La Rèino Jano QXP - Université de Provence

JANO
De varlet abron li lume.
Au page.
Mignot, te menarai emé iéu en Prouvènço...
Iéu beve à l’esperanço e beve à la jouvènço!
E tu, moun troubadou, vendras deman matin
Querre pèr toun guierdoun ma raubo de festin.
AUFAN DE SISTEROUN
Un mantèu n’en farai, o rèino! E mis espalo
Quand se van espoumpi dins la sedo pourpalo,
La capo dóu soulèu iéu pourtarai dessus.
ANDRIÉU
Que noun siegue pèr tu la capo de Nessus!
JANO
Oh! leissas-me pensa que vuei tout s’apasimo,
E que vuei lou malan pèr toujour s’abasimo!
Oh! leissas-me pensa que, foro dóu neblun,
Lou Tabor à la fin mostro soun camelun!
Vèire lou mounde en pas, li terro labourado;
La fedo e l’agneloun tranquile dins la prado;
L’óulivié palinèu acatant lis enclin
De sa broundo, la mar, que bluiejo eilalin,
Cuberto de tartano e de velo e de gumo;
Li vilo gaubejant libramen si coustumo;
Li pople, enfestouli pèr un acord leiau,
Dansant la roumanesco au pèd dóu trounc reiau:
Que pantai de bonur à te rèndre jalouso,
Rèino Berto, qu’aviés pèr scètre uno fielouso!
LOU PRINCE DE DURAS
Tout acò, lou veiren, Jano! car vòstis iue
Soun fa pèr esvali la tenebrouso niue:
S’aubourant em’ estrambord.