cylchgrawn

Cadwyn_16pp_47.qxd 27/5/04 10:29 am Page 7
Cyflwyno Tlws Coffa Robina
Mewn seremoni urddasol a gynhaliwyd yn ystod
Eisteddfod Gadeiriol Crymych ar Fai 15fed.
cyflwynwyd Tlws Coffa er cof am Robina Elis
Gruffydd. Yn dilyn colli Robina yn Nhachwedd 2002,
agorwyd Cronfa Goffa yn ei henw gan Fenter Iaith Sir
Benfro, Cynllun Ogam a Cyd Bro’r Preseli. Crëwyd
y Tlws gan Wynmor Owen, Trefdraeth, ac eleni oedd
y tro cyntaf i’r Tlws gael ei gyflwyno
Nod y Tlws yw hyrwyddo a gwobrwyo cyfraniadau i’r
meysydd hynny yr oedd Robina’n ymddiddori
ynddynt ac yn poeni amdanynt, sef yr Iaith Gymraeg,
Dysgu Cymraeg, y Diwylliant Cymraeg, Lles yr
Amgylchedd, Byd Natur a Chadwraeth.
Dyfarnwyd mai Dilys Parry oedd yn fuddugol ac fe
gyflwynwyd y Tlws iddi gan Dyfed Elis Gruffydd.
Yn ogystal â derbyn y Tlws Coffa sydd i’w gadw am
flwyddyn, derbyniodd Dilys Parry fedal arian a wnaed
gan Gemwaith Rhiannon, Tregaron, i’w gadw’n
barhaol yn tystio iddi dderbyn yr anrhydedd hwn.
Mae Mrs. Dilys Parry wedi rhoi oes o wasanaeth i
ddysgu Cymraeg i blant ac oedolion yn ardal
Hwlffordd. Bu’n gefnogol i fudiadau Cymraeg
Hwlffordd a’r cylch megis y Cymrodorion, Merched y
Wawr, Cyd ac ati. Mae hefyd wedi bod yn cyfieithu i
gyrff fel Awdurdod Parc Cenedlaethol Arfordir Penfro
a’r Ymddiriedolaeth Genedlaethol, gan wneud hynny
yn raenus ac yn ddealladwy. Mae ganddi ddiddordeb
hefyd yn amrywiaeth cyfoethog byd natur Sir Benfro,
ac fel aelod o Gymdeithas Edward Llwyd arweiniodd
nifer o deithiau’r Gymdeithas honno.
Taith Gerdded Gyntaf Clwb
Cerdded Cyd, Caerdydd
Aeth Clwb Cerdded Cyd Caerdydd ar ei daith gyntaf ar nos
Lun, 10 Mai i’r Wenallt y tu allan i Gaerdydd. I’r rhai sy ddim
yn gyfarwydd â Chaerdydd, y Wenallt yw’r allt tua’r gogleddorllewin
os ydych chi ym Mharc Bute yng nghanol y ddinas,
yr allt sydd ar y gorwel gyda’r mastiau microdon.
Daeth chwech ohonon ni ar y daith i weld y clychau gleision
yn y coedwig, ac yn wir, roedd llawr y goedwig yn orchudd
glas ohonyn nhw.
Treulion ni tua awr a hanner yn crwydro yn y goedwig, yn
mwynhau’r blodau a’r coed – y fedwen, y dderwen, yr onnen
a llu o goed eraill. Er bod y tir o dan draed braidd yn llithrig
ar ôl yr holl law yr ydyn ni wedi ei gael yn ddiweddar, wnaeth
neb gwympo.
Roedd hi’n braf iawn dianc o’r ddinas brysur am ychydig i fod
mewn lle tawel, i glywed yr adar yn canu ac i anadlu’r aer pur
sydd heb ei lygru gan fwg ceir – fe allai rhywun fynd yn gaeth
i aer fel hwn!
Wedi gadael y goedwig, penderfynon ni fynd am ddiod mewn
tafarn gerllaw. Tafarn to gwellt ydy’r Traveller’s Rest, ac
mae’n hen iawn, gyda nenfydau isel, sy ddim yn arbennig o
ddiogel os ydych ch’n chwech troedfedd pump modfedd fel fi
– ow!
Diolch yn fawr iawn i Siân Ifan am drefnu’r daith i ni, ac am
iddi ein colli ni sawl tro tra oedden ni’n chwilio am lyn
bychan! Diolch i bawb am eu presenoldeb, diolch hefyd i
Caddy hithau am brynu creision i ni yn y dafarn ar ddiwedd y
daith!
Padi Phillips
Dyfed Elis-Gruffydd yn cyflwyno’r
tlws er cof am Robina i Dilys Parry
7