42 от 27 октября 2022 (25954)

udmdunne.ru
+7 951 195 37 65
ЛЫДӞИСЬКОН СИГ
№42 (25954)
2022-тӥ ар 27-тӥ коньывуон 27
шоры поп. — Кушкем пудодэ
черке вайиськод.
— Бен Инмарлэн сётэмез
ик, вылды, та парсьпи но. Уг ке
яра, берлань нуо, святой вуэныд
гинэ пызйылы.
«Токма супыльтэ», — малпаз
поп. Молебен ортчем бере
нош черк азбарысь парсьпиез
ӧз адӟы ни — Байтуган Ондрей
зэмзэ ик сое ас гуртаз
нуэм.
Стекольной заводысь кузёлэн
ужез поп музэн лекъяськыса
гинэ ортчысал ке, соиз
туж шумпотысал, дыр. Озьы
ӧвӧл угось. Германиен война
кутскем бере ик, Стрижов
кузё заводзэ Барсковлы вузаз.
Табере Барсковлэн ичи кылем
ужасьёсыз но солы мыто,
кудӥз-огез войнаысь револьверен,
винтовкаен, патронъёсын
бертэм. Ар гинэ талэсь
азьвыл кузё сыӵе укылтэм
муртъёсты каторгае келясал,
та виын нош становой но,
урядник но ӧвӧл. Ку кылодадӟод
вал таӵе ужъёсты! Кузёез
заводаз пырыны уг лэзё,
чебер бадӟым коркасьтыз уллязы.
Отын маке заводской
комитет ужа ини.
Вужгуртысь Будянь Иван
дӥне медоын кыстаськыса
улылӥсь Пиляй Ванька лыктэм
но витьтон сюрс манет
уксё куре — контрибуция, пе,
понэмын, вить сюрссэ юри будэтыса,
вера.
— Ма понна? — синъёссэ
золтэ Будянь Иван. — Кытын-о
мынам сомында уксёе?
— Калык вылысь кыскамдэ
государстволы сёт, — чурыт
вера Ванька, Иванлэн синмаз
ик учкыса.
— Ай быгатӥськод-а сомында
уксёез лыдъяны? Сураськод.
— Дышомы ай, киямы луиз
ке... Милям со уксёмы, тон талад.
Табере берлань сёт.
— Зэм-а, даур-а тон озьы?
— Шудыны ведь ӧй пыры.
Мактаськыны мон дышымтэ.
— Гуртам ӧвӧл мынам уксёе,
банкын со.
— Гуртысез милем кулэ,
— ымдурзэ лек кырыжтыса,
Ванька серектэ. — Банкысез
понна эн сюлмаськы, сотэк но
со государство киын.
— Ма, паньтэм 4 , ма озьы
вырод?— ӟичыяськыса Будянь
Иван куаразэ воштэ.
— Монэ тон паньтэм уд
кариськы вал, лэся. Мыным
паньтэмлы тон табере уката
уд яраськы ни... Я, верамме
вутты комбедэ. Ӧд ке быдэсты,
пӧсятом ведь.
Пиляй Ванька ульча сэрегысен
мышсэ гинэ ыштӥз,
Будянь Иван но, ульчае потыса,
пырак Кудаш пиос доры
мынӥз.
— Ӟечом-буром! — картуззэ
басьтыса, кымсаз кирос понон
куспытӥз вазе со корка пушкы
пырем бераз. — Марым-а?
Коркан пукисьёс гуньдэмын
кадь. Кепрес потӥз Будянь
Иванлы, картуззэ посыса
сылэ.
— Э, пырись мурт шоры вазись
но уг шедьы, — могасагес
Кудаш Яко ымзэ усьтэ. — Пуксьы,
кум.
— Пуксё ай... Марым-а,
кум?.. Малы таӵе жум пукиськоды?
— Пуконо луэ уга... Чырты
бераз тышкано вал со йӧспӧртэм
Ванькалы!
— Уксё-а куре? Мон дӥням
но пыраз...
— Ма, со гинэ, кум! Юрт мес,
пудомес, пе, кыӵак басьтомы.
Пурӟизы кулакъёс, пурӟи зы
попъёс, вуз карисьёс. Люкаськыло,
лушкемен кенешыло.
Нырысь нуналъёсы волостной
правление Волков дьяк доры
ветлыло вал. Арня нуналысен
со правление но музон муртъёс
пыриллям, азьло аръёсын
сӥё-дано улылэм муртъёслы
отын шунытэз уг йӧты ни.
Старшина пешкытэмын. Табере
отын Итёк старшина кадь
батыр луэм.
Вужгуртэ советской властьлэн
тусыз пыре ини. Уж революционной
комитет, Бетколудысь
Салтыков Павол
— председательзы, коммунист
со, германской войналэсь
азьвыл стекольной заводын
ужалляз. Гуртъёсысь начар
крестьянъёсты ас котыраз люкаса,
котькытын комбедъёс
кылдытъя, узыръёс вылэ контрибуция
тыре, музъемез гуртъёсын
люкылыны медо ини,
черклэсь музъемзэ талазы но
начаръёслы сётӥзы. Красногвардеецъёс
Вужгуртэ вуыло,
кулакъёслэсь ю-няньзэс окто
но уездной городэ нуо. Карнауховлэсь
юэн ӵӧжмем 5 кеносъёссэ
тырттэм кельтӥзы.
— Куштэм пыдъёс, йыр
пыдэстэм муртъёс кузёясько!
Беда! — куспазы вераськыло
кулакъёс. — Ум сётэ ваньбурмес!
Кивалтос кутомы.
Дасоен, сюэн бертыло солдатъёс
герман но турок фронтъёсысь:
вылысьтызы солдат
дӥсьёссэс воштылытэк, гуртазы
вунэм ужъёссы котыре
кутскыло, чукинскем коркаоссэс
пыкыло, бусыосысь
жагтурынэн кыжмем анаоссэс
утчало. Нокызьы мылкыд уг
сузьы: мугор фронтын окопъёсын
тӥяськемын, пуляосын
сӥсъямын, юртъер кузётэк
куашкамын. Кин сэрен тазьы?
Фронтын, городъёсын
царской армия куашканы кутскиз,
солдатъёслэн штыкъёссы
офицеръёс пумитэ, фабрикаослэн,
заводъёслэн кузёоссы
пумитэ ӝутскылӥзы. Пыдло
пыре со революция городъёсын.
Иське, татын, Вужгуртад
но, революциез зол ортчытоно.
Тӥни ук Кудаш пиослэн,
Будянь Иванлэн, Габи кузёлэн
вуж кабанъёссы сыло на,
луд вылъёсын ю-няньзы мурт
музъем вылын сыръя.
Бертылӥзы гуртъёсазы
кузё пиос но, поп пи Павол
но. Отын-татын ю нуэмын ни,
контрибуция октымтэ на, сое
советской власть туннэ-ӵуказе
октоз. Кинлы мае тыроно ялэмын
ведь.
— Кызьы ас ваньбуреныд
люкиськод? — урдско узыръёс.
— Сэрпалтомы советской
властез! — таӵе лозунгзы соослэн.
Кудаш Осьып фронтысь
али бертӥз. Отысен со помещикъёс,
фабрикантъёс пумитэ
мынэ вал, советской власть
понна сылӥз. Гуртаз вуиз но
мултэс ваньбуреныз люкиськемез
уг пот ни. Шонер верано
ке, со ведь ачиз кулак, бубиз но,
братэз но кулакъёс. Табере со
большевикъёсты синадӟонтэм
каре, ассэ но, фронтын сямен
большевик уг шуы ни.
— Удмуртъёс! Ум тэргаське
куспамы, — националистъёс
вазькылон гожтыло. — Ваньмы
огазе кариськомы! Гуртысь
ю-няньмес сьӧрло ум
сётэлэ.
Со сьӧркытӥ узыр удмурт
кулакъёс сыӵе ик ӟуч кулакъёсын
огазеясько, гуртысь гуртэ
ивор нулло: «Петербургын,
Москваын большевикъёс ӧвӧл
ни, татысь но улляно. Сибирьысь
чугун сюресэз чехословакъёс
басьтӥллям, асьмелы
юрттыны лыкто».
Сьӧсь кионъёс мактал,
урмыса ворттыло Леухинэн
Витвиновен, Дэменлудысь
Кузнецов Прокопен Валамазысь
Кириллов Олексанэн,
пӧлазы ик пырисько Вужгуртысь
подпрапорщик Кудаш
Осьып, поплэн пиез Павол.
Советской властьлы пумит
ӝутсконзы Ижысь фронтовикъёсын,
Старой селоысь но
Торокан селоысь кулакъёсын
герӟаськыса дасяське.
Бугыръяськон кутскиз волостной
съезд дыръя.
Салтыков Паволлэн ӧтем
съездэзлэн мынонэныз Кириллов
Олексан, эсер, кивалтӥз.
Съезд азелы Вужгуртэ
кык красногвардеецъёс лыктэмын
вал — волостьын советской
властез юнматыны,
контрибуция октонэз дыртытыны.
Соосты уйин ик Кирилловен
Кузнецовен арестовать
кариллям, огез юрттӥсьсы
объездчик Порошин вылэм,
мукетыз — кулак Иголкин
Овера.
Съездэз люкатӥзы волостной
правленилэн бадӟым азбараз,
ӝужыт заборъёс куспы.
Съездэз усьтыны гинэ вуиз
Салтыков, сое ӝӧк дорысь
донгизы, интыяз Кириллов
султӥз.
— Вот кыӵе советской
власть, адӟе, крестьянъёс!
Тани красногвардеецъёс
лыктӥллям, вераськыны тӥледын
медо.
Потӥзы кык кузя — солдат
дӥсен дӥсяськемын, мӧля
вылтӥзы кечато тырем патронташъёс,
киосазы быдэн наган.
— Соос ӧвӧл та! — кеськиз
Салтыков.
— Эшъёстэ уд тодмаськы!
— пумитаз гудыръя Кириллов.
— Самой соосыз красногвардеецъёс
та. Кылзӥське умой,
ма вералозы.
Красногвардеец шуонъёс
ӝӧк доры султӥзы но, наганъёссэс
ӝӧк вылэ поныса, папирос
кыскыны ӧдъязы.
— Так-то, граждане, — шуэ
одӥгез. — Волостьты вылэ сомында-сомында
ю тырон усе,
котькуд коркась сое по едокам
октоно, муртлы быдэ котыр
дас пуд усе...
— Тью-ю! — пумитаз шулто
калык пушкысь.
— Как бы не так!
— Дась улэ, сётомы!
— Вот кыӵе соос!
— Начаръёс нош кызьы? —
Пиляй Ванька кеське.
— Начаръёс но огкадь тыроно
луозы, — шуэ ӝӧк дорысь
мурт. — Йырлы быдэ тыроно.
— Мае тыромы на, няньмы
ӧвӧл бере? — кылӥсько куараос.
— Ӝожон эн кизе, ӵужъем
эн кизе, — нош юн-юн вера
патронташен мурт. — Токма
гинэ музъемдэс со басьтэ.
— Хо-хо-хо! — гырдалтэ
матысез калык. — Ну и вераз!
— Кӧттэ посыса серекъялод,
ява, таӵе визьмо калыкен!
— Адӟылэмды вань-а, кызьы
лэсьто крестьян кышноос
ӵужъемез, ӝожонэз!
Ӵашетэ съездэ люкаськем
калык, ма верамзэс но валаны
уг луы ни.
Соку ӝӧк дуре сэзь-сэзь
ӝутске Кириллов.
— Тӥ, — возьматэ со патронташен
муртъёс шоры, —
папирос кыскиськоды, ми
нош пушнерез. Тӥ, — нош кизэ
мыче, — няньмес таласькоды,
милям пиналъёсмы сютэмен
тӧрнало.
— Провокация! — черетске
Салтыков. — Эн оске, эшъёс!
— Уг-а яра? —гудыртэ шораз
Кириллов. — Сыӵе тӥляд
советской властьты...
— Пӧя со!.. Красногвардеецъёс
ӧй вал соос! — Салтыков
кеськыса вераны выре на.
Солэсь куаразэ вожомем
куараос сого, ассэ но бугыръяськись
калык пушкы ньырто.
Ӝӧк дорын ваньмыз: поп
пи Павол, Витвинов, Карнаухов,
Леухин, Ларивон Миквор,
Габи кузё кадьёс люкаськемын,
киосазы — пыӵалъёс.
Асьсэзыз красногвардеец шуыса
нимасьёс син улысь олокытчы
ышизы.
— Адӟиды-а, граждане,
кыӵе советской власть! Кулэ-а
со? — улӟем тылэз пуромытэ
Кириллов.
— Тырмоз!..
— Долой!..
— Иське, — шуэ Кириллов,
— приговор гожтыса сётомы.
Кылзӥське, протоколмес
лыдӟозы. Лыдӟы, Павел Николаич.
Поп пи пиысьтыз дась гожтэм
бумагазэ поттӥз но дугдылыса-дугдылыса
дыг-мог
лыдӟе.
— Гожтӥське табере протокол
улэ. Ваньды, — косэ Кириллов.
— Советской власть
асьмелы кулэ ӧвӧл шуомы.
Учке, мон котькинлэсь азьло
киме нюртӥсько.
Бӧрсьысь бӧрсе гожкизы
вуз карисьёс, кулакъёс, поп пи.
— Гожкемез татысь ульчае
потоз, гожкымтэез азбаре кылёз,
— команда сётэ Кириллов.
Пыӵалэн адямиос ӟезьы
дорын но, ӧс кусыпъёсын но
сыло ини.
Вормонтэмзэ Салтыков
табере валаз. Со коммунист
ук, кызьы гожкод на советской
власть пумитэ, ведь солы
советской власть дуно. Нош
ӧд ке гожкы, кутозы, вылды,
отӥяз... йырдэ быдтозы. Забор
валлин кошкыкуз калык пушкысь
Пиляй Ванькаез адӟиз.
Соиз Салтыковен пумиськемезлы
шумпотӥз.
— Тон кызьы, Павел Павлыч?
— Ватсконо.
— Мон по потон пась утчасько.
Доразы лыктэ Гӧзекшурысь
комбедлэн председателез
— Оддок.
— Кудлань, Павлович? —
каллен юа Оддок.
— Палэнэ.
— Бумагазы улэ гожкемлэсь
мозмытсконо вал, — вера
на Оддок.
Куиньназы ик оген-оген
гидъёс пала кариськизы.
Учко но, сеникысен соосты
чиньыеныз Итёк ӧте, тубыны
косэ.
Гидлэсь липетсэ сьӧрласянь
пась карыса, ньыль мурт бакчае
лэзькиз.
Нош правление азбарысь
калык кема улӥз на ӵашетыса.
— Та гожкеменыд кытчы
ке мыдлане сьӧлтаськод, —
кушетскыса верало ог-огзы лы.
— Мон грамотаез уг
тодӥськы бере, кызьы гожком.
— Шудо вылэм тон... Нош
ӝӧк доры вуид ке, нимдэ пусъёзы
ук.
Куд-огез грамотнойёсыз но
крестьянъёс, асьсэзыз неграмотноен
ялыса, бумага вылэ
гожкемлэсь пыкиськизы.
________
Чугдӥз 1 — быриз.
Уръяськомы 2 — тупаломы.
Эмыз 3 — азиныз.
Паньтэм 4 — адаш.
Ӵӧжмем 5 — тырмем, тыр.
Азьланьтонэз вуоно номерын.