La Rèino Jano QXP - Université de Provence

FRAI ROUBERT
Au mounde i’a ’n poudé qu’es encaro plus grand,
Segnour! un poutentat que noun a ges d’armado
E que d’un pople à l’autre estènd sa renoumado,
Que ligo o que desligo à soun grat, que mantèn,
Fai o desfai li trone en mèstre ounnipoutènt,
Es lou papo! Segnour, prenès-lou pèr aubitre;
De rèi, à voste tour, demandas-ié lou titre;
E quand lou Paire Sant aura sus voste front
Mes la sacrado ouncioun, poudèn brava lou tron.
ANDRIÉU
Bon à dire! mai elo, aquelo Cleoupatro
Superbo, que moun cor, mau-grat tout, idoulatro,
Quand iéu l’aurai macado e dountado que mai,
Pourra-ti, frai Roubert, me perdouna? Jamai!...
E se noun ai en plen lou mèu de si caresso,
L’empèri universau m’es un gourg d’amaresso!
Ah! tambèn, i’a de fes qu’à soun còu me trariéu
En senglutant, e d’autro ount l’escoutelariéu!
FRAI ROUBERT
Diéu garde nosto nau dóu brand de la baleno
E nous preserve, Andriéu, dóu cant de la Sereno!
De regna sus lis ome un que mord l’ambicioun,
Proumié, souto si pèd dèu cauca li passioun.
Se Vosto Majesta, prince, uno fes recoubro
Soun scètre, aura lou scètre e lou restant de-soubro!
Uno fes lou timoun aganta coume fau,
Sus vòsti dre de rèi uno fes à chivau,
Elo-memo, estounado, esbalauvido, urouso
De se sèntre sarra d’uno man pouderouso,
La rèino à voste amour vai tourna sus-lou-cop,
Car l’èurre amo lou chaine e desdegno l’isop.
ANDRIÉU
Zóu dounc! e crèbo enfin, jalousié devouranto!
Famous cousin Duras! bèu prince de Taranto!
Napoulitan feloun, arrougant Prouvençau,
A deman! e veguen quau es mèstre o vassau!