La Rèino Jano QXP - Université de Provence

Me renouvello au cor l’amar de moun destin.
Aquéli qu’en tout tèms noun sabon que desplaire,
Aquéli que me soun descourtés, desoulaire,
Que sus moun scètre d’or coungreion lou rouvi,
Que m’abéuron d’óuprobre e me volon ravi
Ma digneta de rèino, aquéli, siéu tengudo,
Ami, de ié garda la fe qu’es counvengudo...
E li que me fan gau, qu’estùdion mi voulé,
Que de mouri pèr iéu soun ourgueious e le,
Aquéli, se cresian la cabalo esclavouno
Qu’à l’entour de ma vido espeluco e vounvouno,
Tè, li faudrié chabi!
LOU PRINCE DE TARANTO
Jano! rèn qu’un rebat
Que me porte bonur à travès lou coumbat,
Car fau que nous baten em’ éu, à touto pouncho,
Jano, un rebat d’amour, te prègue, li man jouncho,
Lèu-lèu, douno-me-lou!
JANO
Coume s’entendié pas.
Maridado à nòu an,
Em’ un prince feroun qu’èro encaro un enfant,
L’amour, aquéu tiran de la pleno jouvènco,
Jamai n’aguè de iéu sa libro redevènço.
O, lou trelus de vido aguènt pèr noum Amour,
Tóuti podon n’avé sa lindo reflamour;
La mendro di pastouro, i serre de Calabro,
Poudra dins lou sourgènt desasserma si labro,
E iéu, mesquino! iéu, la rèino dóu soulèu,
Se, pèr escavarta ma languino o belèu
Pèr avé lou semblant dóu bonur, se me plaise
Au resson di cansoun, se de-fes me palaise
Dins la joio e l’esclat d’un noble festenau,
Moun soulet risoulet devendra criminau!
LOU PRINCE DE TARANTO
O bello entre li bello! espandisse tis alo!
Ensouvèn-te que siés la rèino prouvençalo
E que, dins lou grand tèms dóu pople qu’es lou tiéu,