ud#30 (25743)

ТЕАТР
4
№ 30 (25743)
2019-тӥ ар 23-тӥ оштолэзь
Шудӥсько - мыным чабо
Виолетта АНИСИМОВА
16-тӥ оштолэзе Удмурт
кун университетын
премьера ортчиз.
Егитъёслэн «Ватка»
театральной студизы
кема дасям «Дон Жуан»
спектакльзэ удмурт кылын
возьматӥз. Пьесаез
берыктӥз но пуктӥз
режиссёр Василий Ушаков.
Мон 3 ар ӵоже студие
ветлӥсько ни. Пьеса азьло
аръёсынлэсь пӧртэмгес,
малы ке шуоно бадӟым, дасяськонэз
трос. Ми, огшоры
студентъёс, сцена вылын
шудыны дышетскемын
ӧвӧл. Озьы ке но студиын
артист луон сярысь
льӧль малпанмылы матын
луиськомы.
Тани премьера нунал
вуиз! Кышкыт, сюлэм йыгаське,
йыр пушкын кин ке
лушкем сипыртэ: «Кылъёсты
гинэ вунэтоно ӧвӧл».
Премьераез эшъёсмы
но дышетӥсьёсмы учкыны
лыктӥзы, ми понна сюлмаськемзэс
ас вылам шӧдӥ.
Лыктэменызы гинэ но соос
сыӵе яратон сётӥзы! Сцена
вылэ потыса, ми но вань
яратэммес возьматыны
тыршимы, котькуд учкись
«Вау!» мед шуоз.
Туспуктӥз Софья ХОХРЯКОВА
Сцена вылэ потӥськод,
10 секунд ортче но,
шӧдӥськод - тон актёр.
Тон вань быгатонлыкъёстэ,
вань кужымдэ огазеяса,
та секундысен героедлэн
улонэныз улыны кутскиськод.
«Ватка» студиысь актёръёс но
режиссёр В. Ушаков.
Мон Клавдия Васильевнаез
шудӥ. Егит дыръяз
со актриса вал, нош али со
вунэтэмын. Табере со Дон
Жуанлэн юртъер котыраз
утялске, Дон Жуан солы
пиез кадь потэ. Рольме дасякум,
туж бадӟым шугсекытъёсын
ӧй пумиськылы,
малы ке шуоно та роль
мыным матын луиз, мон
шӧдӥ, ми героиняен огогмылы
кельшиськомы шуыса.
Аслам сямъёсы вылэ
пыкъяськыса ик, Клавдия
Васильевнаез учкисьлы
усьтыны тырши.
Шудӥсько, монэ серекъяло,
мыным чабо, мылкыд
эшшо но бурдъяське.
Кыӵе шумпотымон вылэм
адӟыны, куке тынад учкисед
пальпотыса, капчи
мылкыдын кошке. Валаськод
- тон ӟечок.
Ми, актёръёс, лэсьтӥмы
данъяськымон уж. Сое луэ
учкыны, со сярысь луэ вераськыны.
«Ватка» студилэн
историяз та эшшо одӥг
тунсыко вамыш. Со понна
Василий Серафимовичлы
бадӟым тау верано. Со котьку
ми понна анай но, атай
но.
МОНОЛОГЪЁС
Таксист. Ошак. Ӧйтӧд. А-а-а!
Ижысь «Юмок» театрысь егитъёслэн зулёнъёссы
Дмитрий Чернов
Уг яратӥськы вераськись
таксистъёсты. Ваньзылэн
одӥг веранзы: соос бизнесменъёс,
нош таксовать
каро сюлэмзы куремъя.
Ӵукна мон таксиен ужаны
мынӥсько. Йыр висе,
ымысь тыл потэ. Мон азьпалаз
пукысал ке, машиналэн
панелез шунаны
кутскысал, дыр, яке таксистлэн
вераськеменыз сэрен
йыры пуштысал. Таксистлэн
мылкыдыз умой,
шула, мар ке но вера.
«Яратӥсько ужме, нокин
уг косъяськы, ачим аслым
кузё». Мон солы пумит вазисько:
«Татын бур пала
кож».
Зэмзэ ке, мон вань адямиосты
яратӥсько.
Дарья Никитина
Улонам одӥг пол гинэ улэме
вал Горд Ошакен одӥг
юрт котырын (коркан ӧвӧл,
заметьте). Бадӟым букваысен,
малы ке шуоно семья
пушкамы солэн сыӵе официальной
нимыз вал. Одӥг
шулдыр нуналэ эшеным кенос
берын, курег лопыръяськем
бервылын, деликатес
пирожкиос пыжиськом
вал. Ми вискын потӥз та
выллем вераськон. «А пукты
син азяд, Горд Ошакты
али лэзиськоз но татчы потоз!
Кытчы пегӟомы?» - юа
эше. Мон шуисько: «Бызёмы
ӧс доры, пыромы но ворсаськомы».
Со вадес луиз син
азе пуктонтэм арбери, малы
ке шуоно со ошак чынзэ но
лэзиськем но табере, «тыгдыг,
тыг-дыг» шуыса, гурезь
бамалтӥ ми пала ваське. Эше
пегӟиз ӧс пала, нош мон - сеткалэсь
кенер доры, куалектэменым
сэрен кенер борды лякиськи
но номыр карыны уг
ни быгатӥськы. Эше дыртӥз
мыным юрттыны: бызьыса
лыктӥз, китӥм кутӥз но
ӧс доры кыскыса нуиз. Та
кузь веранлэн моралез таӵе:
вӧзады юрттыны быгатӥсь
эшъёс котьку уз луэ, соин ик,
сетка борды лякиськиды ке,
люкиське кыклы но луэ асьтэлы
эш, быгатэ юрттыны
асьтэлы асьтэос.
Софья Чузова
Мон огшоры нылаш,
вордски Шаркан палъёсын.
Отын, верало, вылтӥяськись
но дерзкой нылашкаос уло.
Мон но пӧртэм ӧвӧл. Бен, таӵе
сям урод ик ӧвӧл туала вакытэ...
«Астэ быдэсак та дуннелы
сётыны уг яра, дышетскы
адямиослэсь пытсаськыны,
ато тынэсьтыд озьы номыр
но уз кыльы», - озьы ӵемысь
вералляло матысь адямиосы.
Уггес валаськы, малы, оло,
соос малпало мон укыр шара,
оскись адями? Ӧйтӧд... ӧйтӧд,
туж ӵем ӦЙТӦД.
«Тон туж воштӥськид», -
озьы алигес вераз вуж тодмое.
Валэктӥз, калыкъя тупатскись
луи шуыса... Ыштӥд,
пе, пушкысьтыд пиштӥсь
тылдэ. Азьло весь монэ капчи
мылкыдо, ӟечезлы оскись
шуо вал, нош али? Ӧйтӧд!
Ӝожтӥськись, оло, луи? Оло,
мон будӥ? Оло со оптимизме,
вань дуннеез яратонэ вал огшоры
пинал вакыт? ӦВӦЛ!
Мон ыштӥ асме... Ми ваньмы
асьмеды ыштӥськом, но весь
талы дышиськом. Тылмес
корт киямы кысӥськом.
Дмитрий Волков
Йоп, мон purodima (юри
пичи англи букваосын
гожтӥське). Конечно, кутски
веранме, Ян Топлеслэсь
приветствизэ басьтыса,
но со лушкаськон ӧвӧл,
со отсылка. Ми «пост» вакытэ
улӥськомы ук, нош
«пост» дыр чӧлскетъёс вылын
возиське. Такс, окей,
али ачим сярысь. Мон туж
уг яратӥськы бадӟым букваосты,
соос кыӵе ке но «не
то». Соос ваньзылы ярало,
луэ малпаны, соос кыӵе ке
туж бадӟым уж лэсьто. Мыным
аслым кельшо «ь» но «ъ»
пусъёс, ма, соос бадӟым ноку
но уг луыло.
Эшшо мон туж яратӥсько
ныръёсты, со мынам сыӵе
фетише, шуом. Ныръёс
олокыӵеесь но луо. Нош
адӟисько ке мон кыӵе ке
аспӧртэмлыко нырез, со
просто «А-а-а!». Малпаське,
ныр быгатэ луыны лёго,
ӝутӥськем, йылсо - олокыӵе
но. А-а-а!