ud#78 (25693)

2018-тӥ ар 16-тӥ коньывуон (октябрь). Пуксён (вторник) № 78 (25693) 

Вань удмуртъёслэн газетсы 

Кылдытэмын 1915-тӥ арын 4-тӥ феврале 

Форум 

2 

Ульяновске люкаськылӥзы 

егит гожъяськисьёс 

Буре ваён 

Яр палъёсын но Ижын ортчизы 

3 6 

Михаил Федотов кылбурчилы 

сӥзем ужрадъёс 

Драматургия 

«ШУД» бичетысь Даниил Бакановлэн 

«Нош ик «кык» монологез 

КЫЛБУРЕТ 

инГОЖЛИТЕРАТУРАЛЫ СӤЗЕМ НОМЕР 

Туспуктӥз Максим ЕГОРОВ 

Я кин мон таӵе, Инмаре? 

Михаил ФЕДОТОВ 

Ӵукна гордэктӥз ке инвис, 

Пото мон кыре но буре. 

Вапум, нылпидэ тон эн ви, 

Эн иса монэ, Инмаре. 

Педлон синазькыль но пеймыт, 

Педлон весь зоре но зоре. 

Улон зор пилем кадь секыт, 

Марлы мон таӵе, Инмаре? 

Кезьыт инсьӧре учкисько, 

Ӧвӧл отын ӟеч иворез. 

Аслым акылес потӥсько. 

Кытысь мон таӵе, Инмаре? 

Эшъёс вуж черкын юмшало, 

Пересь ӧс азьын тэльмыре. 

Сюлмын гырлыос вазьыло. 

Я кин мон таӵе, Инмаре? 

Бурдо мон, потэ лобаме, 

Сюбег котыртэм кенере, 

Жильы пачкатэ киосме. 

Кинлы мон таӵе, Инмаре? 

Инвис гордэктӥз ке ӵукна, 

Тон питра, мынам бугоре, 

Тон пишты мыным, горд укно, 

Тон юртты мыным, Инмаре.

№ 78 (25693) 

2 2018-тӥ ар 16-тӥ коньывуон 

инГОЖ 

ДЫШЕТСКОН 

Азьло лыдӟиськы, собере гожъяськы 

Ульяновскын ортчиз егит гожъяськисьёслэн 18-тӥез калыккуспо форумзы 

Анастасия ШУМИЛОВА 

Куарусёнэ Россиысь 

пӧртэм улосъёсысь но 

мукет кунъёсысь ӟуч 

кылын гожъяськись 

егит писательёс Ульяновске 

люкаськылӥзы. 

Ӝож ке но, пайдаё 

2004-тӥ арысен ЮНЕ- 

СКО азинтэ «Литературной 

городъёс» программазэ. 

Гожъяськон удыслы бадӟым 

саклык висъясь каръёс 

музъемлэн пӧртэм сэрегъёсаз 

интыяськемын. Россиысь 

сыӵе каръёс пӧлы пыртэмын 

Ульяновск. Татын 

литератураез зэм но гажало, 

тодазы возё лулчеберетэ 

бадӟым пытьы кельтэм 

улосчиоссылэсь нимъёссэс. 

Симбирск (Ульяновсклэн 

азьвыл нимыз) музъем вылын 

вордӥськемын Николай 

Карамзин, Иван Гончаров, 

Николай Языков. Туала литературной 

улонзы но быректэ: 

ялан ортчыло писательёсын 

пумиськонъёс, литература 

ӝытъёс, фестивальёс, 

конференциос. 

Форуме пыриськись 

егитъёсын котьку сямен 

ужазы зӧк литературной 

журналъёслэн редакторъёссы 

но гожъяськон удысысь 

экспертъёс. Котькуд 

журналлэн мастер-классаз 

егитъёс ог-огзылэсь ужъёссэс 

сэрттӥзы-пертчизы, огогзылы 

дунъет сётӥзы, текстъёсысь 

шекъёсты шараязы. 

Мастер-классъёсын ужам 

сяна, егитъёс пумиськизы 

писательёсын, критикъёсын. 

Леонид Юзефович но 

Ольга Славникова прозаикъёс 

(кыкназы ик Россиысь 

«Большая книга» премилэн 

лауреатъёсыз луо) вераськизы 

писательлэн улонэз 

сярысь, творческой сюресъёссэс 

мадизы. Тодмо веросчи 

Михаил Веллер егит писательёсты 

визьнодаз, кызьы 

азинлыко гожъяськись луоно. 

«Иностранная литература» 

журналлэн редакторез 

Александр Ливергант художественной 

текстъёсты кылысь 

кылэ берыктон ужлэн 

шуг-секытъёсыз сярысь мадиз. 

Котькуд ӝыт Евгения 

Декина писатель радъялляз 

«Выль нимъёс» ӝытъёсты 

- форуме пыриськись гожъяськисьёс 

асьсэлэсь ужъёссэс, 

театрлы матын карыса, 

лыдӟылӥзы. Озьы ик кудогез 

форуме вуэмъёс Ульяновск 

улосвылысь пӧртэм 

интыосы вуылӥзы, пумиськонъёсын 

асьсэлэн творчествоенызы 

тодматӥзы. 

Таяз арын мон «Октябрь» 

журналэн радъям мастерклассэ 

пыриськи. Нодъязы 

Казаньысь критик но кылбурчи 

Андрей Скворцов но 

Москваысь кылбурчи но кы- 

Ульяновскысь В. И. Ленин нимо библиотекалэн «ВКонтакте» бамысьтыз 

лысь кылэ берыктӥсь Ирина 

Ермакова. Белгородысь, 

Донецкысь, Нижний Новгородысь, 

Ульяновскысь, Бурятиысь, 

Узбекистанысь но 

Удмуртиысь вуэмъёс, ми 

лыдӟим ог-огмылэсь кылбуръёсмес 

но котькуд кылбурчиез 

нимысьтыз эскерим. 

Огъя гожъяськон манеръёсмы 

но амалъёсмы пумысен 

но вераським, нимаз текстъёсмес 

но куадам-лусйим. 

Ненегъяськон сям доре кылиз, 

лэся - котькудӥзлы 

тыш сюриз. 

Нырысь мынэсьтым кылбуръёсме 

сэрттӥзы-пертчизы. 

Зэмзэ вераса, критикаен 

зол пылатӥзы. Ӟуч 

кылын ляб гожъяськисько 

шуыса, тодӥсько вал, но 

мастер-класс бӧрсьы малпаськонэ 

уси, мон чик но 

нокыӵе кылын но гожъяськыны 

уг быгатӥськы шуыса. 

Валамон - котькуд гожъяськисьлы 

азинскон понна 

кулэ сэзъятскон. Но меӵак 

кыл быдтэ вылэм гожъяськон 

мылкыдэз. Со дыре ик 

мастер-классмы туж пайдаё 

вал: отын трос визь-нод 

сётӥзы, тунсыко поэтъёсты 

лыдӟыны ӵектӥзы. Автор 

нырысь ик аслыз ачиз критик 

луыны кулэ, текстъёсыд 

шоры мурт синмын учкыны 

быгатоно. 

Янгыше уськытоз но 

дурбасьтоз 

Котьку сямен, форумын 

трос вераськизы ӵапак критикалэн 

кулэлыкез сярысь. 

«Критика но литература 

туннэ» котырес ӝӧкын Наталья 

Иванова литературовед 

но критик, МГУ-ысь 

профессор кӧтӝожзэ усьтӥз: 

али ӧжытгес лыдӟисько, тиражъёс 

сино. Лыдпусъёс 

кӧшкемытэсь: 1990-тӥ аръёсы 

«Знамя» журналлэн тиражез 

ог миллион вал, али - 

ог 1 сюрс 300, «Новый мир» 

2 миллион 700 сюрс тиражен 

поталляз, али - ог 2 

сюрс 200. Мукет зӧк литературной 

журналъёслэн сыӵе 

ик югдурзы. Лыдӟисьёслэн 

лыдзы кулэсмемен, йылэ 

гожъяськисьёслэн лыдзы - 

соин кылдэ «перепроизводство 

литературы». Наталья 

Иванова Лев Анненский 

критиклэсь кылъёссэ тодамы 

вайытӥз: «Литература 

кулӥз ке но, критика кылёз - 

со валэктоз литературалэсь 

быронзэ». 

Наталья Иванова шуиз: 

тросэз критика шоры сюбег 

учко, тросэз малпало, критикалэн 

ужпумез - со кыӵе 

ке книгалы анонс лэсьтон но 

сое лыдӟисьлы рекламировать 

карон. Но со озьы ӧвӧл, 

меӵкытӥз Наталья Иванова. 

Критика - со сыӵе ик литература, 

солэн трос жанръёсыз, 

со реклама ӧвӧл, озьы ик 

критик писателез вешан-нуныян 

понна уг гожъяськы. 

Котькуд литературно-публицистической 

статья литературной 

процесслэн вамышез 

луэ. Рецензия - со произведенилы 

огшоры дунъет сётон, 

ӟеч палъёссэ но шекъёссэ 

утчан ӧвӧл. Зэмос критик 

ноку меӵак уг вера малпанзэ, 

лыдӟисьлы аслыз валаны 

юрттэ, кельшоз солы 

текст яке уз. 

Вань эшшо «литературной 

портрет» жанр - писатель 

яке книга сярысь вераськон, 

обзорной статья, 

кыӵе ке ужпумъя заметкаос. 

Нимысьтыз висъяське 

«гедройц» жанр - со «Звезда» 

журналын печатласькем 

критиклэн Самуил Лурьелэн 

рубрикаез, солэн «С. 

Гедройц» кушемнимыз вал. 

Мастер-классъёсы пыриськемзы 

сяна, егит гожъяськисьёс 

Волга шур кузя катерен ортчизы. 

Тунсыко вераськон 

пурӟиз вотэсын улӥсь критика 

пумысен. «Знамя» 

журналлэсь мастер-классэ 

нуись егит писатель Ольга 

Брейнингер вераськиз 

али азинскись но кужым 

люкась литературной блоггинг 

сярысь. Со пусйиз, 

берло 2-3 ар ӵоже вотэсысь 

критикалэн ӟечлыкез но 

данэз будӥз шуыса. Шуом, 

«Инстаграмын» книгаос сярысь 

гожъяны кутскем Яна 

Семёшкиналэн куараез 

али пӧртэм площадкаосын 

чузъяське. 

Наталья Иванова пусйиз: 

зэмос критик луон понна талант 

но темперамент кулэ. 

Литературовед малпамъя, 

критик - со огдыре инспектор, 

со янгыше уськытӥсь но 

дурбасьтӥсь, со ик идеолог 

но. Критика - со вакытлэн 

ачиз шоры учкемез но ассэ 

эскеремез. 

Колхозъёс куашказы 

Форумын бадӟым саклык 

висъяське литературалэсь 

улон-вылонзэ эскеронлы. 

Котырес ӝӧкъёсын 

экспертъёс кенешо писательлэн 

но лыдӟисьлэн кусыпъёссы 

пумысен. «Россиысь 

туала литературалэн 

аспӧртэмлыкъёсыз» темалы 

сӥзем пумиськонын писатель, 

А. Горький нимо литературной 

институтлэн 

ректорез Алексей Варламов 

но литературовед Татьяна 

Булатова вераськизы 

туала литературалэн 

югдурез сярысь. Алексей 

Варламов пусйиз, кутскись 

гожъяськисьлы нырысь 

ик трос лыдӟиськоно шуыса. 

Со Юрий Казаковлэсь 

кылъёссэ тодаз вайиз: «Писатель 

луыны уд быгаты, 

лыдӟись луытэк». Соин та 

выллем форумъёс пайдаё 

луо - егитъёс ог-огзэс лыдӟо 

но лэчыт синмын текстъёс 

шоры учкыны дышетско. 

Алексей Варламов малпамъя, 

ортчем дыре кылизы 

писательёслэн огазеяськонъёссы 

- али литератураын 

пушъе «хуторской 

система», литературной 

«колхозъёс» ӧвӧл ини. 

Писатель малпамъя, гожъяськисьёсты 

огазеяны кулэ 

ӧвӧл, уго соос пӧртэм луэменызы 

тунсыко. Совето 

вакытэн ӵошатоно ке, литератураын 

цензура ӧвӧл, 

котькудӥз быгатэ гожъяны 

со сярысь, мар солы тунсыко 

- Россиын азьло ноку 

таӵе югдур ӧй вал. Со дыре 

ик эрик нокыӵе оскытон уг 

сёты, литература сяськаялоз 

шуыса. Али туж трос 

книга печатлаське, соин 

ик книга дунзэ ыштэ. Конкуренция 

туж вылӥ - писательлы 

секыт шедьтыны 

аслэсьтыз лыдӟисьсэ. Со пумысен 

вылӥ дунъяське критикалэн, 

зӧк литературной 

журналъёслэн, санлы 

издательствоослэн ужзы - 

соос книга зарезьысь утчало-шедьто 

но лыдӟись доры 

вутто учкымон нимъёсты. 

Татьяна Булатова вераз, 

кутскись гожъяськисьлы 

творчествоезлэсь ӟечлыксэ 

валаны секыт, нош пыр-поч 

ваньзэс учкыны-эскерыны 

экспертъёс уг вутско. Вань 

кутскись писательёслы, Т. 

Булатова малпамъя, кӧня 

ке юанлы валэктон сётоно: 

малы мон гожъяськисько? 

Умой-а мон гожъяськисько? 

Кинлы мон гожъяськисько? 

Печатлалозы-а 

монэ? Берпуметӥез юан 

герӟаськемын ӵапак литератураын 

экспертиза радъясь 

институтъёслэн уженызы. 

Литературной форумъёс, 

фестивальёс, премиос, 

редакторен ужан сӥсъяло 

зэмос литератураез, сое 

лыдӟись доры вуттыны тыршо. 

Вотэсын ужась платформаос, 

огласянь, тодмо луыны 

юртто, но со дыре ик трос 

люкам «лайкъёс» уг возьмато, 

тон умой гожъяськиськод 

шуыса. Татьяна Булатова 

пусъемъя, Россиын уг 

тырмо литературной агентствоос, 

кудъёсыз утчасалзы 

тунсыко авторъёсты но соослы 

будыны юрттысалзы. 

Алексей Варламов но Татьяна 

Булатова ог малпанэ 

вуизы: литература - со ним, 

соин ик аслыд ним лэсьтоно, 

нош кызьы - созэ нокин 

рос-прос уг тоды. Котькуд 

писательлы аслыз сюрес 

ӵогоно луэ.

инГОЖ 


3 

2018-тӥ ар 16-тӥ коньывуон 

ТОДМО НИМЪЁС 

Чебер адями 

Удмуртиын буре ваё Михаил Федотовез 


Вожъяськон - алама сям. 

Но 7-тӥ коньывуонэ, Михаил 

Федотовлэн шайгу 

дораз люкаськем калыклэсь 

тодэ ваёнъёссэ 

кылзӥськыкум, ӵапак 

вожъяськон мылкыдлэсь 

куштӥськеме ӧз 

луы. Сокем бордаз кыске 

сыӵе быдӟым адями 

- соин огвакытэ улэм, 

вылтуссэ адӟем, куаразэ 

кылэм потэ… 

Кылбурчилэн вордӥськем 

нуналаз вордӥськем палъёсаз 

вуэм писательёс, журналистъёс 

но Яр ёросысь Вортча гуртысь 

ӵыжы-выжыосыз буре вайизы 

улонысь вазь кошкем таланто 

бесерман воргоронэз. Шайгузэ 

котыртыса, Михаил Федотовлэн 

кылбурезъя гожтэм «Мон 

бакчаям мертто пинал льӧмпу» 

кырӟанэз нёжтӥзы, Николай 

Мерзляков бард быдэстӥз Михаил 

Федотовлэн «Мукет» по- 

Туспуктӥз Валерий НУРИАХМЕТОВ 

эмаысьтыз оглюкетызлэсь 

пӧрмытэм кырӟанзэ. Кылбурчилэн 

улонысьтыз учыръёссэ 

мадизы, солы сӥзем чуръёссэс 

лыдӟизы, творчествозэ данъязы 

Вячеслав Ар-Серги, Виктор 

Шибанов, Татьяна Чернова, 

Пётр Захаров, Владимир 

Михайлов, Василий Михайлов 

но мукетъёсыз. Чылкыт, чебер, 

йӧно, адямиосты валась, улонлы 

шумпотыны быгатӥсь, бордаз 

кыскись… Синмаськымон 

кылбурчи луэмез сяна, Михаил 

Федотов синмаськымон адями 

вал. Со сярысь вераськыку, сое 

адӟем, соин эшъяськем адямиослэн 

синъёссы гажан мылкыдын 

пиштыны кутско, нош куараосазы 

яратон чузъяське. 

- Кузь сюрес вылысен 

котькудӥзлэн ик эшъёсмылэн 

йыразы огдыре пилемо 

но югыт малпанъёс бугыръяськизы, 

дыр, Мишаез улэпен 

син азе пуктыса, солэн висись 

сюлэм пыртӥз чилектэм гожез 

валаны тыршыса… Курыт 

кирень куректон. Али но 

со чыртывыжыез ӵоксузьытэ, 

сюлэмез дырекъятэ, жалянэз 

бугыртэ. Нош но нош кие 

кутӥськод ке солэсь книгаоссэ, 

валаськод: кылбурчи улыны 

дыртӥз, улонэзлэсь пумзэ 

адӟыса син азяз пуктылӥз... 

1980-тӥ арын ик ини ас 

шӧдонэз-адӟонэз сярысь вераз: 

«Эн мыкыртэ йырдэс, 

юлтошъёсы, та улонысь мон 

кошкисько шуыса», - малпанзэ 

кисьтэ Татьяна Чернова 

кылбурчи. 

Михаил Федотовез лыдӟо, 

гажало, ярато - кызьы шуиз 

кылбурчилэн кузпалыз Анна 

М. Федотовлэн вордӥськем 

Вортча палъёсаз вуылӥзы писательёс, 

журналистъёс, ӵыжывыжыосыз. 

Федотова, али дыре со зэмос 

суперзвезда. Нош бесерманъёс 

понна Михаил Федотов - калыксылэн 

дано пиез, герой. Со 

кылбуръёсаз данъяз калыксэ, 

нош калыкез со понна пыраклы 

кельтӥз сое сюлмаз. 

Вордӥськем нуналаз Ярын 

но ортчиз Михаил Федотовлы 

сӥзем ужрад, кытын уйпалась 

калык, Ижысь вуэм куноос 

буре вайизы бесерман кылбурчиез, 

нош 8-тӥ коньывуонэ 

сое данъязы Ижысь филармониын. 

Культурая но туризмъя 

министр Владимир Соловьёв 

пусйиз, Михаил Федотовлэн 

улонэзлэн сиосыз удмуртъёсты 

но бесерманъёсты кема 

шунтозы на шуыса. Россиысь 

сӥё-дано артист Геннадий 

Кузнецов кырӟамез азьын тодаз 

вайиз, кызьы Михаил Федотов 

солы «Гена эшелы - мынам 

куараелы» гожтэмен книгазэ 

кузьмаз. Ӵапак со бӧрсьы 

вордскиз «Мон бакчаям мертто 

пинал льӧмпу» кырӟан. Анна 

Федотова тау кариз, картсэ уг 

вунэто, сое данъяло шуыса, 

осконзэ усьтӥз, котькуд адямилэн 

сюлмаз кузпалызлэн творчествоезлы 

инты сюроз шуыса. 

Со малпамъя, Михаил Федотов 

кылбуръёсаз быдэсак 

усьтӥське - кытын ке со кужмо, 

кытын ке ляб. Сергей Матвеев 

кылбурчи но итӥськиз та малпан 

борды - со пусйиз, Михаил 

Федотовлэн огдыре ӝужыт 

гурезь кадь но ненег сяська 

кадь луэмез паймытэ шуыса. 

Со лыдӟиз кылбурчилэсь ӟуч 

кылэ берыктэм ужъёссэ. Озьы 

ик луыны кулэ - зэмос поэт уг 

возьдаськы лыдӟисез азьын 

котькыӵеен усьтӥськыны. 

Удмурт кылосбуръя, финноугроведениея 

но журналистикая 

институтысь студентъёс 

возьматӥзы Михаил Федотовлэн 

кылбуръёсызъя пуктэм 

постановка - соослы луыса 

кылбурчилэн чуръёсыз удмурт 

кылын чузъяськизы. 

Литератураез эскерись тодосчи 

Вера Пантелеева малпанзэ 

усьтӥз, котькуд вакытлэн 

аслаз поэтъёсыз вань шуыса. 

Михаил Федотов, со малпамъя, 

улэм вакытэзлы зэмос 

тупась гожъяськись вал - 

ӟырдыт, сутӥсь. Со шӧдӥз калыклэсь, 

кыллэсь, оглом улонлэсь 

воштӥськемзэ. Ваньзы сямен, 

тодосчи пусйиз, макем Михаил 

Федотов борды кыстӥське вал 

калык - со бордаз кыске вал ӟеч 

сямыныз но, вылтус чебереныз 

но. Вера Пантелеева шуиз, таланто 

адямиос котьку калыкез 

ӟечгес, йӧногес каро шуыса. Огез 

дышетӥсез Флор Васильев сямен 

ик, бесерман кылбурчи улонысь 

вазь кошкиз - поэт ас дыраз 

вуэ но ас дыраз кошке, вылды, 

малпанзэ усьтӥз тодосчи. 

Ӝытлэн пумаз Вячеслав 

Ар-Серги писатель гожъяськисьёсты 

дунъяны куриз. Со 

учкисьёслы тодазы вайытӥз: 

гожъяськисьёс котьку калыклэн 

азьлань улонэз сярысь 

сюлмасько - Михаил Федотовлэн 

но сюлмыз висиз калыкез 

но кылыз понна. Палэнэ потыку, 

пе, нырысь ик юало: кин 

тӥляд поэтты? Асьмелэн вань 

быдэс дуннелы ушъяськымонданъямон 

поэтмы - со Михаил 

Федотов. Соин солэсь нимзэ 

вунэтоно ӧвӧл, творчествозэ 

вӧлмытоно. 

НЕКОНФЕРЕНЦИЯ 

Берыктӥсьлы уж котьку вань 


2-тӥ коньывуонэ 

Berykton lud кылысь 

кылэ берыктӥсьёслэн 

клубзы но элькунысьтымы 

Йӧскалык библиотека 

ортчытӥзы «Берыктон 

луд» неконференция. 

Berykton lud клублэсь ужзэ 

мытэм Алексей Шкляев верамъя, 

клуб кылдытэмын 

вал, берыктон ужен вырисьёс 

кусып возьыны но тодон-быгатонлыкъёссэс 

вӧлмытыны 

мед быгатозы шуыса. Клублэн 

но неконференцилэн форматсы 

ужрадэ ваньзылы пыриськыны 

луонлык сётэ - берыктон 

ужысь ӧнерчиослы но, соин 

тунсыкъяськисьёслы но. 

Йӧскалык библиотекаысь 

кунгожсьӧр кылъёсын литературая 

ёзэн кивалтӥсь Людмила 

Огородникова вераз 

школаын дышетскисьёслы 

улосъёс куспын ортчись «Перевод 

в поле многоязычия» 

вожвылъяськон сярысь - библиотекаын 

ужасьёс туэ сое 

8-тӥзэ ортчытӥзы. Людмила 

Огородникова верамъя, 

берыктӥсьёслэн арысь аре 

лыдзы будэ, пиналъёс тросгес 

кылъёсысь текстъёсты берыкто. 

Радъясьёслы пӧртэм 

кылъёсты тодӥсь ӧнерчиосты 

утчано луэ - кунгож сьӧрысь 

адямиослы но куд-ог дыръя 

вазисько. Угось конкурслэн 

нырысетӥ этапаз пинал 

кунгожсьӧр кылысь текстэз 

анай кылаз берыктыны кулэ. 

Лидия Нянькина гожъяськись 

мадиз берыктон ужен 

выремез сярысь. Со Ашальчи 

Окилэсь, Галина Романовалэсь 

ужъёссэс ӟуч кылэ 

берыктӥз, али трос ужа нылпи 

литератураез берыктон 

бордын. Гожъяськисьёс асьсэос 

нылпиослы вазисько, 

произведениоссэс берыктыны 

курыса. Гожъяськись верамъя, 

ӟуч кылэ берыктон 

капчи ӧвӧл, малы ке шуоно 

ачиз Лидия Нянькина малпаське 

но гожъяське удмурт 

кылын. Нош удмурт кылэ берыктон 

вӧй вылтӥ кадь кошке 

ини. Со озьы ик вераз «Кенеш» 

журналэн радъям литературая 

конкурс сярысь - 

таяз арын удмурт кылысь ӟуч 

кылэ берыктӥсьёслы нимысьтыз 

номинация ялэмын. 

Сергей Бехтерев юрист 

висьытӥсь ужпумез ӝутӥз - 

туж ӧжыт удмурт кылэ берыктэм 

юриспруденция но право 

удысъёсысь текстъёс, кун документъёс. 

Эшшо одӥг ужпум 

- ужъюртъёс вылысь кык кылын 

нимпулъёс али трос, но 

удмурт кылын гожъямъёсаз 

лачак янгышъёсыз. 

Вера Пантелеева тодосчи 

верамъя, университетын 

журналистикаез дышетӥсь 

студентъёс паймо удмурт кылын 

литература вань шуыса 

тодэмзы бере. Троссэ туала 

гожъяськисьёсты берыктэмъёс 

уг тырмо. Али берыктон 

удысын уг тырмо официальноделовой 

текстъёсты, чеберлыко 

литератураез берыктӥсьёс, 

чик ӧвӧл элькунамы синхрон 

берыктонэн вырисьёс. 

Лариса Дмитриева тодосчи 

вераз «Яратоно удмурт 

кыл» лагерьын удмурт кылэз 

дышетӥсьёсын ужамез 

сярысь. Студентъёсын соос 

мультфильмъёсты, тунсыко 

видеоосты удмурт кылэ 

берыктӥллям. Сыӵе форматэз 

уже кутыны луэ, удмурт 

кылэз дышетыку, озьы ик со 

юрттэ вӧлмытыны кылэз вотэсын. 

Богдан Анфиногенов 

кылбурчи мадиз «ВКонтакте» 

бамез удмурт кылэ берыктон 

сярысь. Берыктон 

сяна, пусйиз со, кулэ калык 

пӧлын иворез вӧлмытыны 

но дасяны кыллюкамъёс, 

мед тросгес калык удмурт 

кылэз вотэсын кутоз шуыса. 

Малпан чузъяськиз: удмурт 

кылысь ӟуче берыктон 

лыдӟиськись аудиториез паськытатыны 

юрттэ, нош ӟучысь 

яке мукет кылъёсысь удмурт 

кылэ - удмурт кылэз узырмытэ. 

Ваньзы шумпото, Библия удмурт 

кылын вань шуыса, нош 

туала лыдӟисьёс табере возьмало, 

ку лыдӟыны луоз удмурт кылын 

«Гарри Поттерез».



инГОЖ 


Вордскы вал выльысь дунне вылэ... 

Михаил Федотовлэн «Берытскыны вуоз дыры» бичетысьтыз кылбуръёс 

* * * 

Эх, вордскы вал выльысь дунне вылэ, 

Веттан гурез сыӵе мон кылзысал! 

Та улонын троссэ уг лу вылэм, 

Кужым гинэ быре вожмаськыса. 

* * * 

Ӵукнаысен чирдэ ини бурдо, 

Ӵукнаысен инвис гома лемлет. 

Югытамлэсь ӧвӧл соку шурдон, 

Сыӵе дыръя потэ яратэмед. 

Сильтӧл 

Кутскиз ук, кутскиз шуланы, 

Ой, кыӵе кышкыт та сильтӧл. 

Уг лу ог-огдэ адӟыны, 

Уг адӟиськы нокытын тыл. 

Я вордсконо вылэм коть уйвӧтам, 

Крезьзэ меми озьы но кырӟалоз. 

Киосызлы тодмо 

нуны веттан, 

Кӧкыен ӵош дунне ӟечыралоз. 

Соку кайгу но мур уммен кӧлоз, 

Меми крезьгур сое катьтэммытоз. 

Сайкан дырыз но выльысь, дыр, вуоз, 

Соку меми эшшо крезьзэ мытоз... 

* * * 

Тон бӧрды, тон бӧрды, куазе, 

Мыным коть луоз капчигес. 

Соку мон пуксё корказе, 

Озьы возьмало выль ӵукез. 

Тон бӧрды, тон бӧрды шара, 

Тӥни шалтыртэ ук липет. 

Вылды, одӥг пол коть араз 

Тынад но луэ бӧрдэмед. 

Зоред шапыкен виялоз, 

Синву кадь усёз корказе. 

Соку мон асме малпало, 

Шонер-а улӥ мон, куазе. 

Куке но лэсьтэм янгыше 

Курыт синвуэн погыльскоз. 

Нош ӟеч будэтэм емыше 

Тыныд мед, куазе, йыбырттоз. 

Возем!* 

«Возем!» шуо бесерманъёс, 

Мычем киез кырмо чарак. 

Сайкыт учко чагыр синъёс, 

Ӟеч мылкыдзэс нуод сьӧрад. 

«Татчы лёгем ӟеч сюрестэс 

Медаз басьты вожо ожо. 

Тодын возём сӥлы кылдэс, 

Пумитаны ӟеч нянь пыжом. 

Гуртысьтымы котькуд коркан 

Шуныт инты тӥлед сюроз. 

Уйшор берозь шудоз арган, 

Кырӟан вӧлмоз Чупчи шурозь.» 

«Возем!» - лэйка вазем куара, 

Куно вера тау куронзэ. 

Бесерманъёс лэзё сьӧраз 

Синмаськымон удмурт сямзэс. 

* Возем! (уйпал) - ӟеч лу! 

Чильтэр пыртӥ пырись тылсиосын, 

Потэ мыным, 

ӧвӧл возьытлыкез. 

Торшер вылын кылле зундэс, 

йыр сын, 

Тӥни мынам ваньмыз, дыр, сьӧлыке. 

Вазь ӵукысен бурдо ини шула, 

Вазь ӵукысен шунды учке шорад. 

Инкуазь гинэ, 

инкуазь гинэ вала, 

Кыӵе шудбур пыре соку дорад. 

Мед луоз 

Со мед луоз, уртчем мылкыд, 

Мон тон вылэ сое кисьто. 

Быдэс уйбыт, сыӵе ческыт 

Яратонэз соку усьтом. 

Со мед луоз, алӥсь кылъёс, 

Мыным тонэн ӧвӧл возьыт, 

Куке сюлэм лулӟылэмъёс 

Сьӧлыктэмесь Инмар азьын. 

Со мед луоз, йырдэ ыштон, 

Нокин уз кортна мылкыдэз. 

Кыӵе пӧсь кыл, кыӵе усьтон 

Шедьтӥд мыным, узы шудэ? 

Со мед луоз, со мед луоз... 

Тӥни шунды ини ӝужа. 

Нош ӟыгырто монэ киос, 

Нош уйвӧтаз выйтэ гажан. 

* * * 

Усиз ке усёз ни лымы, 

Пурысь ульчаез шобыртоз. 

Соку 

быронэн кусыпмы 

Ваче вуонтэм, дыр, потоз. 

Соку мон ӝужыт юртысьтым 

Бурдо кадь лобо эрике. 

Пеймыт йырсиме мынэсьтым 

Лымы вешалоз мамыкен. 

Соку мон кошко ульчатӥ, 

Асме шудбуро кожаса. 

Тулкым ортчылоз сюлэмтӥм, 

Монэ быронтэм карыса. 

Берга, пужнӥське йӧ лымы, 

Юбо кадь, со меӵ ӝутӥське. 

Уг луы синэз усьтыны, 

Йыга мугоре, жугиське. 

Бен вае кутском ваче ки, 

Ум сётске урмем сильтӧллы. 

Ваньмы ке дэмен кариським, 

Уз луы кышкыт асьмелы. 

Пельнянь 

Туннэ покчиарня. 

Ӵукнаысен пельтэ. 

Ми кутӥськом пельнянь 

Кышноеным артэ. 

Нош пичимы милям 

Кӧлэ на кӧкыяз, 

Укно сьӧрын пеллям, 

Сильтӧл вузэм гуръя. 

Жадиз, луоз, толон, 

Шулдыр ӟабыльтыса. 

Сое нуиз кӧлон 

Ческыт дуннеосаз. 

Тани со кӧлыкуз 

Мусо пальпотылэ, 

Солэн дораз соку 

Уйвӧт, дыр, лыктылэ. 

Нош урамын пельтэ, 

Нунал мынэ азьлань. 

Кышноеным артэ 

Мон кутӥсько пельнянь. 

* * * 

Мон куке но кулӥ ке, быри ке, 

Гу вылам мед мерттод вал льӧмпу. 

Тодмотэм сюресчи ӟеч кариз ке, 

Льӧменым утялто мон соку. 

Тодӥськод ук, кыӵе сяськая со, 

Мон ачим но куке сяськаяй. 

Юг-тӧдьы бус пӧлын кадь уя со, 

Мон ачим но озьы ик уяй. 

Туспуктӥз Максим ЕГОРОВ

инГОЖ 


5 



Сюлэмын мон али но гуртын 

Оксана Бисарлэн чуръёсыз 

Бускель 

Тыныд потэ: бускель капчи улэ, 

Куректонэз уг луы - со шудо. 

Тонэ ке улонэд весь эскере, 

Мытэм ужед быдэсмытэк чиге... 

Куасьмем писпу сылэ бусы шорын, 

Уг пото кемалась вож куаръёсыз. 

Озьы ке но сылэ - йылыз инмын, 

Уг лэзисько уллань кузь вайёсыз. 

Мар луысал, ӵ ошатысал ке со ассэ 

Вӧзаз будӥсь мукет писпуосын?.. 

Выжы дӥняз пинал пушъет потэ! 

Бускельёссэ ке нош вандо пилаосын. 

Синучкон 

Мон шедьтӥ выжыкыл синучкон! 

Со монэ шумпоттэ, чеберма. 

Тодӥсько, мон ӧвӧл муспотон, 

Но монэ со одно ик ушъя: 

«Тон чебер, лек ке но луиськод, 

Тон веськрес котькыӵе мугоро. 

Юнме тон синъёстэ буяськод - 

Изьыкуд но чебер потӥськод». 

Осконме юнматӥсь синучкон, 

Вуюись кадь чебер - вож но лыз. 

Чеберай, чеберина, пе, мон! - 

Верало пиелэн синъёсыз. 

Ыштос 

Кӧня ар улӥсько ни? Туж трос, 

Сюрс пала пыдкутчан лёгамын. 

Будыса валасько, вань - ыштос, 

Та дыре туж кулэ со мыным. 

Валасько, кемалась сисьмемын, 

Анае, дыр, сое сэрпалтӥз. 

Юн оскиз со - улом шуд пӧлын, 

Вандылэм интые ку бурмиз... 

Адӟисько мон сое уйвӧтын: 

Сяськая, аръёсын воштӥське. 

Гогые кытын ке усемын - 

Со мынам вордӥськем музъеме. 

Сюрес 

Сюрес вылтӥ питран вазе дымбыр-шалтыр. 

Чик тодмотэм инты, кытчы мынӥськомы? 

Анай вазиз: «Отчы, кытчы кылиз сюлмы, 

Кытын ялан уло лёгам пытьыосмы». 

«Укмыс арес мыным, ваньмыз со - выжыкыл, 

Аръёс кошко гинэ, машинае чаль, пыр». 

Анай дугдӥз, учкиз сюрес шоры: 

«Кӧня пумо, пие, кылем татчы пытьы. 

Таиз бадӟым сапег - пиос фронтэ кошко, 

Дэри пӧлы валъёс пыдес дорозь выё. 

Нош гольык пыд кӧня калык татӥ ветлэм, 

Кинлэн пичи пыдыз? Валай, со - апайлэн. 

Нэнэй кутэн ортчем, берло колошаен, 

Гужем турын атай ваем уробоен. 

Паськыт вамышъяса, агай ортчем - тузӥ, 

Бускель гуртэ ветлӥз ӵемысь та сюрестӥ…» 

«Шунды шуккем, лэся, йырдэ, анай, кошком». 

Ӧй шедьты на, шуэ, тузон пӧлысь учком. 

Кӧльы, тузон, шелеп, гопъёс пумиськизы… 

Анай анаеныз кема вераськизы. 

К... Улон 

Улон - чебер макем та кыл! 

Нош улыны кыӵе усто!.. 

Куке азяз «К» ке уг сыл, 

астэ шудо туж шӧдоно. 

Ойдо ӵушом «К»-ез ӵошен: 

ум Керетэ, ум Куялэ лек Кыл, 

вандэ пушез Керӟегъяськон пуртэн, 

Курыт вина медаз веръялля ым. 

Мед мугормы веськрес луоз, ӟызы, 

ум сиелэ мултэс Кузьыт, Конял. 

Мед буш улоз ӧжыт ке но ӝушмы, 

ядэн ӵошатӥське сакыр, сылал. 

Ум Куртчелэ матысь адямимес, 

быдэс нунал ум сётске Кӧлыны. 

Курадӟыса ум чидалэ вӧсез, 

вордӥськимы шудо ми улыны! 

Куректыса ум улэ, Курдаса, 

Куалекъяса сюлэм медаз тэтча. 

Улон, малы меда азяд пуксе со лек буква? 

Кион сямен ветлэ утчаськыса. 

Гуртоос 

Атасъёс чоръяло ни гидын, 

Вазь ӵукна куашето гуртоос. 

Кышноос бергало гур азьын, 

Азбарын ужало кузёос. 

Кыштырак ужъёссэс лэсьтыса, 

Кеносэ, фермае мынозы. 

Нылпизэс кельтозы чупаса, 

Огзэ нош нуналзэс улозы. 

Ӝытъёссэ доразы пукыло, 

Гур азьын соослэн кафезы. 

Шур, тымет - соослэн зарезьзы... 

Сӥзьылзэ весь дэри колало. 

Шуоды, гуртоос улонлэсь 

Вашкала дауре кылемын. 

Со понна ик соос мукетэсь... 

Сюлэмын мон али но гуртын. 

Черсон сярысь 

Паймыса учкылӥ черсэмзэ анайлэсь, 

Малпалляй - выжыкыл арбери. 

«Чаль, нылы, дышето», - шуылӥз весь анай, 

Мон ӧй кылзы, ӧй черсы - шудӥ. 

Куддыръя черсонзэ анайлэсь ӝегатъяй - 

Пу черсэн школаен шудылӥ. 

Ыж гонзэ мунёлы йырсилы ишкалляй, 

Бугорзэ шудыса сэрттылӥ. 

Нош кубо тусыныз туж валлы келешиз, 

Мон ӵемысь со вылын ворттылӥ. 

Тол куспын трос бугор анае черсылӥз, 

Носкизэ но пӧзьзэ - яратӥ. 

Бен кызьы-о вольыт черсӥське та ыж гон? 

Вань кужмысь аръёс пыр паймисько... 

Мон черсме дугдылтэк бергатко, бергатко, 

Улонме черсыны вырисько. 

Туспуктӥз Максим ЕГОРОВ



инГОЖ 

МОНОЛОГ 

Нош ик «кык» 

Туспуктӥз Вера ШТЫКОВА 

Даниил БАКАНОВ 

60 аресъем кышномурт 

пыре, киысьтыз тетрадьёссэ 

лачмытак ӝӧк вылэ понэ. 

Валаськоды-а, кыл асьмемыз 

огазея, одӥг калыке пыртэ. 

Паустовский гожтэм, ас 

кылзэ гажамез пыр адямилэсь, 

культурной луэмзэ сяна, обществоын 

интызэ валаны луэ. 

Асьмеос Удмуртиын улӥськом, 

но мон оскисько, ваньмы культуралы 

дышетэмын. Кылтэк 

культура но уг луы. 

Малы мон тае лыдӟыны 

кулэ?! Одӥг но «куине» ӧвӧл. 

Вань сочинениос «кыклы» 

гожтэмын! Мон татын тӥ 

понна вырисько, вырисько, 

ваньзэ кушаса сётӥсько, визьмаськемдэс 

возьмасько. Нош 

тӥ мыным мар - номыр но! 

Книгае чиньыеным возьматыса, 

верасько, тазэ лыдӟоно 

ӧвӧл шуыса, нош тазэ - йырады 

кельтоно. Нош тӥ... книгае 

учкиськоды - пӧлы пумез 

адӟиськоды. 

Огшоры тема: «Семьяен 

ортчытэм нунал». Ваньзылы 

тодмо но матын. 

Сергеева гожтэ: «Кызьы 

но озьы сапег дӥсяны 

быгатӥ». Дӥсяны! Дӥсез гинэ 

ум дӥсяське шат?! 

Нош Корепанов: «Ӵукна 

мон анаелы юрттӥ - ӝӧкез 

чуши». 

- Чуши!!! Точкаосыд кытын, 

визьтэм, «чуши», пе! 

Кин тон интые «ч» вылэ точкаос 

пуктыны кулэ?! (Тетрадьёсты 

ӝӧк борды шуккыса 

лэзе.) 

Нош Иванова: «Мон тетрадьёсме 

портфелям 

сэрпалтӥ». Сэрпалтӥ?.. Тӥ 

серекъяськоды-а, мар-а? 

Сэрпалтӥ!.. Тетрадьёсты 

понӥськод тон, нош удмурт 

кылдэ сэрпалтӥськод кадь 

ини! 

Тӥ пыдъёстэс мон борды 

чушиды. Сялӟиды вылам… 

Нош мон... мон вань сюлмыным... 

вань сюлмыным тӥ 

понна ужасько. Котьку валаны 

тыршисько, урокъёс бере 

мае ке валэктыны кылисько. 

Дырме быдтӥсько. Нош мыным 

со понна уг тыро. Ваньзэ 

лэсьтӥсько, тӥ зэмос Адямиос 

мед будоды шуыса. Нош 

тӥледлы со кулэ но ӧвӧл. 

Тӥледлы со мӧзмыт. Асьтэос 

сярысь чик но уд малпаськиське. 

Корепанов, тон мар гориськод? 

Со тынад пиед «чушиз» 

ук. Кызьы анай кылдэ 

уд тоды, Корепанов? Со тынад 

улонэд но юрттэтэд ук. 

Мон тонэ кӧня ар дышетӥ, 

кӧня кужымме быдтӥ? Ваньмыз 

юнме-а, мар-а? Мон мар, 

урод дышетӥсь? 

Малы тынад пиед быдэс 

нуналзэ атаезтэк ортчытӥз, 

тон сярысь сочиненияз пал 

кыл но ӧвӧл?! Оло, тон семьяеныд 

ӵош уд улӥськы? Яке тон 

пиналъёстэ уд яратӥськы? 

Мон-а, мар-а соосты яратыны 

кулэ?! А, Корепанов?! Пинал 

будэтыны толкед ӧвӧл 

ке, малы соку вордӥд? Секыт 

тыныд? Яке малпаськод, со 

тынад ужед ӧвӧл? 

Ивановаен ваньмыз валамон, 

сое анаез огназ будэтэ. 

Ӧз быгаты картсэ бордаз думыса 

возьыны, соин ик огназ 

кылиз. Мон уг но паймиськы! 

Нош тон, Сергеева... 

Секыт-а, мар-а вал сапег кутчаны 

юрттыны? Нылыныд 

ӵош киное мынӥд. Гоголь, 

Вий, классика - ушъямон! Но 

малы нылыд сое огназ учкиз? 

Тон кытын вал? Тон соку мар 

карыса улӥд? Со кӧшкемыт 

кино ук, бадӟымъёстэк сыӵеез 

учкыны уг яра! Нош пиналыд 

кышкаменыз могась кыльысал 

ке?! Секыт-а, мар-а 

одӥг но ӝыны час пиналэд 

вӧзын пукыны? Киноысь валантэм 

интыоссэ валэктыны, 

ӟыгыртыны, кышкыт интыосаз 

синъёссэ кыньытыны! Кытын 

анайлэн юрттэтэз но яратонэз? 

Кин анай интые солы 

кизэ сётоз но шонер сюрес 

вылэ султытоз? Мон? Со мынам 

уже ӧвӧл, со тӥляд ужды! 

Мон тӥледыз но тӥлесьтыд 

нылпиостэс яратыны кулэ 

ӧвӧл, тӥ кулэ! Нош мон удмурт 

лулчеберет сярысь тодон-валан 

гинэ сётыны кулэ! 

Дорысь ужез мон кинлы 

сётӥсько? Тӥледлы сое пиналъёсыныды 

ӵош лэсьтоно! 

Кусыпъёсты мед юнмалозы 

шуыса. Озьы гинэ тӥ 

кунмылы юрттыны быгатоды! 

Анай кылэз тодытэк - тӥ 

зэмос адями но вордскем шаерез 

яратӥсь мурт луыны уд 

быгатэ! 

Тани тӥ?! Тӥ быръёнъёсы 

ветлӥды-а? Кин быръёнъёсы 

ӧз ветлы, кидэс ӝутэ. Тӥ 

мар... Тӥ валаськоды-а, мар 

кариськоды? Шундыпуксён 

палась капиталистъёслы пумит 

султон интые, тӥ ганьгань 

интыяды пукиськоды, 

тӥ асьме кунмылэн тушмонъёсызлы 

юрттӥськоды, 

госдеплы, витетӥ колонналы. 

Асьмеос тушмонъёсын 

котыртэмын! Нош тӥ шыпыт 

улӥськоды! 

Кужмо Удмуртия асьмелы 

гинэ кулэ, асьмелы сяна, кинлы 

со кулэ луоз на. 

Мынам пие тани Ижкаре 

кошкиз, со отын колаен 

но бургеръёсын вуз каре. Возьыт! 

Уг кылзы монэ... Быроз 

отын! Нунокъёсы но монэ кылэм 

уг каро, соослэсь но адями 

уз пӧрмы кадь... Тӥ, егитъёс, 

ваньмыз вылэ сӥтяськоды, 

азьланез сярысь уд но малпаськиське! 

Шумпотэ, тӥляд али мон 

вань. Мон тӥледлы кунмес 

быдтыны но пиналъёстылэсь 

азьпал улонзэс сӧрыны 

уг сёты! Тӥ малпаськоды 

вал, школаез йылпумъяно но 

соин тырмыт? Удмурт кыл 

сярысь вунэтыны луэ? Ӧвӧл! 

Тӥ солэсь нокытчы но уд 

пегӟе. Котькытчы кошке, со 

тӥледын луоз. Кузебай Гердлэн, 

Ашальчи Окилэн, Кедра 

Митрейлэн кылыз. Тӥляд 

кылды но узырлыкты, визьтэмъёс! 

Мон тӥледыз дышето! 

Ӧд ке но яратэ, тододы но 

гажалоды анай кылдэс! Нокытчы 

но уд пегӟе! 

Тӥ табере пиналъёсыныды 

ӵош сочинение гожъяса 

пукоды, кызьы нуналдэс 

ортчытӥды, котькуд нуналдэс 

гожтыса кельтоды, шонер 

гожъяськыны дышетскытозь! 

Сотэк мукет классэ 

уд выже. Нош мон тӥледлы 

юрттыны тыршо. Дыры мынам 

трос, Инмарлы тау, номыр 

уз люкеты. Мынамъёс 

ваньзы бургеръёссы доры 

кошкизы. Табере тӥ мынам 

семьяе. 

Сак кылзэ мынэсьтым верамме, 

мон уг серекъяськы. 

Дырдэс кулэтэмезлы эн быдтэ. 

Тыршыса гинэ, тӥлесьтыд 

зэмос адями пӧрмытыны 

луоз. Ӵош дышетскем эштэс, 

Дерендяевез, тодӥськоды 

на, дыр. Шоркарамы бадӟым 

адями луиз. Депу тат! Анайзэ 

ӧз кельты, берта, жингыръя, 

кенеше соин. 

Мон улонме тӥ но тӥляд 

пиналъёсты понна сётыны 

дась. Тӥляд пиналъёсты 

улыны мед быгатозы шуыса! 

Улыны. Курадӟытэк но 

кураськытэк. Улыны! Пичияк 

ке но асгажанзы мед луысал. 

Кызьы улэмзы потэ, 

озьы ик мед улысалзы. 

Ултӥяськытэк, лушкаськытэк, 

лекъяськонтэк. Озьы, 

кызьы кулэ улыны та дунне 

вылын. Пинал будэтыны, 

мӧйыосты но лябъёсты чакласа 

возьыны. 

Нош тӥ... Анаез ведь огназэ 

кельтыса кошконо ӧвӧл, 

нунокъёсыныз солы адӟиськыны 

сётоно! Жингыръяно 

солы, улонэз сярысь, тазалыкез 

сярысь юаськоно! Оло, 

солы маке кулэ! 

Анаен телефонтӥ вераськыку, 

трубкадэс куштоно 

ӧвӧл, анайлэн куарадэс гинэ 

кылэмез потэ ук. Солэн кылэмез 

потэ, тӥляд отын асьтэ 

шуг-секытъёсты вань, но 

оглом ваньмыз умой шуыса. 

Ужды умой, пиналъёсты 

школае ветло, «витьёслы» дышетско. 

Солэн кылэмез потэ: 

кыӵе ни тон отын, анай? Артрит 

уг курадӟыты-а, сюлэмыд 

уг висьы-а? Нош ми ум 

висиське, милям ваньмыз 

умой. Сергимылэн тани кыкез 

йӧлпиньыз усиз, со кык 

час бӧрдӥз... Анай, ми туж 

мӧзмиськом, котьку но тонэ 

тодамы вайиськом. Эн вись 

гинэ. Витаминъёстэ ю, трос 

эн сюлмаськы. Ми ӝоген пиналъёсын 

ӵош берталом, мон 

тыныд шкафтэ мукет интые 

пуктыны юртто, крандэ тупато, 

лампочкадэ вошто, эн 

сюлмаськы. Ми тонэн артэ. 

Бен, анай, нунокъёсыд но тынэсьтыд 

мӧзмо, тужгес но тынад 

пыжиськемедлэсь, салам 

тыныд верало, туспуктэмъёссэс 

келяны куро. Мон но 

мӧзмисько, анай. Ӝоген ми 

бертом, одно ик бертом. Куартолэзьлэн 

кутсконаз берталом, 

отчыозь кӧня ке гинэ кылиз 

на, анай, возьма... 

Мон но тонэ яратӥсько, 

анай... Ӟыгыртӥсько но юн 

чупасько. 

Тетрадьёсты бича, лулӟе, 

жадеменыз шонаськыса 

кошке. 

ПУМЫЗ. 

Удмурт кылэ берыктӥз 

Лукерья ШИХОВА 

Басьтэмын «Школа Удмуртской 

драматургии 

(ШУД)» пьесаосын бичетысь

инГОЖ 


7 


ВЕРОС 

Эн ю абсент, Арсений 

ДАРАЛИ ЛЕЛИ 

Верало ай тӥлед одӥг учыр, 

одӥг улон сярысь… Мон пересь 

мурт, мыным табере оломар 

но зульыны яра. Нош тӥ 

кылзэ но пеляды понэ, пелепонъёс, 

хе-хе. 

Арсений вал чебер, учкымон 

егит пиосмурт. Чебер гинэ 

ӧвӧл ай - котькуд ласянь усточи. 

Усточи ке но, мур шӧдӥсь, 

бордаз кыскись, дырекъясь 

луло… Бордаз кыскись гинэ уд 

шуы - бордаз думись! М-да… 

Мукет ласянь, лулпушсэ маке 

но конгыръяса улӥз. Ӧй шуысал, 

шекез вал, но кытӥызмаиз 

буш ик вылэм, лэся… Ӧй 

ке луысал, мон ӧй но мадьысал! 

Умой ӧръя ӧз мыны пияш. Луэ 

улонын, ваньмыз сётэмын, эсьма, 

нош шумпотонлы инъет 

уг сюры. Арсений ачиз ик ассэ 

палэс шуылӥз. Туж турлы куронъёсыз 

сое кекатыса возизы. 

Уг тодӥськы, аслам сыӵе шузияськонъёсы 

ноку но ӧз потылэ. 

Йӧспӧртэм вал Арсений. Огшорыгес 

луыны кулэ. Хе-хе. 

Озьы-а, тазьы-а, Инмар 

солы уно саламзэ кузьмаз. Арсений 

валамтэ, вылды: тыныд 

сётэмын ке, уже кут. 

Сенялэн векчи киосыз но 

лулэз позыртӥсь чагыр синъёсыз 

нылъёсты, чечылы ёрмем 

мушъёсты сямен, гочатъяллязы. 

Омырскыны дась 

вал котькудӥз: векчи кускоез, 

чиед кукоез, пичи йыроез, 

начар бурдоез, лобась-поръясез, 

егит-пересез… Куашкам 

мылкыдэз ӝутыны, сюлэмез 

шунтыны быгатоз вылэм - 

шудтэмъёсыз нылъёс бордаз 

ӵемгес мериськылӥзы. Тазьы 

ик син азям пуксе: шутэтске 

Арсений, чарка омыръя, нош 

пельпум вылаз кыӵе ке мусо 

йыр кылле - яратыса палдэм, 

каньсырам. Сеня нокинэ 

ноку улляны ӧз дыртылы. Киыныз 

эмъялляз - вешалляз. 

Уго киыз солэн вылӥ кужымен 

тырмемын вал: суредаськыны 

пӧрмытылӥз. Инкуазь 

шӧдонэз пушказ зол гыбдаз ке 

но, дышетскемез ӧз окмы. Дышетскыны 

мылкыд кулэ, Арсений 

ассэ ӧз ёрты. Эх, ма… 

Огез суредэз быдтымтэ, мукетыз. 

Бар сьӧрысь яратоно 

эшсэ, сьӧд синкашо, меӵкыт 

синмо нылэз, кагаз вылэ 

ӵабъяз вал: кема учкиз-учкиз 

но, валантэм вожомонэн тырмыса, 

сутӥз-пазяз. 

Бен, барын со пукылӥз 

ӵем. Тани та интыын ик, кытын 

али мон пукисько. Пушказ 

быгатыса киськалляз 

уйжомытӥсь шулдыр суретъёсты. 

Со ачиз но татын юртъерлэн 

люкетэз, тузӥ арбери кадь 

адскиз: бордаз пыӵазы дышем 

зынъёс, сямъёс. Тодӥськоды, 

кыӵе со (баръёсын куно луиськоды, 

луоз): лэйкыт крезьгур, 

урдэскад шокась адямиос но 

барменлэн ӟеч синъёсыз. Чарка 

пыдэс кадь чилясь синъёсыз. 

Дышиськод ке, таӵе макеостэк 

улыны секыт, о-о ведь? 

Шобрет улысь кадь тунсыко, 

Суредаз ЧУДЬЯ ЖЕНИ 

аслаз катъёсызъя улӥсь дунне: 

ялан ас бордаз кыске. Кизер 

чиль-сьӧд абсент визез 

сутэ. Выжыкыл. 

Кизер чиль-сьӧд абсент 

сутэ визез… 

Тодӥськод-а, эше, та чур Арсенийлэн 

кылбураз бурдъёссэ 

вӧлъяз. Но кылбур вордскытэк 

ик кулӥз: лыдӟонлэсь ческытсэ 

валаса ӧз вутты. Кылбурчи 

ӧз кисьма. Опеть. Номырлы 

ярантэм! Сыӵе вал Арсений - 

ӝыныё-урдсо. Ачиз шуылӥз: 

палэс… 

Кырӟа вал Арсений. Ӝӧк 

вылэ вуэн тырмытэм бокалъёс 

пуктылоз но етӥз шуккылоз 

ук, ныр улаз мар ке нургетыса! 

Крезьгуръя школазэ куштэм. 

Нош гитаразэ кыӵе ӟыгыръя 

вал, нылэз сямен - вожаса бырод! 

Крезьгуран малпанъёссэ эктон 

согиз, лэся. Мугорзэ Шива 

выллем выретъяз ук! Позыръяськемез 

шоры учкыса, жадёнэз 

вунэтылӥськиз, ява. 

Эктонлэсь но зол яратэ вал 

Арсений, ас понназ ватскыса, 

пияла пелляны. Татын со мастёр 

вал! Нокин ӧз адӟылы, 

кызьы со пияла пельтэ, нош 

пельтэмзэ адӟысалды ке, валасалды: 

сыӵезэ Арсений гинэ 

пӧрмытоз. Йӧспӧртэм адями 

вал. 

Пияла пельтонзэ вунэтыса, 

угы-зундэсъёс лэсьтыны 

йӧндыриз. Одӥг дама туж дуноен 

басьтӥз солэсь «А» букваен 

печато зундэссэ. Со уксёен 

Арсений ӝыны ар юиз - коньдонзэ 

жильдӥз, чурыт куртчем 

ӧз выры. 

Шива тодэ, мар но со ӧз 

йӧндыры! 

Барын ик вань улонэз ортче 

вал. Бар, бар, бар… Выльысь 

но выльысь Сеня абсент 

ярдурын чорыгаса пукиз. 

Арня куспын, оло, котькуд 

нунал пыралляз: дыр берганэз 

шӧдыны уг луы. Одӥг пол 

вӧзаз ортчыт чебер нылок пуксиз: 

нап-горд йырсиез питырес 

бамыз котыр пуштырскыса 

ваське, синкаш бордаз мертчиськыса, 

азвесь угы ошиське 

- пичи чилясь изэн (куинетӥ 

син выллем). Полыс кадь кузь 

но шонер, ӝужыт сапегъёсы 

чуртнам пыдъёсыз, тодмотэм 

этимологиен корт агрегатъёс 

выллем, шорад урдӥсько. 

Ух, кыӵе кышномурт! Яратон 

пучыяськыса ӧз вутты - нылмурт 

Арсений мында юыны ӧз 

чида уго, ӵукна дораз бертӥз. 

Сеня ке, нокыӵе кариськытэк, 

ӝытозь интыяз пукиз, собере 

уйлы кылиз на. Ну, трос вал 

сыӵе нылокъёс. Соосты буйгатъян 

понна со басьтэ вал: 

вордӥськонэ - капчи шӧмо ӵуж 

яке горд коктейль, пуксёнэ - 

мартини бианко, вирнуналэ 

- мартини россо, покчиарняе - 

емышен ликёр, удмуртарняе - 

текила, кӧснуналэ - дунву виски, 

арнянуналэ - коньяк. Тае 

тодӥсь нылъёс нимысьтыз нуналъёсы 

ветлылӥзы. 

Тӥледлы та выллем учыр 

тупаз ке, луоды тӥ, шуом, ӵап 

таӵе барын, но палэнын пукись 

пиёк-эстет вӧзады бокалэн 

я чаркаен матэктоз - эн 

оске солы! 

Тросэз та улонын ваньзэ 

валаны тыршо: озьы каньылгес, 

кожало. Эн дыртэ, мусоосы. 

Кельтэ пичияк инты 

омырвӧтлы. Йырсазьды ачиз 

утчалоз валэктонъёс. Сое но 

сюдыны кулэ, ялан абсент 

гинэ уд юы, озьы ук? Арсенийлы 

но сюриз йыр висён. Таӵе 

вал со возьмамтэ пумиськон. 

Нимыз вал Таня. Кышное 

но Таня вал, соин тодам кылиз… 

Таня пыриз возьдаськыса, 

бадӟым шубаен - ӧс куспы ик 

ӧз тэры. Калыкез тачак, ваньзы 

луньыр-ланьыр ветло, зырасько. 

Арсенийлы, конечно, 

одно солы юрттоно вал! Юрттыны 

со усточи. Кылиз-усьтӥз 

нылашез - нош отын бубыли. 

- Юртты мыным, - шуэ. - 

Бубыли луэме уг поты. 

- Кызьы юрттом? - паймиз 

Арсений. 

- Официантка мон. Туннэ 

спецобслуживание, юромо 

ужаны потӥ. Бубыли кадь 

дӥсяськыны косӥзы. Бурдъёс 

ошизы тани. Уг поты бубыли 

луэме! Шоу лэсьтэме уг пот. 

Мон со мон. 

- Бурддэ кылём шат? - абдраз 

Арсений. 

- Кызьы кылёд на? Со малпанад 

лопырскемын ук! Тон 

монэ бубыли кожад, бер ни табере. 

- Ӧй, ӧй кожа мон тонэ бубыли, 

нылаш кожай. 

- Я, тырмоз. Астэ эн алда. 

- Кытчы лопыр… мынӥськод? 

- Кош азьысьтым! Гонтэм. 

Кутӥз но шуак тэргаз Сеняез. 

Соиз, мазэ-созэ валатэк, 

ӝожомиз, урмиз, отчы-татчы 

жӧлмаса ветлэ. Ӝытбыт Таняез 

чаклаз, ӧтьылӥз, юалляз: 

- Малы тон улляд монэ? 

Малы озьы вераськид? 

Таня шораз кырмышъятэк 

учке: 

- Мар ке куриськоды? Юон 

ваём-а? 

- Эй! 

- «Эй» нимо юонмы ӧвӧл. Но 

мон барменлэсь юало, оло, мар 

ке пӧрмытоз. Яке мае ке мукетсэ 

быръёды? Джин, ром… Абсент 

ӝуатыны быгатӥськом. 

- Абсент, абсент. Чалякгес 

вай. 

Таня Сеня доры куинь 

пол лыктэ. Куинь полаз ик 

пӧртэм буёлозэ вае: гордзэ, 

вожзэ, сьӧдзэ. Сеня юэ гинэ, 

Таня лобӟе… Сеня выльысь 

мар ке бӧтьыртэ - вӧлдэт 

улысен ини. 

Ми собере гинэ тодӥм: со бубыли 

бурдъёс узыр юисьёсты 

гочатыны, соосын шудыны 

малпамын вал. Барлэн кузёез 

озьы тупатэм: вермутъёс но 

ликёръёс сяна, дуно тылву но 

ӟеч мед вузаськоз, пе. Арсений 

но нылашъёслы пӧртэм юонъёс 

мед октоз, пе, акыльтӥз ини, 

пе, огдышем юон расписаниеныз. 

Валантэм луиз, кин кинэ 

алда. Сеня но эрекчи луиз. 

Дунтэм сур но тужгес уродос 

водка октыны ӧдъяз. Шузимиз 

адями. Ваньмыз Таняен 

йырин. Таня котькуд нунал 

ӧз ужалля, ас мылкыдызъя 

бырйылӥз: юромо но вакытаз 

уд кемды. Арсений лыктэ - 

Таня лобӟыса кошкемын. Мар 

бен, нылъёс трос, соосты сектаны 

луэ. Но ведь Таня ачиз 

секта! Сотэк ортчись уйёсы 

Арсений супыляк кудӟылӥз, 

сур но водка тыметэ зымылӥз. 

- Эмъяно та адямиез, - 

куалектӥз Азат Фазилевич, 

барлэн кузёез. - Эмъяно, ато ке 

воксё юэмысь дугдӥз ини! 

Юыны усточи вал Арсений. 

Эшшо огез устолыкез быриз. 

Хе-хе. 

Та мадёнэз пеляды поныкуды, 

юанды кылдӥз, дыр, 

зэм-а вал со Арсений, ӧй-а 

малпа мон та адямиез? Но 

ведь мон тӥлед верай ни: 

визьмын гинэ улыны уг яра, 

омырвӧтлы но инты кельтоно. 

Арсений кадь адямиос вань, 

вань та дунне вылын. Куло 

но выльысь вордӥсько. Толон 

гинэ - серем-а, ӝожмыт-а? - 

адӟылӥ со выллем егит пиёкез. 

Озьы ик бар дурын пуке, 

синзэ кыньыръя. Кытысь соос, 

сыӵе Арсенийёс? Инмар соосты, 

инкуазьын баланс мед 

луоз шуыса, оген-оген музъем 

вылэ келялля. Кызьы соос 

уло? Кытысь абсент юыны 

уксё шедьто? Эшшо ке кызьы 

сомында абсент ӟузьылэм бере 

улэп кылё? Тӥледлы но суредам 

учыр тупаз ке, луоды тӥ, 

шуом, ӵап таӵе барын, но етӥз 

пиёк, абсент гажась синпӧет, 

чарка бӧрсьы чарка кысказ ке 

- эн оске солы. Со улэп луыны 

уг быгаты. Со, зэм но, кулӥз 

ни, дыр, абсентын тямыстон 

градус уго. 

Арсений но кемалась 

лобӟемын: Инмар сое берен ас 

эксэйлыказ басьтӥз. Мынам 

улонам огпол но абсент веръяме 

ӧвӧл. Тылвуослы оскон 

вань шат? Йӧл вылын пӧзьтэм 

пыш гинэ юисько. Соин али ке 

но улэп - Арсений сярысь мадиськисько. 

Йӧллы сяна, та 

дунне вылын номырлы оскыны 

уг луы. Нош абсент - со 

лобӟем муртъёслэн мӧльзы. 

Вот и мед лобалозы. Нош мон 

та пукон вылын ньыльдон ар 

пукисько ини, тау Арсенийлы, 

интызэ бушатӥз.

8 

№ 

78 (25693) 


инГОЖ 

АДӞЫТОН 

АДӞЫТОН 

Ин но му 

Дано тодосчиосты 

тодэ вайыса 

ДАРАЛИ ЛЕЛИ 

10-тӥ коньывуонэ Ижкарын 

усьтӥськиз 

венгер архитекторлэн 

Имре Маковецлэн 

«Инэз но муэз герӟаса» 

адӟытонэз (0+). Творчествоысьтыз 

адӟыны 

луэ инкуазьлэсь 

инӟыоссэ: юртъёсыз, 

писпуос сямен, инкуазьысь 

«будо». 

Имре Маковец (1935-2011) 

- венгер калыклэн огез дано 

пиез. Вордӥськиз Будапештын, 

луиз тодмо архитектор. 

Инкуазез гажась архитектор 

ужъёсаз ӵемысь улэп материалъёсты 

кутэ, кылсярысь, 

юртлэн люкетэз луыны быгатэ 

будӥсь писпу. И. Маковец 

малпамъя, котькыӵе 

коркаез котырысьтыз ландшафтэ, 

та интылы тупась 

будосэз сямен, «мерттыны» 

кулэ. И. Маковецлэн идеальной 

коркаез таӵе: инъетэз 

музъемысь будэ, липетэз инмысь 

ваське. И. Маковецез 

Венгриысь органической архитектуралэн 

кичӧлтӥсеныз 

лыдъяло. 

Шарошпатак карысь 

культура юрт - И. Маковецлэн 

одӥгез тужгес но тодмо 

ужез. U-кабъем юртэз пуктыны 

мылкыдыз ӝутскиз, 

авар могильникысь зарни е 

тэчонэз адӟемез бере (дэмдор 

шэдьтэмын вал лымшор 

Венгриын, 2-тӥ даурысь кладын). 

Мадьяр архитектор 

вашкала вакытъёсысь арберилы 

синмаське но сое выльысь 

«улӟытэ» - калык син 

азе поттэ. 

Юртэз улэп муртэ кадь 

адӟон Маковецлэн ужъёсаз 

ӵем пумиське. Будапештысь 

Фаркашретӥ черклэн пуш 

борддоръёсыз адямилэсь урдлыоссэ 

тодэ вайыто. 

Пакшысь черклэн инъетаз 

- кык вашкала S-тусо 

руна, венгер (но правенгер) 

Венгриысь архитектор И. Маковец 

аспӧртэм черкъёс кылдытъяз. 

лулчеберетлэн аспӧртэм пусэз. 

Огазеям знакъёс огкадесь 

ке но, ваче пумит луо: 

югыт но пеймыт, нылкышно 

но воргорон, небыт но чурыт. 

Черке пырон азьын кык 

кылчин интыяськемын: огез 

югыт дунне понна сюлмаське, 

мукетыз пеймытсэ чакла. 

2005-тӥ арысен 2011-тӥ 

арозь (кулытозяз) Имре Маковец 

Будапештысь Фелшё-Кристинаварош 

ёросысь 

черк проект бордын ужаз. 

Пичи дыръяз та интыын 

черклы фундамент кисьтыны 

вуттӥллям, но Кыкетӥ 

дунне ож кутскемен, храмез 

ӝутон куспетӥ луэм. Черкез 

йылпумъяны учыр тупаз: 

вуж чертёжъёс шедизы. 

И. Маковец трос пол вошъяз, 

выльдылӥз нырысетӥ 

суредъёссэ: вань ужъёссэ со 

киын суредалляз, векчи детальёсты 

рос-прос валэкъяз. 

Иже вуэм адӟытонысь 

адӟыны луоз Имре Маковецлэсь 

суредъёссэ, чертёжъёссэ 

но макетъёссэ. Со яратэ вал 

тодмотэм дыръёслэсь тусъёссэс 

утчаны, «тазьы луыны 

быгатысал» нимо дуннеез син 

азяз пуктылыны. Суредъёсаз 

архитектурной элемент интые 

инкуазьысь люкетъёс пуксё. 

Быгылес пучыос, усьтӥськись 

куаръёс, сяськаос инкуазьлэсь 

кылдытон кужымзэ шараяло. 

«Инэз но муэз герӟаса» выставка 

кыстӥськоз 4-тӥ шуркынмонозь. 

Адӟытон интыяськемын 

Ижкарысь «Галерея» 

юртлэн выль залаз: Пушкинской 

урамын, Суредасьёслэн 

элькун огазеяськонзылэн 

азьвыл залазы. Выставка 

радъямын, Москваысь Венгер 

лулчеберетъя центр, Венгриысь 

суредаськон академия, 

Венгрилэн Казаньысь консульствоез 

юрттэмен. 

Виктория КРАМОВА 

11-тӥ коньывуонэ Удмурт 

театрын ортчиз 

«Удмурт кылосбурез 

азинтӥсьёс» 

адӟытон. Сое радъяз 

Йӧскалык библиотека. 

Выставка сӥземын вал 

Удмуртиысь дано тодосчиослэн, 

наукая докторъёслэн 

Иван Васильевич Таракановлэн 

но Геннадий 

Афанасьевич Ушаковлэн 

юбилейёссылы. Иван Васильевичлы 

таяз арын 90 

арес, Геннадий Афанасьевичлы 

80 арес тырмысалыз. 

Адӟытон тодматӥз тодосчиослэн 

книгаосынызы. 

И. Тараканов кема аръёс 

ӵоже эскериз удмурт кыллэсь 

лексиказэ, фонетиказэ, 

пунктуацизэ, гожтӥз 

трос тодослыко ужъёс, дасяз 

удмурт кылын шонер 

гожъяськонъя кыллюкам. 

Г. Ушаков кылтодосэ озьы 

ик бадӟым пытьы кельтӥз 

- ӵошатӥз удмурт но ӟуч 

кылъёслэсь грамматикаоссэс, 

поттӥз удмурт но ӟуч 

кылъёсты дышетонъя пособиос, 

школаын дышетскисьёслы 

удмурт литературая 

учебникъёс но хрестоматиос 

дасян бордын 

ужаз. 

Озьы ик Удмурт театрын 

ортчиз «Традиции 

и новации в филологическом 

и этнокультурном 

образовании в условиях 

межъязыковой коммуникации» 

4-тӥез калыккуспо 

форум. 

КЫЛПУМЫСЬ 

Чылкытатскон сярысь 

Мария ВЕКШИНА 

Фин-эстон гожъяськисьлэн 

Софи Оксаненлэн 

«Очищение» 

(18+) романаз (поттэмын 

2008-тӥ арын) 

одӥг коркан пумисько 

туала но совето вакытъёс, 

ӟуч но эстон 

сямъёс - Зара нылмурт 

но Алиде кышномурт. 

Нырысь ик верам потэ 

ачиз авторез сярысь. Софилэн 

вирсэръёстӥз ветлэ 

фин но эстон вир: анаез 

- эстон, атаез - фин. 

Соин ик, Финляндиын 

улыса, гужемлы быдэ со 

Эстониын ӵужанаез дорын 

кунояськылӥз совето 

власть кузёяськон вакытэ 

ай. Нылмуртлэн 

сюлэмаз мур пыӵаллям 

эстон калыклэн со вакытысь 

курадӟонъёсыз - лек 

кивалтӥсьёс, малпанъёссэс 

шараяны кышкась адямиос, 

Сибире келям эстонъёс… 

Алиде совето вакытэ 

трос курадӟонъёс пыр потэмын, 

нош Зара - туала 

улонлэн кӧаз сюремын, со 

«уй бубыли». Алиделэн ас 

вакытаз Сибирь пала келям 

апаезлэн нылыз луэ. Зара 

Владивосток палась Европае 

ӵужапайзэ утчаны вуэ. 

Та 2 адямиослэн туж трос 

сьӧлыкъёссы. Зара, сутенёрез 

дорысь пегӟыкуз, адямиез 

вие. Нош Алиде апаезлэн 

картэзлы синмаське, 

соин йырин ик апайзэ 

Сибире но келяло. Озьы 

та кышноослэн лулъёссы 

сьӧлыкъёсын но урод мылкыдъёсын 

тырмемын ни - 

соослы кулэ чылкытатскыны. 

Со сярысь вера романлэн 

нимыз но. 

Роман туж яркыт кылын 

гожтэмын, автор пыр-поч 

суреда «уй бубылиослэсь» 

улэм-вылэмзэс, совето вакытэ 

кивалтэм воргоронъёслэсь 

эрказъяськемъёссэс 

но улонлэсь мукет кышкыт 

но юрӟым палъёссэ. Со сяна, 

лыдӟисьёс быгатозы совето 

вакыт шоры эстон адямилэн 

синмыныз учкыны - со туж 

ик шудо уг адӟиськы вылэм. 

Вераны кулэ, книга потэмез 

бере ик Финляндиын 

тужгес лыдӟымонэз луиз, 

басьтӥз вань бадӟым премиосты. 


2018-тӥ ар 16-тӥ коньывуон (октябрь) 

1915-тӥ арысен 1917-тӥ арысен 1918-тӥ арысен 1918-тӥ арысен 1930-тӥ арысен 1943-тӥ арысен 1992-тӥ арысен 

Учредители: 

Государственный Совет 

Удмуртской Республики 

Правительство 

Удмуртской Республики 

Главный редактор 

З. К. Рябинина 

Адрес редакции-издателя: 

426008, г. Ижевск, 

ул. К. Маркса, 274 

www.udmdunne.ru 

e-mail: udmdunne@yandex.ru 

Газета отпечатана в АО 

«Ижевский полиграфкомбинат» 

(426039 г. Ижевск, 

ул. Воткинское шоссе, 180) 

Телефоны: 

73-33-42, 89511953765 - приёмная, реклама, 

зам. гл. редактора 

73-33-46 - отв. секретарь 

73-33-43, 89511953766 - корреспонденты 

Индексы: П 5806, П 5001 

Тираж номера 1000 

Заказ № 513 

Объём 2 п. л. 

Цена свободная 

Подписано к печати - 18.00 

По графику - 18.00 

Мнение авторов не всегда совпадает с 

мнением редакции 

Использование материалов допускается 

только с разрешения редакции 

Материалы, публикуемые с пометкой 

«Д» и «Реклама», печатаются на договорной 

основе. 

Газета зарегистрирована Управлением 

Федеральной службы по надзору в сфере 

связи, информационных технологий и 

массовых коммуникаций по Удмуртской 

Республике 

Регистрационный номер 

ПИ №ТУ18-00646 

Рекомендовано для чтения с 18 лет

ud#78 (25693)

Create successful ePaper yourself

Delete template?

Save as template?