Brochure à télécharger - Répertoire des pièces de théâtre et ...

Louis : Comint stitche t-on l'èwîye ? Hop, d'in seûl côp ! Et bén… pou Anne-Marie,
Hop ! D'in seûl côp !… Come on stitche !
Mme Sivèle : A ça près, c'n'est nén ène fesse qu'on pike mins pus râde in keûr ! Et c'est
bran.mint pus délicat !
Louis : Djustumint, pus c'est délicat, pus râde il faut fér l'bèzogne… Et pou Sophie,
vos savez c'qu'il a fét ?
Mme Sivèle : Il a rompu pa téléfone ?
Louis : Pî qu'ça ! Il a scrît deûs mots su in papî et il a stî li pôrter !
Mme Sivèle : Ele a tél'mint l'èr cazuwèl lèye, qu'il ara p'tète yeû peû…
Louis : Mins c'est djustumint ça l'courâdge, c'est di n'nén awè peû d'fér d'èl pwène a
'ne saqui d'cazuwèl… Di toute façon, c'qu'il li a scrit ou rén… "Dji m'èva pou
saquants timps, quand dji s'ré r'vènu… Putète…" Vos p'lez yèsse seûr qui
Sophie va racouru droci pou z'awè des détay's ! Et i va s'èrtrouver dins
l'min.me pétrin ! (il regarde l'heure) Deûs-eûres quârt et Anne-Marie n'est nén
cô là… Mins qwè c'qu'èle fét ?
Mme Sivèle : Vos èstez bén pressé d'èl vîre ariver… Dji n'sés nén, mins vos m'avez l'èr ène
miyète sadique su les bords vous ! Dji m'rafîye tout l'min.me di vire comint c'qui
vos-alez tirer vos plan !
Louis : Come su des roulètes ! Lèyez l'ûche d'èl cujène au laûdje, vos-ètindrez !
Mme Sivèle : Dji n'voureus nén passer pou ène curieûze !
Louis : Vos 'nnè savez ostant qu'lèye !
Mme Sivèle : C'est st-a souwéti qu'Anne-Marie n'prinde nén l'afêre come Christine…
Pac'qui…
Louis : Come Christine ??
Mme Sivèle : Qu'èle ni vèn.ne nén, lèye ètout, djouwer du rivolvèr… Adon pour vous…
Louis : Qwè pour mi ?
Mme Sivèle : Dins des momints parèy's… On satche cô bén su n'importè qui pou passer
s'colère !
Louis : Vos pinsez qu'èle a l'min.me caractère qui Christine ?
Mme Sivèle : Vos savez… L'soufrance vos f'reut toûrner ène bièsse a bon dieû en wèsse di
tch'fau !
52