Lou Bessihoun - Université de Provence

Pleno luno
Un brave camelié restavo emé sa mouié dins lou desert maroucan. Tóuti dos vivien
pauramen dins un tibanèu de pèu, emé un tian, un fiò de pèiro, uno cuberto de pèu de
camèu. Lou brave ome pantaiavo d’ana à la vilo, noun pèr despensa li sòu: avié ges de
sòu, mai pèr vèire la vilo. N’en charravo tant e tant, de la vilo, à sa mouié... Mai elo,
voulié pas lou leissa parti soulet. Subre-tout, voulié pas resta souleto emé lou troupèu de
camèu...
Chasque sèr, ié parlavo de la vilo, di meraviho à descurbi, di carriero clafido
d’oustau, d’ome... Ero devengu un vertadié desvàri, e fin finalo, sa mouié, pèr ié faire
plesi, acetè de lou leissa s’enana, mai en escàmbi, ié demandè de ié radurre un presènt:
- M’agradarié tant que me pourgiguèsses un diadèmo d’argènt.
Au Marò, li diadèmo d’argènt soun de causo banalo, e lou camelié faguè la
proumesso.
- Se jamai óublides moun presènt, te bastara de regarda la luno, e te n’en ramentaras.
Sourtiguèron dóu tibanèu e regardèron lou cèu: la luno èro à soun proumié quartié:
semblavo un diadèmo d’argènt.
- Veses, pensaras que me fai lingueto un diadèmo d’argènt.
Lou brave ome partiguè à la vilo sus soun plus bèu camèu e ié restè quàuqui jour
meravihous à regarda li boutigo, à bada lis oustau, à chaspa li bèsti au marcat, à bèure la
birro emé d’àutri camelié en se racountant d’istòri de camèu... Pamens, lou sèr dóu
depart, óublidè pas lou presènt de sa mouié. Intrè dins uno boutigolo, mai avié óublida
ço que sa femo voulié. Se ramentè simplamen que ié diguè que s’óublidèsse lou presènt,
sufirié de regarda la luno. Sourtiguè de la boutigo pèr regarda lou cèu: la luno èro pleno:
semblavo un mirau.
- Es simple, ié diguè lou menudié, voste mouié vous demandè de ié radurre un mirau.
E lou camelié croumpè un mirau.
De retour au desert, souto lou tibanèu, pourgiguè lou presènt à sa mouié. Ero uno
pauro femo simplo, qu’avié jamai vist un mirau. Se regardè, se pausè au founs dóu
tibanèu e plourè.
Sa maire, la vesènt ploura, ié demandè la resoun de si lagremo.
- Moun ome es parti à la vilo. Ié demandère de me croumpa un diadèmo d’argènt e
tournè emé uno autro femo.
E plourè...
La maire, touto esmougudo, prenguè lou mirau e se regardè. Ero pamens uno pauro
femo simplo, qu’avié jamai vist un mirau:
- As resoun, ma fiho, a ramena uno autro femo, mai te fagues pas de marrit sang, es
uno femo vièio e laido...
Tricìo Dupuy