Lou Bessihoun - Université de Provence

Lou tèms passè. Passè meme trop. Elo, tournè au pèd de la crous e aubourè mai lis
iue vers la tourre.
- “Tè, se diguè, li rèsto di muraio sèmblo que soun plus tant aut coume adès…
Curious…”
Regard sa mostro. Sarié tèms qu’arribèsse, quand meme, l’Andreloun.
A-n-aquéu moumen, se ramentè d’un libre dins sa pòchi, lou coumencè de legi. Lou
soulèu mountavo que mai. Ausiguè d’esquerlo e bèn lèu un troupèu passè. De fedo emé
quàuqui cabro foulasso. Un ome jouine li menavo vers d’àutri terro. De vèspre
tournarien davala vers la jasso…
En passant proche, la chato ié faguè signe de la man, sènso muta. Tout d’uno un brut
amount… de roco que barrulon, un chafaret dóu diable. Se regardèron, regardèron la
tourre, un pau de tubado, o bèn de póusso? Curious… Ié faguè mai signe de la man. Elo,
ié respoundeguè d’un riset, regardè pièi sa mostro.
- “E d’aquel Andreloun qu’arribo toujour pas.”
Lou soulèu picavo. Un pau plus liuen avisè d’erbo mouflo, à l’oumbreto. I’anè,
s’alounguè, barrè lis iue, reveguè la tourre, soun calignaire, lou pastre, lou libre, e mai
soun calignaire.
- “Oh, lou libre, que l’ai leissa au pèd de la crous.”
L’anè querre. L’aureto avié vira fuiet. Lou libre se devinavo dubert à la pajo 666. Ero
la fin d’un chapitre. Legiguè:
“- Em’acò s’ausira un chafaret dóu diable, un pastre passara emé soun avé, e de
mounde i’aura plus.
Ansin disié lou vièi Tibetan.”
Lou chafaret, lou pastre, la fin dóu mounde, tout acò viravo dins sa tèsto. Curious…
A-n-aquéu moumen, avisè Andriéu, soun Andreloun que davalavo.
- “Hòu, hòu!… Moun Andreloun, coume siéu countento qu’arribes. Coumençave de
me prene pòu. Figuro-te que…”
A flour e mesuro que parlavo, l’Andriéu risié, risié… mai risié!
Alor, coumprenguè tout.
- “Oh, noun! es pas verai, digo… es pas verai, siés pas… Pas tu…”
Eu dins qu’un cacalas s’esvaliguè.
- “Oh, noun! moun Andreloun… Alor, lou vièi Tibetan avié resoun?…”
L’endeman la retroubèron au pèd de la crous. “Mort naturalo” diguè lou legisto.
Pamens, lou jour de l’enterramen, noutèron qu’Andriéu, lou calignaire, èro pas vengu…
*
Peireto Berengier