La Rèino Jano QXP - Université de Provence

Irresistible, fòu, amato lou tiran...
En bravejant dóu poung li blànqui salivado,
Zerces, éu, coumandè que fouitèsson la mar...
Anas lou coumpeli, lou revoulun amar
De touto uno nacioun en raço que s’eigrejo!
Coume fai, d’aquesto ouro, aquéu rèi que bóudrejo,
Ravajo, ensaunousis lou sòu napoulitan!
Aquéu sóuvage rèi que permeno, floutant
Sus mi vilo e mi terro, un orre drapèu negre!
Que, pèr venja la mort de soun fraire e coussegre
La counquisto de moun empèri, fai estras
De touto lèi e, lache, assassino Duras,
Un prince de moun sang e l’espous de ma sorre...
E quand, desemparado e soulo, quand demore
En fàci d’un ferouge enemi qu’a jura
De me perdre e peréu de me desounoura,
Se pièi, pèr abriga ma feblesso de femo
E teni moun espaso e regi ma triremo,
Se d’un nouvèu counsort iéu cerque lou soulas,
L’infamo calounnìo emé soun nivoulas
De verin, de tralans, d’alegacioun guespouso,
Ennegrira la rèino e ternira l’espouso!
Ah! nous rememourant de mounte sian nascu
E glouriousamen pourtant sus noste escut
Li pau de Catalougno e flourdalis de Franco,
Poudrian, dóu desden emé l’asseguranço,
Passa, la bouco mudo, au mitan di catiéu,
Car la rèino, après tout, dèu si comte qu’à Diéu!
Mai pèr amor de vous, rèi e nacioun crestiano
Qu’esperas atentiéu la responso de Jano,
Jano, coume un enfant, se vòu soumetre vuei
Au drai que dèu tria lou froument e lou juei.