42 от 27 октября 2022 (25954)

№42 (25954)
16 2022-тӥ ар 27-тӥ коньывуон
«Аныкай» медиамастерской
«Возьматы мыным Захарез!»
Захар пиеным ӵош
ветлыны кутски «Куара»
огазеяськонлэн «Аныкай»
медиамастерскояз.
Удмурт анай-атайёсын
но нылпиосынымы
ӵош дышетскиськомы
лэсьтыны видеоблогъёс.
Удмурт кылын. Туала
сямен. Котьмар сярысь.
Тодон-валан кулэ
Ог 2 ар талэсь азьло мон
нырысьсэ вотэсысь адӟи нылпиослы
удмурт кылын нуиськись
блогъёсты. Огзэ соос
пӧлысь — «Азбар ТВ» — нуиз
Лилия Широбокова Варя нылыныз.
Котькуд серизэс чидатэк
возьмалляй, отын Варя
нылпиосты я куазен, я емышъёсын
тодматъяз. Малпай, кыӵе
ӟеч уж лэсьто Широбоковъёс.
Нырысь ик, анай кылын ӟеч
видеоконтент кылдыто. Собере
— нылпиенызы ӵошен
выро, солэсь быгатонлыкъёссэ
волято. Ачим но малпаськыны
кутски: Захар пиеным блог
усьтоно.
Пие пумен будӥз. Учкисько
но, мультикъёс интые, солэн
плейлистаз пумен видеоблогъёс
но кылдылыны
кутскизы. Яратэ учкыны, кызьы
камера азьын мукет пиналъёс
шудо, пӧрасько, пӧртэм
шудонъёсын тодматско.
Татын, конечно, пӧртэм анайатайёс
пӧртэм сямен малпасько.
Кин ке пиналэзлы видеоконтент
воксё но учкыны уг
сёты. Но туала вакытэ туала
амалъёслэсь уд пегӟы ни. Соин
ик талэсь ӟеч палзэ пусъеме
потэ. Мультфильмъёс, видеоблогъёс
пыр нылпи дуннеен
тодматске. Со материалэз
быр йыса пичиен-пичиен
сётӥд ке, отын номыр уродэз
ӧвӧл. Кылсярысь, мультфильмъёслы
луыса Захар тодэ ни
англи кылын но лыдпусъёсты,
буёлъёсты но куд-ог глаголъёсты.
Малы тае уд куты, асьме
блог лэсьтыку но?
Озьыен, Захарен ӵош
видео блог лэсьтыны мылкыды
кемалась пӧзе вал ни.
Инмар кылэм, лэся: учкисько
но, «Куара» огазеяськон усьтэ
«Аныкай» медиамастерскойзэ.
Отын, пе, удмурт анай-атайёс
нылпи видеоблог лэсьтыны
дышетскозы. Гожтӥськи. Уго
мылкыд борды тодон-валан
кулэ на. Кызьы снимать кароно
видеоблогез? Кыӵе аппаратура
кутоно? Кызьы программаосын
ужано? Телефонэ нуналлы
быдэ тус уськытъяськомы,
Анай-атайёс кылдыто удмурт видеоблогъёс
Удмурт анай-атайёс видеоблог лэсьтыны дышетско.
Пиналъёслы занятиос ортчо удмурт кылын.
видео лэсьтӥськомы ке но,
аппаратмы сярысь троссэ ум
тодӥське вылэм! Тае валай
нырысетӥ занятие вуэме бере
ик. Телефонын видео лэсьтыны
милемыз дышетэ «Куара»
огазеяськонлэн кивалтӥсез,
клипмейкер Владислав Степанов.
Ма сярысь верано?
Пумиськылӥськомы арнялы
быдэ Ижысь Ф. Васильев
нимо библиотекаын. Анайатайёс
дышетскыку, пиналъёс
я мультфильм лэсьто, я
удмурт эктонъёсты дышето,
суредасько. Та нуналъ ёсы
анай-атайёс асьсэ видеоблогъёссы
бордын ужаны кутскизы
ни. Кылсярысь, Алексей
но Екатерина Софроновъёс
Ксени нылынызы пиналъёслы
удмурт шудонъёсты возьматозы.
Ирина Вахрушева
Аделина нылыныз киужен
вырозы, суредаськозы. Ми
Захарен леголэсь пӧртэм роботъёс
лэсьтыломы, озьы ик
пиналъёсын удмурт кылэз
дышетомы, нырысь ик цифраосты,
буёлъёсты, пудо-животъёсты.
Оглом вераса, кин
мае яратэ, сое ик возьматэ!
— Котькудмы та проектэ
кыӵе ке малпанэн лыктэмын,
— вера Екатерина Софронова.
— Алигес вераськи
Санкт-Петербургысь эшеным.
Верай, Ксени нылы садикын
курадӟегес шуыса, малы ке
шуоно удмурт вераськемзэ
воспитательёс уг валало… Эше
туж паймиз: ми доры куное
вуылыса, со малпам вылэм,
шаерамы ваньмыз удмурт кылэз
тодо шуыса. Собере мон
эшшо но золгес малпаськонэ
уси, малы ми, Удмуртиын
улӥсьёс, удмуртлыкез калык
пӧлы вӧлмытыны ум тыршиське?
Луонлыкъёсмы вань
ук… Мынам кемалась мар ке
лэсьтэме потэ вал ини удмурт
нылпиос понна. Сое, мае мон
трос калыке, паськыт дуннее
вӧлмытыны быгатысал. Блогинг
али вакытэ улонын золгес
но золгес юнма. Соин выль
сямен ужаны дышетсконо.
— Ми малпамы, «Аныкайын»
нырысь ик Марк пимылы
удмурт кылын вераськись
эшъёс шедьтомы шуыса, —
верало Михайловъёс. — Озьы
ик нылпиенымы ӵош ӟеч видеоконтент
лэсьтыны дышетскомы,
удмурт кылэз нылпи
видеодуннее вӧлмытомы. Ми
малпаськимы, мар пимылы та
вакытэ тунсыко потэ, соин ик
блогамы пиналъёсты спецтехникаен
тодматомы, озьы учкисьёс
милемын ӵош удмурт
кылмес дышетозы.
«Медиамастерская для удмуртских семей «Аныкай» огинлэн «ВКонтакте» бамысьтыз
Вакытлэн ӧраз
«Аныкай» видеомастерскойлэн
сюресэз кутскиз
2019-тӥ арын. Соку,
Йӧскалык политикая министерстволэн
юрттэменыз,
«Куара» огазеяськон котыраз
люказ 15 удмурт анайёсты
но дышетӥз соосты видеоблогъёс
лэсьтыны. «Куара»
огазеяськон Россиысь Президентлэн
грантъёсъя фондысьтыз
уксё утӥз но, уж
азинскиз. Озьы 4 ёросъёсысь
30 семьяос вотэсэ ӟеч фотоос,
видеоос лэсьтыны, текстъёс
гожъяны дышетскизы.
Нош тужгес устоосыз 5 семьяос
практикуме пыриськизы,
тодон-валанъёссэс
эшшо но муромытӥзы на.
— Ми валамы, макем кулэ
та выллем дышетскон анайатайёслы.
Соин ик малпамы
азинтыны ужмес но пыриськимы
Егитъёсын ужанъя
федерал агентстволэн конкурсаз,
вормимы, — вера
грантэз утӥсь, «Аныкай»
проектлэн кивалтӥсез Ольга
Степанова. — Медиамастерской
— со видеоблог лэсьтыны
дышетон инты гинэ
ӧвӧл, со сыӵе инты, кытын
нылпиос ог-огенызы удмурт
кылын вераськыны быгато.
Влад Степанов картэным
ӵош будэтӥськомы Марк
пимес, ми соин анай кылын
вераськиськомы. Потэ, со
мед улоз удмурт кыл пӧлын,
бадӟымъёсын гинэ ӧвӧл, ас
ёзъёсыныз но удмурт кылын
вераськыны мед быгатоз шуыса.
Соин ик «Аныкай» проектын
вань занятиос удмурт
кылын ортчыло. Вакытмы
сыӵе: нылпиос ярато учкыны
видеоблогъёс, соин соос
удмурт кылын туж ӟечесь
мед луозы. Вань удмурт нылпиос
дуннелэн котькыӵе
сэрегаз мед улозы но мед
быгатозы видеоблогъёсты
учкыны.
Оглом вераса, «Аныкай»
медиамастерскойын кылдытэмын
луозы 10 видеоблогъёс.
Озьы шапыкен-шапыкен
блогинг зарезьын кылдозы
удмурт видеосуредъёс. Нош
анай-атайёс но нылпиос одӥг
тулкым вылын уялозы, огогзылы
матынгес луозы. Ми
но Захарен ӟеч видео лэсьтыны,
учкисьёсмылы кельшыны
тыршомы. Шумпотом, куке
кыӵе ке удмурт пинал анаезлы
шуоз: «Мама, возьматы
мыным «Ютубысь» Захарез!»
________
Мария ВЕКШИНА