Lou Bessihoun - Université de Provence

La luno e l’enfantoun
Lou pichounet, sa man dins aquelo de soun grand, badavo la luno, que mountavo
plan-plan, de darrié lei baus. Uno bello luno pleno, uno lunasso d’estiéu, maduro coume
un gros càqui.
Tout d’un tèms, lou pichounet faguè:
- Digo, Papet, tu qu’as lou poudé d’aganta touto meno de bèsti, de la plus pichoto à
la plus grosso, mi poudriés aganta la luno? En mai, sabes l’us pèr ana dins lou baus,
parai?
- E de que n’en voudriés-ti faire, d’aquel astre?
- Voudriéu la pendoula dins ma chambro, au caire de la gabiolo ounte li a lou grihet
que m’agantères e que mi chali de sa cansoun quouro fau la sièsto.
- Pèr aganta la luno, moun bèu pitouet, li a un biais, si fa pas coum’acò.
- Mai, digo, Papet, ai lou tèms, mai mi l’agantaras, parai?
- Deman, assajaren, mai pèr l’ouro, vai ti coucha que si fa tard.
Avans de plega lei parpelo, lou pichot diguè:
- Papet, saras proun gai pèr l’aganta, perqué mounto foueço vite, sas?
- Sarai proun gai, vai, ti l’agantarai.
L’endeman, lou grand emplissè d’aigo lou buvadou dei galino e lou metè à pourtado
dóu pichounet. Lou vèspre tiravo sei radierei cartoucho, e lou pichounet esperavo en
virant coume uno bauduflo.
- Vène, moun bèu, diguè lou grand, es quàsi l’ouro. Ti vau fa vèire la lèco qu’ai
carculado pèr pessuga la luno, e saren just proun de dous.
L’enfantoun seguissè soun grand e veguè ço que lou vièi avié adouba.
- Mai, Papet, es d’aigo! Voli pas que la luno si neguèsse!
- Mai moun bèu, si negara pas, la luno. Es uno fremo, e l’agrado de si miraia. Vaqui,
dóu tèms que li sounjara plus, li mandaren un bourras dessus. Es bèn pensa que?
- Papet, la viéu pouncheja darrié lou baus!
La pleno luno atacavo de mounta d’aise, d’aise.
-Viro-li lou cuou. La fau pas regarda, que noun vendrié.
D’aquéu tèms, lou vièi avié douna un’auriho dóu bourras au pitouet.
- Tèn bèn lou cantoun e quouro sara au bèu mitan, l’ataparen d’un soulet cop. As
coumpres?
Lou pichounet bouleguè la tèsto en signe de o, puei à souto-voues:
- Papet, Papet, regardo, la viéu dins lou buvadou.
- Espèro enca un pau, que siegue dins lou mitan.
Lou pichounet s’agroumelissè tant que pousquè pèr noun si faire vèire de l’astre tant
counvida. Sarravo dins sa maneto soun cantoun de bourras à li faire sourti lou jus.
- Siés lèst, diguè lou grand? Zóu, l’anan.
E touei dous atapèron d’un mume vanc lou buvadou.
- Vène lèu à l’oustau, aro e ti revirés pas.
En intrant dins l’oustau, l’enfantoun faguè peta sa joio.