La Rèino Jano QXP - Université de Provence

Boumbissès à l’entour, dóufin! Dins sa careno
La galèro reialo emporto la Sereno.
Largas velo, marin! A la barro, pilot!
E vous-àutri, vougaire, espalié, galiot,
Vougas seme!
JANO
La mar es uno encantarello.
Despièi qu’ai mes lou pèd sus l’oundo riserello,
Iéu me sènte envahi d’un soulas delicious.
Tout fugis: lou ribas, li resson malicious
De la terro, li lagno e li dòu de la vido...
Davans lou gourg seren me chale esbalauvido.
La velo s’emblanquis dins l’encrour dóu cèu blu.
Danson, li marejòu, en giscle de belu
Diamantin.Li remaire, à mita nus, boulegon
Li balans de soun cors à l’antico: se plegon,
Se drèisson tóuti ensèn, e murmuron en Cor
Lou soulòmi plagnènt que ié douno l’acord...
Brave, mi galiot! Sa vigourouso empencho
Recavo, eila-darrié, lou flot que nous encencho
En longo tirassiero, image fugidis
Di joio d’eiçavau que l’erso aproufoundis.
Entre-mitan li les di róugi pavesado,
Di pavesado d’or, iéu penèque, bressado.
Voudriéu dins lou clarun me foundre, se poudiéu!
Un vaigue sentimen de l’infini de Diéu
Me pivello... La mar es bello, es amourouso,
Es lindo dins sa glòri, es uno rèino urouso!
Lou founs dóu tiatre chanjo,
la vasto mar parèis.