La Rèino Jano QXP - Université de Provence

Saluda pèr un crid de joio e d’afecioun.
La vido m’aparèis coume uno ravacioun
Tout-escas, lis ourrour de ma planeto, en visto...
Aro, dóu tèms que fuse entre lis oundo misto,
De moun pople afouga l’acuei, lis estrambord!
Aquéu tresanamen de gau, aquéu desbord
De foulié, de caresso, aquelo pouderouso
Brassado que me jito uno raco arderouso,
Aquel ur de se vèire amado coume res,
Vau-ti pas milo fes, un milioun de fes,
Lou bonur qu’entre dous, estrechan, s’empresouno?
Pople, vai, bèlo-me, béu-me dins ma persouno!
M’es de-bon d’èstre tiéuno e bon de t’agrada,
Car siéu ta rèino, e pos, amourous, me bada!
SCENO IX
LA RÈINO JANO, L’AMIRAU, LOU PAGE DRAGOUNET.
L’ AMIRAU
Rèino, lis Isclo d’Or, à vosto drecho, naisson.
DRAGOUNET
Lis Isclo d’Or?... Aqui, pèr vous, que noun me laisson,
Rèino, cueie un bouquet! Sènton lou roumanin
Qu’embaumon.
JANO
Te fan gau?
DRAGOUNET
Ah!