La Rèino Jano QXP - Université de Provence

JAN GANTÈUME
Dis que Janeto emé soun bèl Andriéu
Van èstre dóu reiaume ensemblamen li priéu;
Que saran tóuti dous courouna; que la poumpo
De l’empèri, li dre, li crido à son de troumpo,
Li favour, lis ounour, tout sara mitadié;
E, bono precaucioun, que dins soun abadié
Rintrara, frai Roubert, e misè Felipino
Tournara dins Catano, encò de Prouserpino.
GALIAS DE MANTO
Felipino deforo e lou mounge au couvènt,
N’en responde: au palais la pas de Diéu revèn.
JAN GANTÈUME
Es ansin talamen qu’uno casso ufanouso,
Pèr celebra l’unioun qu’au-jour-d’uei se renouso,
Nous counvido en Averso.
GALIAS DE MANTO
Acord inespera
Que sara lou renos dóu parèu, e fara
Verdesco! Pas verai, Bertrand?
BERTRAND DI BAUS
Ha! la remaisso
Prounoustico, de-fes, la chavano e la raisso...
Iéu n’ai pòu… A la rouino oustau predestina!
Lou cèu, pamens, à Jano avié bèn tout douna:
Bello coume lou jour, asciençado, elouquènto,
De tóuti si seguènt e tóuti si seguènto
Adourado, avenènto au pople, proudigant
Li favour, jitant l’or, leissant meme soun gant
A l’urous cavalié qu’em’ elo fai la vòuto,
Espantant li dóutour pèr sa paraulo dòuto,
Briho, davans lis iue de l’univers candi,
Coume un astre d’amour sus la terro espandi.
Mai dins lou revoulun di justo magnifico