La Rèino Jano QXP - Université de Provence

D’aquéu qu’a dous cènts an.
JANO
Aduse quàuqui fiolo...
Se revirant.
Mai dormon nòsti violo?...
Iéu, me fau de musico! Es la voues qu’en douçour
Penetranto, en souspir, en chalun, en founsour,
Dis amourousamen ço que noun se pòu dire,
Parai?
S’entènd musiqueja. Li page
aduson de garbelin de roso.
Vèngue de roso! Es la flour que desire.
GALIAS DE MANTO
Jano jito li roso sus la taulo.
N’en toumbo uno dins la coupo
de Galias de Manto.
S’aubourant.
Mèisse lou vin reiau, boutihié! Vau pourta,
Dins la coupo d’argènt, un brinde à la bèuta,
Un brinde à la bèuta souleianto e fegoundo,
Meravihouso flour que n’a ges de segoundo!
La bèuta, resplendour qu’embriago l’eros,
Pèr elo, embarluga, se trasènt vers lou cros!
La divino bèuta, qu’enfreno li plus ruste
E qu’aplanto, enebi, li front li mai aguste!
ANDRIÉU
Béulaigo Mantouan, fasèire d’estampèu,
Veguen dounc en bevènt quau nous fara rampèu!
A nosto poutesta sus li terro italiano!
Au revenge prouchan di Vèspro Siciliano!
Au papo Clemènt Sièis, qu’a mes ounte voulèn
La courouno de Naple e de Jerusalèn!