La Rèino Jano QXP - Université de Provence

Elo endourmirié
Lou boui d’uno tino
Que gargoutarié:
Acò ‘s la tereno
Que sort di toumbèu!
Acò ‘s l’alabreno,
Acò ‘s l’Aucibèu!
SCENO VII
Li Meme, LA RÈINO JANO.
JANO
Avié sèt an, Andriéu, e iéu nòu, quand moun rèire
Soungè de nous fiança l’un à l’autre. Fau crèire
Que lis astre, aquéu jour, ai! malurousamen
Destilèron la lagno e lou treboulamen.
Jamai un vanc bessoun, jamai uno lusido,
Coume n’an de-segur lis unioun reüssido,
Nous venguè revela lou soulèu de l’amour...
Diferènt de naturo e de biais e d’imour,
En que bon l’amaga? tóuti dous, au countràri,
Aguerian nosto court à despart. Temeràri,
De-longo entravessa ‘mé sis Oungrés, Andriéu,
De l’aurige eilavau que mountavo contro éu
Vesié pas, lou mesquin! la negrour menaçanto...
Mai iéu, en plen jouvènt, de me saupre puissanto
E bello, lou chalun de tóuti, en me risènt,
M’ensignavo que trop moun poudé trelusènt,
Iéu belèu, es verai, sensiblo à l’agradanço
Dóu plasé, di festin, di carroussèu, di danso,
Ai leissa, lou counfèsse, acrèire que poudiéu
Oublida ço que dève à l’ounour coume à Diéu.
Que voulès? M’ère dicho, en cargant la courouno,