La Rèino Jano QXP - Université de Provence

Pire que noun se vèi dins li court barbaresco,
Li tourné, la coumèdi e tout lou rebalun,
Eissorbon lou païs de soun cascarelun...
E de brut segrenous deja van pèr lou mounde;
E li pople, esmougu d’aquéu sagan inmounde,
S’entre-dison: Avau, vers li Napoulitan,
Semiràmis refai sis ourgìo d’antan.
JANO
O calounnìo atroço! O lacheta de l’ome!
LOU PRINCE DE TARANTO
D’abord que tóuti dous, cousin, sian gentilome,
E que la rèino es femo, e que l’escarnissès,
Iéu vous jite lou gant!
ANDRIÉU
Lou gant? Se me cresès,
Cousin, acampas-lou, car vous sara necite,
Quand faudra coumparèisse aqui vounte vous cite,
Au rouge tribunau dóu bourrèu.
LOU PRINCE DE TARANTO
Pèr un rèi
Se pòu que lou bourrèu fugue la majo lèi.
Mai pèr un qu’a l’ounour dins lou piés e dins l’amo,
Uno escorno, cousin, se purgo emé la lamo!
ANDRIÉU
A revèire, Taranto, e bèn lèu... Entremen
Que se vai alesti noste courounamen,
E que li cant d’amour emé li mandoulino
Van esvarta lou fum d’aquelo treboulino,
E que vai se remetre à soun tèisse courous
La casto Penelopo, anen-nous-en, mi prous!
Anen faire counèisse au pople quau gouverno...
E, dis aigo de Brinde is aigo de Salerno,
Que tóuti mi drapèu, bacela dóu mistrau,
Porton pèr armarié lou plot e la destrau!