La Rèino Jano QXP - Université de Provence

Que pèr doumestica lou trigos qu’envirouno
Un trone femenin, lou meiour talisman
Es la gràci que Diéu nous a messo entre man...
E poulit me semblavo, e digne d’uno rèino,
De foundre em’ un regard la frejour de la brèino,
De faire em’ un sourrire enfloura l’amelié,
D’estaca ‘m’ un riban lou cor d’un chivalié,
D’èstre gènto pèr tóuti, avenènto, abelano,
E de mena moun pople em’ un filet de lano!
O, tout lou pensamen de ma folo primour
Ero aquest: èstre amado e regna pèr l’amour...
Quau m’aurié di que pièi, au jour dóu grand tempèri,
Tout acò me sarié reproche e vitupèfi!
E que m’acusarien, à l’age de vint an,
D’ èstre l’empegneiris d’un crime espaventant!
Plouro.
SCENO VIII
PLAGNUN
LOU PAGE
Se ma rèino plouro,
Iéu vole ploura.
Veici la malo ouro,
Sian despoudera.
Emé vous, mestresso,
Iéu m’ère abari,
E, se me sias presso,
Autant vau mouri
LOU POPLE
Aviéu uno maire,
Aviéu un soulèu.