ud#94 (25709)

№ 94 (25709)
10 2018-тӥ ар 13-тӥ толсур ТӦР ШОРЫН ТӦР ШОРЫН
Ачиз сямен
№ 94 (25709) 15
2018-тӥ ар 13-тӥ толсур
КЫЛБУР СУЗЬЕТ
Куаръёсы - куараосы
Анастасия ШУМИЛОВА
Удмурт поэзиын Татьяна
ЧЕРНОВАЛЭН
кылбуретэз нимысьтыз
инты басьтэ: кема аръёс
ӵоже со лыдӟисьёссэ кыске
выжыкыллы тупась
ямлы (чебер) кылбур
дуннеяз. 15-тӥ толсуре
тодмо удмурт кылбурчи,
Россиысь Писательёслэн
но Журналистъёслэн
огазеяськонъёссылэн
ёзчизы, Удмурт Элькунысь
лулчеберет удысысь
дано ужась 65 арес
тырмонзэ пусъе.
Т. Чернова.
- Берло гожтэм кылбуръёстэс
лыдӟыса, малпанэ
кылдӥз, соос «Тыныд тодмотэм
кырӟанэ» нырысетӥ
кылбур бичетысьтыды
кылбуръёслы туж матын
луо шуыса.
- Пересен пиналэн одӥг
кадь, шуо, пинал дуннее берытсконо,
вылды. Монэ весь
романтик нимало вал, но кудог
дыръя со романтической
гожъямъёсы серемесгес пото
ини аслым. Соин пайми вал,
куке тодосчи Анна Измайлова-Зуева
«Мир женской души»
книгаын нырысьсэ гожтӥз,
мон лирико-драматической
поэт шуыса. Алла Кузнецова
кылбурчи куке но радио пыр
вераз вал: Т. Черновалэн, пе,
туж паськыт тематикаез. «Та
шундыё дуннеямы» кыкетӥ бичетме
чаклано ке, отын зэм но
трос пӧртэм темалы сӥзем кылбуръёс.
«Советской Удмуртия»
газетын ужакум, кылбуретэ
паськытаз. Куд-ог дыръя газет
поэтъёслы заказ сётэ вал кылбур
гожтыны кыӵе ке праздниклы,
шуом. Тодӥсько на, Гай
Сабитовез Выль арлы сӥзем
кылбур гожтыны курим. Мон
соку юри квартираяз ветлӥ,
нош со гожтымтэ. Куремъя-косэмъя
гожтыны секыт ик. Печать
юртэ берытсконъям ачим
гожтоно луи. Газетын ужакум,
дуннеын югдур кӧшкемыт вал
- холодная война мынӥз. Со но
чуръёсам пыриз.
Пумен яратон вылэ выльысен
выжи. Александр Шкляев
тодосчи берло кылбуръёсысьтым
психологизмзэ пусйиз.
Егит дыр.
Таӵе арескын яратон сярысь
возьытгес ини гожъяськыны
кадь. Николай Байтеряков
шуиз вал кылбураз: «Арлыдъя
пурысьтам йырыныд возьытгес
уйвӧтын улыны…» Туж
шонер пото та чуръёсыз. Тани
берло кылбурам гожтӥсько:
«Мон бырттысал йырам
фата...» Таӵе арескын фата сярысь
гожъяны кепырано, со
лирической геройлэн малпанъёсыз
луо ке но. Йырын оломае
но бергатӥськод ук, кылбурын
оломар но кылдытӥськод, пинал
кариськыса - со но уйвӧтан.
Куддыр укыргес но потэ аслым.
Сыӵе эйфориын кадь
улон зэмос дуннелэсь палэнтэ
но люкетэ .
- Со уродэзлэсь уг утьы
шат?
- Уте но, дыр, огласянь, куке
аслыд ачид кылдытӥськод дунне,
пурысь улонлэсь пегӟыса.
Мамаеным 6 ар ӵоже утиськыса
улӥсько ини, ваньмыз
одӥг выллем. Мон аслым дунне
кылдытӥсько но, отын мыным
умой. «Пилемъёслэсь корка
мон пӧрмытӥ…» - та кылбурам
со туж умой адӟиське. Озьы
кылбураса, уродэзлэсь утиськиськод,
но со уйвӧтан зэмос
улонысь ужез но ӝегатэ. Усем
мылкыд Библиын сьӧлыкъёс
пӧлы пыртэмын ук - со ӵапак
вӧтаса улон луэ.
- Уйвӧтан дуннелэсь
палэнтӥськоно ке, мар сярысь
соку гожъяськоно?
- Кышномуртлэн, зэм ик,
нырысь интыын - мылкыд,
шӧдонъёс, яратон. Но яратон
но пӧртэм пумо луыны быгатэ.
Семьядэ, нылпиостэ, шаердэ,
дордэ яратон котькинлэн сюлмаз
вань. Пушкад вань ке адямилы,
дуннелы синмаськон,
кылбуръёс капчиен кылдо. Зэмос
лириклэн паськыт яратонэз.
Адями трос ке адӟемын,
калык ке сое гажа, солэн кыдёкегес
учконэз луэ. Ас понназ
улӥсь, корказ ватӥськись адямилэн
дуннеез сюбеггес, огшорыгес.
Тани Николай Байтеряковез
ик малпано ке, со война
пыр потэмын, трос курадӟонэз
адӟемын, но солэн дунне
шӧдонэз паськытгес со понна.
Байтеряковлэн чуръёсыз тодэ
лыкто:
Мынам вакытэ тудвуэн
пуромиз,
Вирен-а сое, пероен-а
гожтод?
Оло, берлогес вордӥськем
адями
Солы зэм дунъет сётыны
быгатоз…
- Михаил Федотовлэсь но
кылбуръёссэ лыдӟыса, паймоно
мурдалаезлы, зэмос поэт луэмезлы.
Тросэзлэн удмурт поэтъёслэн
кылбуръёсазы инверсия
ӵем пумиськылэ, нош
М. Федотовлэн тросаз ужъёсаз
глагольной рифмовка.
Малпан вань: сыӵе рифмовкаен
кылбуръёс лябесь, но удмурт
кыллэсь катъёссэ учконо
ке, соос шонересь ук. Кин вералоз,
М. Федотовлэн кылбуръёсыз
лябесь шуыса? Кылбуретын
аслэсьтыд куарадэ шедьтыны
капчи ӧвӧл. Пӧртэм удмурт
кылбурчиослэсь одӥг темая
кылбуръёсысьтызы быдэн
строфазэс басьтыса, соосты огазе
карид ке, кылбур пӧрмоз. Со
умойтэм тодмет. Нош лыдӟоно
ке Анатолий Леонтьевез -
кыӵе быгатыса со строфаосты
вошъя! Солэн кылбуръёсыз
лобӟисесь, солэн вань аслаз
гожъяськон манерыз. Егит
гожъяськисьёслэн совещаниязы
Флор Васильевлэн верам
кылъёсыз йырам печатласькыса
кадь кылизы. Кылбурын,
пе, 3 маиз ке луыны кулэ: поэтической
мылкыдыз, поэтической
малпанэз но поэтической
образэз. Кылъёсты огшоры
рифмовать карем медаз луы
со. Огшоры пӧръяны-гожъяны
луэ, но зэмос кылбур озьы уд
пӧрмыты. Зэмосэз шуак кылдэ,
кыӵе ке йӧтскон, учкем,
шӧдон бӧрсьы зуркак луоно ке.
Со ачиз кылдэ, отысь троссэ уд
но тупаты ни. Мон ӵем радиоез
кылзӥсько но мыным потэ, тросаз
кырӟанъёсын огшоры рифмовать
карем чуръёс пумисько.
Гурез шулдыр ке, кырӟан калыке
вӧлме. Фольклорлы матын
кадь, но образъёс фольклорын
кадь муресь ӧвӧл ини. Оглом
кыӵе ке огшорыятон луэ. Мон
малпасько, кырӟанъёсты гожъяку
но, профессионализм луыны
кулэ.
- Тӥляд вал-а мукет нылкышно
кылбурасьёсын ӵошатскон
яке соослэсь адӟем
карон мылкыдды?
- Ог-огед сьӧры уйиськон
вал, бен. 1977-тӥ арын Владимир
Романов, Людмила Кутяновалэсь
«Зундэс лэсьтӥ»,
«Шампанской, мӧзмись ныл
сюлэм кадь…» кылбуръёссэ
эскерыкуз, вераз вал: та сяна,
номыр но ӧд ке гожты ни, та
кылбуръёсыд шедевръёс луыса
кылёзы… Зэм ик, кылдӥз
вал малпан: кыӵе Людаез ушъяло!
Людмила Кутяноваен нырысь
тросэз тупа вал милям.
Нырысетӥ бичетъёсмы редакцие
огдыре вёрсткае сюризы.
Лидия Перевозчикова редактор
шуиз вал: мукет дыръя,
пе, книгаостэс ӵош ум ни потталлялэ,
сураськиськом. Кылбуран
манермы нырысь мынӥз
кадь ӵош, собере Л. Кутяновалэн
мукетгес луиз, мынам
но воштӥськиз. Людмила Кутянова
стихосложениея самой
ӟечез ӧнерчимы ук, монографиез
но вань. Кылбурамез
со кадь тодӥсь-валась нокин
эскеремын ӧвӧл. «Кенеш»
журналын ужакуз, мыным верамез
но вал кылбуръёсы пумысен:
кылэн шудон сьӧры
Анаеныз но сузэръёсыныз.
уйиськыны кутскид, пе. Собере
чакласькыны тырши. Люда
мыным бадӟым эш кадь вал.
Монэ мылкыд котьку валтӥз,
нош солэн золгес вал йырыныз
малпаськыны быгатонэз.
Со ӧз потталля удалтымтэ
кылбуръёссэ, нош мынам
жаг мында кылбуръёсы, олокытчы
но сюрылэмын. Со сярысь
3-тӥ сборникам чуръёсы
но вань: «Быдтоно, дыр, вал,
сутоно, дыр, вал бурд шедьтэмзылэсь
азьло...» Куддыръя возьыт
луэ, соиз я таиз кылбуре
потэ ке. Кылтӥрлык ласянь
ӧвӧл, шара усьтӥськонлэсь кепырано.
Нош туала егитъёсты
учконо ке - соос али туж шараесь,
интимной кылбуръёс туж
вазь гожъяны кутско. Со алама
но ӧвӧл, дыр, туэ акселерация,
вазь быдэсмон мынэ. Нош
ми возьдаськиськом вал, али но
солэсь куштӥськыны уг луы,
мӧйымыса но возьыт со сярысь
гожъяны. Мукет ласянь учконо
ке, Алла Кузнецова туж шара
вал, со озьы ик шуылӥз: кулэ
шара ваньзэ вераны. Но со сямен
гожъяськыны кутскид ке,
со аслад чуръёсыд уз ни луэ.
Со тыныд уг тупа бере, аслэсьтыдзэ
ик азинтоно, ачид сямен
гожъяськоно. Чиньыысь сюпсьыса,
кылбур уд гожты. Поэт
луон улонэз ачиз радъя. Алла
Кузнецова быдэсак пуштросызъя
кылбурчи вал, Людмила
Кутянова но.
- Татьяна Чернова но...
- Егит дыръям мон ӵем
вуылӥ егит критикъёслэн но
гожъяськисьёслэн семинаръёсазы.
Москваын огаз семинарын,
кылбуръёсылэсь подстрочникъёссэ
лыдӟыса, егит
писательёс монэ быдтыса
куштӥзы. Йырме ошыса пукисько
но, одӥгез кивалтӥсьмы,
Владимир Соколов писатель,
шуиз: асьме азьын зэмос поэт
пуке. Соку пельпум вылысьтым
изэз куштӥзы кадь. 1988-
тӥ арын, удмурт литературалэсь
100 ар тырмонзэ пусйыку,
Москваын монэ кутӥзы Россиысь
Писательёслэн союзазы.
Соку одӥгез писатель шуэм
удмуртъёслы: ӟечокъёс, умой
ныл будэтӥллямды. Кылбуръёсыя
сыӵе мылкыдыз кылдэм.
- Тӥляд та дырлы 3 бичетты
потэмын, котькудӥзлэн
нимыз 3 кыллэсь
пӧрмытэмын. Отысь кыӵе
ке пуштрос утчано-а?
- Куинен луэм, о-о. Юри
озьы быръемын ӧй вал. Куинез
ик «Т» букваысен кутске
на, соиз «Татьяна» нимыя. Берло
печатланы дасям бичетэ 2
Бадӟымез нылыз - Настя - семьяеныз
Румыниын улэ.
кыллэсь луыны кулэ вал - «Чагыр
тылы». Кин ке но шуиз,
«Т» букваен уг кутскы ук, нош
мон шуисько, со понна «Ч» букваез
вань - Чернова Татьяна.
Со бичетэ таки ӧз поты, издательствоын
ачим бабытӥ.
Отчы бичетъёсысьтым быръем
но берло гожтэм кылбуръёсы
пырыны кулэ вал. Выльысен
куд-огзэ утялтӥсько,
мукетъёссэ ватсасько на. Но
али мамаелы туж трос кужым
сётӥсько, мед гинэ солы умой
луоз. Бадӟым ужпуме но вань -
мамаелэсь гожъямъёссэ поттоно,
солэн трос ужъёсыз: нылпиослы
кылбуръёсыз, лирикаез,
тодэ ваёнъёсыз. Тросэз ышылэмын
ини. Мамаелы 91 арес. Со
кема аръёс ӵоже библиотекаын
ужаз, котьку калык пӧлын
вал. Дышетскемез 7 класс гинэ
ке но, туж визьмо, лыдӟиськем
адями, общественной ужен выриз.
Нылпиосыз 6 кузя вал, со
шӧдылӥз, соослы саклыкез уг
тырмы вал шуыса. Али янгыше
ассэ уськытэ, нылпиосыз сярысь
юано ке, котьку вера: ноку
но дыры ӧй вал…
Поэт луон - астэ курадӟытон,
огласянь. Тае адӟыса
но, семьяямы озьы ик со
сюрестӥ мынӥськом. Мон
но егитгес вакытам котьку
калык пӧлын вал. Улонмес
сӥзиськом гожъяськонлы,
асьме сярысь малпаськытэк,
узырлык сьӧры уйиськытэк,
лулпуш дуннеын улыса. Та сярысь
чуръёсы но вань: «Музъем
выл шумпотонэн чик уг
улӥськы вылэм…». Мылкыд
али вань на, гожъяськем потэ,
Литератураын аслэсьтыдзэ ик азинтоно,
ачид сямен гожъяськоно. Чиньыысь
сюпсьыса, кылбур уд
гожты. Поэт луон улонэз ачиз радъя.
но дыр ӧвӧл. Нырысь интые
мукет ужпум потэ - котырад
ваньмыз мед умой но ӝикыт
луоз. Сьӧд ужлэсь киы мынам
уг ваньмылы. Поэт луыны
секыт, поэтэн улыны но секыт,
дыр, со йӧспӧртэм адями.
Мылкыд валтэ ке, номыр кулэ
ӧвӧл ни. Мар кельше вал тыныд
та вакытэ, отчы зымиськод,
нош мар кулэ вал лэсьтыны
- сое уд лэсьтӥськы. Озьы
аслэсьтыд улондэ секыт кариськод,
котырыд куашка.
- Алёна (Дарали Лели)
нылдылэн гожъяськыны
кутскемез бере кыӵе мылкыдды
вал?
- Ма, пырак кӧкыысен ачим
озьы будэтӥ бере… Кылэз
шӧдыны дышетӥ. Весь книга
лыдӟылӥ солы: нырысь пичи
кылбуръёс, собере, 4-5 аресъем
дыръяз - Буратино, Незнайка
сярысь, Гулливер дорозь но
вуим. Алёналы Александр Волковлэсь
«Волшебник Изумрудного
города» книгазэ басьтэмме
тодам вайисько: уксё тырмыт
ӧй вал, котыръяськи-малпаськи
но, озьы ке но басьтӥ. Школае
мынэмез бере солы «Букварь»
тунсыко уг ни поты вал.
12 аресказ Маргарет Митчеллэсь
«Унесённые ветром» книгазэ
кузьмай - таӵе ӟеч кузьыме
мынам ӧй на вал, шуиз. Книгаослы
луыса но фантазиез узырмиз.
Пичи дыръяз телевизортӥ
кыӵе ке но сериал возьмато
вал - сое азинтон но малпалляз.
Куддыр ачим но паймисько:
гуртын ӧз буды ке но, кыӵе
гинэ шер кутӥськылӥсь удмурт
кылъёсты уг тоды! Удмурт
литератураез но лыдӟемез
юрттӥз, дыр. Куке но со вераз
вал: улонам самой умой пӧрме
гожъяськон.
- Нош тӥ пичи дыръяды
кыӵе книгаосты лыдӟылӥды?
- Лыдӟиськон дуннее Самуил
Маршаклэн книгаез бордысен
кутскиз. «Кошка старая
жива, уж такая домоседка...»
Коӵышмы, со книга но анаелэн
лыдӟемез - асме шӧдыны
кутскон вакытысь огез яркыт
суред - али но син азям пуксё.
Букваосыз тодманы кутскеме
бере яратоно книгаосы
луизы Г. Ходыревлэн «Кызьы
мон будӥ», А. Белоноговлэн
«Ческыт шыд» но А. Клабуковлэн
«Тынад пичи эшед».
Нырысетӥ классын умой дышетскеме
понна Е. Шварцлэсь
«Первоклассница» книгазэ
кузьмазы. Анае библиотекаын
ужаз, отын трос вал
удмурт кылэ берыктэм книгаос.
Мыным удалтӥз: библиотекаысь
быдэс ӟыгыртэт книгаосын
бертӥсько вал. Анае
но гожъяськон мылкыдме
гомӟытӥз.
Алёна нылыныз Ижын.
Татьяна ЧЕРНОВА
Кӧня вань веран кылъёс но
Кӧня вань куараосы,
Бичасал зарни чуръёс но
Сузьйысал вож куаръёсы.
Кеськысал быдэс дунне
тыр:
- Мон тонэ яратӥсько!
Тыршеме юнме гинэ, дыр,
Тон уд кылы - тодӥсько.
Куаръёсы тӧлъя-буръя но
Куаратэк шильыртозы.
Яке ӝож кырӟан гуръя но
Пель сьӧрад шыпыртозы.
Кеськысал быдэс дунне
тыр:
- Тон одӥг - вань ултозям!
Куарае потэ лябгес, дыр,
Со ӝока... ас лул пушкам.
Тӥнь соин ик, тӥнь соин ик
Уг но вырӟыло куаръёс,
Куасьмыло, дыр,
тулысэн ик,
Кынтыло кезьыт зоръёс.
Со понна ик, со понна ик
Лыз инбам но кӧсэктэ.
Мӧзмонэд но туж кема ук
Вӧсь яра вылын эктэ.
* * *
Тау тыныд сӥзьыл понна,
Мыкырес бадьпуослэн
Тулкымъя веттаськыса,
Ву вылэз зарнияса -
Тон но мон - асьме сярысь
Суредаськемзы понна.
Мон отчы ке учкисько,
Синпӧртмам кадь
адӟисько:
Чильпырась куаръёс пыртӥ,
Лэчырась вайёс вистӥ -
Тон но, мон но... мон но
тон...
Синъёсмы гинэ отын:
Гожмамын но
куарсамын -
Нокинлы но адӟонтэм,
Шӧдонтэм но валантэм,
Куаръёслэсь но
висъянтэм...
Мурт синъёс но
мертчонтэм!
Бен, соин ик тау тыныд,
Зарниям гожъёсыныд
Тон усьтӥд югыт-югыт
Мыным выль улон вакыт -
Улӟыны, шулдырскыны,
Осконме бурдъятыны.
* * *
Тӧдьы но сьӧд.
Пурысь но кырсь.
Пурысь коӵыш,
Кырыж вӧсь быж...
Улон, улон...
Шуд - муньылон.
Туннэ - ӧвӧл,
Со вал толон.
Шунды тылси
Укыр вакчи,
Векчи но ӵуж.
Тросгес - лыз бус.
Киуж «капчи» -
Кылем йылкуж.
Улон - дыг, буш...
Ачим - вог ӝуш.