La Rèino Jano QXP - Université de Provence

Andriéu ié mostro lou drapèu, e
pièi sort d’uno porto emé li
segnour oungrés. La rèino sort de
l’autro emé li damo de la court.
SCENO II
LI PARTISANS DE JANO, LI COMTE DE TRIVÈNTO ET DE TERLITZ, ROUBERT
DE CABANO, JAN GANTÈUME, LA CATANESO, LOU PRINCE DE TARANTO.
LOU COMTE DE TRIVÈNTO
La destrau e lou plot! Se i’a degun que rible
Lis arpo dóu tiran, vaqui lou sort terrible
Que nous menaço tóuti emai belèu, ourrour!
Elo-memo la rèino!
LOU COMTE DE TERLITZ
Uno bèsti en furour
Es pas mai amalido e brutalo e crudèlo...
Noun, i’a plus qu’uno causo: à Naple, qu’es fidèlo
E que pèr Dono Jano escamparié soun sang,
Courre, deman matin, branda lou toco-san,
Contro lis óupressour crida lou paro-garo,
Esbrudi de pertout que nosto rèino caro
Es à mand de peri... Lou pople enferouna
Vai parti sus lou loup coume un desbadarna;
E Jano, à soun entour, empourtado en candèlo,
Veira lou pople entié dansa la tarantello.