Lou Bessihoun - Université de Provence

Pèr Mas-Felip Delavouët
Tres jouvènt se soun rescountra (1)
Pèr la glòri d’un jour d’ivèr,
Vengu d’eici, vengu d’eila,
Vengu de liuen ‘mé lou vènt fèr.
L’un escoutavo dins soun amo
La cantadisso di bóumian
Que lou secuto, sèns calamo
Emé lou vira de soun sang.
Lou segound jouvènt avié, d’ouro,
Treva li colo e li relarg
Dóu grand cèu nus que se desflouro
E se blesis au vènt testard.
E lou tresen sabe pancaro
Quinte secrèt tenié ‘scoundu,
Mai l’on vesié ferni sa caro
Quouro i dous autre a respoundu.
Tres jouvènt an crousa si vido
Un matin d’ivèr e de gèu,
E si tres jouvènço avanido
Que passaran mai o mens lèu.
Passaran car lou tèms degruno
Sus lis espèr e sus li flour,
Passaran, e li vièii luno
S’esvaniran jour après jour.
Mai se soun ande nous emporto
Voudriéu sauva, pèr moun coungoust,
Avans de m’esmarra pèr orto,
Un pau de lus d’aquéu jour blous,
Un pau de lus dins mi man grèvo
Pèr enlusi l’escur ermas
Ounte aniue vanegon li trèvo
De mi vièi pantai jamai las.
15 de janvié 1945
Jan-Calendau Vianés
(Aquéli tres jouvènt èron M.F. Delavouët, Carle Galtier e J.-C. Vianès)