зор вакыт губи
мында ляльӟизы. Нылпиос
ӧжытомизы. Уго гуртысь оже
кошкем воргоронъёс ӝыныез
но ӧз бертэ ни. Со понна мирошкаос
(атайтэм, ӧксыз
нылпиос) тросгес луизы.
Таӵе нылпиос понна коньдон
тыризы ке но, Дусялы тазьы
пиян кӧтъяз ӧй вал. Та лушкаськонлы
кельше. Нош Дуся,
ёрмыса ке но улӥзы, вораськыны
ӧз дышы. Атаез оже
быремен, анаеныз, выныныз
гинэ быдэсмиз. Табере солэн
яратоно кузпалэн, шундылэн
шунытэз улын кадь,
улэмез потэ. Нош кинлэсь
ке огдырлы пунэмам гажан
ныл сюлэмез буйгатоз шат?
Сыӵе синмаськисьёс бен вал.
Но Дусялы, пи кельшылӥз ке
но, сыӵе мурт кулэ ӧй вал.
Марлы нылпиослэсь атайзэс
талалод, марлы анайзылэсь
шудзэ, душес чипыез сямен,
ишкалтод? Оло, солы но Инмар
сётоз ай карт. Со адямиез
туж жалясь, яратӥсь шуэ ук
анаез...
Тани таӵе улон-вылон сярысь
малпаськонъёсын Дуся
садо урам кузя корка палаз
вамышъя. Палёмыны ӧдъясь
шунды сиос ӟечлы оскыто.
«Оскы, оскы, дыдые, тынад
ваньмыз умой луоз» шуо кадь.
Та ческыт вӧтысь Дусяез поттэ
капка азьын сылӥсь уробоен
вал. Солэн пыд азяз пичияк
турын бӧм. Матэктӥсь адямиез
адӟыса, вал сиськонзэ
ӝамдэлы куспетӥ карылӥз но
выльысь ӝоместыны ӧдъяз.
Дуся паймытскиз но, кышкатскиз
но: кинъёс таӵе вазь
ӵукна ик доразы лыктӥллям?
Уродэн-а, ӟечен-а?
Корка пырыкуз ик, син
шораз йӧтӥзы ӝӧк сьӧры
пуксем куноос. Соос куинь
кузя: кыкез — мӧйы арлыдо
кышномуртъёс но егит пияш,
Дусяен огъёзлы кельше.
Кышномуртъёс удмурт дэремен,
чыртывесен, айшетэн,
йыразы кашамер кышет...
Дуся гур азь палысен анаезлэсь,
ӝӧк вылэ мар ке со
сиён нуллыкуз, лушкемак
юаз:
— Кинъёс со ӝӧк сьӧрын?
Мар каро татын?
— Соос, нылы, асьме доры,
ветыл утчаса, вуиллям, — валэктэ
Окыль.
— Ветыл? Кыӵе-мар ветыл
асьме дорын луоз?
Шузимиллям-а, мар-а? Эшшо
ке соосты, чик тодмотэм муртъёсты,
ӧвӧлтэм сиён-юонэныд
утялтӥськод ай. Мар-о,
асьмеос бай-узыръёс-а?
Туздыры дась кӧтъёсты чалякгес!
Эшшо ке юондыр
дӥськут дӥсяллям. Улля, улля
сэрытгес! Лулзы но, мугорзы
но татын медаз лу!..
— Нылы, нылы, я дугды
ай, дугды ӵашетэмысь! Ӧд
вала тон верамме. Ӧд кылы
шат? Кышно курасьёс ук ветыл
утчаськом шуо. Озьыен,
ӝӧк сьӧрысь куноос — со тонэ
юасьёс. Нош тон, марзэ-созэ
тодытэк, сурым поттӥськод...
— Озьы-а ма?.. Собере
тон, нэнӥ, соглаш-а ни?
— Ма, соглаш, пе. Ачид
мар шуод ини. Мон тонъя
луо. Атаед улэп луысал ке,
со, конешно, вашкала сямъя
нырысь курасьёслы ик тонэ
ӧй сётысал. Мон со, мамык
небыт лул, пумит луыны уг
быгатӥськы. Тӧл ке кудпала
пельтэ, сопала ик мынӥсько...
Я, тон пичи ӧвӧл ни. Быдэ
вуэм мурт. Ачид малпа, мар
карыны, бызьыны косӥ шуыса,
берло монэ медад пыкылы.
Ачид адӟондэ адӟы.
Дуся ужан дӥсьсэ мылпотытэк
воштӥз, ымнырзэ
гылтыса, синучкон азьын
тупатъяськиз но ӝӧк сьӧрын
пукись курасьёс пала потӥз.
Ас кожазы ӟабыльтыса но ӝӧк
вылэ маке со вуттэм сиёнэз
пичиен веръяса пукись куноос,
кин ке команда сётэм бере
кадь, егит ныл шоры синъёссэс
мертчытӥзы. Малпалод,
соос Дусялэсь вылтусысьтыз,
дӥсьысьтыз шексэ, виштызэ
утчало. Нош эмеспизы синзэ
малы ке уллань лэзиз. Оло
возьдаськиз, оло ныллэн чеберез
сое мальдытӥз. Мын но
тод. Сямыз бон олокыӵе. Ымныр
тусыз чылкыт — миськем
сяртчы кадь. Мугорын йӧно,
сӥльвиро адӟиське. Йырсиез
тӧдьыкысъем, синъёсыз кинайчача
выллемесь...
«Синмаськонтэм ӧвӧл
кадь, — малпаз Дуся. — Ма,
легезьпу сяська но чебер, но
венё».
Уно пол вӧталляз Дуся,
кыӵе луоз солэн кузпалыз.
Валамон ини: тросаз книгаосын
сямен ик, принц луоз.
Лыктоз со доры тӧдьы вал
вылын... Нош гуртысь пиос
огзы но принцлы ӧз кельшылэ.
Ваньзылэн сямен шексы
вань. Я неномыртэм возьдаськись-кепырасесь,
доре
ик матэктыны уг дӥсьто. Яке
сумбресэсь, кордымесь, уг
тодо, кызьы ныл сюлэмез
лӥятыны, ас палазы берыктыны,
синмаськытыны...
Соин ик дораз вуэм
«принцез» Дуся туж ик шумпотыса
ӧз пумита. Малпаз:
«Та но гуртысьтымы пиослэсь
пӧртэм ӧвӧл, дыр.
Пежъянэз сиктанэн воштэм
кадь гинэ луоз».
Со куспын кен курасьёс
чаркаысь аракыез веръязы
но, веран кылзы ошмес
ву кадь жильыртыны ӧдъяз,
кырӟанэн ӧръяськиз. Ӝӧк
сьӧры ӧтьымтэ куноос вӧзы
пуксьыкуз, соос Дусяез таӵе
кырӟанэн пумитазы:
Юод, юод та винаез,
Малы уд ю винаез?
Эмезь кадь ик туж ческыт
но
Сугон кадь ик туж курыт...
«Та бызёнын но, дыр, —
малпаз Дуся, — вань ческытэз
но, курытэз но... Ма, мон
тазьы, оло, бызён сярысь уйласько?
Оло, изем потэме сопала
кыске ни?» — шуак луиз
со.
Но тани курасьёс пизылэн
но кензылэн азьпал улонзы
сярысь пӧлльыны кутскизы
но городэ мынон сярысь
кылпум поттӥзы. Дуся пельзэ
лудкеч кадь чорказ, эсьма,
уммез ик тӧл пельтэм выллем
таркаськиз. Уго гуртысь котькуд
егит мурт город сярысь
малпа. Отын улон вуюись
кадь адӟиське Дусялы но.
Юнме шат заводысь (городэз
озьы нимало) пиштӥсь
тыл шоры со пичи мурт кадь
жальмаса учкылэ. Уйин ворекъясь
зоринча солы выжыкыл
дунне кадь потэ.
Нош кызьы отчы сюрод? Ӧс
пытсамын! Колхозысь кошкон,
паспорт басьтон понна
справка кулэ. Нош сое уг сёто.
Кышкало, вань егитъёс городэ
пегӟозы шуыса...
Туспуктӥз Максим ЕГОРОВ
«Бызи ке, уз кутэ ни, —
чилектӥз ныллэн йыраз. —
Иське, тани со гуртысь мозмон
сюрес. Ура! Соку мон
бызьыны соглаш!»
Тае ик сюлэмзы пирсэкъяса
возьмазы выль туклячиос.
Соослы кельшиз ныл.
Таза. Мугоро. Чылкыт. Ужась
луоно. Мар кулэ на? Соин
ик пилэн анаез кема ӧз туна
ни: ӝӧк вылэ пуктэм азвесь
толэзь выллем вӧе люгезям
коньдонзэ мертчытӥз.
* * *
Дусяез городэ вайизы.
Выль кенэз но эмеспиез
кеносэ кӧлыны интыязы.
Выдтӥзы тӧдьы ын улэ...
Озьы кельтӥзы огназэс. Карт
луонэз Дусялэн туж возьдаськись,
матэктыны уг дӥсьты.
Нылъёсыз ӟыгыръямез ӧвӧл
на, шӧдӥське.
Мар кароно? Дуся тодэ: кеносэ
пытсазы бере, ӵуказеяз
ӵукна валес котырзэс учкозы
но азбаразы ошозы... Иське,
одно ик Со луыны кулэ.
Лёгиськытэк кыӵе пытьы

№40 (25850)
2020-тӥ ар 15-тӥ коньывуон 19
кылёз? Нош пытьы ӧз кыльы
ке, сое янгыш карозы. Юмшась
вылэм, шуозы. Тӥни ведь ма!
Ваньмыз та олокызьы
йылпумъяськысал, вылды.
Но шӧдтэк шорысь вал гырдалтэм,
уробо дыбыртэм
кылӥськиз. Собере Дуся анаезлэсь
чангес куаразэ тодмаз.
Нылкышно азбаре пырыса
вуттӥз-а, ӧз-а — кесяське ни:
— Кытын мынам нылы?
Поттэ, поттэ мон азе! Мон
сое берен нуыны лыктӥ! Оло,
тӥ малпады, ми узыресь ӧвӧл
но мон нылме мултэс карыса
сётӥ? Кытын со?
Туклячизы паймыса но
дэймыса ӧтьымтэ куно пумитэ
нёжтэ:
— Ма, соос кӧлыны
выдӥзы ни... Кеносын...
Окыль кенак, йырыз курен
мар вераны ёрмыса кадь,
шиетӥз:
— Кытын?
Туклячиез киыныз возьматӥз
пул липетэн шобыртэм
чум шоры. Солэн ӧсэз
пу пуннетэн пытсамын.
Окыль кенак сое ишкалтӥз,
лапег ӧсэз пыдыныз ӵыжыса
усьтӥз но кеськиз:
— Нылы, пот! Мон та, мумид,
мон тонэ берен доре
нуыны лыктӥ! Лэзи но, туж
жаль потӥд. Соос тонэ, куанер
карыса, обидьыса возёзы.
Шедьтом ай ас пармес. Эн
кышка, огнад уд кыльы. Тон
сьӧдун ӧвӧл ук! Чебер, веськрес!
Куд-ог пужыен паньсам
ымныръёсын, горданьёсын
уд ӵошаты. Иське, марлы астэ
уньманяны, ултӥяны сётод?
Астэ ачид гижы йыл быдӟа
ке но гажаны кулэ. Ассэ ачиз
яратымтэ мурт гинэ чик тодымтэ
кие сыӵе капчиен уськытскоз...
Выль кен но эмеспи куалектыса,
ури-бери валесысьтызы
султыса, дӥсяськыны
кутскизы. Дуся пумен анаеныз
вераське:
— Нэнэй, нэнэй, мар тон
шузияськиськод? Гуртысен
сётыны соглаш вал ук! Табере
— пумит! Мар луиз? Кыӵе
шӧкыч тонэ леказ? Мар-о
сыӵе азё-беро уробо кадь
выриськод? Мар шуоз гурт
калык? Веденяослэн кыдзы
бертэм!
— Котьмар мед шуозы!
Мыным одӥг кадь: тэль-а,
бусы-а! Давай дӥсяськы, бича
котырдэ сэрытгес, бертом!
Кыл быдтыса улыны дыр
ӧвӧл — уйшор вуоз! Уйшор
бере ӟеч ужъёс уг лэсьтӥсько
ни.
Нылыз муминыз каршон
вакытэ Дусялэн карт луонэз
кеносысь шыпак потӥз. Дуся,
анайзэ огназэ кельтыса, сое
утчаны кошкиз. Лапас улысь
пу артанаос дорысь шедьтӥз.
Со, дыгыр куалекъяса, куаратэк
бӧрдэ. Дусялэн сюлмыз
позырскиз, пияш солы туж
жаль потӥз, лулыз ас нылпиезлы
кадь либытлыкен бугырскиз.
Анаезлы чурытак вераз:
— Уг, мон уг берты! Вождэ
ваёд коть уд но — мон татчы
кылё! Гумырме та пиен
ортчыто! Солань-талань
кыстаськыса уг улы. Нэнэй,
берт, буйгатскы, эн шугъяськы!
Оскы нылыдлэн шудэзлы.
Мынам сюлмы шӧдэ: милям
ваньмыз умой луоз!
Окыль кенак нылзэ тодытэк
уг улы: мар ке вера ке,
сое одно ик лэсьтэ. Нокыӵе
тракторен но сюрес вылысьтыз
уд кыскы ни. Соин ик ӧз
ни ӵашеты, уробояз пуксьыса,
биньгозызэ кутыса, валзэ
дор палаз улляз. Солэсь сюрессэ
али гинэ ӝужам толэзь
югдытӥз...
Эмеспиен выль кен кылиськыса
выльысь кӧлыны
чуме выдӥзы. Дуся карт луонзэ
гаж мылкыдын, ас вордэм
пизэ кадь, гадь бордаз
юн-юн ӟыгыртӥз...
Пичи дыр тодэ ваёнъёс
Эдэйгуртэ сюрес
Римма РЫЛОВА
«Удмурт дуннелэн» авторез
Тылойылпочинкаямы асьмелэн
начальной школамы
вал. Бакча берын, бусыын, кузь
пу юрт сылӥз. Кык висъетъёсаз
пиналъёс дышетскизы,
быдэн кык классэн: нырысетӥ
класс — куинетӥеныз, кыкетӥ
класс — ньылетӥеныз. Пичи
гинэ висъетаз милемлы сиён
пӧзьтылӥзы, шыд яке йӧл
быректылӥзы. Отчы ик переменаосы
дышетӥсьёс шутэтскыны
пыраллязы. Котькуд
висъетын (туала сямен — кабинетын)
вал аслаз гурез, сое
техничкаос вазь ӵукна пуэн
эстылӥзы. Коридорын кык
гуръёс сыло вал. Со вакытэ
коридормы милемлы бадӟым
потылӥз. Чингыли урокысь
жингыртэ ке, толалтэ ми резь
поттыса шудӥськом вал коридорын,
лымы южма ке, бусые
потӥськом, отын юж вылтӥ
бызьылӥськом.
Одӥгаз классын сылӥз
шкаф, ӝажыосаз — книгаос,
ми черодэн басьяськомы
вал отысь книгаосты но, туж
ӝикыт возьыса, лыдӟиськомы
вал.
Малы ке но котькуд
ар дышетӥсьёсмы вошъяськылӥзы.
Одӥгезлы дышы
са гинэ вуиськомы, таиз
гуртысьтымы кошке, мукетыз
вуэ. Ньыль ар ӵоже олокӧня
дышетӥсьмес вош тӥм.
Куинетӥ классын дышетскыкумы,
нырысетӥ сентябре
егит нылаш лыктӥз. Паськыт
ымныро, ымыз бадӟым,
таза мугоро, лапег, кузь йырсизэ
йыртышказ биняса нуллэ
вал. Нимзэ уг тодӥськы
ни. Кема ӧз ужа. Тӥни со
дышетӥсенымы куарусён
то лэзе милемыз чортӥзы
етӥн думылыны. Аньыос
керттӥськом, пуктылӥськом
— со ужлы но, мукетъёсызлы
но ми кемалась дышемын,
нош дышетӥсьмы
сылэ, номыр уг ужа, милемлы
уг юрттӥськы. Со нуналэ
дышетӥсьмылы мылкыдмы
воштӥськиз — ӧм яратэ.
Но та дышетӥсен сэрен ик
мукет учырез тодам вайисько.
Южтолэзь вал кадь соку.
Дышетӥсьмы котькуд кӧснуналэ
урокъёс бере дораз,
мукет гуртэ, берталля вал.
Бадӟым сюрес дорозь гуртысенымы
куинь иськем
пала нюлэскытӥ мыноно. Та
дышетӥсьмы милемыз, куинь
нылъёсыз, чортӥз ассэ
сюрес дорозь келяны. Ми
соглаш кариським. Нюлэскын
тӧдьы-тӧдьы лымы
кылле. Писпуос но лымыен
шобыртӥськиллям, кӧло.
Валэн ветлэм сюрес кузя
вераськыса мынӥськомы.
Дышетӥсьмы мар ке но вера
но, ми гориськомы. Вуимы
бадӟым сюрес дуре, Пычас
кожонэ, кӧня ке улыса, автобус
вуиз но, дышетӥсьмы,
отчы пуксьыса, кошкиз. Милемлы
табере бызьыса бертонэз
гинэ кылиз на вал.
Малпамтэ шорысь Валя
эшмы шуэ:
— Та сюрестӥ пырак
мынӥмы ке, вуомы Эдэйгуртэ.
Отын милям мемеймы
улэ. Ойдолэ ветлом отчы!
Ми мукет эшеным, Галиен,
чик малпаськытэк, соку ик соглаш
кариським. Кема ик ум
ветлэ, туннэ ик берен бертомы,
малпамы.
Шоссе кузя нырысь бызьысагес
мынӥмы ай, жадимы но
Туспуктӥз Максим ЕГОРОВ
калленгес но калленгес вамышъяськом
ни. Весь ум вуиське.
Кӧт но сюма ини!
Ма, ку адӟиськоз ини та
Эдэйгуртэз? Туж кыдёкын
вылэм ук! Берлань берытскыны
ӟигар ӧвӧл ни. Ми жадьыса
какалмим ини. Мырдэм
вамышъяськом. Куазь но пеймыт
луэ ини — нош Эдэйгурт
уг адӟиськы!
Воксё пеймыт луэм бере
Валимы кеськиз:
— Тӥни адӟиськоды-а
тылъёсты? Со Эдэйгурт.
Эдэйгурт туж бадӟым вылэм
— куинь-ньыль урам. Валямы
соку ик ӧз шедьты ай
мемейёссылэсь корказэс, ветлӥськом,
ветлӥськом пеймыт
урамъёстӥ, нош кужыммы
ӧвӧл ни. Мырдэм но кызьы
шедьтӥмы корказэс.
Тодӥсько на, кызьы Валямылэн
паймем мемеез но
кенакез пыдъёсысьтымы гын
сапегъёсмес, пальтоосмес куязы
(асьмелэн ӟигармы ӧй ни
вал кылиськыны), пуктӥзы
ӝӧк сьӧры. Одӥг пуньы шыдзэс
ӟуземме тодӥсько на, ӝӧк
сьӧры ик ваньмы умме усиськеммы...
Ӵуказеяз нуназе пал ини
кенаксы милемыз сайкатӥз,
чай сектаз но шоссе дуре
нуиз. Кӧня ке дыр ортчыса, Иж
палась автобус вуиз, кенаксы
милемыз пуктӥз, шофёрлы
уксё тыриз но валэктӥз, кытчы
васькытоно.
Автобусэн кӧня ке минут
куспын Пычас кожонамы
вуим, ваським но бызьыса
доре бертӥм. Кызьы пумитазы
меда нэнэен дядяйёсы,
уг тодӥськы ни. Оло тышказы,
оло шумпотӥзы, улэпесь
бертӥмы шуыса. Тышкано
ик вылэм сыӵе укылтэмъёсты.
Али малпасько ке, нэнэме
жалясько, кытчы пыриз
нылы, мар луиз соин шуыса,
быдэс уйзэ чырым но ӧз
кары, дыр. Кӧня выль кисыриосыз
кылдӥзы, дыр, бамъёсаз!
Нэнӥе, мусое, сопал дуннеын
ке но, простить кар монэ,
шузиез!

№40 (25850)
20 2020-тӥ ар 15-тӥ коньывуон
Яратоно книгае
Яратоно книгаосыз сярысь вера суредась,
крезьгурчи, «Дукес» но post-dukes проектъёслэн
авторзы, Туризмъя но киужъёсъя элькун
центрысь кибашлы ЧУДЬЯ ЖЕНИ.
____________________
Хогвартс, Берлин но ватскем шормуӵ
Элиезер Юдковский «Гарри Поттер и методы рационального
мышления» (16+).
Та книга — Джоан Роулинглэн Гарри Поттер сярысь книгаосызъя
гожтэм фанфик. Гарри Поттерлэсь историзэ писатель
выльысен малпаз. Та романын валтӥсь герой, наукаысь амалъёсты
кутыса, волшебникъёслэн Хогвартс школаязы тодон-валан
басьтэ. Отын со тужгес но визьмоез дышетскись луэ, Драко
Малфоен эшъяське (Джоан Роулинглэн книгаяз соос тушмонъёс
вал). Книгаын туж тунсыко верамын физикаысь, химиысь,
социологиысь но мукет удысъёсысь амалъёс но теориос.
Жюль Вернлэн романъёсыз (6+).
5-тӥ-6-тӥ классъёсын дышетскыкум, лыдӟеме потӥз
кунгожсьӧр литератураез. Со понна мон гуртысь библиотекае
лыктӥ но быдэс час утчай кельшымон книгаез. Ки улам сюриз
«Таинственный остров». Та романэн тодматскемелэсь азьло
чик уг яратӥськы вал лыдӟиськыны. Нош собере мон лыдӟи
Жюль Вернлэсь 12 томе люкам вань романъёссэ.
Илья Кабаков, Михаил Эпштейн «Каталог» (6+).
Михаил Эпштейн — философ, филолог но культуролог, али
улэ Америкаын. Илья Кабаков — дуннеысь тодмо ӟуч суредась,
1980-тӥ аръёсы со кунгож сьӧры улыны кошкиз. Со
инсталляциосын, концептуальной искусствоен выре. Огпол
гинэ ужъёссэ адӟеме вань, Берлинысь туала искусствоя музее
вуылыкум. «Каталог» — адямиослэн искусство но улон сярысь
вераськемзы.
Ханс Ульрих Обрист «Пути кураторства» (12+).
Искусство удысысь кураторлэн ужез сярысь книга. Малпаськытэ,
ма со сыӵе — туала искусство.
Феликс Денк, Свен фон Тюллен «Берлин, техно и падение
стены» (16+).
Та документальной книгаын Германиысь диджейёс но Америкаысь
Детройтысь крезьгурчиос асьсэлэн крезьгурзы, технолэн
историез сярысь верало. Син азе пуксе, кызьы хаус, эйсид,
индастриал, транс но мукет крезьгур ӧръёс азинскизы ӝыныё
буш кылем Берлинын (Германиез 2-лы люкись стенаез 1989-тӥ
арын куашкатэм бере). Рейверъёслы лыдӟымон книга.
Книга ӝажы
Котьку экты!
Алигес Ижысь «Ошак,
толэзь но палэсмурт»
творческой огазеяськон
«Удмурт рейв» пичи
книга поттӥз (0+).
Отын люкамын Чудья
Жени суредасьлэн ужъёсыз.
Со «Удмурт рейв» нимо серия
улсын эктӥсь нылъёсты суредалля
— ваньзы сямен удмурт
дӥсен пӧрмытскемын. Суредъёсысь
нылъёс сярысь Анастасия
Шумилова кылбурчи пичи
текстъёс гожтӥз — соос прозаен
гожтэм кылбуръёслы укшало.
Художниклэн ужъёсаз туала
улон но крезьгур вашкала
пуштросэн сураськемын бере,
гожъяськись но удмурт фольклорез,
туала улон-вылонлэсь
тодметъёссэ огазеяз. Кылсярысь,
огаз гожтэмаз удмурт
мадиськонъёсты люказ:
Гурезь сьӧрын лыз ужпи
гырдалляку, чебер дӥсяськыса,
П. Чайковскийлы — 180 ар
Крезьгур но оскон
Куартолэзьлэн пумаз
Воткаысь П. Чайковский
нимо музейын ортчиз
«Духовный путь Чайковского»
книгаен тодматскон
(0+).
Изданиын люкамын композиторлэн
гожтэтъёсыз
но дневникысьтыз люкетъёс,
возьматэмын П. Чайковскийлэн
Инмарен, черкен
кусыпъёсыз. Та книгаез
лыдӟыса, валано, кыӵе муген
П. Чайковскийлэсь крезьгурзэ
синучкон азьын эктоно.
Кам тупалан лыз вал адскыку
но, эктоно. Эктоно,
город котыртӥ сьӧд эрвал
бергаку, пурысь улошо музъемез
котыръяку, эктоно,
гондыр бурсыку, гонзэ кисьтыку,
горд скал султыку
но умме усьыку, эктоно.
В общем, экты, котькыӵе валантэм
учыр дыръя — экты.
священникъёс «христианской
крезьгур» нимало. Тодматсконэ
лыктэм куноос но,
мылкыдзэс вераса, пусйизы,
композиторлэн крезьгурез
Библиысь чуръёсты валаны
юрттэ шуыса.
Лыдӟисьёсты книгаеныз
тодматыны вуиз Галина Сизко
— Москва улосвылысь Клин
городысь П. Чайковскийлэн
музей-заповедниказ ужась.
Ужрад дыръя чузъяськиз
П. Чайковскийлэн крезьгурез,
романсъёсыз.
Туспуктӥз Максим ЕГОРОВ
Пичи книгаез дасяз но
вылбамзэ лэсьтӥз дизайнер
Вера Штыкова. Удмуртлыкен
пыӵам чеберлыкез быдэс
дуннее вӧлмытэммы потэ, верало
«Ошак, толэзь но палэсмурт»
огазеяськонысь егитъёс.
_________
Виктория КРАМОВА
«Духовный путь Чайковского»
книгаез печатлаз Надежда
фон Мекк нимо благотворительной
фонд. Надежда
Филаретовна фон Мекк — 19-
тӥ даурын улэм ӟуч меценат
— П. Чайковскиен кема аръёс
ӵоже кусып возиз но композиторлы
юрттӥз, нош али
солы сӥзем фонд дано композиторлэсь
творчествозэ уте
но вӧлмытэ.
_________
Юлия ШЕШКАУСКА
Кылпумысь
Куинь Иван но одӥг Марья
Андрей Рубанов —
туала ӟуч прозаик —
ас сяменыз гожтӥз
«Финист — ясный
сокол» тодмо ӟуч
калык выжыкылэз.
Романлэн (18+) сюжетэз
оглом сыӵе ик: Марья
синмаське Финист адями-тылобурдолы,
нылашлэн
сузэръёсыз люкето
яратонзылы, Финист
ыше, но ышон азяз
шуэ: Марья монэ шедьтоз,
корт пыдкукез нуллыса
быдтыса.
«Финист — ясный сокол»
книга — ӟуч фольклор
вылэ пыкиськись
зэмос бадӟым фэнтези.
Татын пумитаны луэ вунылъёсты,
Баба-ягаез
(бабка Язва), Горын кыез,
солэсь пизэ Горынычез
но выжыкылъёсысь мукет
геройёсты.
Татын ӧвӧл антагонистэз
— геройлэн валтӥсь
тушмонэз. Маке умойтэмзэ
лэсьтӥсь геройёслэн
пуш дуннеязы учкиськод
ке, соос жаль но
пото, соосты валаны но
ӧдъяськод. Нош Марья
валтӥсь герой шуэмын ке
но, солэн пуш дуннеез татын
туж ик уг усьтӥськы.
Со черс выллем — нош со
котыртӥ биняське сюжет.
Соин ӵош куректыны, сое
жаляны секыт — со образ
но ӧвӧл, функция гинэ.
Валтӥсь геройёс татын —
3 Иванъёс. Соос пӧртэм
вакытъёсы юртто Марьялы
дусымзэ шедьтыны.
Книга 3 люкетлэсь
пӧрме. Котькудзэ маде
3 Иванъёс пӧлысь огез.
Иванъёс туж пӧртэмесь,
соин котькуд люкет
пӧртэм кылын мадемын.
Нырысетӥез Иван
— кырӟась-верась, соин
солэн нимыныз верам
люкетын тачак визькылъёс,
лэчыт веранъёс.
Кыкетӥез Иван — тыро-пыдо
мурт, кортлэсь
но кулэсь дӥсь лэсьтӥсь,
соин веран но лад-лад
кошке. Куинетӥез Иван
— Соловей адями-тылобурдо.
Со лобаны быгатэ,
дунне вылын туж кема
улэ ини. Та люкетын
валэктӥське дуннемы,
но валано ӧвӧл, малы
осконо, нош маиз пӧяса
верамын.
Тунсыко герой — Язва
песянай. Татын со «Матрица»
киноысь Пифия
кадь. Адӟонлы оске, дунне
колёсалэн бергамезлы
уг люкеты.
Нош кытысь потӥзы
лобаны быгатӥсь адямиос?
Тодады вае ай:
куд-ог телепрограммаосын
возьматъяло шунды
сиосын гинэ кӧтсэс
тырись адямиосты. Адями-тылобурдо
— ӵапак
сыӵе мурт. Шундылэсь
кужымзэ пыӵатыса,
со лобаны ӧдъя. Супергерой
выллем.
Книгаез лыдӟыса,
пичи вакытэ берытскиськод.
Изён азяд лыдӟиськод
кадь Александр Афанасьевлэсь
«Ӟуч калык
выжыкылъёс» книгазэ.
Геройёс понна сюлмыд
шуг — кыӵе гинэ шугелеке
соос уг сюро! Но
тодӥськод: пумаз ваньмыз
умой луоз, угось та
— выжыкыл! Выжыкыллэсь
выллем, Андрей Рубановлэн
книгаезлэсь но
ӵыдыны уг луы.
_________
Вера ШТЫКОВА
«Ингоже» юанъёсын, дэмланъёсын вазиськоно
73-33-42 телефон номеръя.
Веросъёстэс-кылбуръёстэс ыстэлэ, «Ингоже» шуыса,
электрон почтае udmdunne@yandex.ru.