36 от 15 сентября 2022 (25948)

udmdunne.ru
+7 951 195 37 65
№36 (25948)
ДУННЕ КОТЫРЕС 2022-тӥ ар 15-тӥ куарусён 25
Таджикистан но Узбекистан
Ӧсъёссы уг пытсаллясько
Куноез ӟеч пумитан кык полэс ӟечен берытске
Пичи Пурга черкогуртысь
Лариса Емановаез
кузь сюрес ялан бичатыса
возе. Алигес нылмурт
Таджикистанэ но
Узбекистанэ вуылӥз.
Фан гурезьёс
— Мукет кунъёсы вуылон,
гурезьёсы тубан мыным
улыны-ужаны кужым сётэ,
соин ик сюрес ялан бордаз
кыске, — веранзэ мытӥз
Л. Еманова. — 10 нуналзэ
Таджикистанысь гурезьёстӥ
ветлӥ. Фан гурезьёс — альпинистъёслэн
райзы. Тубиськод,
куазь шоры учкытэк:
я шунды пыже (нош гужем
отын +48 градус возиське), я
тӧлаське, я лымы пужнэ. Ай
тыбыр сьӧрын 16-18 секталаем
песьтэр. Но жадемез уд
валаськы: оло инкуазь, оло
эшъёс (группаямы 18 кузя
вал) ӟигар сёто.
Фан гурезьёслэн марӟанзы
— Алаудин ты. Солэн
чеберез усьтӥське, шунды
пуксьыку но ӝужаку: пыдэсаз
— тӧдьы луо (но со
чагыр улэ, озьы инбам синучконын
выллем адске),
котыраз — яркыт-вож изъёс
(ву турын бордазы няняськемын).
Собере вал на мукет
тыос: Большое Алло, Куликалонской,
Мутной... Соос татын
15 котыр: огез — чагыр,
мукетыз — лыз, куинетӥез
— вож... Миллион туспуктэм
лэсьтытэк, дорысьтызы
кошкем уг поты. Пыласькыны
удгес дӥсьты — вуэз юзмыт.
Но со понна пӧзьтэм
шыд макем ческыт!
Чимтарга перевалэ шедён
понна зӧк куртка, штан
дӥсяно луиз. 4 сюрс 800
метр вылӥе тубамы. Али
гинэ гурезьёсы тубаны кутскем
муртлы та сюрес секыт
йӧтэ, угось шокан пытсаське,
пыдъёс сьӧлтасько. Чимтарга
Эльбрус гурезьлэсь
кӧнялы ке лапеггес. Интернет
ӧвӧл. Гуртъёс-городъёс
кыдёкын. Кылемын тон но
инкуазь. Сыӵе дыръёсы йырысь
вань урод малпанъёс
тӧлӟо. Паймоно кадь: мугор
жаде, но со вакытэ ик выль
кужымен пыӵа.
Удмуртъёс кадесь
Таджикистан Узбекистан
вӧзын ик интыяськемын
бере, отчы пыратэк, бертыны
ӧм потэ.
Ваньмыз сямен туристъёс
нырысь пырало Бухарае. Ми
но озьы ик каримы, угось со
туж вашкала город. Ӵапак со
Пичи Пургаысь Лариса Еманова
Таджикистанысь гурезьёсын.
пыр ортче вылэм Буртчин
сюрес (Шёлковый путь). Тае
валаны луэ али но — азьвыл
дауръёсысь пуктӥськемъёс
утиськемын, отын туннэ но
ӟырдыт вуз карон мынэ.
Сюлэмме зол бугыртӥз
узбек калык: удмуртъёс кадь
ик кибашлыесь, удмуртъёс
кадь ик ческыт пӧрасько.
Пырамы мунёлы сӥзем
юртэ. Вань отын музеез но,
мастерскоез но. Воргоронъёс
пулэсь, бумагалэсь, каунлэсь
(тыква) мунёос дасяло.
Шудонлэн кыӵе тусыз луоз —
йырзэс кема уг тӥяло. Ульчае
пото, кудӥзлэн туристлэн тусыз
кельшоз, сое ик суредало.
Эн, пе, пайме, кыкетӥяз
лыктыкуды, асьтэлы тупась
мунёез синйылтӥды ке.
Сюдӥзы бусьтыр. 10 нунал
гурезьёстӥ ветлэм бере
пловзы верантэм ческыт
потӥз. Узбекистанысь котькуд
город сое ас сяменыз
пӧра. Кудаз ке изюм, кудаз
ке барбарис ватсало. Но соизлы
но, таизлы но ӟеч рис
но ыж сӥль кулэ. Огаз кафеын,
сиськем гинэ ӧвӧл,
пӧраськон интыязы но пырамы.
Татын но воргоронъёс
кузёясько. Бадӟым пуртыын
бадӟым тыл вылын сугонэз,
сӥлез пырсато... Паймоно,
кызьы со ваньмыз уг сутскы,
уг пазяськы.
Ми ӝӧк-пукон сьӧрын
кӧтмес тыримы. Нош узбекъёс
семьяязы сисько мукет
сямен: музъем вылэ дастархан
(ӝӧккышет) вӧлдо,
котыраз курпача (шобрет)
валё. Сисько, отчы пуксьыса.
1 тэркые 2 адямилы плов
поно. Сое одно ик бушатоно.
Киноосын куддыр возьмато,
рисэз чиньыосынызы ымазы
тыро шуыса. Али озьы
ӧвӧл ни: пуньыен-вилкаен.
Ӟуч кылэз
ӟеч валало
Бухараын, солэн котыраз
трос вашкала мечетьёс,
минаретъёс, медресеос.
Кылсярысь, Арк цитадель
интыяськемын гектарлэсь
бадӟым музъем вылэ. Борддоръёсыз
котыресэсь — кыӵе
ке узыр ханлэн питырес
кӧтыз выллем. Пушказ трос
музейёсыз — мурӝолаз гинэ
Узбекистанысь Бухара городын
трос вашкала юртъёс.
но. Азьвыл дауръёсы музъем
пушкысь камераосын узникъёсты
возё вылэм. Туннэ
адямиос интые пуктылэмын
восковой фигураос. Соосты
учкыса, валаны луэ, кызьы калык
со вакытэ дӥсяськылӥз,
мар сиылӥз, кызьы йыртэмасьёсты
визьмаллязы... Цитадель
19-тӥ дауре йыг-йыг
пуктэмын. Туннэ нуналозь
сое огпол но тупатъяллямтэ
на, борддорезлэн одӥг интыез
куашкамын ке но (Граждан
ож вакытэ Горд армия сое
тарканы вырем).
Ляби-хауз площадь но
чебер. Шораз пичи тыметэз
вань. Вашкала дауръёсы
калык отысь бырылымтэ —
вуэн вуз карылэм. Нош туннэ
отын шыпыт. Каньылля ужа
Сюлэмме зол бугыртӥз узбек калык: удмуртъёс
кадь ик кибашлыесь, удмуртъёс кадь ик
ческыт пӧрасько.
фонтан, кытӥ-отӥ адскыло
туристъёс. Площадьлэн бур
палаз — Суфийской обитель,
паллян палаз архитектурной
синпелет — Медресе Нодир-
Диван-Беги. Соиз но, таиз но
юрт ӝутэмын 17-тӥ дауре.
Узбекистанлэн шоркареныз,
Ташкентэн, ӵошатыса,
Бухараын улон начар. Но туристъёс
тае валаса уг вутто.
Угось соосты гидъёс чебер но
чылкыт утялтэм интыостӥ
гинэ нулло. Мукет суред
кылдэ, отысь улӥсьёсын вераськыса.
Ӟуч кылэз соос ӟеч
валало. Куд-огез, Россиысь
луэммес тодыса, выжыятыны
кутске: нош кыӵе городысь?
Берло шараяське: таид
юнме уг юалляськы вылэм —
ӵыжы-выжыез Россиын ужа,
уждунзэ вордскем палъёсаз
келя. Бухараын уж шедьтыны
секыт.
Нуназе котырын город
буша. 40 градус пӧсь сиос
улын ветлыны чидало туристъёс,
таксистъёс но полицейскойёс
гинэ. Урамъёс
калыкен выльысен пачылмо
ӝыт 8 час котырын. Но 2 час
ортчыса, соос нош шыпытало
— комендант час кутске.
Коркаосазы капкаоссы уг
пытсаськыло — пӧсен йырин
ӧвӧл, куноос капчиен пырыны
мед быгатозы шуыса.
Оско: куноез ӟеч пумитан 2
полэс ӟечен берыктӥське.
________
Ольга КОРЕПАНОВА
Лариса Емановалэн архивысьтыз