ud#30 (25743)
You also want an ePaper? Increase the reach of your titles
YUMPU automatically turns print PDFs into web optimized ePapers that Google loves.
№ 30 (<strong>25743</strong>)<br />
2019-тӥ ар 23-тӥ оштолэзь 3<br />
КУЛЬТПРОСВЕТ<br />
Историез дышетоно... пыдын<br />
Шаерчи Максим Блинов Ижкаретӥ экскурсиос ортчытъя<br />
Анастасия ШУМИЛОВА<br />
Ижкарын 3-тӥ арзэ<br />
ужа культурая но историяя<br />
«Антей» клуб.<br />
Сое кылдытӥз егит<br />
экскурсовод, историк<br />
Максим Блинов.<br />
- Максим, тон Ижкарын<br />
экскурсиос ортчытъяськод.<br />
Нош ку ачид Удмуртилэн<br />
шоркареныз тунсыкъяськыны<br />
кутскид?<br />
- Мон вордски Можга ёросысь<br />
Уча черкогуртын, будӥ<br />
Можгалан. Бӧрысь семьямы<br />
Ижкаре интыяськиз. УдГУысь<br />
историяя факультетын<br />
дышетски.<br />
Одӥг пол Литвалэн шоркараз,<br />
Вильнюсэ, конференцие<br />
вуылӥ. Туж пайми, макем<br />
ӟеч соос тодо карзылэсь но<br />
кунзылэсь историзэс: университетысь<br />
тодосчиос но, студентъёс<br />
но, азбар ӵужисьёс<br />
но, руль бергатӥсьёс но. Соос<br />
карзэс ярато, историзэс гажало,<br />
соин Вильнюсэ сомында<br />
туристъёс вуыло. Мон малпай:<br />
малы Ижын озьы ӧвӧл?<br />
Вильнюсэ вуылэме бере<br />
Ижын нырысетӥ экскурсия<br />
ортчытӥ. Нырысь-валысь<br />
велосипедъёсын ветлӥм,<br />
бӧрысь пыдын поръяны кутским,<br />
али город сьӧры походъёсы<br />
но потаськом. Огазеяськонмес<br />
«Антей» клуб нимам.<br />
Антей - вашкала грек<br />
мифологиысь батыр, Геялэн,<br />
Музъем-анайлэн, пиез. Соин<br />
Геракл нюръяськиз. Со Антеез<br />
вормыны быгатӥз, куке сое<br />
ки вылаз ӝутӥз. Геракл Антеез,<br />
выжыосызлэсь, музъемлэсь<br />
люкыса, лябӟытӥз. Адямиосын<br />
но озьы ик - асьмеос<br />
выжыосмылэсь палэнскиськом<br />
ке, историмес, калыкмылэсь<br />
ортчем сюрессэ ум ке<br />
тодӥське - лябӟиськом, соку<br />
асьмемыз вормыны капчи.<br />
Ӵапак соин «Антейлэн» ужпумез<br />
- ижкаръёсты историенызы,<br />
культураенызы тодматыны.<br />
Экскурсие котькуд арнянуналэ<br />
потаськом.<br />
Ачим мон Можгалан будӥ<br />
бере, отын но экскурсиос толэзьлы<br />
огпол радъяллясько.<br />
Воткае, Брангуртэ, Шарканэ<br />
«Открывая Удмуртию»<br />
экскурсионной центрен ӵош<br />
ветлӥськом на.<br />
- Шаермы сярысь тодон-валандэ<br />
кызьы<br />
узырмытӥськод?<br />
- Мон архивъёсысь, музейёсысь<br />
документъёсын ужасько.<br />
Историкъёслэсь ужъёссэс<br />
лыдӟисько. Со сяна, Ижын<br />
улӥсь калык трос тодэ - адямиосын<br />
вераськоно гинэ.<br />
Кылсярысь, огпол экскурсия<br />
дыръя пумитамы песянаез,<br />
со Ижысь мотозаводлэн музеяз<br />
куке но ужам. Михаил<br />
Калашниковез но, Дмитрий<br />
Устиновез но тодэ вылэм.<br />
Туспуктӥз Андрей ПЕРЕВОЗЧИКОВ<br />
Экскурсиосы школьникъёс,<br />
студентъёс, егитъёс но ветло,<br />
но арлыдоос котьку тросгес<br />
луо. Кыӵе ке интые вуиськом<br />
но, мон соослэсь юасько:<br />
нош тӥ мар та инты сярысь<br />
тодӥськоды? Тодэ ваёнъёс,<br />
фактъёсын сураськыса, историез<br />
улӟыто.<br />
Алигес мон Удмуртиысь<br />
Йӧскалык музее ужаны<br />
интыяськи, Внемузейной<br />
экскурсиосъя отделэзлэн<br />
кивалтӥсез луисько. Озьы<br />
хоббие ужлы пӧрмиз, шуыны<br />
луоз. Табере ми «пуась»<br />
выставкаос радъяллялом,<br />
школаостӥ, предприятиостӥ<br />
ветлыса, презентациос ортчытъялом.<br />
- Тросэз ӝожтӥсько, Иж<br />
пурысь, мӧзмыт кар шуыса.<br />
Мар соослы шуысалыд?<br />
- Пурысь интыостэм каръёс<br />
ӧвӧл. Мукет ласянь, «шонер<br />
очки» поныса, Ижысь<br />
трос чеберзэ адӟыны луэ. Татын<br />
яркытэсь, архитектуразыя<br />
адӟымонэсь юртъёс вань.<br />
Можгалась Ижкаре выжеммы<br />
бере мон тырши та карен<br />
умой-умой тодматскыны.<br />
Монэ туж паймытӥз Ижысь<br />
ульчаослэн радъяськемзы:<br />
карлэн вуж люкетэз линейкая<br />
пуктэмын кадь, ульчаос<br />
паськытэсь но кузесь.<br />
Тросэз ижкаръёс Санкт-<br />
Петербурглы синмасько, та<br />
городъёслэн планировказы<br />
огвыллем. 19-тӥ дауре<br />
Ижын ужаз архитектор Семён<br />
Дудин - со Арсеналэз,<br />
Пыӵал тӥрлык поттон заводлэсь<br />
валтӥсь корпуссэ, Троицкой<br />
черкез но мукет адӟымон<br />
юртъёсты пуктӥз. Тодон-валанзэ<br />
С. Дудин люказ ӵапак<br />
Санкт-Петербургын. Революция<br />
бере татын Ленинградысь<br />
архитекторъёс ужазы,<br />
соос но Ижлы Питер шӧм<br />
пыртӥзы.<br />
Ижын «ӟуч стиль» но вань<br />
- Иван Чарушин архитекторлэн<br />
проектэзъя пуктэм Дунчылкыт<br />
Михаиллэн соборез.<br />
Но «ӟуч стилез» ке басьтоно,<br />
со золгес Сарапулын<br />
шӧдӥське.<br />
Карлэн тусыз озьы ик<br />
герӟаськемын музъемен.<br />
Тани Ижын вырйылъёс трос.<br />
Соин йырин Пушкинской<br />
урам туж аспӧртэмлыко -<br />
дуннеын та выллем архитектурной<br />
ансамбльёс уз сюре,<br />
дыр: Сталин вакытысь чебересь<br />
юртъёс уллане кошкись<br />
ульча кузя интыяськемын.<br />
Пыӵал тӥрлык поттон заводлэн<br />
валтӥсь корпусэз но<br />
тунсыко: классической стилен<br />
пуктэм трос ярусъем промышленной<br />
юрт Ижкарлы<br />
туж тупа. Жаляса верано, кылем<br />
арын шпилез ӝуаса усиз.<br />
С. Дудин зэмос гений вал - со<br />
юртъёссэ пуктӥз, ландшафтлэсь<br />
вань аспӧртэмлыкъёссэ<br />
лыдэ басьтыса. Кылсярысь,<br />
Советской урамтӥ - азьло со<br />
Троицкой нимаське вал - вамышъяку,<br />
валтӥсь корпус<br />
пала учконо ке, башняез туж<br />
чебер адӟиське. Нош Арсеналэз<br />
С. Дудин вуж Ижкарлэн<br />
тужгес вылӥ интыяз пуктӥз.<br />
Татын умой, ву уг пукы.<br />
Вань на мукет тунсыко<br />
интыос. Кылсярысь, Заречной<br />
шоссе сьӧрысь Осинов<br />
мыс палась вуж пристань. Со<br />
сярысь тросэз уг тодо. Отысь<br />
сюрес прудэ кошке, историкъёслэн<br />
верамзыя, азьло отӥ<br />
заводъёсысь шлакез поттазы.<br />
Туж тунсыко инты, отчы<br />
южтолэзьысен оштолэзёзь<br />
гинэ вуылыны луэ.<br />
- Мон Ульяновсклы пайми<br />
вал - отын трос юртъёс<br />
борды тодэ ваён пулъёс<br />
ошылэмын, шӧдске: татын<br />
историзэс утё. Асьмелэн<br />
со ласянь кыӵе югдур?<br />
М. Блинов Осинов мыс сярысь<br />
вера.<br />
- Асьмелэн табличкаосмы<br />
вань, но тырмыт ӧвӧл. Тодонвалан<br />
сётӥсь стендъёс, тодэ<br />
ваён пулъёс тросгес луысалзы<br />
ке, уногес адямиос Ижкарез<br />
умойгес тодысалзы. Соос<br />
ӧвӧлэн но вуж юртъёсты али<br />
быдто. Соосты кун уг утьы.<br />
Туж жаль, Бородинлэн ульчаысьтыз<br />
инженерно-технической<br />
ужасьёслэсь (ИТР)<br />
коркаоссэс алигес быдтӥзы.<br />
Та чебересь 2 этажъем коркаос<br />
М. Калашниковлэн музеез<br />
палан сыло вал. Кыӵе умой<br />
луысал та интыез музейной<br />
кварталлы пӧрмытыны. Но<br />
со сярысь нокин ӧз сюлмаськы,<br />
ӧз утьы та юртъёсты. В.<br />
Короленко нимо театрлэсь<br />
юртсэ но быдтозы: выльдыны,<br />
пе, трос уксё кошкоз. Но<br />
со архитектуралэн памятникез<br />
ук.<br />
Жаль, QR кодъёс уг ужало<br />
- соосын телефон пыр информациез<br />
учкыны луэ вал азьло.<br />
Малы ке но ужамысь соос<br />
дугдӥзы. Алигес Андрей Дерябинлэн<br />
памятникез доры<br />
вуылӥ но адӟи: QR кодэн табличка<br />
муз вылын костаське.<br />
Нош А. Дерябинлэн бюстэз<br />
- Ижкарысь одӥгез вашкалаез<br />
скульптура, солы 100<br />
арлэсь трос ини - возьматэ,<br />
гажаськомы-а асьмеос городмес.<br />
Дыр ортчемъя улон<br />
воштӥське, асьмеос индустриальной<br />
вакытысь потребительское<br />
выжим. Соин<br />
трос вуз карон интыос кылдо.<br />
Шуом, «Эльгрин» центр<br />
- мотозаводлэн юртэз, азьло<br />
отын «Иж», «Сириус» магнитофонъёс<br />
потто вал. Нош<br />
«Аксион» центрын куке но<br />
мотозаводлэн столовоез<br />
интыяськылӥз.<br />
Выль юрт пуктыку, чаклано,<br />
мар азьвыл та интыын<br />
вал. Тани Советской урамын<br />
одӥг вуз карон инты храмлэн<br />
интыяз пуктэмын. Ышем<br />
храмлэн алтарь интыяз али<br />
кофе вузало. «Океан» магазин<br />
интыын но азьло Введенской<br />
черк сылэ вал. Нош православной<br />
традициез басьтоно<br />
ке, черк куашкам бере но солэн<br />
интыяз святой дух улэ.<br />
Мынам Нижний Новгородэ<br />
вуылэме вань. Карлэн шораз<br />
куке но черк вылэм, совето<br />
вакытэ сое куашкатӥллям.<br />
Со интые пиялалэсь табличка<br />
лэсьтӥллям, со возьматэ,<br />
кыӵе тусыз вал черклэн.<br />
Адӟиське: карын улӥсьёс<br />
историзэс гажало. Асьмелы<br />
соослэсь дышетсконо вылэм.<br />
Мыным туж кельше Елабуга.<br />
Со пичи ке но, татчы<br />
трос туристъёс вуыло, угось<br />
елабугаос быгато карзэс<br />
азинтыны, историзэс утьыны.<br />
Ижкар но туристъёслы<br />
тунсыко луыны быгатысал.<br />
Со понна асьмелы кармылэсь<br />
историзэ но ог-огмес гажаны<br />
дышетсконо. Тодмотэм<br />
интыостӥ ӵемгес поръяно,<br />
музейёсы ветлоно. Мон куке<br />
но лыдъяй вал - школаосысь,<br />
предприятиосысь адӟытон<br />
сэрегъёсты лыдэ басьтыса,<br />
Ижын оглом 80 музей.<br />
- Нош маке удмуртэз<br />
Ижын вань-а?<br />
- «Удмурт» шуиськом ке,<br />
йыре лыкто Йӧскалык музей,<br />
Эшъяськон юрт но мукет<br />
та выллем интыос. Но<br />
зэмос удмуртэз, мон малпамъя,<br />
Восточной посёлокын<br />
кылемын. Отын куке<br />
но Русская Карлудка гурт<br />
вал, но отын удмуртъёс тросгес<br />
улӥзы. Шурлэн нимыз<br />
но удмурт кылъёслэсь (кар<br />
но луд) пӧрмемын. Лапег пу<br />
юртъёс, пужыё наличникъёс<br />
гурт тус кылдыто, Ижкарез<br />
аспӧртэмлыко каро. Соос медаз<br />
ышысалзы.<br />
Ижкарын оглом туж трос<br />
удмурт нимъёс, тани Иж<br />
шурлэн нимыз но удмурт,<br />
шуо. Та музъем вылын удмуртъёс<br />
но соослэн вашкала<br />
ӵыжы-выжыоссы улӥзы.<br />
Татын улэм калык Рим империен<br />
но кусыпъёс возем.<br />
Культуразы но туж тунсыко<br />
вылэм. Соин шуыны<br />
быгатӥськом: та интыын удмурт<br />
выжыос юнэсь.<br />
Озьы ке но революцилэсь<br />
азьвыл Ижкарын удмуртъёс<br />
ӧжыт вал. Заводэ дышем<br />
сямъя ӟучъёсты ужаны<br />
кутылӥзы, соин татчы вуэм<br />
удмуртъёс асьсэзыз ӟучъёс<br />
шуыса гожъязы. Тросэз озьы<br />
ӟучомизы. Революция бӧрсьы<br />
асшӧдонзы воштӥськиз ик.<br />
Мон малпасько, али Ижкарез<br />
национальной кар шуыны<br />
уз луы, угось татын трос<br />
культураос пӧлэстӥськемын.<br />
Со ласянь Ижмы Вильнюслы<br />
туж тупа.
Change language