42 от 27 октября 2022 (25954)

№42 (25954)
4 2022-тӥ ар 27-тӥ коньывуон
ГУРТООС
Адӟем карымон
Музъемтэк — выжытэк
Вотка ёросысь «Пихтовка» хозяйствоысь директорлэн воштӥсез Виталий Иванов калыкен кенешыса ужа
Удмуртиысь гурт удысысь
дано ужась Виталий
ИВАНОВ ас вакытаз
трос лэсьтӥз Вотка ёросысь
«Пихтовка» хозяйствоысь
музъемен ужанэз
умоятон понна. Али
директорлэн воштӥсез
луэ.
«Ита» колхозэз
ӝутӥсь
Виталий Александрович
ноку ӧз малпалля, Шаркан
ёроссэ Вотка ёрослы воштоз
шуыса. Пичи гинэ Мукабан
гуртын будӥз. 40-45 корка,
юртлы быдэ 5-10 пинал, котькудзы
ог-огзэс тодо. Ивановъёслэн
семьяязы но 5 нылпи
вал, Виталий — покчиез. Солы
ик осконэз вал анаезлэн.
— Буби, мон 1-тӥ классын
дышетскыкум, улонысь
кошкиз, — тодаз вае Виталий
Александрович. — Усьыса
сюрлызэ тӥяз, 2 нунал куспын
кысӥз. Ми ноку но узыр
ӧм улэ. Буби гужемзэ пастух
луыса ужалляз, толалтэ ферма
котырын бергалляз, валэн
гидэ силос ворттылӥз. Муми
парсь сюдӥз, скал кыскиз, кунян
утялтӥз. Мон ачим 4-тӥ
классысен «Ита» колхозэ ужаны
поталляй ни. Пичиосты
парсь сюдыны пушнер ишкыто
вал. Адямилэсь ӝужыт,
бышке, но чидаськод но бичаськод.
Турын дасянэ ог 50
кузя ветлылӥм. Умой возьёс
кизисько вал бере, нюко-гопо
интыосты турналлямы.
Ми вакытэ вань ужез киын
лэсьтӥськомы вал на. Вожъяськыса
учкылӥмы комбайнёрлы
юрттӥсе кутскем эшъёсмы
шоры. Отчы шедьыны секыт
вал. Одӥг арзэ мыным но
удалтӥз. Мон соку аслым самой
узырез потылӥ. Гужемлы
быдэ эмезь, губи бичаллямы,
куасьтылӥмы, сое но коньдон
понна заготпунктъёсы келяськомы
вал. Асьме поттэм коньдонэн
школае мыныны форма
басьяллямы. Мама сотэк огназ
милемыз сюдыны-вордыны
ӧй вормысал.
Виталий Александрович
агаез шоры ӵемысь учкылӥз:
со кадь ик заводын ужалоз.
Гуртэ бертэмезлы быдэ котыраз
ялан мерскылӥз. Агае
бордысь городской зын лыктэ
вал, шуэ. Сочинениосаз но Виталий
озьы ик гожтылӥз: заводэ
кошко.
— Аръёс ортчемъя малпан,
улон шоры учкон воштӥське,
— вера Виталий Иванов. —
Дышетӥсьёс шуо вал: тынэсьтыд
ӟеч физик, математик
Виталий Иванов Вотка ёросысь «Пихтовка» хозяйствоын 29 ар ужа ини.
пӧрмоз. 7-тӥ классын дыръям
математика урокъёсты нуыны
оско вал. Но огпол школае колхоз
пред лыктӥз. Быдэс класс
азьын гуртын ужасьёслэн кулэлыксы
сярысь валэктӥз,
кадръёс уг тырмо, шуиз. Кабинетысьтымы
потыкуз, мон
тодӥсько ни вал: Ижысь сельхозинститутэ
пыро. Пыри.
Ассэ ачиз сюдыны, дӥсяны
мед вормоз шуыса, магазинэ
уй стороже кутскылӥз. Стипендия
басьтӥз на. 2-тӥ курсысен
армие кошкиз. Служба
бере бертӥз но — анаезлы
хозяйствозэс возьыны секыт
шуыса адӟиз. Озьы Виталий
Александрович дышетсконзэ
заочно амалэн азинтӥз. Ачиз
«Ита» колхозазы уже интыяськиз.
Нырысь агрономе
пуктӥзы, отӥяз бригадире
юнматӥзы на. Бусыос понна
но, 200 кысконо скалъёсын
ферма понна но кыл кутылӥз.
Ужаны быгатэмзэ палэнын но
ӝог синйылтӥзы.
«Пихтовкаез»
бурдъясь
1993-тӥ арын феврале Ивановъёслэн
ӧсазы йыгаськись
луиз.
— Со вакытэ деревняостӥ
наркоманъёс ветлыло вал,
мак юаса, — азинтэ Виталий
Александрович. — Кышкатэк
коркась корка пыраллязы,
модоссэ курыса. Пудо сюдыса
пыриськомы но, укно улэ кин
ке машинаен дугдӥз. Нош ик
мак юасьёс, кожай. Егит воргорон
пыре. Мон, пе, «Пихтовка»
совхозлэн директорез.
Чорыг будэтӥсьёс Вотка
палан вань шуыса тодӥсько
вал, но отчы вуылэме ӧй вал.
Адямиоссэс уг тодӥськы.
Георгий Степанович Крыловез
но нырысьсэ адӟисько.
Сое ог 2 толэзьлы азьвыл
гинэ директоре юнматӥллям.
Агрономтэк кыли, малпаськы,
пе, ми доры выжон сярысь.
Шуисько: атай юрт кутӥсь
мон. Уже яра. Кытчы кошком?
Нош Георгий Степанович, кык
арня ортчыса, нош вуиз. Машинаяз
пуктӥз но Пихтовкае
вайиз, совхозэз, пе, возьмато.
Мае адӟод толалтэ? Фермае
пыртӥз но, синъёсы палёмизы.
Быдэс корпус плиткаосын
лякылэмын. Котыр чылкыт.
Милям гидъёсмы кыед пӧлын
выемын, нош татын коть
туфлиен ветлы. Учкисько но,
мамалэн эшез Эльза Докучаева
татын ужа, со мылкыдме
бугыртӥз на.
Март толэзе Виталий Ивановез
машинаен ик дорысьтыз
басьтӥзы но Пихтовкае
вайизы. Мумиз но шуиз: берытскыны
котьку вуттод,
тон егит на, эскеры астэ. Егит
специалистэз Эльза Тимофеевна
дӥне ик нырысь-валысь
интыязы. Со куспын квартира
тупатъязы.
— Совхозын югдур капчи
ӧй вал. 1990-тӥ аръёсы чорыг
вордон предприятиез ур-вар
кесяны турттӥсьёс, забастовкаосы
потасьёс уно гинэ вал.
Соин но лябӟылӥз. Лыктон
арам Пихтовкаын пудо сиён
гинэ но ӧз окмылы. Пермь
улосын куро дасяло вал. Монэ
отчы ыстӥзы. Учкисько но,
сисьмем куроез прессовать
каро. Мукетыз ӧвӧл, пе. Кытчы
мон сюри шуыса, йыр бордам
кырмиськи. Уноез ужасьёс
юо. Кинэн кизёд? Тракторист
бусыозь мед вуоз но кабинаысьтыз
медаз погра шуыса,
чакласько вал. Бусыосысь ӧй
поталля. Котькудӥз дортӥ пастух
сямен ветлылӥ. «Ита»
колхозамы мынам тодам но
ӧз лыктылы ужасьёсты озьы
эскерылыны. Шутэтскон нуналъёс
вуизы но, юало: уже
потыны приказ луоз-а? Серекъяло,
кожасько. Колхозын
ми та сярысь ӧм малпаськылэ
— ӝоггес кизьыны тыршылӥм.
«Пихтовкаын» но ужаломы,
шуи. Трос аръёс ӵоже механизаторъёс
дышиллям ужамзы
бере ӝыт куноятэмзылы.
Та сямен нюръяськеме понна
монэ тушмонэз кадь пумиталлязы.
Кышкыт вал соку татын.
Али ке но паймисько, кызьы
со вакытъёсты Георгий Степанович
чидаз. Нокинэ но уллятэк
тыршиз. Котькинэн лякыт
вераськылӥз.
Котьма ке но нырысетӥ
ужан араз хозяйствоын гектарлы
быдэ 17 центнер урожай
басьтӥзы. «Пихтовка»
понна со бадӟым лыдпус вал.
Но Виталий Александровичлэн
эшшо но тросгес ю-нянь
люкамез потылӥз. Пудо сюдыны
сяна, чорыглы но ю
тысь кошкылӥз угось. Соин ик
арысь аре урожаез йылтон сярысь
ужпум пуктылӥз. Со понна
трос лэсьтэмын вал.
Дисциплинаез
тупатӥсь
— Дисциплинаез тупатон
понна трактористъёс вӧзысь
ӧй кошкылы. Ужасьёсын пумтэм
кенешылӥз директормы
Виталий Ивановлэн архивысьтыз
но. Калык но пумен валаны
ӧдъяз: ужам бордысь потэ
уждун. Ог-огзэс куаретыны
ӧдъязы. Специалистъёслэн,
кивалтӥсьёслэн сабырлы кариськемзы
шоры учкыса но,
асьсэос умойгес луыны тыршизы.
Ужъя коллективной договор
юнматӥмы, льготаосты,
соцвыплатаосты кин басьтыны
быгатэ шуыса. Уждунэз
йылтӥмы. Нош макем тросгес
коньдон басьтӥськод, сокем
золгес мышление воштӥське,
семья сярысь тросгес сюлмаськыны
кутскиськод. Пумен
хозяйствоямы юисьёс
быризы. Нош «Ита» колхозэ
воксё куашказ. Мынам сюлэм
сопала ӧз кыскы ни.
Виталий Александрович
валтӥсь агроном луыса 21
ар ужаз. Уно аръёс ӵоже отпускез
ӧз адӟылы. Али но
бусы ужъ ёсты эскерыса возе,
кулэ дыръяз ачиз но ужъёсты
радъя. Хозяйствоын сое
воштӥз Якшур-Бӧдья ёросын
кыдам Олег Широбоков. Котьку
кенешыса ужало. Туннэ
хозяйствоын ог 6 сюрс гыроно-кизёно
бусыоссы ни. Туэ
гектарлы быдэ 30-32 центнер
басьтӥзы, уно аръёс ӵоже
нырысьсэ 9 сюрс 950 тонна
ю-нянь люказы. Со быдэс
коллективлэн валаса ужамез.
«Пихтовка» Россиысь кужмоез
чорыг вордонъя хозяйство луэ.
— Мон ноку но директорлэн
воштӥсез луо шуыса ӧй
малпалля. Приказ гожтэмзы
бере нырысь-валысь асме
кытчы карыны ӧй валалля.
Бусыын ужаны дышем адямилы
документъёс пӧлы выйыны
секытгес ик. Бусыын
адӟиськод емыштэ, нош татын...
Творчествоез быриз та
ужам. Кыл кутонэз бадӟым
ик. Но бусыосты уйвӧтам но
адӟисько.
Музъемлэсь мӧзмыса но,
Виталий Иванов бакчаяз экспериментъёс
ортчытъя. Музъемтэк
мон выжытэк кадь,
шуэ. Школаын дышетскыкуз
ик, гуртоосты будэтэм баклажанэныз
паймытӥз вал.
Пие, маин сое сиёно, юазы
гуртоосыз. Ачиз ик пӧраз но.
Али но семьяоссэ, ӵыжывыжыоссэ
паймытъя. Нылъёсыз
бадӟымесь ни, нош пиез
7-тӥ классын дышетске, бубиз
борды кыстӥське. Кузпалыз
медсестра луыса ужа. Шутэтске
удмуртъёсын — ёросын удмуртлыкез
ӝутӥсьёс пӧлын со
нырысь радын.
________
Елена САРАМАТОВА