bereket №7

Бакча возисьёслы,
кибашлыослы
сӥзем газет
№30 (25942)
2022-тӥ ар 4-тӥ гудырикошкон 13
Калык чакланъёс
Гудырикошконэ ӧз зорылы
ке, кӧс но шуныт
сӥзьылэз возьмано.
________
Тыпылэн мульыез
трос ке, ар емышо луоз.
________
Адӟем карымон
Ми пукимы
веник керттыса
Писпулэн куаръёсыз
уноез ӵужесь ни ке,
сӥзьыл вазь вуоз.
________
Выль
Сӥзьыл нергеослэн
кутсконзы — Виль
(Выль нянь, Льин
день, Ильин день).
Праздниклэн нимыз
ик возьматэ: та нуналэ
выль нянь, выль бакча
но луд емышъёслэсь
сиён пыжемынпӧрамын
луоз, ӵӧж,
ӟазег яке така вандозы
(Юбера, Чежесть). Ӟег,
сезьы, йыды шепъёс,
кӧжы, кубиста куар
вайылӥзы. Ваньзэ сое
ӝӧк пуме тырылӥзы но
куяськылӥзы (Юбера,
Писэйгурт, Вылӥ
Асангурт), кулэмъёсты
буре вайылӥзы
ӝукен (Гожня, Вылӥ
Асангурт). Пӧртэм ю
тысь шепъёсты куалае
ошылӥзы (Чежесть,
Алганча-Игра),
шыдэ веттылӥзы
но мед удалтоз
шуыса вӧсяллязы
(Казакгурт).
Та нуналэ выль
пызьлэсь нянь пыжо
(Зюзино), сезьпызь
пӧзьто (Турайгурт).
Котькуд семья, куалаяз
вӧсяськем сяна,
уйлы вӧсяськыны
лудэ ветлылӥзы на.
Отчы воргоронъёс
гинэ мыно вал. Татын
соос така вандо но,
выль картошкаен шыд
пӧзьтыса, кулэмъёсты
буре ваё. Вӧсяськемзы
бере гырлыосты
жугыса но вӧсь гурез
кырӟаса берто: «Осто
но осто, ӟеч инэ-вуэ, /
Ӟеч ардэ-вапумдэ
сёт вал, Инмаре!»
(Пытцам, Карашур,
Гожня). Ильин нунал
бере ӵуказеяз араны
пото вал. Бусые мынэмлэсь
азьло азбараз
юрт кузё вӧез вӧся. Со
вӧен сюрлоез зырало,
аран ӝог но капчи мед
ортчоз шуыса (Вылӥ
Асангурт).
Дасямын В. Владыкинлэн но
С. Виноградовлэн «Удмурт
оскон» книгазыя
Егит ужбергатӥсь Иван Чернышов веникъёссэ быдэс дуннее вуза.
4-тӥ гудырикошконэ
Ижын кутскоз Россиысь
егит ужбергатӥсьёслэн
форумзы. 4 нунал ӵоже
егит ужбергатӥсьёс
понна радъямын луозы
кенешонъёс, предприятиосын
тодматсконъёс,
мастер-классъёс.
— Та выллем форумъёс
ужбергатӥсьёслы проектъёссэс
азинтыны, выль уж
борды басьтӥськыны юртто,
— шуэ Красногорск ёросысь
Васильевское гуртысь
егит ужбергатӥсь, «Дубберай»
компаниез кылдытӥсь Иван
Чернышов. Со 9 ар ӵоже ини
Удмуртиын керттэм веникъёсты
быдэс дуннее вуза. Студент
дыръяз ик йыраз таӵе
малпан кылдэм: Ижкарын
гинэ 100-лэсь ятыр мунчо, соослы
ваньмызлы веник кулэ.
Егит ужбергатӥсь гижысь-пиньысь
басьтӥськиз
та удыс борды. 2014-тӥ арын
Иван нимаз ужбергатӥсь кариськиз,
аслэсьтыз сайтсэ
кылдытӥз, ялонъёссэ Интернет-сервисъёс
пыр сётӥз. Карта
вылэ пусйылӥз, кинъёсын
кусып тупатоз, пӧртэм каръёсысь
мунчо комплексъёсы
жингыръяз. Ужзэ кутскыкуз,
Иван тодэ вал кызьпу веник
сярысь гинэ. Веникъёс ачиз
керттылӥз, со сяна, гуртоосызлэсь
басьтылӥз.
2017-тӥ арын Иван Чернышов
аслэсьтыз производствозэ
усьтӥз. Али 13
ужасьёсыз, веник куасьтон
интыосыз вӧл-вӧлэсь. Россилэн
вань улосъёсаз — Калининградысен
Владивостокозь
— тодо ини Удмуртиысь
веникъёсты. Со сяна, соос 19
кунъёсы кошко.
Али «Дубберайын» веник
кертто кызьпу, тыпы, горд
тыпы, бадяр, сусыпу, ньылпу,
беризь, эвкалипт вайёслэсь.
Эвкалиптэз но горд тыпыез
Краснодар крайысь басьто,
тыпыез — Киров улосысь. Кудог
веникъёсы ческыт зыно
Али «Дубберайын» веник кертто кызьпу,
тыпы, горд тыпы, бадяр, сусыпу, ньылпу, беризь,
эвкалипт вайёслэсь.
бутник но пыштурын ватсало.
Куд-огъёсыз веникъёс воксё
сяська керттэтлы укшало
— кызьпу вайёс пӧлын тузь
сяськаос но яркыт бирды кадь
инӟысяськаос тыремын. Калыклы
озьы ик кельшо пушнерен,
курытпотэн (полынь), нюртуген
(багульник), виртурынэн
(зверобой), тӧдьысяськаен (ромашка)
веникъёс.
«Дубберай» компаниын
капчи мылкыдын ужало, соин
ик веникъёссы устоесь, лӧблӧбесь
пӧрмо. Нунал ӵоже
шорлыдын одӥг ужась ог
50-100 веник пӧрмытэ. Егит
кивалтӥсьсы нокыӵе ужлэсь
уг кышка, ваньзэ эскерыны
тырше, уж трос ке, уйин но
ужаны дась. Со шуэ: «Бизнес
— мон понна уж но, хобби но,
улон но».
Кылем ар ӵоже «Дубберай»
компания 365 сюрс веник
вузаз. Красногорск ёросысь
улӥсьёс шумпото, дӥнязы
таӵе компания кылдӥз шуыса.
Угось Иван Чернышовлы луыса
ужан интыос усьтӥськизы.
Ужбергатӥсез вылӥ дунъя Удмуртилэн
Тӧроез Александр
Бречалов но — кузьымъёслы
«Дубберай» компанилэсь веникъёссэ
басьтэ.
________
Людмила ЧЕРНОВА
dubberai.ru

№30 (25942)
14 2022-тӥ ар 4-тӥ гудырикошкон САД-БАКЧА
Толэзь пус
Йод, сылал но мукетыз...
Август — бакча емыш
бичан толэзь. Но кудыосты
тырмытон вискын
мар сярысь вунэтоно
ӧвӧл?
• Трос аръем сяськаослэсь
— примулаослэсь, флоксыослэсь,
пионъёслэсь,
лилиослэсь но мукетъёсызлэсь
— выжыоссэс
люкылыны, выль интые
мерттыны луоз. Одӥг аръем
сяськаослэсь кидыссэс
бичаны эн вунэтэ — быръе
тужгес чебер усьтӥськем
сяськаослэсь. Бичам бере
кидысъёсты умой-умой
куасьтоно но бумагалэсь
пакетъёсы тыроно.
• Помидор удъёсты сьӧдэктонлэсь
— фитофтора
басьтонлэсь — утёно.
Хими суретъёсты кутыны
али уг яра ни. Юрттыны
быгатоз йод — 10 литр
вуын 10 миллилитрзэ суралтоно,
соин помидор
удъёсты котькуд 3 нуналлы
быдэ пазяно. Кутыны
луоз «Фитоспоринэз» но —
тазэ котькуд 10 нуналлы
одӥг пол пазяса тырмоз.
• Перец удъёсты, кияр
удъёсты сямен ик, утёно
сисьмонлэсь. Пурысь,
тӧдьы пурысьтам интыоссэс
кӧс яке марганцовка
вуэ коттылэм басмаен
ӵушалтоно но пенен
пазьгоно.
• Сугон йыръёсты сюйысь
поттоно, убо борды
выжыенызы гинэ кырмиськыса
мед пукозы на.
Кисьтано сылал вуэн — 10
литр вулы 1 стакан сылал.
Юалэ — валэктом
Быгыльскемез
мед будоз
Кияртэк кылё шуыса
кышкасько. Пудъёсыз вылын
емышъёсыз быгыльско, но малы
ке уг будо.
Ирина К.
Иж город.
Валэктэ гурт удыс наукаосъя
доктор Александр
Фёдоров
Талэн мугъёсыз кӧня
ке пӧртэм луыны быгатозы:
ӧжыт ву сюре, мултэс
ву кисьтаськоды... Пӧсь куазен
кияръёс вылэ нуналлы
быдэ шуныт ву кисьтано,
умойгес луоз ӝыт,
котькуд удлы ог 5 литр
мында. Теплицаын ӝокыт
ке, быгыльскем кияръёс
Куазь 20 градус салкым луыны кутскиз ке,
перецез шобыръяны кулэ луоз ни — сотэк со будэмысь дугдоз.
• Кубистаез но мукет бакча
емышъёсты сиисьёс пумит
али «Фитоверм» препаратэз
гинэ кутыны луоз.
будытэк ик усьыны быгатозы
— убоос медаз ӟырдалэ шуыса,
мульчаен шобыртоно.
Кияръёс уг будо, кальций
уг тырмы ке. Шӧдӥды
ке, быгыльскем емышъёс
ӵужектыса усё — соку ик
кисьталэ, кальциевой селитраез
вуэн суралтыса.
Зэмзэ вераса, кияр удъёс
туж ярато котыраз бергамез.
Котькуд 10 нуналлы
быдэ соосты «ческыт сиёнэн»
шумпоттоно. Мон,
кылсярысь, турын-куарез
вуэн кисьтӥсько, «Карбомид»
ватсасько но ог 2 арня
ӵоже пытсаса пукетӥсько —
та куспын со чырса. Соин
кисьтасько ке, кияр удъёс
шумпото, монэ но емышенызы
шумпотто! Емыш
• Емышлэсь бушам сутэр,
гоносутэр (крыжовник)
пудъёс соку ик
дасяськыны кутско вуоно
арлы — соослэн али
выжызы юнма, кулэясько
минерал суретъёслы:
суперфосфатлы но
калийлы. Горд сутэрлы
но гоносутэрлы
1 бадӟым пуньы суперфосфат
но 2 бадӟым пуньы
калий, нош сьӧд сутэрлы
2 бадӟым пуньы
суперфосфат но 1 бадӟым
пуньы калий кулэ луоз.
Умой луоз, соосты вуэн
суралтыса кисьтаны.
Чаклалэ, пудъёсын ӧвӧл-а
бинялтӥськем, уродмем
куаръёсыз, нымыкибы
каръёсыз вань ке,
соосты бичано, сутоно.
• Узыен убодэс паськытатыны
малпаськоды ке, али
ӵапак вакытэз — «мыйыкъёс»
тол вуытозь умойумой
выжыяськыса вуттозы.
Емыш сётэм узы удъёс
сярысь но вунэтоно ӧвӧл
— али соосты макем умой
утялтоды, сокем ӟеч урожай
басьтоды вуоно арын.
Соос туж шумпотозы суперфосфатлы
(котькуд
квадрат метрлы 20 грамм)
но калийлэн сульфатэзлы
(котькуд квадрат метрлы
10-15 грамм). Висёнъёс
медаз алялэ шуыса, кудог
сад-бакча возисьёс узы
пудъёссэс ӵышкыло. Но та
ужез одно август кутсконын
лэсьтыса вуттоно —
бере кыльыны уг яра. Бере
кылиды ке, куаръёсты
сётон вакытазы, кияр удъёслы
озьы ик туж кельшозы
пень (1 чечы пуньыен
котькуд уд выжые), дрожжи
ву, калийной селитра,
магнийлэн сульфатэз, калийлэн
сульфатэз. Али
трос вузасько киярлы дась
удобрениос — «Aгpикoлa»,
«Здpaвeнь» но мукетъ ёсыз.
Котькуд удобренилэн пакетэз
бордын гожтэмын
кӧняен но кызьы сое кутоно.
Москвичка но
Уралочка
Груша мерттэме потэ, но
уг валаськы, кыӵе сортъёсыз
асьме шаерын умойгес будо.
Оло, юрттоды?
Михаил К.
Дэри ёрос.
Туспуктӥз Элина КУМАЧЁВА
исано ӧвӧл ни. Угось выльёсыз,
лымы усьытозь,
умой-умой потыса уз вуттэ
ни, озьы узы выжыос гольык
кылёзы но кынмозы.
• Пумен тросгес но тросгес
убоос бушало ини. Отчы
выльысь кизьыны луоз на
салат, редиска, укроп, пекинской
кубиста, каляга,
курыткушман. Теплицаын
кезьытъёс дорозь емыш
сётыса вуозы на кӧжы,
ӝог вуись гордкушман.
• Убоостэс «йӧнатэмды»
потэ ке, туж умой луоз сидератъёс
кизьыса, кылсярысь,
фацелия, горчица но
мукетсэ. Музъемез умоятэм
сяна, соос нымы-кибыосты
но кышкато.
________
Элина КУМАЧЁВА
Груша шаермылэн лымшор
ёросъёсаз туж умой будэ, нош
уйпал ёросъёсын сое мерттыны
инты туж чакласькыса
быръёно: кезьыт тол шорын,
зор, лымы ву пукон азьын со
медаз луы.
Нош сортъёс ӧжыт ӧвӧл.
Гужем кисьмасьёсыз пӧлын
— Башкирская летняя, Гвидон,
Мраморная, Пермячка,
Северянка, Талица, Чижовская.
Сӥзьыл вуисьёсыз
пӧлын — Вековая, Бережёная,
Добрянка, Заречная, Памяти
Яковлева, Сварог, Миф,
Москвичка, Уралочка.
Озьы ик бадӟым опытэн
сад-бакча возисьёс ӟеч урожай
басьтыны быгато Валентина,
Радужная, Сказочная,
Ларинская сортъёслэсь.
Амалоос
«Мыйыкоослы»
нимаз убо
Викторие арлы
быдэ удалтэ!
Узыен убоосме, пыр
утялтыса, удъёслы пасьтана
вӧлскыны лэзьытэк,
возисько: «мыйыкъёссы»
мычисько
ке, соку ик ӵышкисько.
Озьы соос вань кужымзэс
емыш быгыльсконлы
гинэ сёто.
Кытысь басьтӥсько
выль, пинал удъёсты?
Ачим ик будэтӥсько, но
мукет убо вылын. Сояз
4 уд мерттэмын — таоссэ
юромо «мыйыкъёссы»
понна возисько ини.
Ӵышкемез
ярато
Эмезь пудъёсы трос
ӧвӧл, но емышсы
куасьтыны но, варення
пӧзьтыны но
тырме.
Эмезь бырем бере емыш
сётэм вайёсты соку ик
ӵышкыса куштӥсько.
Вӧзаз потэм выль вайёс
пӧлысь кельтӥсько тужгес
зӧкъёссэ, кужмооссэ
гинэ. Соосты ог 1 метр
30 сантиметр кельтыса,
йылъёссэс вандылӥ ни,
но али но бер ӧвӧл на.
Талы луыса пудъёс пуштыр-пуштыр
будо — урдсазы
выль вайёс пото.
Вуоно арын соос бордын
но горд-горд емышез
кисьмалоз.
Эшшо эмезь пудъёс улэ
тырисько кема кыллем
кыед, дырын-дырын
кисьтасько турын-куарез
чырсатэм вуэн —
кыӵе талы соос шумпото.
Органикаез эмезь
кадь нокыӵе будос
сокем уг яраты ни.
Кубистаосы
йырлэсь
бадӟымесь
Кубиста йыръёсылы
таза но бадӟым
будыны юрттэ
валерианка.
Басьтӥсько сое аптекаысь.
Одӥг пузырёксэ
суралтӥсько 3 литр
вуын, ватсасько 1 бадӟым
пуньы небӟытэм
майтал. Кубистаосме
нымы-кибыос арамтыны
кутскемын шуыса
шӧдисько гинэ — та
суретэн пазясько.
Туж умой юрттэ!
________
Ирина ОГЛЕЗНЕВА,
кема аръёс ӵоже
сад-бакча возись.

КУЗЁ
№30 (25942)
2022-тӥ ар 4-тӥ гудырикошкон 15
Адӟем карымон
Огзэ кеся,
мукетсэ лэсьтэ
Лэсьты ачид
Ӟечыран
Алнаш ёросысь Ляли гуртысь Пётр Гусоргин
нош ик выль трактор бича.
Алнаш ёросысь Ляли
гуртын кибашлы воргорон
улэ — Пётр Гусоргин.
Гуртоос сое Кулибин
гинэ шуо, угось трактор-машинаос
лэсьтэ,
соосын нӧд сюрестӥ но,
лымы вылтӥ но капчиен
ортче.
Пётр Михайлович ваньмон
дыръяз техника котырын
берганы яратэ, кинлэсь
сыӵе быгатонлык паласькем,
ачиз но вераны шугъяське.
2 аресаз атайтэк кылем, воргорон
ужъёслы дышем агайёсызлэсь.
Школазэ йылпумъяса,
сварщиклы дышетскем,
армие ветлэм но вордскем
гуртаз бертыса, колхозазы
ужаны вамыштэм. Егит муртлы
К-700 трактор оскиллям.
Озьы со 10 ар пала тыршем.
Нош собере огдырлы кошкылэм
уйпала. Отысен паймем
бадӟым техникалы. Угось
ӟарт кезьыт куазен но капчиен
заводисько, лымы вылтӥ
но нӧд интыостӥ капчиен
ворттылыны быгато. Ог дасо
ар палэнын улэмез бере сюлмыз
нош ик вордскем интыяз
кыс кем.
— Та вакытэ «Колос» хозяйствоын
погрузчикен ужасько,
— шуэ Пётр Гусоргин. —
Тракторе — иномарка, шораз
учкыса, пичи гинэ кадь, нош
ачиз туж провор, котьма ужез
быдэстыны луэ.
Туала выль техникаен
ужа ке но, аслаз йыраз ялан
бергаса улӥз уйпалась адӟем
техника. Угось солэн но толалтэ
куазен гуртсы котырысь
лымы бусыостӥ ворттылэмез
потӥз. Одӥг нуналэ
льӧль малпанэз улонын зэмаз.
Ачиз вездеход лэсьтӥз,
нимаз сое «Петрович». Техниказэ
ӝыны ар пала лэсьтыны
выриз. Вездеходэз —
изь вер, моторезлэн кужымез
18 но ӝыны валлэн мында,
лымы вылтӥ ӝог ширтэ,
шуретӥ уя ны быгатэ, эсьмаса,
кабинаяз одӥг шапык но ву
уг пыры.
— Техникаез бичаны секыт
ӧвӧл, запчастьёс шедьтыны
шугъяськоно, со понна
Ижевск яке Набережные
Челны городъёсы юри ветлылоно
луиз, — шуэ Пётр
Михайлович. — «Лифан»
машиналэсь моторзэ, вуж
машинаелэсь поглянъёссэ
но мукет детальёссэ уже
кутӥ. Лымые медаз выйы
шуыса, гусеница лэсьтӥ
на. Кузпалы вылзэ чебер
буяны юрттӥз. Техникае
танк кадь ик луиз, котькыӵе
шуг-секытъёсты капчиен
ортчыны быгатӥз. Вормон
нуналэ гурт урамъёстӥмы
машинаос колоннаен ортчизы,
мон азьпалазы мынӥ.
Жаляса верано, «Петровиченыз»
гуртэтӥз кема ворттылыны
кылдымтэ, Интернет
вотэсысь адӟыса, Киров
улосысь пӧйшурась дораз
вуэм. Тракторедтэк, пе, уг
кошкы. Аслэсьтыз лэсьтэм
Туспуктӥз Надежда НИКОЛАЕВА
техниказэ вузано луэм, нош
со интые магазинысь пичи
трактор басьтэм. Ачиз ик
солы картошка мудон, копан,
октон, косилка агрегатъёс,
уробо лэсьтэм. Выль басьтэмзэ
жаляса возе, кыедзэ
соин уг потты, нюлэскы уг
ветлы, алигес со нош ик пичи
трактор (мини-погрузчик)
лэсьтӥз.
— Таиз тракторе лымы сузяны,
кыед поттыны, лапас
сиге турын ӝутканы шуыса
лэсьтэмын, — вера воргорон.
— Погрузчике 2 метре
ӝуткаське, двигательлэн
кужымез 15 валлэн мында,
коробкаез «Жигули»-лэн, гидравликазэ
авторазборысь
басьтӥ. Техникаме лэсьтӥ,
ужатыса эскери ни вал, но берен
сэрттӥ. Вань детальёссэ
рос-прос буяло, варить каро
но выльысь бичало. Техника
котырын берганы гужемзэ
дыр уг шедьы ай.
Пётр Гусоргин техниказэ
ас валамезъя бича, куд-ог
тунсыко малпанъёссэ Интернет
вотэсысь «лушка». Кортэз
кышъям, вандылэм сяна,
юртъер котыраз но котьма
карыны киыз мынэ. Пулэсь
пукон-ӝӧкъёс лэсьтэ, беседкаяз
гур но ачиз ик пуктэм.
Нош алигес чылкак выль уж
шедьтэм — ӝытлы быдэ арганэн
шудыны дышетске. Ма
но со шудыны пӧрмытэ ни.
________
Валентина ЕМЕЛЬЯНОВА
Вуж скейтбордлэсь ӟечыранлы
уката шумпотозы пиналъёс.
Кулэ луозы:
• вуж скейтборд (яралоз огшоры пул но);
• гозы;
• сверло;
• лопатка ныд;
• буёл.
Гуртын улӥсьёслэн скейтбордзы ӧвӧл, дыр, но городын
улӥсьёслэн нуныкайёссылэн сюроз оло. Тӥяськем арберилы
кыкетӥ улон сётыны луоз!
Ӟечыран лэсьтон понна нырысь ик скейтбордлэсь питранъёссэ
куяно но гозы кыскыны сверлоен пасьёс лэсьтоно:
кык палтӥз но быдэн 2 пась. Кутӥськонъёслы мыноз лопатка
ныд, соосты 30-40 сантиметр кузьда вандоно, отчы но пасьёс
лэсьтоно. Чебергес мед луозы шуыса, буяны яра. Лэсьтэм
пасьёстӥ гозыез поттоно: скейтборд но кутонъёслэн пасьёссы
борды гердъёс керттылоно.
Пӧрмем ӟечыранэз кыӵе ке писпу борды юнматоно яке
нимысьтыз юбоос борды но пуктыны луоз.
Пукон
Лӥяллэсь ӝӧк-пукон шулдыртоз
азбарез но, бакчаез но.
Кулэ луозы:
• лӥял;
• бензопила;
• шлифмашинка;
• лак.
Писпу лӥялэз сэрпалтыны дыртоно ӧвӧл — солэсь
пӧрмытыны луэ пукон.
Лӥял одно ик кӧс луыны кулэ. Сое куасьтоно шунды сюронтэм
интыын одӥг-кык толэзь ӵоже 15-25 градусын.
Лӥяллы кулэ форма кылдытоно, бензопилаен вандыса.
Пукон луыны быгатэ 4 сэрего но, котырес но. Вольыт карыны
наждачной бумага яке шлифмашинка юрттозы. Пӧрмем
пуконэз лакен буяно.
________
Татьяна ИЛЬИНА

№30 (25942)
16 2022-тӥ ар 4-тӥ гудырикошкон КИБАШЛЫОС
Синмаськымон
Реклама
Котькуд арбериын —
инкуазьлэн чеберез
Ижкарысь Татьяна
Тактаева чеберъяськон
арбериос лэсьтэ, ужаз
кутэ гальванопластика
амалэз.
Чеберъяськон арбериоссэ
Татьяна Тактаева лэсьтыны
кутскиз ог 3 ар талэсь азьло.
Гальванопластика амал выль
бере, соин со Татьяналы тунсыко
потӥз ни — Интернетысь
ӵектонъёсты учкыса, та ужлы
дышетскиз.
— Чебер арбери кылдытозь,
ужез туж трос, — шуэ со. — Нырысь
ик, кылсярысь, дасяно куаръёс
но вайёс, соосты чылкытатоно-сузяно.
Собере чылкыт
куар вылэ электротоклы ортчыны
юрттӥсь раствор кисьтоно.
Дасям куарез гальванической
ваннае пононо, нунал
куспын куар ыргонэн шобырске.
Куасьмем бере ини куарзэ
бордысьтыз сузяно. Ыргонлэсь
куар тазьы но дась ӧвӧл на.
Сое волятоно, лакен шобыртоно,
буяно. Буёл пыӵатыны
пӧртэм амалъёс вань. Ыргонэз
нашатырь спиртэн но сылалэн
во зёно ке, со лызалэс-вож
луэ. Чилясь но яркыт буёлъёс
эмален буяса кылдо. Кудзэ
чеберъяськонъёсты, пеймыт
Ижкарысь Татьяна Тактаева.
мед луозы шуыса, тылын но
сутыны луэ. Одӥг чеберъяськон
бордын шорлыдын 2 арня
пала вырисько.
Татьяна лэсьтэ пель угыос,
брошкаос, подвескаос, суйпоскесъёс,
йырсие бырттонъёс.
Куд-ог арбериосыз инӟыослэсь
но дуно изъёслэсь бичамын.
Синъёсты озьы ик палёмыто
аметистлэсь, авантюринлэсь,
марӟанлэсь, кораллэсь, малахитлэсь
лэсьтэм угыосыз но
подвескаосыз. Кибашлы чакла
на, кинлы кыӵе из тупа. Шуом,
агат, пе, нылкышноослы но,
воргоронъёслы но тупа — со
тупаса улонлэн пусэз.
Гужемлы Татьяна ӵектэ яркыт
чеберъяськонъёсты: пичи
куаръёсты-брошкаосты, капчи
угыосты но емышъёсын подвескаосты.
Сӥзьыл но толалтэ
нуллон вылысь секытъёсызгес
чеберъяськонъёс тупалозы.
Кылсярысь, пальто борды
бырттэм бадяр куаръёс яке
тыпы мульыос дӥсез соку ик
шукрес, тузӥ карозы.
Кибашлы аслаз ужъёсаз инкуазьлэсь
чеберзэ пыӵатыны
быгатэ. «Кызьпу куар» брошкаез
ик зарни сӥзьыл тусо
пӧрмем! Кильтро адӟисько
туала модалы тупась пало
пель угыос: огаз пельын —
горд эмезь, нош мукетаз —
эмезь куар. Экзотикаез
яратӥсьёсты но шумпоттыны
быгатэ кибашлы — зарезь
валэз но зарезь кизилиосты
лэсьтэм.
Т. Тактаевалэсь ужъёссэ
басьтыны луоз Лудорвай музейысь,
Ижкарысь адӟытонъёсъя
«Галерея» центрысь но
Киужъёсъя йӧскалык элькун
центрысь. Кибашлылэсь
ужъёссэ озьы ик учкыны луэ,
vk.com/ukrashenia_s_dushoi
ссылкая яке 7-912-851-62-94
номеръя жингыртыса.
________
Людмила ЧЕРНОВА
Чеберъяськон арбериос лэсьтэмын, куаръёсты кутыса.
Туспуктӥз Татьяна ТАКТАЕВА
Адӟем карымон
Дышетскыны ноку бер ӧвӧл
Дэри ёросысь Подшивалысь Ольга Матвеева
куиськыны кутскиз, пенсие потыса.
Ольга Матвеевалэн архивысьтыз
Дэри ёросысь Подшивал
гуртысь Ольга Матвеева
вань улонзэ пӧрась луыса
пенсиын ни. Табере
5-тӥ арзэ шутэтске ни,
но дораз пукыны ик уг
ваньмы.
55 арессэ пусйыса, Ольга
Матвеева выль удыслы дышетскем
на.
— Мылкыд гинэ мед луоз,
котьма лэсьтыны пӧрмытоно
вылэм, — шуэ со. — Егитысен
керттӥськыны, чильпаськыны
яратӥсько вал, нош берло
дыре гуртысьтымы куиськись
нылкышноос шоры вожъяськыса
учкылӥ, мынам но
куэм дэремен ветлэме потӥз.
Пенсие потӥ но ӵуказеяз ик
Ижысь киужъёсъя юртэ дышетскыны
мынӥ. Толэзь ӵоже
монэ визьнодазы Вера Фардиева,
Надежда Мансурова,
Альбина Ядыгарова.
Дышетскыны кутскыкуз,
кышномуртлэн дораз станокез
но вылымтэ. Но оскем,
Анатолий кузпалыз сое лэсьтоз
шуыса. Нырысь ик пу ныд
басьтоно кариськиллям —
станоклы, пе, кукъёс луозы.
Магазинысь сое туж кема бырйиллям,
вуз карись паймыса
юам, ма сокем лэсьтыны малпаськоды?
Куиськон станок
сярысь кылэмез бере таосты
аслаз анай-атаез доры ыстэм —
Кияса ёросысь Юрмалай гуртысь
корка сигазы, пе, станоксы
тузонӟыса сылэ. Матвеевъёс
ӵуказеяз ик Кияса
ёросэ шонтӥзы. Доразы станокен
вуизы, Ольга Васильевна
сое тӧдьы луытозяз миськиз.
— Кызьы сӥньыс писъяны
уг валаськы вал, ярано, городлэсь
кыдёкын ум улӥське —
дышетӥсьёсы дӥням ветлӥзы
писъяськыны, — шуэ кышномурт.
— Куиськон капчиен
мынэ, основазэ пуктыны секыт,
ваньзэ лыдъяно-чотано,
сураськонъёс медаз луэ шуыса.
Нырысь ик ӵушкон куи.
Отӥяз киы воляз. Табере 5-тӥ
арзэ станок сьӧрын пукисько.
Аслым но быдэс семьяелы
(кузпалэлы, пиосылы но
кенъёсылы) дэремъёс, пӧртэм
пумо айшетъёс, саестэмъёс,
кускерттонъёс, сумкаос, ӵушконъёс
но мукет арбериос куи
ни.
Ольга Матвеева куиськон
станоксэ корка шораз пуктэм,
нош креслозэ но диванзэ верандаяз
поттэм. Угось киужен
вырон вискын телевизор учкыны
но радио кылзыны яратэ.
Станокезлэн пасьталаез 62
сантиметр. Сӥньысъёслы уг
ёрмы, ваньзэ соосты магазинысь
басьтэ.
— Гужемзэ станок сьӧры
пуксьылыны но дыры уг
кыльы, гуртысьтымы «Дэлет»
коллективенымы ялан
юмшаськомы, фестивальёсы
пыриськиськомы, — серекъя
кибашлы. — Туэ гужем
гинэ Екатеринбург, Санкт-
Петербург, Соль-Илецк городъёсы,
Пичи Пурга, Алнаш
ёросъёсы вуылӥмы ни.
Сьӧрамы одно ик пӧраськемъёсмес
но киужъёсмес
нуллӥськомы. Сӥзьыл нош ик
станоке сьӧры пуксё.
________
Валентина ЕМЕЛЬЯНОВА

ГИДКУАЗЬЫН
№30 (25942)
2022-тӥ ар 4-тӥ гудырикошкон 17
Выль выжы
Азбарын кузёясько «пингвинъёс»
Дэбес ёросысь Зар-
Медло гуртысь Анна
Юферевалэн азбарез
пӧртэм тылобурдоосын
узыр. Данъяськонэз —
индийский бегунок выжыысь
ӵӧжъёс.
Нылкышно тылобурдоосын
кӧня ке ар талэсь азьвыл
гинэ тунсыкъяськыны кутскиз,
вордыны ӧдъяз но —
шумпотонэзлэн пумыз ӧвӧл.
Бурдоосыз асьсэос но котыраз
кыстӥсько. Сиськемзы шоры
учкыса, мылкыд ӝутӥське,
шуэ нылкышно.
— Бегунокъёсы алигес пи
поттӥзы. Дото мусоесь! —
пальпотэ Анна Юферева. —
Будэмъязы соос эшшо золгес
кельшыны кутско пингвинъёслы.
Мугорзы кузь ӟенелик
кадь, гадьзэс урдыса, мугорзэс
выллань шонертыны турттыса,
туж ӝог бызьыло. Гань-гань
ветлэмзы уг луы, кожалод.
Мукет выжыысь ӵӧжъёс пыд
улазы учкыса кадь ветло ке,
таосыз котьку юбо кадь, шонер
султыса, вамышъяло. Со
понна ик соосты пингвинъёс
но нимало.
Паймымон выросъёссылы
синмаськыса, кема дыр ӵоже
та тылобурдоосты зоопаркъёсын
вордылӥзы. Нош али
соос гуртоослэн гидкуазязы
пумен тросгес луо ни. Анналэн
ӵӧжъёсыз 2-3 килограммозь
будо. Котькытчы дырто
ке но, сямзы лякыт, азбарысь
вань тылобурдоен эшъяськыса
уло. Куара-ланга уг потто,
пиоссылы кышкытлык
кылдыку гинэ, ӵаш потто.
Асьсэос но бадӟым куараослэсь,
мултэс куашетэмлэсь
куалекто. Тылобурдоосты зол
Дэбес ёросысь Зар-Медлоысь Юферевъёс
индийский бегунок выжыысь ӵӧж вордо.
кышкатыны но уг яра — сюлэмзы
пилиськыны быгатоз.
Зэм, интыязы тэк пукыны уг
ярато — соослы ялан кытчы
ке мыноно. Соин ик инты но
паськыт кулэ. Ярато пыласькыны,
но вутэк но чидалозы.
Юферевъёс тылобурдооссэс
вутэк возьыны жаляло:
бадӟым тусе ке но чылкыт ву
лэзё. Отын ни «пингвинъёс»
шумпотыса жомбыллясько.
Макем тросгес пыласько, сокем
ӝоггес чеберско. Вузэс
ялан выльдоно, со котьку
чылкыт мед луоз.
Индийской выжыысь
ӵӧжъёсты четлыкын но возьыны
яра. Но сыӵе дыръя карзэс
ялан тазатоно, пӧртэм висёнъёс
медаз алялэ шуыса. Борддоръёсты,
выжъёсты изваскаен
малляно. Карзэс нуналлы
огпол ке но тӧлатоно. Борддоръёс
вискын бадӟымесь пасьёсыз
но висъёсыз медаз луэ
— весь тӧл шудӥз ке, бурдоос
черланы быгатозы. Толалтэ
каразы 5-7 градус шуныт мед
луоз, пыдъёссэс кынмонлэсь
утёно, улазы куро валёно.
— Мар сётӥськод, ваньзэ
яратыса сиё, — шуэ нылкышно.
— Сиськыны соос проворесь!
Вож турынэз адӟемзы
ик уг луы — вожмаськыса ишкыны
кутско. Эшшо ческыт
мед луоз шуыса, турынэн
сяна, сюдӥськомы юэн, комбикормен,
кӧжыен, чорыген.
Ӝушсы умой мед ужалоз шуыса,
азьысьтызы ум басьяське
луоен я векчи кӧльыен
тыро тусез. Отысь асьсэлы
мар кулэ шедьто, отын ик
пыласько но. Нуналаз 3 пол
сюдӥськомы. Пузасьёссэ
4 пол но куноятӥськомы. Но
тусе туж уно сиён поныны уг
яра — куайыны кутскозы, нош
тазамем ӵӧж пузамысь дугдэ.
Тросгес мед пузалозы шуыса,
мел, пыргытэм курегпуз кӧм я
ракушкаос сётъясько. Ар ӵоже
360-лэсь ятыр пузало, котькуд
пузлэн секталаез 70-80 грамм.
Кӧмзы вожалэс я чагыралэс.
Толалтэ но, гужем но ӵӧжъёс
огкадь ӟеч пузало. Пузъёссы
ческыт но кӧттырымонэсь.
Адямиослы сиыны алэмын
ӧвӧл. Пыжиськеме но салатэ
поныса, сиён ческыт луэ.
Мукет тылобурдоослэн пузъёссы
сярысь, кемагес возисько.
Сӥльзы но ымын сылме
— ческыт, холестеринэз воксё
ӧвӧл, витаминъёсын узыр,
шуо. Диетической лыдъяське.
Анна Юферевалэн архивысьтыз
Анна Юферева пусъемъя,
индийский бегунок выжыысь
ӵӧжлэсь туж ӟеч мумы пӧрме.
Зэм, мугорыз пичи бере, 10
пуз вылэ гинэ пуксьытоно. Но
кылем пузъёсты инкубаторе
пононо. Потэм пиосты мумызы
борды лэзьыны луэ. Ӵӧж
пузъёсыз вылын ӟеч пуке.
Туж шер пузэз тӧл луэ. Пиосыз
ӵогисько 28-тӥ нуналаз.
Анайзы соосты умой чакла.
Ӵӧжпиос ӝог будо, юнэсь
луо, висёнъёслы уг сётско. Кылсярысь,
ӵогиськемзы бере 1-2
арня куспын 1,4 килограммозь
будо, толэзь дыръязы бадӟым
ӵӧжъёс кадь адӟисько ни. Нош
4 толэзь куспын сиыны вуымонэсь
луо. Мумы ӵӧжъёс 5,5-6
толэзьскын пузаны ӧдъяло ни.
Айы ӵӧжъёс сярысь, мумыосыз
пичиесьгес будо, соин ик кинлэсь
ке тылобурдозэ басьтыку,
та тодметъя бырйыны луоно.
Со сяна, айы ӵӧжъёслэн, 3 толэзёзь
будытозязы, быжзы конгырскемын
луэ. Мумыосызлэн
пыдъёссы югытэсьгес. Одӥг
айы ӵӧжлы 5 мумызэ возёно.
Нош буёлъя ӵӧжъёс куӵоосыз
но, куренялэс-сьӧдъёсыз но,
тӧдьыосыз, сьӧд-сьӧдъёсыз
но, гордалэс тусъемъёсыз но
вань.
— Гуртын нырысь паймо
вал, мар ӵӧжъёс та шуыса, —
вера Анна. — Табере калык
но вордэ ни. Нош ми семьяямы
ӵӧжъёсмес пингвинъёс
гинэ шуиськомы. Ачид
тылобурдоостэ яратӥськод,
соосты ӟеч утялтӥськод ке,
соос но дорзэс, кузёзэс ярато,
ӝоггес будо. Котыразы
берганы мылыд ӧз поты ке,
висьыны кутскозы, бырозы.
Ӵӧжъёс, нылпиос кадь ик,
мылкыдэз ӝог шӧдо.
Юан-веран
Кеч вордӥсьёслы куронъёс
Россиысь Гурт удысъя министерство
ыжъёсты но кечъёсты
возёнъя выль правилоос
дася, шуо. Кыӵе воштӥськонъёс
луозы?
Юлия П.
Пичи Пурга ёрос
Валэктон сёто Удмуртиысь
Пудо эмъянъя валтӥсь
управлениысь специалистъёс
— Зэмен ик, Россиысь Гурт
удысъя министерство векчи
сюро таза пудоез вордонъя
выль куронъёс юнматыны
медэ. Соос ужаны кутскозы
вуоно арын 1-тӥ мартысен.
Ыжъёс, кечъёс пӧлын
вӧлмись висёнъёслэсь утиськон,
сиёнлэсь ӟечлыксэ будэтон
понна кылдытэмын выль
куронъёс. Фермеръёслы, гурт
предприятиослы гинэ выль
правилоос малпамын ӧвӧл —
личной подсобной хозяйство
возисьёслы но чакласьконо
луоз. Кылсярысь, векчи пудоез
алэмын пастуханы пудо
шайёс, жаг куян бервылъёс,
очистной сооружениос котырын
но бервылын. Пастухан
возьёсын комакъёсын, нымы-кибыосын
нюръяськыны
косэмын. Озьы ик алэмын
тылобурдо, кролик, пӧйшур
возён интыын кечъёсты но
ыжъёсты вордыны я соос котырын
пастуханы. Фермаосы
пырон азе дезбарьеръёс юнматыны
куремын.
Частникъёслы но гид азязы
нимысьтыз коврикъёс валёно
луоз. Гидын 10 йыр но
векчи пудо ке, улоно юрт 10
метрлэсь матын медаз луы,
25 йыр ке — 40 метрлэсь. 100
йырлы чаклам ферма улоно
коркалэсь 160 метр кемын луыны
кулэ ни, нош 400 йырлы
чакламез — 640 метр кемын.
Макем тросгес пудо, сокем со
юртъёслэсь кыдёкын луыны
кулэ.
Пӧртэм животъёсты одно
ик нимаз висъетъёсы пыртоно,
тылобурдоосын одӥг гидын
возьыны алэмын. Одно
ик вентиляция лэсьтоно луоз.
Со сяна, кечъёсты нимаз
гидын кыскыны косэмын,
борддорез котыре кыед возён
инты лэсьтыны алэмын.
Висъетсэ нимысьтыз материалъёслэсь
ӝутоно луоз, соос
каньылэн мед мисьтӥськозы
шуыса.
Гидын ужаны нимысьтыз
дӥсь, пыдкук, тӥрлык возьыны
косозы. Гидъёсты роспрос
тазатоно, дезинфекция
ортчытоно араз 2 пол: тулыс
пастухан вакыт кутскем бере
но сӥзьыл, пудоез гидэ пыртэмлэсь
азьвыл. Кыедэз гидлэсь
палэнын возьыны косэмын,
сое музъеме удобрение
чот пазяны лэземын, но со
бакча (бусы) улоно юртлэсь ог
300 метр кемын мед луоз.
Котькуд пудоез реестре
пыртыны, маркировка ортчытыны,
одно ик прививкаос,
вакцинаос пуктылыны
косэмын. Куронъёсты
тӥясьёслы штрафъёс тупатэмын
луозы. Куронъёсын
пыр-почгес тодматскыны
луэ министерстволэн сайтэз
пыр.
Бамез дасяз Елена САРАМАТОВА

№30 (25942)
18 2022-тӥ ар 4-тӥ гудырикошкон
ТАЗАЛЫК
Чылкыт ул!
Кин каръяське сюл пушкы?
Арлы быдэ дуннеын
500 миллион адями
шуге-леке вуэ ӝуше,
сюлъёсы каръяськись
(кишечной) инфекциосын
сэрен. Соин ик
одно чаклано чылкытлыкез.
— Кранысь ву уд юиське,
дыр, ук? — юа Паласькись
висёнъёсъя элькун больницаысь
инфекционист Наталья
Ижболдина. — Уг яра!
Уката пӧсь гужем висьыны
усьыны кема ӧвӧл. Умойтэм,
сӧриськем сиёнэн, быректымтэ,
кырсь вуэн ӵош кӧт
пушкы инфекциос шедьыны
быгато.
— Инфекциос уно пӧртэм
луо. Кылсярысь, ваньмылэн
кылэммы вань ротавирусъёс,
норовирусъёс, энтеровирусъёс
но трос мукетыз
сярысь... Вань на бактериос,
шуом, сальмонеллаос, шигеллаос...
Ваньзэ таосты ми,
эмъясьёс, пыртӥськом сюл,
ӝуш (кишечной) инфекциос
пӧлы, — шуэ врач.
Кишечной инфекциос
пӧртэмесь ке но, соослэн огкадьзы
вань: каръясько адямилэн
сиськон ёзвиосаз —
ӝуше, сюлъёсы. Кӧня ке дыр
ӵоже отын ватскыса уло, асьсэлы
ышыг инты утчало, собере
аляны кутско. Трос луэмзы
бере гинэ адями маке
но умойтэмез шӧдыны ӧдъя.
Кылсярысь, ӧскемез потыны,
йырыз висьыны кутске, мугорыз
ӟырда, кӧтыз чутыръя...
Зэм, одӥгъёсыз инфекциос
адямиез пичияк гинэ
Арбузэз сюрес дурын вузаськисьёслэсь
басьтыны яра, но пилиськемын медаз луы.
кышкато, нош мукетъёсыз
шуге-леке вутто. Кылсярысь,
сальмонеллаос мугорын
24-48 час пала ватскыса
улыны быгато, собере
лексэс потто: адямилэн мугорыз
39 градусозь ӟырда,
куалекъяны кутске, кӧтыз
зол чутыръя. Дизентерилэн
(таиз кылдэ шигелла
бактериен сэрен) мугорын
ватскыса улон дырыз эшшо
но кузьгес. Угось со зӧк сюл
борды кырмиське — отчыозь
вуоно, интыяськоно
ай... Собере мугор
ӟырдам, куалекъям
сяна, кӧт зол
висьыны кутске,
сьӧросэ ветлэм
потэ, но ӵемысь
бушатскыны уг
луы.
— Адямилэн мугорыз
зол ӟырдамын
ке, мугорысьтыз вуэз
Туспуктӥз Элина КУМАЧЁВА
бырыны кутске, таӵеослы койкае
выдыса умойгес луоз. Уката
но нылпиослы, арлыдоослы, —
азинтэ веранзэ Наталья Ижболдина.
— Угось валаса
йӧнатӥськыса, диетаез чакласа
гинэ мугорысь инфекциез
поттыны луоз.
Инфекционист шугъяськемзэ
вера: тросэз кӧтсы
чутыръяны, ӧскемзы потыны
кутске ке, мазэ-созэ чакласа
уг уло, антибиотикъёс
юыны ӧдъяло, кылсярысь,
туж ярато левомицетинэз.
Но вирусэз антибиотикен уд
вормы! Озьы, умой карем
интые, уродгес лэсьтыны
луэ — сюлъёсысь ӟеч микрофлора
сӧриське. Кыӵе эмъюмъёсын
йӧнатӥськоно —
вералозы специалистъёс
гинэ.
Со сяна, трос чылкыт ву
одно юоно. Ву пӧлы пичияк
лимон кислота ватсаса
умой луоз. Чаклано диетаез:
возиськоно капчи
углеводъёслэсь — макарон,
нянь, канфет-печеннялэсь.
Озьы ик пайдаё уг луо
кӧжы-бобылэсь, гордкушманлэсь,
киярлэсь сиёнъёс
но газэн вуос. Со понна
пӧзьтыны луоз ву вылын
пурысь ӝукъёсты, рислэсь
сяназэ. Туж висьыку, умой
карозы улмолэсь, сӥльлэсь
пюреос.
Но йӧнатӥськемлэсь каньылгес
висёнэз алыны:
• киосты ӵем майталэн
миськылоно;
• бакча емышъёсты ӝӧк
вылэ пуктонлэсь азьвыл
кошкись вуын
миськоно, умой луоз,
быректэм вуэн вылтӥзы
кисьтыса;
• пӧзьтон азьын курегпузэз
одно майталэн
миськоно. Кемагес
кылле ке, кӧм вылысьтыз
сальмонеллаос,
бактериос пушказ но
пырыны быгато, соин
ик ыль курегпузэз сиыны
уг яра;
• уг яра сиыны умой
пӧзь тымтэ, пырсатымтэ
сӥ лез, чорыгез,
лавкаысь басьтэм ыль
йӧлэз;
• сиён пӧран вӧшъёс чорыглы,
сӥльлы, бакча
емышъёслы нимаз луыны
кулэ;
• сиён вылэ медаз пуксьылэ
кутъёс но мукет
нымы-кибыос.
Паласькись висёнъёсъя элькун больницаысь
инфекционист Наталья Ижболдина:
________
— Кӧт висемез ноку чиданы уг яра, одно вазиськоно эмъясьёс
дӥне, ӧтёно «скороез». Угось шуге-леке вуэмлэн мугъёсыз
пӧртэм луыны быгато. Адями малпалоз, урод сиёнэн-юонэн
сэрен урод луиз, ортчоз ай шуыса, но кӧт висьыны быгатэ,
кызян, нуны ваён ёзвиос умойтэм ужаку но, аппендицит
дыръя но, кӧтэ сётыны быгатэ пери шуккем но мукетыз.
Валаса сиськон
Горд эмезь
Сад-бакчаосамы
кисьма эмезь.
Эмезь узыр пӧртэм витаминъёсын
(С, В, В2,
В6, РР, Е, каротин), отын
ог 9 процент сакырез,
ог 2 процент органической
кислотаосыз. Талы
луыса со:
• йырвийымын выль
лулсэр пырыослы
кылдыны юрттэ, йырсазез
сак возе;
• вирысь сакырзэ
кулэстэ, солы шуак
ӝутскыны уг сёты;
• сюлэмез юнматэ;
• лыӟечыранъёсты
(сустав) егит возе,
соосты тӧрнанлэсь,
сузмонлэсь уте.
Юалэ — валэктом
Ляб чача
Маке туж трос верало обезянъёс бордысь паласькись чача
(оспа) сярысь. Коронавирус сямен ик со но дорамы уз вуы-а?
Ирина К.
Иж город
Валэкто Тазалыкез утёнъя министерствоысь специалистъёс
Зэм, берло дыре маймылъёс бордысь потӥсь чачаен паласькон
учыръёс дуннеын тросэтӥ пусъемын. Роспотребнадзор
ивортӥз, Россиын но со одӥг адямилы паласькиз ни шуыса. Но
черлам муртлэн улонэзлы кышкытлык кылдэмын ӧй вал, висён
медаз аля шуыса, ужрадъёс ӝог кутэмын.
Экспертъёс лыдъяло: чача коронавирус музэн сокем паськыт
уз вӧлмы. Ӵошатон понна: омикрон одӥг мурт бордысь
ог 12 муртлы выжыны быгатэ ке, чача — 1-2 муртлы. Со сяна,
СССР-ын чачалы пумит прививка пуктыло вал, со озьы ик
висёнлы аляны ӧз сёты.
Но котьма ке но, чакласькыны кулэ: киосты ӵем миськылоно,
трос калык люкаськылон интыосы потаку, маска но мултэс уз луы.
Чача кырмиськыку, мугорын виштыос кылдо, куасьмемзы
бере но бервылзы кыльыны быгатэ. Адямилэн мугорыз
ӟырда, сӥльбыгытъёсыз юмекъяло, йырыз висе, ӟигарыз быре.
Пуконлэн тыбырыз мед луоз
Давление ӵем тэтча бере, тонометре котьку син улам.
Кылэме вань, вирзӥбетэз мертаку, куд-ог куронъёсты одно
чаклано шуыса — озьы ик меда?
Елизавета Т.
Якшур-Бӧдья ёрос
Вирзӥбетэз мертаку, одно чаклано куд-ог куронъёсты.
Кылсярысь, дӥсь пачкатӥсь луыны кулэ ӧвӧл, пуксёно ганьгань
— пуконлэн тыбырыз мед луоз. Вераськыны, пыдъёсты
кечат-вамат карыны уг яра.
Эскеронъёс озьы ик возьмато:
• кезьыт интыын давлениез мертаку, тонометр пӧяськыны
быгатоз — лыдпусъёсты бадӟымгес возьматоз;
• тамак кыскем бере ӝыны час ке но мед ортчоз, сотэк,
лыдпусъёс озьы ик шонертэм луозы;
• кызь пуйы тырмемын ке, давление ӝутӥське;
• кофе, нап чай юиды ке, давление бадӟыма;
• вирзӥбетэз мертаны уг яра керӟегъяськыку, секыт
уж ужам бере кӧня ке ял кароно, сотэк лыдпусъёс
бадӟымесь луозы;
• ӵашетӥсьёс, бадӟым куараен вераськисьёс вӧзады
вань ке, тонометр озьы ик янгышаны быгатэ.
______________________________
Бамез дасяз Элина КУМАЧЁВА

ШУТЭТСКОН СЭРЕГ
№30 (25942)
2022-тӥ ар 4-тӥ гудырикошкон 19
Йыртӥян
Мар со дари?
1 2 4 6 3 8 10
5 12 7 9
14 16
11 13 18
15 20
22 17 24 26
19 21
28 23 25
27
29 30 32
34
31 36 33 38 35 40
42 44 46
37 39 41
43 48 45 47 50 52
54
56 49 58
60 62
51 64 53 66 55 68
57 59
61 63
65 67 69
Паллянысен буре:
1. Тодмо этнограф, 200-лэсь уно научной ужъёслэн авторзы. 3. Гольык йыр.
5. … карыны. 7. Удмуртиысь калык артист. 9. Дэри (диал.). 11. Сю ар. 13. Кыӵе удмурт
журнал поттэ вал журналист Людмила Медведева? 15. Лекаськись. 17. Карп выжыысь
чорыг. 19. Жуг-жаг турын. 21. Купорос удмурт сямен. 23. Калгись, возьыттэм
адями (диал.). 25. Писпу люкет. 27. Тышкаськон кыл. 29. Удмурт театрын мынӥсь
спектакль. 30. Ӝогак, чаляк (диал.). 31. Нёжало инты. 33. Удорсирлэн мукет нимыз.
35. Паласькись ку висён. 37. Лул. 39. Сяська. 41. Нылпи кылбурчи. 43. Нап-ӵуж
ымо тылобурдо. 45. Глаз ёросысь гурт. 47. Россиысь Горд книгае пыртэм пӧйшур.
49. «Асьмелэн со одӥг» спектакльысь Марпалэсь рользэ шудэм артистка. 51. Вож
нунылэн дэремез. 53. Юкаменск ёросысь гурт. 55. Борозда, межа. 57. Кенер (диал.).
59. Чечы кыскон (диал.). 61. Кутыны, кырмыны. 63. Удмуртиысь суредась Гиргорей
Слави. 65. П. Блиновлэн «Улэм потэ» романысьтыз герой. 67. … шыд. 69. Ижысь
калык эктонъя ансамбль.
Вылӥысен улӥе:
1. Ческыт сиён. 2. Огсямен. 4. «Крестьян но … » удмурт калык выжыкыл. 6. Эш, юлтош.
7. Удмуртиысь калык артистка. 8. Емыш. 10. А. Перевозчиковлэн веросэз. 12. Сиыны
ярасьтэм губи. 14. Вашкала удмурт нылкышно ним. 15. Керетон, ӵашетон. 16. Огназ улӥсь
адями (диал.). 18. Буёл. 20. Бакча сульдэр. 22. Таӵе нимын гурт вань Кизнер, Можга, Вавож,
Шаркан ёросъёсын. 24. Писатель … Валишин. 26. Писпу. 28. Яркыт сяськаё турын.
30. Фронтовик, врач, кылбурчи. 32. «Нылкышно шуд» книгалэн авторез. 34. Кыктоос.
36. «Мон суралляй ... гуры пызен» (Н. Байтеряков). 38. Кеньыр. 40. Курадӟыны (диал.).
42. Тужгес яркыт тылобурдо. 44. Йыр люкет. 46. Шурлэн лазег интыез. 48. Глазов ёросысь
гурт. 50. Коньдон. 52. Егит удмурт кырӟась. 54. Коӵыш (диал.). 56. Кудӟытӥсь юон.
58. Бадӟым куараё тылобурдо. 60. Ужан тӥрлык. 62. Сое йӧллэсь лэсьто. 64. Посуда.
66. Та ёрос кылдӥз 1929-тӥ арын. 68. Маизлы оске ӟазег?
________
Галина СЕМЁНОВА

№30 (25942)
20 2022-тӥ ар 4-тӥ гудырикошкон ГУР АЗЬЫН
Паймымон
Чупрес апай
Шаркан ёросысь Мишкин черкогуртысь Светлана Перевозчикова
ческыт пӧрамен но куноятоз, кырӟалоз-вералоз но.
Шаркан ёросысь Мишкин
черкогуртысь культурая
юртын ужась
Светлана Перевозчикова
котькыӵе ужрадэ мылокыдо
пыриське. Ёросазы
ортчись «Чупрес апай»
конкурсын но трос пол
вормись луиз ни.
«Чупрес апай» конкурс
ёросысь культура удысын
ужасьёс понна радъяське.
Ӵапак соос Тол бабайлэн
усадьбаяз лыктӥсь куноосты
пӧсь пыжиськемен пумитало
но капчи мылкыд кузьмало.
Тужгес пӧсь вакытсы луэ
толалтэ: трос куноос доразы
вуо. Но гужем но калыксы уг
бырылы. Кылсярысь, арлы
быдэ «Эктоника» фестиваль
ортче, со дыръя культура
удысын ужасьёс «Табань
Fest» конкурсэ пырисько —
кырӟаны-вераны но табань
пыжыны быгатонлыкъёссэс
нимысьтыз жюри эскере,
нош пыжиськемзылы дунъет
сёто фестивале лыктэмъёс.
— Фестиваль дыръя быдэс
командаен — инты ёзъёсысь
культура удысын тыршисьёсын
— ужаськомы: кин
ке пыжиське, кин ке кырӟавера,
— шуэ Светлана Перевозчикова.
— Нош жюриез
командаос 10 минут куспын
асэнызы тодматыны но трос
табань пыжыса вуыны кулэ.
Бӧрысь со пыжиськеммес
калык азе потто, вань мылкыд
карисьёс сое шӧмъяло
но дунъет сёто. Таӵе конкурсэ
туэ 8 мурт пыриськиз,
табань пыжись ёс пӧлын 2-тӥ
инты басьтӥ.
Светлана Перевозчиковалэн
пыжиськон амалэз туж огшоры:
ву, сылал, сакыр, пызь,
вӧй но маял. Ваньзэ сое одӥге
суралтыса, ыльнянь лэсьтэ.
Одно ик тодаз вае ӵужаезлэн
верам кылъёссэ, куд-ог дыръя
вӧсяське. Ыльнянь, пе, улэп
маке, соин вераськоно, ӟечез
сярысь малпано, капчи мылкыд
дыръя гинэ пӧраськон
борды басьтӥськоно. Табанез
вӧзы зырет лэсьтэ на. Курегпузэз
йӧлэн шукке, пичильтык
пызь но сакыр будэтэ но,
пичи тыл вылын ялан сураса,
пӧзьтэ.
— Выль ар праздникъёс
яке гужем фестивальёс дыръя
табань сиисьёсмы туж трос
луо, — шуэ Светлана Перевозчикова.
— Ыльнянь гинэ
нуналаз дасо ведра мында
лэсьтӥськомы, губиен, сӥлен
табань пыжиськомы, вӧзаз перепеч
но лэсьтӥськомы на.
Светлана Юрьевна калыкез
пӧртэм пыжиськемен шумпоттэм
сяна, дораз но ческыт
пӧраны яратэ. Та вакытэ кабачокен
ӵемгес пӧраське. Солэсь
мильым лэсьтыны яратэ. Кабачокез
вуштэ, пызьыртэ, 3-4
курегпуз шукке, шӧмызъя сылал,
пызь но вӧй ватсаса, таба
вылын яке гурын пыже. Кабачокез,
каунэз (тыкваез), ческыт
пӧсьтурынэз толлы но трос
дася. Соосты кубикъёслы вандылэ
но кынтэ. Помидорез но я
кынтэ, я куасьтыса банкаосын
возе. Арлэн пӧртэм вакытаз
пыжиськыны яратэ, шаньги,
перепеч сяна, калягаен кокрок
(пушказ одно ик мак понэ), виноград
куарен голубцы лэсьтэ.
Огкылын вераса, чупрес апай:
кырӟалоз-вералоз но, ческыт
пӧраськемен но куноятоз.
Лыдӟисьёслы ӵектӥз куасьтэм
помидор лэсьтыны.
Куасьтэм помидор
Кулэ: 4 килограмм помидор,
700 миллилитр кӧсвӧй (умойгес
луоз оливковоез), 5 йыр чеснок,
укроп-петрушка.
Помидорез миськоно но
вандылоно (бадӟымзэ 4-лы,
пичизэгес — 2-лы), тыршоно,
вань юдэсъёс одӥг быдӟаесьгес
мед луозы шуыса. Пыжиськон
корт вылэ пергамент бумага
поныса помидорез вӧлдоно
но вылаз сылал пызьнано. Вож
турынъёсты ватсаны уг яра,
соос сутскозы гинэ. Противенез
духовкае 4-5 часлы пыжыны
пуктоно, гурысь пӧсез
90 градус мед луоз, конвекция
режимен (ӧссэ ӧжытак усьтоно).
Помидор зол-зол медаз
куасьмы.
Стерилизовать карыса
дасям банка пыдэсэ ӧжытак
вӧй кисьтоно, со вылэ ватсано
куасьтэм помидор, 1-2
пилет чеснок, юдэм вож турын.
Помидорен тырмытэм
банкае вӧй ватсаса пытсано.
4 килограмм помидорлэсь
0,7 литръ ем 5-6 банка сиён
люкаське. Банкаосты одно ик
арнязэ кезьыт интыын возёно.
Куасьтэм помидорлэсь
ческыт куртчон пӧрме. Сое
сиё, творожной сырен маяллям
нянь юдэс вылэ поныса.
Туспуктӥз Валентина САВЕЛЬЕВА
Толлы сиёнъёс
Пӧсьтурынэн салат
Кулэ: 15 горд пӧсьтурын, 2 йыр сугон, 2-3 лавр куар, 2 стакан
кӧсвӧй, 2 пуньы сылал, 20 кӧжы сьӧд пӧсьтурын, 420 грамм томат
пюре (яке паста), 3/4 стакан сакыр, 6 пилет чеснок, ӝыны
стакан уксус.
Пӧсьтурынэз кузь ласянь вандылоно, сугонэз — зӧк
кульчоослы, сое бадӟым кастрюляе пононо.
Тусьтые кисьтоно: томат пюре, уксус, вӧй, сакыр,
сылал, кӧжыен пӧсьтурын, лавр куар, небӟытэм чеснок —
ваньзэ тае ӟеч-ӟеч сурано но юдыса дасям пӧсьтурынэн
сугон вылэ кисьтоно. Суретэз плита вылэ пӧзьтыны
пуктоно. Быректӥз ке, тылзэ пичиятоно но эшшо 10 минут
пӧзьтоно. Дась салатэз стерилизовать карыса дасям
банкаосы тыроно но зӧк дӥсен шобыртоно. Сӥям бераз
банкаосты салкым интыын возёно.
Азьтэм лечо
Кулэ: 1 но ӝыны килограмм помидор, 3 ческыт пӧсьтурын,
4 пилет чеснок, 1 пуньы сакыр, 2/3 пуньы сылал, 1 но ӝыны пуньы
9 процентъем уксус.
Помидорез юдоно но блендерен небӟытоно, пӧсьтурынэз
кубикъёслы, чеснокез векчи юдоно. Емышъёсты бадӟым
посудае пононо, сакыр но сылал ватсаса, пичи тыл вылын
35 минут пӧзьтоно. Бӧрысь та суретэ уксус ватсаса, эшшо 10
минут пӧзьтоно на. Дась суретэз стерилизовать карыса дасям
банкаосы тыроно, йырын уллань пуктоно но шубаен шобыртоно.
Сӥямез бере салкым азе пуктоно.
Каунлэсь сок
Кулэ: 2 килограмм каун (тыква), 2 апельсин, 200 грамм сакыр,
ӝыны чечы пуньы лимон кислота.
Каунэз кубикъёслы юдоно, кастрюляе пононо но ву кисьтоно
(каун вуэн мед шобырскоз). Пичи тыл вылын, ялан
сураса, небӟытозяз пӧзьтоно. Апельсинэз пызьыртоно. Каунэз
блендерен небӟытоно, вылаз апельсин сок, сакыр но лимон
кислота ватсаса, пӧзьтыны пуктоно. Сок чырсалэс потӥз ке,
сакыр ватсано. Суретты быректӥз ке, стерилизовать карыса
дасям банкаосы тыроно.
Арбузлэсь компот
Кулэ: 2 килограмм арбуз, 2 литр ву, 400 грамм сакыр.
Сакыр поныса, ву быректытоно. Арбузэз сузяно, кубикъёслы
вандылоно но быректӥсь вуэ пононо. Сурет пӧзьыны кутскиз
ке, тыл вылысь басьтоно но пытсано. 40 минут сылэмез
бере банкаосы тыроно. Арбузлэсь шӧмзэ толалтэ но уд вунэтэ.
Валэктонъёс
Мар со дари?
Паллянысен буре:
1. Христолюбова. 3. Йыртэмпол.
5. Лоркак. 7. Бекманов.
9. Нёпо. 11. Даур. 13. Ашальчи.
15. Дуринчи. 17. Гордбурд.
19. Люгы. 21. Дари. 23. Накас.
25. Дӥнь. 27. Албасты.
29. Трокай. 30. Заман.
31. Улыг. 33. Мушсир.
35. Тылъяра. 37. Урт. 39. Лызгырлы.
41. Иванов. 43. Камчучо.
45. Нюр. 47. Вучайы.
49. Бакишева. 51. Кутэт.
53. Сыга. 55. Анабур. 57. Куйма.
59. Муан. 61. Сабыны.
63. Михайлов. 65. Омель.
67. Суам. 69. Андан.
Вылӥысен улӥе:
1. Халва. 2. Огкуен. 4. Вумурт.
6. Уром. 7. Будина. 8. Эмезь.
10. Олён. 12. Куарогуби.
14. Казнык. 15. Даллашон.
16. Варгас. 18. Курень.
20. Ашанай. 22. Вишур. 24. Роман.
26. Бадяр. 28. Ляктурын.
30. Зорин. 32. Матвеев.
34. Эгызоос. 36. Лулпу.
38. Сезьы. 40. Ранӟыны.
42. Шурка. 44. Йырнебыт.
46. Ивас. 48. Мундэй. 50. Уксё.
52. Антонова. 54. Мачы.
56 Сюкась. 58. Интака.
60. Кокчо. 62. Аръян.
64. Таба. 66. Грак. 68. Бурд.
Бамез дасяз Валентина ЕМЕЛЬЯНОВА
«Берекетэ» юанъёсын, дэмланъёсын вазиськоно
73-33-42 телефон номеръя.
Материалъёстэс ыстэлэ, «Берекетэ» шуыса,
электрон почтае udmdunne@yandex.ru.